رد: طلبات نوتة أ / عادل صموئيل الجزء الثانى
الفصل الثالث
اخطاء التدوين واخطائى انا الشخصية
انا دايما لما اشرح موضوع بقولامثلة توضيحية وبتبقى ارتجالية ساعة ما بتكلم .. فيه حاجة مهمة اسمها التمكن من الشىء , يعنى مثلا واحد بيسوق سيارة لو متمكن اوى ومش ارعن يعنى مايسوقش بسرعة فى شارع مزدحم مثلا مش ممكن حايحصل انو يعدى من سيارة وما يقدرش المسافة بينها وبينها ويروح خابط فيها .. ويوم ما يتخبط او بيعمل حادثة بيكون خطأ غير دايما .. نفس الحكاية لو مثلا مدرس فيزياء ثانوى ( او رياضيات ) لو متوسط الشطارة لو جبت له عشر امتحانا مختلفة بتوع ثانوية عامة .. لو ما يقدرش يحلهم ويجيب فى كل ورقة 40 من 40 يبقى مدرس فاشل ...ده لأنها اخد فى الكلية حاجات اكتربكتير امتحان الثانوية العامة بالنسبة لو لعب عيال يعنى ولو مدرس شاطر جدا جهبذ يعنى لو جبت لو امتحانات الكلية حيجيب فيها اعلى درجات ممكنة ... ده الطبيعى بتاع الدنيا
اما التدوين الموسيقى ده موضوع تانى .. يعنى لو جبنا 1000 عازف شاطر حايطلع منهم كاممدون موسيقى شاطر اوى ؟ طبعا عدد محدود جدا ... لأن التدوين الموسيقى بيحتاج 3 حاجات اولا .. انو يكون بيعزف سماعى يعنى بيستوعب اى جملة بأقصى سرعة ممكنة لما يسمعها ويحفظها يعزفها فورا بدون اى خطأ .. يعنى مفيش جملة مايقدرش يعزفها .. وثانيا لازم يكون قارىء جيد للنوتة .. مش زى ما بيقرا جريدة ولكن اسرع من قراءة الجريدة عشر مرات ع الاقل .. ليه انت لما تقرا جريدة ممكن تقرأ بأى سرعة تختارها مفيش مشكلة لكن فى الموسيقى ممكن مازورة فيها 4 نوارت وراها جملة فيها 16 كروش وقد يكون فيهم علامات تحويل احيانا مزعجة او مش تقليدية لازم يقراهم ورابعض من غير ما يتكعبل ولأول نظرة ودى مثلا مواصفات اقل عزف فى الفرقة الماسية مثلا .. وثالثا انو يقدر يشغل اولا وثانيا مع بعض .. يعنى يسمع الجملة بعدين يسمع مازورة ويكتبها فورا ثم المازورة التالية وهكذا ... فيه مازورة بتبقى سهلة بتتكتب على طول واحيانا مازورة بتكون صعبة شوية لازم يسمعها كذا مرة عشان يستوعبها وبعدين يكتبها .. ومن هنا معنى كلمة مدون موسيقى شاطر ان معندوش نسبة خطأ ... يعنى ارجعوا لأغنية راجعين بقوة السلاح .. سهلة لكن الكوبليه بتاع يا ارض يامسجونة سجنك راح يزول .. وشوفوا صعبة اد ايه ... يعنى خدت منى وقت شوية اركز فيها اوى اوى عشان استوعب علامات التحويل الكتير .. بس طبعا مش حاتستعصى عليا ...
فيه نقطة خطيرة جدا .. لو الجملة اللى بكتبها غربى يعنى مافيهاش نصف دييز او نصف بيمول عادة اتوماتيك بعد ما اكتب الجملة ايدى بتروح على المسطرة وهنا البرنامج بيعزفها طبعا .. بيظهر لو فيها حرف غلط ولا حاجة لأن البرنامج بيقراها بدقة 100% , اما لو الجملة فيها علامات شرقية .. هنا البرنامج حايقراها اما بيمول او دييز .. هنا محظور عليا انى المس المسطرة واسمعها ... ليه ؟ لأنه حايقراها فى مقام تانى وهنا لو المقام بياتى حايطير السلطنة من دماغى .. الحل انى اراجعها اقراها بعينى .. وبالطبع بخبرتى بعرف لو فيها حاجة غلط او حرف ولا اى حاجة ... وطالما عندى الملف الصوتى .. مش حاتحصل انى ادون غلط وإلا يبقى لا اصلح انى اكون مدون اصلا .. ودى بنصح بيها اخواتى المدونين الصغيرين .. يعنى قبل ما تخرج من المازورة تأكد انها مضبوطة 100% وقبل ماتخرج من الجملة ايضا تأكد انها مضبوطة 100% عشان بعد ماتخلص وتحب تراجع .. ممكن تلاقى همسة كده كل 10 سطور لكن لو خرجت من المازورة والجملة بدون ما انا قلت وانت بتراجع حتلاقى فى كل سطر مصيبة او اتنين وممكن لما تصلح من الكم الكبير تنسى حاجة ..
