طلبات نوتة أ / عادل صموئيل الجزء الثانى

[muhamadibra]

ميشيل المصري - موسيقي عبقري - اكثر اعماله تتميز بالرقة والعذوبة - وتتر مسلسل من الذي لا يحب فاطمة واحد من هذه الاعمال - ومثال علي مزج الاحساس والاصالة - ياريت يامايسترو يسمح وقتك لتدوينها وتعليقك عليها - مع جزيل الشكر
د محمد ابراهيم

[عادل صموئيل]

احبائى
احد الاخوة الاعزاء سألأنى عن الحلية والعُربة واسمحوا لى اقدم لكم شرح بسيط جدا عملته على عجل ان شاء الله يكفى ومرفق امثلة بسيطة
اولا الحلية هى عبارة عن حرف زمنه صغير جدا بيلصق فى احد النغمات فى الموسيقى الغربية بيبقى محدد لكن فى الموسيقى الشرقية بيترك لذوق العازف او المطرب وانا بخبرتى لما بتكون اساسية فى الجملة الموسيقسية لازم اكتبها ولما تكون مش اساسية مش بكتبها وشرط الحلية ان يكون العازف او المطرب متمكن لأنها بتسرق من الزمن ... بمعنى ان مثلا زى ما انا عامل مازورة فيها 4 نوارات لو عملنا حلية على اى حرف الميزان ماشى ومحسوب طبعا لكن زمن الحلية الصغير جدا واللى بتتخطف دى بيتسرق من زمن النغمة لو العازف او المطرب مش قدير ممكن تطول منه شعرة وهنا الزمن بيتكسر .. وانا لو كتبت اى جملة وعزفها كذا عازف خطير حتلاقى كل واحد منهم بيحط فيها حليات حسب ذوقه بس المهم ان الافراط فيها زى الافراط فى عدد ملاعق السكر فى كوب الشاى

اما العربة دى بيعملها المطرب او العازف المتمكن وانا عامل ابسط مثال لها واهميتها انها بتظهر براعة العازف او المطرب لكنها سلاح ذو حدين يعنى هنا فى المثال اللى انا عامله النغمة فا العُربة ثلاث حروف صغيرين ونغمة الفا اتسمت حرفين يعنى صار كام نغمة من نغمة واحدة وكلهم فى زمن النوار وهنا لو العازف او املطرب مش قدير ممكن يقع فى الواحدة ...او حتى لو طالت منه ممكن يسرق من زمن النغمة اللى بعدها بس الشرط ان على اول المازورة الللى تليها ينزل على الدوم بسلاسة خطورة العرب انها سلاح ذو حدين يعنى ام كلثوم مثلا كانت تعمل عُربة فى الكوبليه لكن اصالة مثلا تعمل عشرين عُربة فى الجملة وده عيب خطير جدا او بتبقى زى ماتضع خمسين ملعقة سكر فى الشاى وثانيا بتخليها تقع فى الوحدة .. وكتر العُرب انا بعتبرة استعراض شطارة غبى ... يعنى مثلا لو كان اللحن بتاع عبد الوهاب اصلا ممكن يتعمل فى الجملة عشر عُرب كان عبد الوهاب عملهم لكن طالما ماعملهمش يبقى اللحن حلو وآخر انضباط كده لأن بالطبع لا اصالة ولا غيرها اشطر من عبد الوهاب ... والملحوظ الخطير ان كل من بيغنى دلوقتى وفاهم نفسه شاطر فاهم ان عبقرية الغناء كتر العُرب مع انها العكس .. يعنى كان زمان مطربة اسمها منيرة المهدية كانت سلطانة الطرب لكن كانت بتعمل ف الجملة الواحدة عشر عُرب .. كان انت ممكن تسمعها لكن ماتعرفش تقلدها .. لما جت ام كلثوم وابتدت تغنى الغناء السلس مسحت منيرة المهدية
مع اطيب تحياتى

[سليم العباس]

شرح مفيد و مختصر و مثال كاف فيما يتعلق بالعرب الموسيقية .
و أهم ما ذكرته حضرتك أن الإكثار من العرب لا يعني أن الفنان متمكن بل أنه قد يسيء إلى اللحن الأساسي و بالذات ألحان العباقرة ...
و تأكيداً لكلامك أستاذ عادل هذان مرفقان صوتيان للفنانة أصالة نصري الأول مليء بالعرب و هو من أغنية يا صابرة يانا و المرفق الثاني من أغنية يا خالي و التي لا تحوي إلا عرب قليلة جدا .

