طلبات نوتة أ / عادل صموئيل الجزء الثانى

[salhi_haithem]

تحية طيبة
شكرا أستاذ عادل لتدوين هذه التحفة و هذه الأغنية الرائعة و حقيقة هي صعبة جدا و قد فتحت موضوع مع أخي طارق في ما يخص هذه الأغنية فقلت له لماذا أغلب الأساتذة لا يريدون تدوين هذه الأغنية بالرغم أن عند سماعها تجدها ليست من فصيل الأغاني الثقيلة جدا فيها جمل معقدة نسبيا فقال لي هذه الأغنية صعب في بساطتها يعني السنكوبات (سنكوب) هم الذي جعلوها صعبة جدا و ليس السمع كالتدوين و قال لي هي مرهقة جدا
شكرا لك أستاذنا و بارك الله فيك المهم أنا سعيد جدا بتدوين هذه الأغنية
هيثم
اخى العزيز اشكرك
هى مشكلة لاغنية دى ان تركيبتها مش زى تركيبة الاغانى العادية اللى لما تسمعها تستوعبها على طول . ولكن اول انطباع لما تسمعها تخاف منهم .. وانا قلت انها زى ماقالت الاخت العزيزة زينة 17 دقيقة لكن كل دقيقة تتكتب فى نصف يوم يعنى انا باخد جملة .. اول مرحلة الاستيعاب بعدين افكر تتكتب ازاى بعدين ابتدى اكتب ادخل فى الجملة اللى بعدها الاقى نفسى خرجت من حفرة لحفرة اكبر .. وزى ماقلت انها من تأليفه وتلحينه يعنى بيشتغل مع نفسه .. يعنى لما بكتب جزء كبير وييجى يعمل لو اعادة بتكون الاعادة مش بالطريقة التقليدية يعنى نسخة كربونية بعمل مرجع ولكن الاعادة بيكون فيها اختلاف يخلينى لازم اكتبو تانى وانا كانى ماشى على حبل فى مكان مرتفع يعنى بمنتهى التركيز عشان التغيير .. ناهيك عن تغيير الموازين وانا اكتبها كده ولا كده .. زائد طبعا الافراط المتعود عليه بليغ فى العلامات العارضة ودى بتحتاج تركيز شديد لأن العلامة العارضة مش بيكررها كذا مرة ورا بعض ولكن بيلاعبك يعنى يكررها مازورتين بعدين مازورة ناتوريل بعدين يحطها تانى بإختصار يعنى تحس ان الكوبليه مش كوبليه ولكن كذا كوبليه فى بعض لكن لو سمعتها عشرين مرة وفهمت هو بيقصد ايه انا حسيتها سهلة .. كمان فيه حاجة خطيرة جدا للمدونين .. فيه فرق كبير لما انا بكتب الاغنية من عود الملحن يعنى موجود بجوارى وبيملينى بالعود مازورة مازورة وبين انى بكتبها من التسجيل يعنى الجمل السريعة اوى ( اللى دون اللحن ده اصلا استاذى العزيز المرحوم نصر عبد المنصف ) كان الملحن فى الجمل السريعة دى بيمليها للمدون ببطء بحيث ان المدون يهضمها ويفهما ويكتبها بعدين الفرقة تنفذها بأى سرعة مطلوبة بس المهم تكون اتكتبت صح لأن الجمل السريعة فيها مش فخ فيها فخاخ .. يعنى فيه حاجة اسمها السيكوانس او التتابع يعنى اختصاره لما نقول دو رى مى فا التتابع بتاعها نقول رى مى فا صول او مكن نغمة تانية وممكن تتكرر كذا مرة لكن التتابع هنا كان بيعمل حركة مختلفة تلخبط المدون وبالذات وهو بيسمعها سريعة انا كتبتها غلط كذا مرة وسمعتها وسمعت الشريط لحد ما ضبطتها .. وصعب تلاقى مدون يدونها بالذات لأن الاغنية دى مظلومة يعنى مش بتتذاع ابدا .. كتر الاذاعة لأى اغنية بتخليك مرة تلقط منها حتة مرة تلقط حتة تانية وهكذا تبقى مستوعبها لكن لما تسمعها اول مرة اكيد مخيفة كتير يعنى لأن مش حاتحس جمل مستقلة زى الاغانى التانية ولكن جمل بتتعاد بطريقة غير تقليدية
مع اطيب تحياتى عادل صموئيل