طلبات نوتة أ / عادل صموئيل الجزء الثانى

**نور الصباح** · #1 23/11/2013, 17h30

احبائى

اقدم لكم من روائع عبد الوهاب القديمة
بلاش تبوسنى فى عينية
طبعا الاغنية دى تعبتنى جدا فى التدوين لأنها صعبة جدا
اصعب حاجة فيها ان فيها ادليب كتير وده عبد الوهاب طبعا يعنى لما يعمل ادليب لازم اكيد يبقى غنى اوى
SSSSSSSSSSSSSSSSSSSSSSSSSSSSSSSSSSSSSSS

نور الصباح

**زينة الغريبي** · #2 23/11/2013, 17h48

أستاذ عادل متشكرين على تحفة ياما القمر ع الباب و تحفة يادلع يادلع و أغنية بلاش تبوسني في عنيا

**muhamadibra** · #3 23/11/2013, 19h34

شكرا لرائعة بلاش تبوسني في عنية لمحمد عبد الوهاب
د محمد ابراهيم

**عادل صموئيل** · #4 23/11/2013, 19h55

احبائى

اقدم لكم من روائع فايزة احمد
عمل من العيار التقيل جدا جدا مكتوب فى 17 صفحة

احلى طريق فى دنيتى

الاغنية دى انطلت وانا كنت متردد اكتبها لأنها طويلة جدا جدا وبتاخد مجهود كبير وبتحتاج تفرغ ذهنى ونفسى بمعنى ان الاغانى القصيرة ممكن بكتبها فى ساعة او ساعتين او فى يوم واخلص منها لكن الاغانى الكبيرة كده بتحتاج وقت طويل بالذات لأنى بسمع جزء جزء واخطط يكتب ازى ارسمه فى مخى الاول طبعا عشان اقدم لكم نوتة ما اقدرش اقول سهلة ولكن بحاول بقدر الامكان اخليها اسهل ما يمكن وحاجة تانى انا الوحيد اللى اقدر اكتبها هذه الايام اولا لنى عزفتها مع فايزة يعنى عملنا عليها بروفات كتير شفت كل جزء منها بيتكون ازاى وثانيا حتى لو اتوجد مدون تانى النهاردة ممكن يدونها بيكون بيشتغل فى السوق يعنى اكيد عنده تدوينات بتدر عليه دخل ومش معقول يكتب 17 صفحة لوجه الله بدون مقابل واكيد ممكن تتخيلوا المدون الكبير بيكتب الصفحة بكام
الشىء الاهم يعنى حسيت ان الاخ العزيز اللى طلبها عنده ذوق وحس عالى يعنى ممكن يعزفها كلها
الاغنية دى بتتكون من مقاطع سهلة جدا ومقاطع صعبة طبعا ومقاطع متوسطة واهم واخطر شىء فيها تاخد بالك من السرعات وتغيير المقامات يعنى كذا مرة السرعة بتكون 100 فجأة تبقى 130 بدون مقدمات وفى نفس الحويلة بيتغير المقام كمان يعنى بتحتاج انك قبل ما تبتدى تعزفها تسمع الاغنية عدة مرات عشان تحس بالنقلات الخطيرة دى
واهم شىء اننا مانعزفش النوتة وخلاص يعنى مطلوب شوية احساس وده مش ممكن ييجى لما نقرا النوتة فقط او واحد عمرو ماسمع الاغنية ممكن يعزفها كحروف لكن مش حاتبقى فيها طرب وبالذات لأن فيها كمان كذا ادليب وانا اتمنى ان اللى يحس ان النوتة صعبة عليه شوية انو يشوف الاجزاء السهلة ويشتغل فيها برضو حانبقى عملنا انجاز
انا بسترجع ذكرياتى فى البروفات كان اهم شىء ان كان التركيز مع الاستاذ حسن انور لأن ضابط الايقاع مفيش قدامه نوتة يعنى لازم يكون حافظ اللحن اوى اوى اوى اوى ( شفتم كام اوى ؟ ) ويليه فى الخطورة احمد فؤاد حسن قائد الفرقة انو بيمعل فى النوتة بتاعت مصطلحات عشان يعرف يقود صح وبالذات زى ما قلت لكم فى النقلات الايقاعية
العملية دى بتفكرنى بالملقن اللى فى المسرح ... يعنى مع الممثلين الكبار اوى بيديه حاجة اسمها الكيو يعنى المفتاح يعنى اول كلمة فى الجملة بتاعته والممثل بيكمل .. بإختصار فى الفرقة الماسية ماكانش عندنا اى مشاكل فى النوتة مع العازفين بتاتا يعنى اهم شىء تكون النوتة مكتوبة كويس اوى ... والتصليح او تغيير الجمل اللى كنا بنعمله فى البروفات كان كل عازف بيصلح بقلمو فى وقته بعدين كنا بنكتب النوتة تانى على نضيف ( الحركة دى كانت بتحصل فى الحان عبد الوهاب الطويلة كنا بنكتب النوتة تانى كذا مرة لأن العازف لما بيصلح ممكن يشخبط فى الورقة او مع السرعة ممكن يكتب التصليحة بخط مش واضح فكان الحل المثالى اننا كنا بنعيد كتابة النوتة بحيث قبل يوم التسجيل تبقى النوتة مكتوبة 100% فى منتهى النظافة وآسف للطالة

مع اطيب تحياتى

**نور الصباح** · #5 23/11/2013, 20h54

احبائى
اقدم لكم من روائع فايزة احمد
عمل من العيار التقيل جدا جدا مكتوب فى 17 صفحة
احلى طريق فى دنيتى
SSSSSSSSSSSSSSSSSSSSSSSSSSSSSSSSSS

شكررررررررررررررررررررررررررررررر
أخوكم
نور الصباح

**muhamadibra** · #6 23/11/2013, 21h04

المايسترو د عادل بك طول كما تريد فالاجواء التي تضعنا فيها مهمة جدا وتجعلنا في اشتياق للحن والتحليل الفني العميق الذي يغيب عن امثالي - لك كل شكر وعرفان - اعانك الله
د محمد ابراهيم

**عمرو الهنداوي** · #7 23/11/2013, 22h29

شكرا أستاذي القدير

على نوتة احلى طريق فى دنيتى
لفايزة أحمد...
و إذا كان ممكن بعد إذنك نوتة سعاد محمد أوعدك لو حضرتك كان عندك وقت هي أغنية جميلة اوي...