فيه اغناى بتتعمل فى حفلة وحفلة تانية بيعملوا فيها تغيير .. هنا لما تمسك النوتة وانت بتتعامل من ملف صوتى وكانت مكتوبة من حفلة تانية فيها تغيير حاتحس ان التدوين غلط .. وده حصل مع الاخ العزيز وليد ... يعنى من كذا سنة هيثم نزل لى الملف بتاع اغنية زى النهاردة وانا كتبتها منه والاغنية عشر صفحات ولحلمى بكر المتعمد الفزلكة والصعوبة يعنى الاغنية اخدت منى ووقت طويل وطلعت عينى يعنى ... طبعا لما نزلتها الاخ هيثم اللى انا اثق فيه جدا مالقاش فيها اى ملاحظات والا كان قال لى تانى يوم .. الحفلة اللى انا مدونها فيه مقدمة 3 سطور فيها صولو ناى ... الاخ العزيز وليد ما اخدش باله ان الاغنية اللى عنده واللى نزلها فى المنتدى مافيهاشالكلام ده .. طبعا معاناهه ان دى حفلة تانية خالص وهنا المفروض لا تقارن النوتة بالتسجيل نهائيا ... اما تشوف التسجيل اللى انا مدون منه واما ارمى النوتة ماتستعملهاش .. يعنى انت قلت القفلة غلط مثلا ... ممكن تكون القفلة اللى انا سمعتها فا مرى دو سى لا مثلا مش معقول حاكتبها كده وانا سامع حاجة تانية .. ما يعملهاش مبتدىء تدوين .. انت لقيت قفلة تانية العكس مثلا او حروفتانية خالص او حتى حاجة شبه كده ... هنا لازم تاخد بالك ان ده تسجيل تانى معدلين فيه القفلة
عشان اقول اخطائى انا الاول حقول حاجة .. وده للجميع ... افرض انت واسرتك فى رمضان رحتم خيمة رمضانية او سهرتم فى مطعم فيه تخت شرقى .. بيبقى 4 عازفين مثلا ومعاهم مطرب ماسك عود .. بيكزون مستواهم الفنى متوسط طبعا .. زكز معاهم من اول ما يبتدوا .. لو المطرب غنى 10 اغانى حايبقى منهم 7 لمحمد فوزى .. لأن محمد فوزى اغانيه كلها سهلة جدا ... ركز معاهم اكتر حاتلاقيه بعد الاغنية العاشرة بيتدى يقولهم تانى من الاول مش حاافظ غيرهم يعنى .. ولو رحت نفس المكان كذا مرة حتلاقى نفس الحكاية , كل يوم بيقول العشر اغانى 3 مرات .. شكلته وانا اعرف منهم كتير .. انه مش عايز يصلح نفسه ويبقى اشطر طالما بيشتغل ويقبض فلوس على مستواه ده .. مش بيقعد يختار اغنية ويذاكرها ويضيفها الى رصيده الضئيل بحيث ان كل شهر رصيده يزيد 4 او 5 اغانى مثلا ..
اما انا شخصيا ظروفى تختلف عنه 180 درجة ... يعنى انا لو فى حفلة خاصة او قعدة وماسك الكمنجة والمتفرجين عارفين مين انا وكنت بشتغل مع مين وفترة اد ايه ... بيطلبوا طلبات صعبة ( المطرب الاول لو قلت له اغنية يقول لك مش حافظها ) انا ظروفى انى حافظ مش اقل من 1000 اغنية اعزفهم فى اى وقت .. ولو انطلب منى اغنية مش حافظها اوى يعنى عمرى ماعزفتها من قبل . لكن سامعها فى الراديو ممكن اقول منها حتة ..
