طلبات نوتة أ / عادل صموئيل الجزء الثانى

[نور الصباح]

احبائى
اقدم لكم من اغانى محمد قنديل
حدوتة
الاغنية دى انا بسمعها من زمان بس ماحبيتهاش لولا الحاح الاخ العزيز نور الصباح يعنى عمرى ما كنت اختار اكتبها
SSSSSSSSSSSSSSSSSSSSSSSSSSSSSSSSS
شكرا جزيلا لجنابكم على النوتة وشكرا جزيلا على التقديم والإهداء الممتع الظريف كما هى عادتكم معنا
و أنا عارف إن اللحن معقرب شوية فى الميزان
لكن
أنا عارف بأكلم مين و بأتعامل مع مين
ومرة أخرى
شكرررررررررررررررررررررررررررررررا
أخوكم
نور الصباح

[muhamadibra]

استفسار في نةتة وله يا وله الصفحة الاولي السطر الخامس هل هناك خطأ مطبعي غير مقصود بأن يكون الرقم في بداية السطر 2 بدلا من 1 ام انا مخطئ - وشكرا جزيلا
د محمد ابراهيم

اخى العزيز
طبعا كلامك صح وانا صلحتها ونزلتها فى مكانها ارجو تشوفها
مع اطيب تحياتى عادل صموئيل

[muhamadibra]

تحياتي واحترامي الكبير للاستاذ العملاق عادل صموئيل وشكرا جزيلا للمرة المليون - ولو ممكن طلب اخر بعد اذنك نوتة دعاء عبد الحليم حافظ ع التوتة والساقية لو ما فيها تعطيل لحضرتك
د محمد ابراهيم

اخى العزيز اشكرك
ع التوتة ما ينفعش تتدون لأنها حاجة زى الموال يعنى اللى نفسو يعزفها لازم يكون بيعزف سماعى كويس جدا بعدين يحفظها ويقولها
حتى لو واحد دونها حايبقى صعب تتقرى وحاتطلع لحن تانى غير اللى بتسمعه
يعنى الأغنية لما تكون على ميزان انا بكتبها بمنتهى الدقة يعنى النوتة بيبقى فيها مش اقل من 99% من اللحن الصحيح بعد كده اى واحد بيقرأ حايطلعها
مع اطيب تحياتى عادل صموئيل

[muhamadibra]

شفتها يا استاذنا والنوتة رائعة جدا جزيت خيرا
د محمد ابراهيم

[muhamadibra]

طلب بسيط من ا عادل قد يأخذ وقت يسير ولكنه مهم جدا بالنسبة لي - في نوتة عش انت - الصفحة الاولي ياريت تبسط لنا المذهب شويه ليصلح للمبتدئين بعد اذنك - وشكرا مقدما
د محمد ابراهيم

[salhi_haithem]

