طلبات نوتة أ / عادل صموئيل الجزء الثانى

**mony-85** · #1 11/03/2014, 01h32

.. وهنا احب ان انوه الى الفن اللبنانى يعنى تأليف الرحبانية اللى بيحب يسمعهم يحس 90% من غناهم من النوع الوصفى بحيث ان اللى يسمع 900 اغنية عمره مايحس بالملل لأن كل اغنية بتحكى او بتقول حاجة .. انا آسف للإطالة بس طبعا انتم ناس حلوين ذوقكم مختلف عن اذواق اللى بيسمعوا الاغانى ال ( ..... ) بتاعة اليومين دول
مع اطيب تحياتى

اتفق مع حضرتك في كل ما قلت واختلف معك فقط في اعتقادك انك اطلت في الكلام
احنا بنستمتع بالانصات لكلامك وبنتشرف بتوجيه كلامك لنا
صحيح بلغني ان عند سيادتك مشكلة في التعامل مع الويندوز 7 وتعريف الطابعة والاسكانر وغيرها من المشكلات
أي مشكلة عند حضرتك ياريت تقولهالي وانا احاول ان شاء الله احلهالك حل نهائي
سيادتك افضالك علينا كتييييييييييييييييييييييييييييييييييييييييييييير

الاخت العزيزة
اولا اشكرك على ذوقك وكلامك الجميل
المشكلة ان اى سؤال انتم بتسألوه بيبقى جوابه مش كلمات ولكن عصير لعصر من الزمن الجميل انا عشته وبسعد جدا لما حد بيحب العصر الجميل ده .. وكل سؤال بيحرك جوايا مشاعر ابتديت اولا اتألم لأن العصر ده مع الاسف انتهى بمعنى ان عصر الفن الجميل كان من حوالى يعنى 1940 الى 1990 .. اللى بيؤلمنى ان العصر ده كان امتداد وتطوير لكذا عصر وتاريخ وحضارات من قبله والمؤلم انو بدل ما يتطور او يمتد او على الاقل يبقى زى ماهو يعنى ييجى خليفة للعمالقة الزمن اتدمر وانا بشبهها بأننا بعد ما ركبنا الطيارات النفاثة وشفنا كل التكنولوجيا ييجى جيل خايب فاشل والعلم ينهار وتتقفل كليات الطيران وتبقى الطيارات على الارض ياكلها التراب ونرجع تانى نركب الحمير وده اقل وصف لما نكون بعد ماسمعنا عبد الحليم وام كلثوم وكلهم يبقى دلوقتى المطرب الاول اسمو بعرور
انا يوم الخميس الماضى سهرت عند جماعة اصدقائى وكان معايا زميل باقى من فرقة ام كلثوم عازف شيللو اسمو عبد الفضيل محمد بس هو اقدم منى شوية يعنى ابتدا مع ام كلثوم من اقبل الليل .. بس كان الضيوف شوية ناس سميعة من الدرجة الاولى يعنى حافظين كل حرف وعزفنا لهم شوية اغانى من بهريز الزمن الجميل منهم الجندول والاطلال زحب ايه ورق الحبيب واتجننوا طبعا وانا كنت مستمتع متعة لا حدود لها
لأنى بحس انى مازلت موجود ولياقيمة يعنى مش انى حاجة كده زى وابور الجاز زمنه راح وانقضى وبقى موضة قديمة .. اما عن مشكلة الطابعة والسكانر وياريت لو عندك خبرة فى الموضوع ده احكى لك بس استحملينى شوية
انا حاليا عندى طابعة اسمها ريكو الوان ليزر يعنى طابعة خطيرة جدا وحجمها كبير ووزنها خمسين كيلو بس عيبها ان حبرها غالى جدا يعنى بتتملى ب 600 جنيه ومش اى حد بيملاها لذلك انا بستعملها فى الضرورة القصوى بوفر الحبر بتاعها يعنى لنها جاية مليانة حبرها الاصلى من المانيا ودى نركنها على جنب شغالة مفيش مشاكل
المشكلة عندى طابعة hp 3744 inkjet حبر سائل الوان جميلة جدا وانا بملاها حبر بنفسى بتكلفنى ملاليم والتميز انى اشتريت واحدة من كذا سنة ولما عجبتنى اوى ( ونظرا ان الموديلات القديمة جامدة جدا وماتتعوضش ) اشتريت واحدة تانية وخليتها بالكرتونة بتاعتها للزمن وفعلا الاولى بعد ما اشتغلت سنين تعبت شوية وكانت محتاجة صيانى وديتها لمحل فى مول الكمبيوتر عندنا ف عينشمس وواحد حمار جاب لى اجلها رميتها وشغلت الجديدة .. وطبعا شغالى زى الفل بس لما حبيت استعمل ويندوز 7 السى دى بتاعتها قال انو معمول لأقصى