احبائى
اقدم لكم من روائع الفنانة وردة
بلاش تفارق
الاغنية دى بتمثل حباية من العقد الجميل اللى هو بليغ مع وردة فى عز مجد وردة وعز الجو الجميل بتاع الحفلات فى اوائل السبعينات كان بيبقى عندنا حفلات فى لبنان احيانا 3 مرات فى الاسبوع بيتخللها حفلات فى القاهرة فى الصيف طبعا كنا ساعات بنروح المطار لابسين وجاهزين ننزل بيروت ياخدنا باص للحفلة ونخلصها ونرجع ..
الاغنية دى كان فيها حاجة صعبة جدا قابلتنى وهى صولو الاكورديون الكهربائى فى المقدمة , الصولو بيتقال مرة واحدة والكمنجات مش بتقوله وراه كالعادة .... وهنا بيبقى مشكلة كبيرة جدا فى التديون اذا العازف لعب او عمل اى حاجة وانا عادة باخد مش من الصولو باخد الجملة من الكمنجات لأنهم ملتزمين باللحن طبعا .. وعادة عازف الكى بورد بيقول حاجات ماينفعش آلة تانية زى العود مثلا تقولها زى مثلا كذا دوبل كروش ورا بعض بالذات لما يكون التتبع او السيكوانس مش عادى يعنى فيه فزلكة بمعنى مثلا لما تقول دو سى لا صول يبقى السيكوانس العادى او الطبيعى تنزل كلمة وتبقى سى لا صول فا .. لكن لما يكون التتابع مش ماى كده وبالذات لما يعمل تفعيلة تانية غير تتابع 4 نغمات ورا بعض والاكوريون او الاورج ممكن يقولها بسرعة جدا صعب العود او الكمنجة تقولهم بالسلاسة دى .. زائد مشكلة المشاكل اآلة نفسها الاكورديون الكهربائى .. هو معمول للموسيقى الغربية يعنى البلوز او الديسكو او الحاجت دى اللى ممكن تكون الجملة عايمة مش مهم .. لكن لما تكون الجملة عايمة زى الجيلى فى الموسيقى الشرقية مش حاتفهم منها حاجة .. كمان انا واحنا بنعزفها ماكنتش بديها ودنى اوى لسبب اننا مش حانعزفها بعده .. يعنى ده الصولو بتاعه هو يعزفه صعب سهل هو حرفيه طالما بليغ مش محدد له يقول ايه بالتحديد بس انا كت باخد بالى من انو لما يخلص عشان بندخل بعده مباشرة ماندخلش ضعاف .. المشكلة الكبرى انى بحالته ماعرفتش اكتبه .. وما اقدرش اكتب المقدمة ناقصة جملة .. عملت احسن حاجة .. بقيت اسمعه حتة حتة وآخد روح اللحن اللى بيقوله .. وبالذات ان الجملة مليانة علامات تحويل بتعمل تأثير يجنن .. يعنى الصولو حلاوته فى المقامات اللى راح لها وعادة بليغ بيشتهر باللعب فى المقامات الكتير .. عملت حساب انى اكتبها بحيث العود يقولها وهو مستريح وبحمد الله كتبتها ...
فى الصفحة الثالثة لما بتقول خلتنى اخاف الايحاء ان السرعة 80 وفعلا ابتديت اكتب لحد ماخلصت المذهب كله .. بعدين راجعته لقيتو صعب جدا جدا يعنى ماحدش حايقدر يعزفه غير المحترفين جدا اضطريت اخلي السرعة 125 وكتبته تانى .. لأن الامانة بتقتضى انى مش انزل النوتة وخلاص ولكن لازم اكبر عدد يستعملها .. وطبعا طلعت سهلة جدا والتفعيلات الغريبة بقت فى المتناول لما ضاعفت الزمن .. المهم خلوا بالكم من فروق السرعات وعلامات التحول والدليل
مع اطيب تحياتى
رد: طلبات نوتة أ / عادل صموئيل الجزء الثانى
العرض الشجري