احبائى
اقدم لكم رائعة من روائع الموسيقار الكبير رياض السنباطى
امشى اليك
الاغنية دى الاخ العزيزعود الاندلس طلبها ولاحظت انو طلبها كذا مرة ونزل رابط يوتيوب وانا شخصيا ماكنتش اعرفها من قبل واول ما لقيتها هو مسجلها بالعود فقط يعنى خفت منها .. لأن الاغنية لما بتكون متسجلة بفرقة مش بيبقى فيها مشاكل موسيقية لكن مع العود من واقع خبرتى طبعا .. مش معقول الملحن يلحن الاغنية ويسجلها ع العود وينزلها السوق او يبيعها لشركة لأن هنا اللحن بيكون انتهى تلحينا لكن لسه فيه مرحلة الاخراج وعادة الشرائط المسجلة ع العود دى بيبقى الملحن خلص تلحين الكلمات لكن لسه اللزمات الموسيقية ما اكتملتش اوى وبيكملها اثناء البروفات والشريط دهب يبقى يديه للمطربة تحفظ منو وهى مالهاش دعوة اوى باللزمات الموسيقية لكن تاخد بالها من تسليمة الغناء اللى بتدخل منها .. بعد كده فى البروفات اللزمات بتتبلور وممكن تتصلح وممكن تتغير بحالها .. وده يدل ان اللحن ده متسرب من عند السنباطى وانا حسيت انو ممكن يكون هو اللحن اللى كان عامله لفيروز وحصل عليه مشاكل .. المشكلة الخطيرة انو وهو بيعزف ع العود ممكن يسخن ويتسلطن وممكن يسرع او يبطىء وهنا ممكن يكسر الواحدة وفيه فعلا كذا مازورة مكسورة اضطريت اعمل لها تدخل جراحة يعنى اضيف لها كروش بس الخطورة ( وانا زمان كنت يشتغل والسنباطى قاعد قدامى يعنى المازورة 4 اضلاع انا احط السكتة دى فين فى اى ضلع ممكن يكون احساسى انا غير اللى هو عايزه .. المهم حسيت انى انا الوحيد فى العالم اللى ممكن يكتب اللحن ده اولا بخبرتى مع السنباطى وان حتى لو كان لسه حد من زملائى المدونين الكبار لسه موجود مكانش حايكتبه الا لو مطرب معين كلفه بتدوينه وكان طبعا شوف لحن زى ده تدون بكام .. كمان ماحدش مدون متوسط يقدم على عملية انتحارية فى تدوين لحن زى ده .. ولو تلاحظوا وان دى مش طريقتى كنت بكتب اول كلمتين فى الغنا على المقاطع عشان ما اتوهش فى اللحن لأن اللحن مش كوبليهات ولكن بطريقة رباعيات الخيام يعنى البيت شطرتين .. وبالطبع لما بيكون متسجل على فرقة بيبقى اول الكوبليه واضح لكن لما يكون اللحن كله بالعود الواحد بيتوه فيه وكذا مرة تهت لما بتعب واقفل وارجع بعد شوية كنت بسمع اللحن تانى من الاول عشان اول للجزء اللى وصلت لو ف التدوين المهم اللحن ده اخد منى عشر ايام مجهود متواصل واظن انتم حسيتم انى كنت تقريبا مختفى .. بس اتمنى ان يستفيد منه اكبر عدد من الاعضاء .. هو طبعا انت لو سمعته بالعود حاتحسه صعب جدا لكن لما اتكتب اعتقد بقى اسهل كتير يعنى طلاسمه اتفكت شوية
واترككم مع النوتة مع اطيب تحياتى
رد: طلبات نوتة أ / عادل صموئيل الجزء الثانى
العرض الشجري