حاجة xp ومارضتش تتسطب طبعا عملت كذا طريقة عفاريتى وسطبتها بس ناقص حاجة على البرنامج بتاعها اللى ع السى دى فيها برنامجين بينزلوا اولهم وهو مهم بيطلع لك نافذة فيها شباك بيبين لك مستوى الحبر اد ايه عشان اعمل حسابى قبل مايخلص اتصرف واملاها .. كمان حاجة مهمة فيها فى نفس البرنامج خيارات منها اظهار معاينة قبل الطباعة هى موجودة فى الاوفيس لكن فى برنامج الطابعة بتفرق لأنها بتبين فى اى برنامج او اى حاجة المعاينة يعنى فى برنام انكور مثلا بيظهر افرضى الصفحة طويلة شوية او عريضة شوية يعنى ممكن لما اشوفها المها شوية طبعا البرنامج ده مش موجود
اما السكانر هو canon Lide 30 وهو جهاز جميل جدا جدا وحمار شغل يعنى عندى بقالو كذا سنة واحيانا كنت باخد عليه 500 صورة ورا بعض وشغال زى الفل ويبانى اصلى المهم نفس المشكلة احط السى دى يقول لى اخرو xp انا اتصرفت وجبت لوتعريف من النت على ويندوز 7 وتغل بس اهم شىء على السى دى بتاعته برنامج خطير اسمو canon tool box البرنامج ده هو زى ماتقولى المدير اللى بيشغل السكانر يعنى فيه ميزات كتير اوى اولها خاصية copy يعنى تحطى الصورة او الورقة تروح على الطابعة مباشرة زى تصوير المستندات بس فيها ميزة كمان ان فيه خيار انك تغمقى او تفتحى الصورة يعنى لو ورقة باهتة اوى ممكن اصلح لونها تطلع احلى م الاصل
مزايا تانية كتير اوى فى البرنامج ده نزلت من ع النت كذا نسخة اللى ترضى تتسطب واللى ماترضاش المهم اللى تتسطب ماتشتغلش ولما قعدت احاول اكتشفت حاجة ان لما يكون البرنامج مضبوط وشغال فيه كلمة settings دى لما تفتحيها تلاقى نافذة اول حاجة فيها اسم السكانر معناها ان البرنامج قابله.. الاقيها فاضية ونافذة مصمتة يعنى مافيهاش اضافة اى شىء فاضية بس دى المشكلة
انا عندى دايما نسختين ويندوز واحدة على سى والتانية على دى انا كنت عاملهم الاتنين xp هو طبعا الجهاز لما بيفتح بيفتح لوحدو على آخر نسخة اتسطبت وهى اللى ع الدى وبشتغل عليها وظيفة النسختين ايه ؟ اولا انتى عارفة انى بعمل شغل على الجهاز يعنى بكتب نوتة مثلا يعنى دلوقتى انا بكتب فى لحن صعب جدا بقالى 3 ايام بكتب يادوب خلصت منه خمس صفحات هنا الخطورة ممكن نسخة الوندوز تضرب او تتعفرت اى وقت ماترضاش تفتح بروح افتحها من الويندوز الاولانى واخد ملفاتى من عليها بعدين اشيلها وانزل غيرها .. فيه حاجة اخطر من كده فيه برامج بتتعارض مع بعض بالذات اللى فيها خاصية text فيه ساعات برامج منها بتعفرت الانكور اللى بكتب لكم بيه النوت عشان كده انا اى برنامج من دول بنزله على نسخة السى بعيد عن الانكور او مثلا عايز استكشف برنامج جديد بنزلو هناك بعيد برضو عن شغلى ... انا حاليا عندى xp علىسى وويندوز 7 على الدى بجرب فيه يعنى الطابعة والسكانر شغالين عليه زى ماهم عادى بس هو المشكلة لو انا حبيت استغنى عن الاكس بى واخلى 7 فقط لازم اعمل حسابى ان يبقى عندى المواضيع ماتتعطلش .... هو لعلمك ما انا ممكن اشترى طابعة وسكانر جداد بس فيه حاجتين اللى عندى زى ماقلت لسه جداد وشغالين زى الفل ومش من الناحية المادية الاجهزة القديمة كانت اقوى من الحديثة يعنى زى ماقلت الاجهزة الحديثة كلها زبالة وبتتعب بسرعة انا آسف للإطالة بالنسبة للسكانر لو فيه اسطوانة يكونوا عاملين كانونlide30 يكون بيشتغل على ويندوز 7 لأنى بصيت بصة سريعة لقيت الموجود ف السوق lide 100
مع اطيب تحياتى ونبهينى انك قريتى الرسالة دى عشان احذفها او انقليلها عندك على ملف وورد واقريها على مهلك

