الأدباتى

[حمدى شبانة]

دى مشاركة استثنائية
للأدباتى منى هدية
قبلة سلام ويا تحية
لكل اللى معانا فى السهرة
الله الله يا بدوى جاب اليسرا

دا عيد ميلاد غالى لأنه
لحمدى اخويا عاشق فنه
اكتوبر خمستاشر منه
شهر العظماء ياللى ما تدرا
الله الله يا بدوى جاب اليسرا

ياحبيبى كل سنة وانت
طيب كدا زى ما انت
الذوق مع الواجب انت
مخلص وبتصون العشرة
الله الله يا بدوى جاب اليسرا

عقبال يارب سنين ميه
تقضيها فى عيشة هنية
بنفس جميلة ومرضية
دايما تروق لك العكرة
الله الله يا بدوى جاب اليسرا

وتعيش لما تشوف محمود
وفاطمة لما يبقوا جدود
ودايما مع أم محمود
ما تشوفوا غير أيام سارة
الله الله يا بدوى جاب اليسرا
( هانى الجمل )
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــ
دكتور هانى الجمل مع الست
ــــــــــــــــــــــــــــــــــــــ

كل التحية يا دكتور
بمشاركتك دى أنا مسرور
بُكرة حييجى عليك الدور
وف عيد ميلادك راح تقرا
الله الله يابدوى جاب اليسرا

صاحبى وبتمنى رؤياك
دايماً أقول ( أغداً ألقاك )
أبداً أنا عُمرى ما ( أنساك )
ونفسى نتقابل مرَّة
الله الله يابدوى جاب اليسرا

( القلب يعشق كل جميل )
وإنتا طبعك حلو جميل
( حيَّرت قلبى ) صبح وليل
إنتا الأصيل يابن الأُمرا
الله الله يابدوى جاب اليسرا

بيتى ( بعيد عنك ) لاكن
من إمتى بَعَدِتنا أماكن ؟
( ليلى ونهارى ) هواك ساكن
ف عقلى مهما إيه يجرا
الله الله يابدوى جاب اليسرا
ـــــــــــــــــــــــــــــــــــــ

كل الشكر والتحية للصديق الغالى
دكتور هانى الجمل لأنه تذكر يوم ميلادى
وقدم مشاركة جميلة على طريقة الأدباتى