رد: طلبات نوتة أ / عادل صموئيل الجزء الثانى
احبائى
اشكركم كلكم على كلامكم الجميل واخص شكر كبير لأحبائى فى المغرب الشقيق ... ويسعدنى جدا انى اسمع انهم بيستفيدوا من النوت المتواضعة اللى انا بدونها .. والمغرب بالذات من احب البلاد العربية للفرقة الماسية يعنى كنا بنسعد جدا لما يجينا سفرية للمغرب بالذات مع عبد الحليم حافظ لانه كان صديق شخصى للملك الحسن الثانى رحمه الله وكان لازم يعزمنا على العشاء فى القصرالملكى وكنا بنعمل حفلة خاصة للأسرة الملكية ... وكنا بنحس بمنتهى الحب والود
انا عايز اقول لكم سر بالنسبة من احد فوائد النوت المكتوبة ببساطة او تبسيط كتابة النوتة بالطبع مع عدم الاخلال بأى حرف من اولها لاخرها ... احنا ايام الفرقة الماسية اتعلمنا الاهتمام باللحن من اول حرف لاخر حرف حتى اقول لكم حاجة تجنن شوية ما قبل اول حرف وما بعد آخر حرف .. حتقولوا الاغنية وعرفناها من اول حرف لآخر حرف لكن ايه ماقبل اول حرف ومابعد آخر حرف ؟ اقول لكم
اولا لما بنسجل فى الاستوديو لما مهندس الصوت بيشغل الشريط ويدينا اشارة البدء لازم يكون صمت تام وبعدين المايسترو او قائد الفرقة بيبتدى يدنا اشارة البدء وهنا لازم يكون صمت تام حتى ان المستمع يحس بأول حرف فى اللحن .. ولما نخلص اللحن خالص .. انتم عارفين ان آخر حرف فى اللحن بيكون هو اساس المقام يعنى لو حرف صول مثلا بنخلص آخر حرف ونفضل ثوانى زى التماثيل يعنى ماحدش يتحرك يعنى مثلا لو قوسى طالع والحرف خلص بأثبت على هذا الوضع ثوانى لأن طنين النغمة الاخيرة بيفضل ثوانى بعد الاغنية ماتخلص ... ثوانى لحد ما مهندس الصوت بيعمل لنا اشارة ان الطنين( او بيسموه الصدى او الايكو بتاع الاستدويو ) او ما هو يحس انو خلص عنده بيعطينا اشارة احنا عارفينها معناها شكرا خلاص ... بعديها بنزل الكمنجة و اللى عايز يتحرك يتحرك وكتير حصل ان اثناء الصدى ده مطربة جديدة او مطرب مش متعود او اى حركة تحصل او حد ينزل الكمنجة او حد يلمس حاجة او اى شىء يفسد لحظات الصدى ده والمهندس بيطلب مننا نعيد المقطع او آخر جزء من اللحن مع اننا مسجلينه صح 100% ولكن عشان موضوع الصدى ده .. لما انت تشتغل فى الجو ده عشرين سنة مثلا اكيد حا يبقى الشغل بالنسبة لك كده من اول حرف لأخر حرف ... نفس المصيبة دى كانت بتحصل فى الحفلات يعنى مذيع غبى مش فاهم اصول الشغل فى الراديو بيقدم حفلة لأم كلثوم وهو قاعد قدام المسرح بيوصف لك الجو وفتح الستار وظهرت السيدة ام كلثوم وترتدى فستان مش عارف ايه وتجلس وسط فرقتها الموسيقية وعمال يوصف ومش واخد باله ان محمد عبده صالح اعطى اشارة البدء والفرقة دخلت اللحن والمذيع لسه عمال يوصف .. والحان كتير افسدها المذيعين بالطريقة دى لنو مش فاهم ان اول ماتفتح الستار فيه طقوس .. يعنى اولا الجمهور بيصفق اوى بيحيى ام كلثوم وبعدين هى بتقف وتنحنى للجمهور بعدين بتقعد تانى وتنتظر لحد ما التصفيق يخلص بعدين بتعطى اشارة لمحمد عبده صالح بيرفع يده وينتظر لحظات حتى ان التصفيق يهدأ يتصفى يعنى بعدين بيبتدى لأن لو مازال التصفيق عى ممكن اول حروف من المقدمة تكون منخفضة تضيع فى التصفيق وهنا اول اللحن يعتبر ضاع ... والحركة بتاعة المذيع الغبى دى خلت ام كلثوم تطلب من الاذاعة طلبين اولا اختيار مذيع فاهم الموضوع يخلص كلام فى الوقت المناسب وكان جلال معوض واحيانا امال فهمى وثانيا ان التسجيل يكون من خط منفصل مش متصل بميكروفون المذيع بمعنى ان مهندس الصوت بيسجل اللى على المسرح والمذيع صوته رايح للناس اللى بتسمع فى البيوت فقط مش بيطلع فى التسجيل
فيه موضوع تانى بالنسبة لتبسيط النوت ... احنا قلنا ان التبسيط بيبقى مفيد جدا جدا للمبتدئين وممتع جدا للمحترفين لأن الورقة بتتقرأ فى ثانية ... انت لما تشوف اى فرقة موسيقية لو فيها 12 كمنجة مثلا مستواهم بيكون متفاوت يعنى مش كلهم شاطرين 100% يعنى فيه شاطرين اوى ومتوسطين واقل شوية النوتة لما تكون مكتوبة معقده وصعبة بيقراها الشاطرين والمتوسطين ممكن يغلطوا فى حروف والاقل شوية يغلطوا كتير والخطورة هنا انهم بيعرقلوا الشاطرين بيقللوا جودة ادائهم .. لكن لما تكون النوتة مبسطة حتلاقى الكل بيعزفها بدون اخطاء وده اللى انا بحب اوصل له ... لأن على الطبيعة انا الناهردة لو حبيت اكون فرقة مش ممكن اقدر اجيب كل العازفين مستواهم 100% لكن مع تبسيط النوت ممكن اخلى الاداء 100% واعتقد تفرق كتير
مع اطيب تحياتى
|
العرض الشجري