**Toqa El Hagrasy** · #2 11/03/2014, 06h20

السلام عليكم

ياريت نوتة موسيقى مسلسل بنت اسمها ذات

**Toqa El Hagrasy** · #3 03/05/2014, 15h51

السلام عليكم

انا كنت طلبت قبل كده نوتة تتر مسلسل بنت اسمها ذات ، انا بقدر تعب الاستاذ عادل صموئيل وبشكره جدا وعارفه انه مشغول الله يعينه ، انا بكرر طلبي تاني لاني محتاجه النوته في اسرع وقت بتاعت تتر مسلسل بنت اسمها ذات ، وشكرا

الاخت العزيزة
اولا انا آسف لتأخرى فى الرد عليكى لأنى زى ما انتى شايفة الظروف انا بلف حوالين نفسى مش من المنتدى فقط ولكن من الدنيا .. انا نزلت الملف وابدتيت اسمع لقيت سهل وماشى وفجأة طلع العفريت يعنى التوزيع والتوزيع اما يكونتحت الميلودى لمعنى ان الميلودى يكون فى الصدارة ( زى شغل زمان بتاع عبد الوهااب والعمالقة ) او يكون التوزيع عالى اوى يعنى تسمعى معجنة او طبق كنافة او بلش كنافة نقول مكرونة اسباجيتى كلو ملخبط فى بعضه ومشكلة التوزيع ان بيبقى فيه كذا خط فوق بعض وانا المفروض بكتب الاساسى بكون مش سامع الاساسى عمومام انا ابتديت اكتب فيها لنك محتاجاها بسرعة بس فيه جزء فى النص قبل صولو الابوا مش فاهم فيه حاجة يعنى التوزيع عالى اوى تحسى خناقة يعنى كتبت صولو الابوا وخارج منو دلوقتى وربنا يستر فى اللى جاى
بس انا نفسى اقول على حاجة المفروض لو انتى بتعزفى آلة واحدة فى نفس الوقت المفروض تعزفى لحن يكون ميلودى بحيث انك بآلتك الواحدة بتقولى الحن كله لكن لما بيكون اللحن موزع انتى بتعزفى حتة منه قد تكون مش كافية للمستمع
واقول لك معلومة التوزيع مش ممكن يتدون ولكن لما بيكون فعلا فرقة عايزة تعمل لحن موزع لازم تجيب النوتة الاصلية اللى عاملها الموزع بنفسه لأن حتى ما ينفعش لو هم مين يعزفوه سماعى ... الكلام ده فى الاوبرا فى اوركسترا القاهرة السيمفونى بيبقى عندهم النوت الاصلية اللى جاية من اوروبا مكتوبة السيمفونية البارتاتورا بتاعة المايسترو وبياخدوا منها كوت كل آلة على حدة مع اطيب تحياتى واكرر اسفى للتأخر عليكى عادل صموئيل

**mony-85** · #4 18/03/2014, 01h52

مع اطيب تحياتى ونبهينى انك قريتى الرسالة دى عشان احذفها او انقليلها عندك على ملف وورد واقريها على مهلك
[/COLOR][/SIZE][/QUOTE]