انت لو قابلتنى ف الشارع ومعاك كراس موسيقى وقلم رصاص ونقعد على قهوة ممكن اكتب لك اغنية حيرت قلبى مثلا فى ساعة .. وطبعا اغانى كتير كده حافظها صم وبكتب على طول .. لما جيت ادون هنا فى المنتدى كنت فى اول سنة بدون بالطريقة دى يعنى اغنية حافظها صم 100% وعازفها مليون مرة من قبل بدونها من الذاكرة بدون الرجوع للملف الصوتى .. وهنا الثقة الزيادة بالنفس ممكن تعمل اخطاء بس مش فى الدتوين بتاتا ونهائيا طبعا والا لا اصلح مدون اصلا
لكن الخطأ بييجى من انى بخالف قواعد التدوين اللى انا قلتها فوق .. يعنى لازم اكتب المازورة واللى بعدهما واراجعهم بعدين اراجع واسمع الجملة بحالها واروح للى بعدها وهكذا .. كنت بكتب بسرعة جدا جدا .. ومرتين واعترف مع السرعة نسيت جملة بحالها .. طبعا حد نبهنى وانا على الفور صلحتهم يعنى الجملة ماتخدش منى نصف دقيقة اكتبها .. بعد كده غيرت طريقتى .. ما بقيت اكتب اى اغنية ولا حتى ذهب الليل الا لازم اجيب الملف الصوتى وبكتبها كأنها اغنية مش حافظها اصلا ... وكسبت حاجة خطيرة جدا جدا ... لما كنت بعزف الاغنية سماعى كنت بسمعها من الخارج .. لكن لما دونتها من الملف الصوتى اكتشفت ان فيه تفعيلات داخلية جميلة اوى ما شفتها إلا لما توغلت وغصت فى الاغنية وحللتها بمنتهى الدقة ... ولو تلاحظوا ان اى حد منكم لما بينزل ملف صوتى مش بادىء من اول المقدمة مش ناقص حرف انا بعترض .. يعنى انت مدينى لحن معرفش فيه ايه قبله .. وممكن يكون اللى مش موجود ده مبنى عليه الموجود .. وحد يسمعها ويقول لى فيها غلط ولا ناقصة حاجة ..
ناهيك عن الغباء عند البعض .. واحد دخل ع الخاص انتم ماتعرفوهوش يعنى مش بيرد معانا وعدد مشاركاته صفر .. قال لى اغنية بنت الشلبية فيها اخطاء كتير هل انت متأكد ان النوتة صحيحة ؟ انا قلت يانهار اسود .. كنت حاتعصب بس فكرت شوية .. الاخ ده ساب كل النوت اللى عددها 1000 او اكتر ومسك فى البنت الشلبية ودى اسها واتفه واقل لحن فيهم كلهم يعنى اى تلميذ اتعلم الاسبوع اللى فات يعزفها .. ما اتكلمش عن الاطلال مثلا .. ونوتة زى دى استحالة اغلط فيها ولا حتى واحد فى المليون .. لسببين .. اولها انها سهلة جدا جدا ثانيا مافيهاش علامات شرقية يعنى بمجرد اكتبها لو ضغطت على المسطرة البرنامج بيعزفها مافيهاش الهوا طبعا .. وبعدين كلها 4 اسطر بتتكرر يعنى دى انا بكتبها فى نصف كوب شاى ... يعنى لو ابتديت ومعيا كوب شاى متوسط حاتخلص قبل ما اشرب نصف الشاى .. من هنا فهمت انه مبتدىء جدا لدرجة انه مش عارف يقراها اصلا ...
بس انا ارجو بلاش الوسواس ده ... يعنى احساسك يا اخ وليد ان النوتة ممكن يكون فيها اخطاء حايخليك تشك فى كل مازورة تقراها ... يعنى فى كلامك انت قلت المزورتين كذا وكذا عاملين زى نشيد مدرسى ,, انا من غير ما اشوفهم تخيلت ان فيهم نوارات فقط .. انت لما تسمع اى مازورة فيها حلية او حليات .. دى اصلا بتتكتب سادة او نورات وفى البروفة الملحن بيقول قولوها كذا والعازف بيعمل الحلية لأنها لو اتكتبت ماحدش حايعرف يقراها .. والموسيقى الشرقية بتتميز بكده ... يعنى هات لى احلا عشر عازفى كمان واحط قدامهم نوتة سطرين حتلاقى كل واحد منهم حايضع فيها حليات على ذوقه .. اما الموسيقى الكلاسيك العازف لازم يلتزم بالنوتة حرفيا .. لكن فيه حاجات خاصة ... يعنى احيانا ومش كتير ,, الملحن بيبقى عامل الحلية ملحنها كده من صميم الجملة يعنى ودى لازم اكتبها حتى لو كانت صعبة لأن ممكن تكون احلا حتة فى الجملة ولو ماكتبتهاش يبقى الجملة فقدت حاجة واطيب تحياتى
كده خلصت كلام دلوقتى ونشتغل بقا
|
العرض المتطور