سؤال :
هل صحيح أن بعض الأصوات تمتلك عرب طبيعية ؟ أما أن العرب هي دائما مقصودة ؟

و شكراً لك
اخى العزيز
مفيش حاجة اسمها عرب طبيعية فى الصوت .. العرب عبارة عن تجويد بيخلقه العازف او المطرب بس كل ما يكون كلامهما متمكن بتطلع احلى واهم شىء تبقى فى مكانها وماتكسرش الزمن عندك ام كلثوم مثلا لو قفلت كوبليه بعربة الناس تقول الله لن العربة فى مكانها ومش مبالغ فى استعمالها وحاجة مهمة ان اللحن زمان كان كافى جدا مش محتاج العرب لتجويده إلا فى درجات قليلة يعنى ممكن عرربة واحدة او تنين فى لحن لأم كلثوم ..
مع اطيب تحياتى عادل صموئيل

[feras fathi]

شكرا جزيلا استاذنا الفاضل عادل صموئيل
لم افهم جيدا ما معني العرب بالضبط بالرغم اني اسمع الكلمه كثيرا

هل اغنيه قلبي دليل في المقدمه الموسيقيقه في البادايه استخدام اربع علامات تبعد عن بعض نص بعد وهي خارج المقام الاصلي هي التي تسمى عرب ؟؟؟ صحيح ؟؟
اخى العزيز سؤالك مهم جدا واسمح لى اشرحو لأن اختلاط المصطلحات مشكلة
لما يكون اربع علامات ورا بعض بينهم نص تون هذا يسمى كروماتيك يعنى لما اعمل مثلا دو دو دييز رى رى دييز ... طبعا من اى مكان سواء صاعد او هابط وممكن يكون عدد اكبر من النغمات متتالية بهذه الطريقة
اما العُربة بتبقى حلية بس كبيرة شوية يعنى انا لما اقول مى دى اسمها نغمة سادة لكن العربة اعملها فا مى رمى مى نخطف الثلاث نغمات الاولى فى وقت سريع جد ونركز على المى .. هى فى الموسيقى الشرقية مالهاش نظريات .. هى انت بتتعلمها لما تسمع كتير اوى وتكون متمكن من السماعى بحيث لما تسمع العربة تفهم جت ازاى ومن حصيلة سماعك ممكن انت تعملها فى نغمة مع الالتزام طبعا بالمحظورات اولا انا ماتتكررش كتير وثانيا انك تكون متمكن بحيث ماتكسرش الزمن فى المشاركة اللى فوق هنا مباشرة الاخ العزيز منذر مقدم نماذج فيها عرب اسمعها وحسها بنفسك
اما اغنية قلبى دليلى دى المفروض ممنوع فيها العرب اساسا لسبب انها موزعة يعنى انت لما تسمعها شوف كام عازف وفيها اد ايه شغل وهنا الالتزام لازم يكون بالنوتة 100 % لسبب انت لو قصرت او طولت ومعاك ناس كتير بتعمل حاجات مختلفة ممكن يحصل نشاز بمعنى افرض النغمة مى مثلا لو انت عملت عربة فيها رى او فا حاتعمل نشاز مع زملائك بالذات فى التوزيع لكن لما يكون اللحن ميلودى زى اغانى ام كلثوم او عبد الوهاب او فريد الفرقة بتكون فى الغناء بتتابع المطرب وبتقول خفيف اثناء الغناء مع المطرب ومن هنا العربة مش بتتعارض مع الفرقة
مع اطيب تحياتى عادل صموئيل