من خلال فهمي المحدود لما قرأت انا متهيألي ان مشكلة سيادتك تتلخص في
1- اعتيادك على xp اكثر من win7
2- والاهم من كده انك كنت بتشتغل على برامج معينة باصدارات بتشتغل على xp والبرامج دي مش بتشتغل على win7
3- ان حضرتك علشان تعوض برنامج واحد زي البرنامج اللي جاي مع اسطوانة الطابعة محتاج تحل محله بكذا برنامج
4- مشكلة عدم التوافق بين الملفات اللي بتعملها على xp مع win7 والعكس
5- وجود اتنين ويندوز على الجهاز ( ده في حد ذاته مشكلة ايضا ) علشان لو ويندوز ضرب ممكن يضيع التاني مثلا
*******
طيب انا عندي فكرة :
شوف يا أستاذي الفاضل . . احنا نبدأ من الاخر يعني اولا احنا بدل ما تخلي عندك 2 ويندوز جنب بعض انت تخلي عندك 2 ويندوز جوا بعض يعني حضرتك هتنزل ويندوز 7 فقط ، وهتنزل برنامج اسمه (VMware )
البرنامج ده بيخليك تعمل جهاز كمبيوتر تخيلي داخل الجهاز الأصلي وكأن عندك جهازين متوصلين ببعض وبشكل بسيط جدا وبعد ما تعمل الجهاز ده تنزل عليه ويندوز xp من اسطوانة الويندوز اللي عندك عادي خالص وتنزل عليه البرامج اللي انت عاوزها .
وتبقى مشغل الويندوز 7 عادي خالص وفي نفس الوقت تبقى فاتح الويندوز اكس بي في نافذة اخرى زيه زي اي برنامج ومع الشغل في البرنامج ده هتعرف تنقل الملفات بين الويندوزين براحتك وتشغل كل البرامج اللي انت عاوزها
لكن ملحوظة هامة : لا تحفظ الجهاز اللي انت هتعمله بتاع الويندوز اكس بي على الــ :C احفظه على اي بارتيشن تاني علشان لو الويندوز ضرب في اي وقت تفضل ملفاتك محفوظة وممكن كمان تشغلها على اي جهاز اخر لو انت عايز بس يكون عليه نفس البرنامج .

الاهم من ده كله :
بما أنك ساكن في عين شمس انا ممكن ابعتلك اللي يخلصلك الموضوع كله لحد عندك ودي مش جدعنة مني ده جزء بسيط من افضالك علينا . بس حضرتك تقول اوكي وهتلاقيه القصة كلها خلصانة كل الحكاية ان يكون عندك " بن " علشان الرجل ده مش بيشرب غير قهوة هههههههههههههههه او لو تحب تقابله في مكان ويديلك اسطوانة عليها البرنامج واي برامج اخرى تحبها وهتلاقي عنده رد لأي استفسار عندك خاص بالكمبيوتر ومشاكله
وعذرا على الاطالة

الاخت العزيزة متعتذريش اولاعلى الاطالة بالعكس كل الكلام المفيد بيبقى اكتر الواحد بياخد منه معلومات مفيدة
انا حاليا حليت كل المشاكل تقريبا الحمد لله هو زى ماقلت لك انا منزل نسخة xp على السى وويندوز 7 على الدى والمشكال كان اساسها ان معظم البرامج اللى بشتغل بيها كانت اضدارات فديمة مش بتشتغل على ويندوز 7 لكن الاوخة الاحباء وعلى الاخص الاخ العزيز دكتور وسام اكرم من العراق تقريبا حل لى المشكلة يعنى نزل لى شوية برامج اخطر من خطيرة بمعنى انو لو عدنك اى برنامج ما بتشتغلى عليه واصدار رقم 5 مثلا ومريحك وماشى معاكى زى الفل لو عشان ويندوز 7 لازم تنزلى مثلا اصدار 8 بيبقى حديث اوى ومقعد وفيه حاجت كتير مالهاش لازمة وبالعكس ممكن يبوظ لك شغلك .. الاخ العزيز وسام بحث ونزل لى اصدارات من نفس البرامج اللى بشتغل عليها بس عبارة عن القديمة زى ما هى بس متعدلة عشان تشتغل على ويندوز 7 وده اعجاز فى حد ذاته يعنى البرنامج اللى الواحد متعود عليه عمال زى الحاجات بتاعتك فى اوضتك بتبقى عارفة كل حاجة مكانها فين مش تتوهى عليها وبالذات التدوين بيحتاج ابقى قاعد مستريح يعنى عايز حاجة فى ثانية اعملها مش اتعطل يعنى من ضمن المعجزات برنامج كول ايديت 2 ده روحى فى الشغل نزل لى نسخة منو متعدلة زى ماهى تشتغل على ويندوز 7 زى الفل ومذا برنامج ... فيه حاجة خطيرة اكتشفتها كمان انا كان ابنى مدينى نسخة ويندوز 7 هو منزلها من على موقع ميكروسوفت تتصورى طلعت نسخة زبالة وكانت بتعمل مشاكل انا فيه واحد قاعد على الارض بيبع سيديهات اسمو رجب فى الشارع اللى متفرع من شارع عين شمس رايح على محطة المترو عند المسجد جنب المحل اللى بيعمل زلابية وبلح الشام الواد ده بيتميز ان عندو اسطوانات حلوة
مع ان معظم اللى بيبعوا اسطوانات ف الشارع بيبقى عليها فيروسات ومصايب لكن الراجل ده حاجاته حلوة مع انو مش بيفهم فى الكمبيوتر المهم اشتريت منو اسطوانة ويندوز 7 التيميت ( ودى الاصلية بتاعتها ب 1500 جنيه ) تتصورى طلعت اروع من الروعة ومافيهاش مشاكل زى الاولانية الحمد لله انا دلوقتى شغال الحمد لله وفيه بس حاجتين ناقصين فى الطابعة والسكانر بس بفتح ال xp لما احتاجهم ولو فعلا احتجت شىء من الاخ العزيز عندك ان شاؤ الله مش حاتردد ... عايز اسألأ على حاجة فيه طابعة ليزر اتش بى موديل p 1102 w الطابعة دى مالية الدنيا بس فه لاحظت حاجة هنا فى المول بتاع سوق العصر اللى ف شارع عيبن شمس بتتباع ب من 640 الى 700 جنيه ولونها ابيض قريت فى النت فى محلات مصر الجديدة الشيك اوى نفس الموديل ولونها اود ب 900 جنيه سألأت واحد قال لى اللى فى مصر الجديدة هى الاصلية واللى ف عين شمس تقليد لها .ز وواحد تانى قال لأ هى هى بس بتوع عين شمس بيتعاملوا مع ناس غلابة لكن بتوع مصر الجديدة حرامية وبيتعاملوا مع ناس اغنياء ماتفرقش معاهم الفلوس ايه رايك ف الموضوع ده
مع اطيب تحياتى عادل صموئيل

**mony-85** · #5 27/03/2014, 10h04

[/COLOR][/SIZE][/QUOTE]

عايز اسألأ على حاجة فيه طابعة ليزر اتش بى موديل p 1102 w الطابعة دى مالية الدنيا بس فه لاحظت حاجة هنا فى المول بتاع سوق العصر اللى ف شارع عيبن شمس بتتباع ب من 640 الى 700 جنيه ولونها ابيض قريت فى النت فى محلات مصر الجديدة الشيك اوى نفس الموديل ولونها اود ب 900 جنيه سألأت واحد قال لى اللى فى مصر الجديدة هى الاصلية واللى ف عين شمس تقليد لها .ز وواحد تانى قال لأ هى هى بس بتوع عين شمس بيتعاملوا مع ناس غلابة لكن بتوع مصر الجديدة حرامية وبيتعاملوا مع ناس اغنياء ماتفرقش معاهم الفلوس ايه رايك ف الموضوع ده
مع اطيب تحياتى عادل صموئيل[/COLOR][/SIZE][/QUOTE]

أولا متهيألي حضرتك بتتكلم عن محطة مترو عين شمس مش المطرية ولا الحلمية لأن سوق العصر متهيألي قريب من شارع المشروع كده ان لم تخني الذاكرة
ثانيا بالنسبة للطابعة البيضاء والسوداء أعتقد ان الفرق بينهم في بعض المزايا الإضافية الموجودة في الطابعة السوداء وليست موجودة في الطابعة البيضاء مثل الطباعة عن بعد وعن طريق الانترنت والطباعة من الايفون والايباد ويرليس (بدون سلك) مثلا ....... إلخ
وليست القضية قضية اصلي وتقليد أو ناس بتبيع غالي وناس بتبيع رخيص وللمعلومية في مصر الجديدة وفي روكسي بالاخص الاسعار بتكون ارخص من عين شمس وارخص من مول مترو اللي في ميدان الحلمية بالذات لأنهم تجار كبار وموردين بيشتروا كميات كبيرة فبتكون الاسعار ارخص
أنا هاكتب لحضرتك لينكين فيهم الطابعتين بالاسم والرسم ومميزات كل طابعة فيهم علشان تقدر تحدد احتياجاتك لأي طابعة منهم
الطابعة البيضاء : (HP LaserJet Pro P1102‎ (CE651A

http://www8.hp.com/emea_middle_east/...#!tab=features
ــــــــــــــــــــــــــــــــــــــــــــــــــ ــــــــــــــــــــــــــــــــــــ

الطابعة السوداء : HP LaserJet Pro P1102w‎ (CE658A)

http://www8.hp.com/emea_middle_east/...#!tab=features

الاخت العزيزة
انا اشكرك على ذوقك وتعبك انا بتكلم عن مول سوق العصر اللى فى عين شمس اللى على ناصية احمد عصمت مع ش عين شمس وانا ساكن فى نفس شارع عين شمس عند بنزينة موبيل انا فعلا عملت تحريات واكتشفت ان كلامك صح
هو فيه البيضا p 1102 والسوداء اللى ب 900 جنيه فى مصر الجديدة p1102 w اكتشفت ان الفرق بينهم حرف w وده اختصار لكلمة وايرلس يعنى هى هى بس بيفرقوا فى ان السودا واير لس ودى ماتفرقش معايا ف حاجة
انا بفكر اشتريها مع انى عندى حاليا طابعتين واحدة ريكو الوان ليزر دى خطيرة جدا بس حبرها غالى يعنى بتتملى ب 600 جنيه ومش عند اى حد بس بالطبع لو اتملت النهاردة بتطبع عشرين الف ورقة لذلك انا مخليها للحاجات المهمة يعنى بستعملها قليل اوى واطابعة التانية اتش بى انك جت وانا بملاها حبر بنفسى بس انا قرفت منها لن لو ماطبعتيش عليها 48 ساعة الحبر ممكن لون ينشف اما الليزر لو تركتها اى فترة الحبر بودرة مش بينشف اما الطابعة الليزر اتش بى اللى بنتكلم عليها ميزتها اقتصادية يعنى بتتملى ب 25 جنيه تطبع 1200 ورقة وكل 4 ملوات نغير الكارتردج الاصلى تمنو 150 جنيه وبالطبع حبرها متوفر عند البقال زى ما بيقولوا مش زى الريكو لنى بصراحة بستهلك طبع كتير اولا جنانى انا يعنى ساعات بكون بجرب حاجة ممكن اطبع خمسين ورقة اجرب حاجة وكمان غلاسة الاحفاد يعنى واحدة فى الجامعة وواحدة ثالثة اعدادى وواحد اولى اعداى بيطلبوا اطبع لهم حاجة امبارح بتاعة الجامعة طلبت اطبع لها بحث 60 ورقة عملتهم طبعا ع الانك جت لن حبرها بملاليم .. يعنى انا بدرس الموضوع هو بينى وبينك انا من زمان صرفت كتير اوى اوى بس اتعلمت يعنى اول طابعة جبتها كانت كانون خربت بيتى كارترجات لأن هم عاملينها ما ينفعش تتملى حبر لازم تشترى جديدة وطبعا سعرها غالى اوى المهم انا اشكرك الف شكر على تعبك وعلى فكرة كلامنا دى ممكن يستفيد منه ناس كتير يعنى تجاربنا ممكن توفر لهم فلوس كتير احنا دفعناها لحد ما اتعلمنا
ومع اطيب تحياتى عادل صموئيل

**thesherifalaa** · #6 27/03/2014, 17h41

السلام عليكم

أطلب من حضرتك نوتة نشيد النادي الأهلي
‫ظ†ط´ظٹط¯ ط§ظ„ظ†ط§ط¯ظ‰ ط§ظ„ط£ظ‡ظ„ظ‰ ظƒط§ظ…ظ„ط§ ط¹ظ„ظ‰ ط´ط¨ط§ط¨ ط¹ط±ط¨ ط³طھط§ط±ط².wmv‬â€ژ - YouTube

**نور الصباح** · #7 27/03/2014, 22h17

احبائى
اقدم لكم تتر مسلسل
ياسمين التركى
هو لحن خفيف اوى ظريف حايعجبكم اهم ميزة فيه انك تمسك الآلة بتاعتك وتشوطه مرة واحدة بدون تفكير
مع اطيب تحيات
SSSSSSSSSSSSSSSSSSSSSSSSSSSSSSSSSSSSSSS

الصـــــــــــــبر طيب وإن كان مر .....مايضرش
والصابرين بخير
أنا صابـــــــر عليك لحد الصيام الكبير ما يخلص
وبرضه ....حا أصبر
وشكرررررررررررررررررررررررررا
أخوكم
نور الصباح

**عادل صموئيل** · #8 28/03/2014, 00h38

احبائى

اقدم لكم نوتة نشيد

النادى الاهلى

بس انا ليا عتاب وقلبى واجعنى اوى من الكورة
يعنى كان زمان مبارة كرة وبالذات بين ناديين كبار بنتفرج على لعب حلو وبعدين فى نشرات الاخبار يقول لك تعادل او فاز نادى كذا على نادى كذا 2/1 او حتى 4/صفر ماشى لكن المؤلم دلوقتى بيبقى الخبر فى مباراة كذا حصلت احداث مؤسفة وكان نتيجتها كذا قتيل وكذا جريح والاتف فى الاستاد وحرق كام عربية ع الماشى من عربيات الناس المساكين اللى حظهم خلاهم يسكنوا جنب الأستاد ... بعدين الدنيا تتقل والداخلية تجتمع يلغوا باقى الدورى ولا يخلوا المباريات بدون جمهور ... بجد بجد حاجة مؤلمة و( تكسف ) ويطلع لك ناس مش من هواة الكورة يقولوا هى الكورة دى لازمتها ايه اصلا فين ايام زمان مكن كان سنة فقط كان يوم مباراة الاهلى والزمالك مناسبة قومية .. ولا مباريات المنتخب الوطنى كانت بتبقى عيد وطنى ... فين الاحتفالات اللى للصبح لما المنتخب الوطنى يفوز .... ايه ما بقيناش وطننين ولا ايه ؟؟
حقول ايه .... مع اطيب تحياتى بس خلاص

**نور الصباح** · #9 28/03/2014, 09h16

احبائى
اقدم لكم نوتة نشيد
النادى الاهلى
بس انا ليا عتاب وقلبى واجعنى اوى من الكورة
SSSSSSSSSSSSSSSSSSSSSSSSSSSSSSSSSSSSSSS

الصـــــــــــــبر طيب وإن كان مر .....مايضرش
والصابرين بخير
أنا صابـــــــر عليك لحد الصيام الكبير ما يخلص
وبرضه ....حا أصبر
وشكرررررررررررررررررررررررررا
أخوكم
نور الصباح

**عادل صموئيل** · #10 22/03/2014, 09h58

احبائى

اقدم لكم اغنية فيروز

احبك مهما اشوف منك

الاخ العزيز hamorabib انا الاغنية دى اول مرة اسمعها فى حياتى من نصف ساعة لما لقيت الحاحك وهى مش عارف المقدمة ناقصة حاجة انا كتبت من اول غنا فيروز يعنى انت ممكن تعزف المذهب بدل المقدمة وتمشى لنماحدش حافظها اعتقد ومالقيتلهاش اى تسجيل ف اى مكان تانى
اما من حسن حظك انها صغيرة يعنى مذهب وكوبليه بيتكرر ما اخدتش منى بالضبط 22 دقيقة انا حاولت ابسطها طبعا لن فيروز بتعفق جامد فى اجزاء ... بس فه حاجتين ملحوظتين الاغنية دى ممكن قديمة اوى يعنى صوت فيروز لولا انت لبنانى وقلت دى فيروز ماحدش كان عرفها لن صوت فيروز مع الرحبانية كانت تقنية التسجيل عالية اوى وصوتها كان زى ما احنا عارفينه الحاجة التانية اللى لفتت نظرى ان الاغنية اللهجة مصرية مش لبنانية
بس هى بالطبع الاغنية حلوة اوى

مع اطيب تحياتى