السلام عليكم
د محمد ابراهيم تصوري الخاص أنه الأستاذ عادل حاول يبسط أغنية عش أنت فهي ستفقد كل جمالها وروحها و طعمها و لو بحثت على نوتة عش أنت من تدوين عبد الرحمان جبقجي ستفهم أنه نوتات الأستاذ عادل تفوق بأشواط نوتة عبد الرحمان جبقجي من ناحية البساطة و الدقة و إختيار ميزان التدوين علما أنه نوتة الجبقجي ناقصة تدوين مقاطع الكلام يعني فيها موسيقى فقط
و الأغنية في حد ذاتها صعبة شوية يلزمها شغل و عمل و مثابرة و هذه النوعية من الأغاني هي التي ترفع من مستوانا في العزف شرط أنه نشتغل فيها شوية
و النوتة لما تكون مزركشه يعني فيها النوار و الكروش و الدوبل كروش وشوية سنكوبات تكون ممتعة عمله مثل فيلم أكشن. تصور لو نوتة من أولها لأخرها نوارات أو روندات ستكون مملة و باسلة و مفيهاش روح
هيثم
اخوتى الاحباء
طبعا كلام اخى العزيز هيثم صحيح واهم شىء اننا بنتعامل مع بعض من فترة طويلة يعنى حافظنى
نفس اللحن ممكن يكون لو كذا طريقة للتدوين بتختلف بالمدون نفسه يعنى فيه مدون بيحس انو شاطر اكتر من الازم او بيكون بيتعاون مع موسيقيين محترفين على درجة عالية بيحب يدون النوتة صعبة عشان يحسوا انو متمكن وفيه مدون متواضع مثلى بيتعامل من كل المستويات فى نفس الوقت يعنى لازم النوتة تكون مقبولة من الجميع
يعنى المبتدىء يشوفها نفسيا شكلها سهل ويشتغل فيها ومرة فى مرة بيوصل وكتر العزف وكتر النوت بيرفع مستواه والدليل على كده اعضاء كتير هنا ف المنتدى اما العازف الشاطر النوتة لما تكون مكتوبة سهلة بتفتح نفسه للشغل وعندنا كنا فى الفرقة الماسية لماتكون نوتة سهلة ممكن نسجل عشر الحان ورا بعض فى وثت قليل لكن لما تكون معقربة ممكن اللحن الواحد ياخد وقت مزعج طويل لأن الفروق بين العازفين ممكن يحصل لخبطة واكيد اى واحد بيقول حرف غلط لازم الفرقة كلها بتعيد اللحن او الكوبليه من الاول ... وفيه معلومة خطيرة جدا جدا وهى اساس التدوين الصحيح
انت لما تسمع جملة موسيقية من مطرب او من عازف بيبقى فيها حاجتين مهمين اولهما ايه اللحن الاصلى والتانى ايه الحليات لو حصلت وهنا الخطورة يعنى انا بخبرتى ببحث عن اللحن الاصلى لأنه هو الاساس ... يعنى الأيام الاخيرة من زمن الفن الجميل كان فيه جملة بيعزفها الاورج وتانى مرة الفرقة الاروح بيقول حاجات صعبة جدا بيستعرض عضلاته الموسيقية وبيخرج عن الحن وكتير بيضيع قيمته وماحدش حايعرف يكتب اللى بيقوله انا ونا بسمع بمرر الصولو ده واسمعو واكتبه من الفرقة لأنها بتقرأ النوتة اللى قدامها وكذا مرة بتكون اللحن الاورج او عازف كمان بيعزف الجملة لكن فى اللحن الفرقة مش بتعيدها وراه اوقبله وهنا انا بلغى اللحن كله وحصلت كذا مرة ... فيه فرق بين انا لما اكتب اغنية من الملحن نفسه ونفس الاغنية من تسجيل على الفرقة ( طبعا انا بتكلم من موقع خبرة لأنى جربت الطريقتين ) الملحن لما بيملينى اللحن بالعود بيتعمد انو بيملينى الجملة سادة بدون حليات بتاتا إلا اذا كانت الحلية او اجزء الصعب ده من صلب اللحن .. الجملة لما تكون سادة بتدى الفرصة للمطرب انو يعمل فيها عربة او حلية .. لكن لو الحلية اتكتبت انا هنا بقيد المطرب وبخنقه يعنى مثلا انا لو كتبت الحلية حاجة صاعدة يعنى فا صول لا صول مثلا
وجه المطرب مزاج يعملها هابطة ينى فا مى رى مى مثلا هنا حايحصل نشاز
فيه حاجة تانية مهمة اسمها التصدير يعنى تقديم او تأخير حرف .. يعنى ممكن المازورة بادئة بنوار ممكن المطرب يغنيها سكتة كروش وكروش او العكس
هنا ممكن تتكتب وممكن ماتتكتبش حسب تقديرى يعنى ممكن تتكتب انت تحسها سهلة وفى لحن تانى ممكن تلخبطك ... ممكن وانت بتغنى تاخد نفس فى مكان او اى شىء بتعمله الموسيقى الشرقية مش جامدة محددة زى الموسيقى الغربية
بس الخلاصة ان اى نوتة انا بكتبها ما ينفعش تتبسط اكتر من كده لأن اللحن ممكن يتغير ... يعنى انا الشىء الحلو اللى بيحسب ليا انى لما بكتب نوتة سهلة لازم تكون ففى حدود خط احمر خطير هو انى ما العبش فى اللحن الاساسى .. لنى انا عادل صموئيل لعبت فى اللحن الاساسى يبقى اللى ماعزفوش مع الملحنين الكبار شخصيا يعملوا ايه ؟ وللعلم انا فيه نوت بضطر اكتب اجزاء فيها بتكون صعبة شوية لكن عشان اللحن ما يتغيرش ما ينفعش تتكتب غير كده واللى بيتعلم الاول بيبتدى بالنوت الاسهل وبالتدريج ربنا بيكرمه
مع اطيب تحياتى عادل صموئيل

[muhamadibra]

شكرا للاستاذ هيثم صالحي للاهتمام والنوته ماشيه معايا تمام كلها الا الجزء الاول يمكن كما تقول لأنني مبتدئ وتحتاج تمرين كثير وطلبي كان ان امكن التبسيط علي قدر المستطاع من استاذ كبير مثل ا عادل حيث انه اكيد مر بمراحل مختلفة في العزف - مثل الاستاذ عندما يدرس نفس المحاضره للطلبة ثم يلقيها للدراسات العليا - واشكرك مرة اخري الاغنية جميلة جدا هي ولا وعينيك كنت سأطلب تبسيط المقدمة التي تحتوي علي صولو العود
د محمد ابراهيم

[muhamadibra]

شكرا جزيلا ا عادل وشكرا ايضا ا هيثم وزادكما الله علما وخبره - طلبي كان لانني احب هاتين الاغنيتين وانا في السودان بدون معلم اعلم نفسي بنفسي علي العود منذ حوالي سنة ونصف من علي النت وكانت نوتات المنتدي اهم شئ استعين به واستفدت منه كتير جدا - وكذلك استفدت من الردود المختلفة واستمتعت بقراءة خبرات ا عادل بالذات حول الالحان ومع الفرقة الماسية - وهي مقدمات مهمة لمن هو مثلي بعيد عن المجال
د محمد ابراهيم

اخى العزيز
المشكلة ان فيه اغانى بتبقى سهلة فى الغناء والعزف واغانى بتبقى صعبة واغانى بتبقى صعبة جدا وهكذا
وانا لما كنت بشتغل مع العمالقة اكتشفت السر
ان الملحن بيعمل الاغانى السهلة عشان اى حد ممكن يؤديها والمتوسطة عشان الشاطرين ولكن الصعبة بتبقى صعب جدا على اى حد غيره يعملها عشان يبان انو متميز
يعنى هات لى مطرب وعلى فرقة يؤدى اغنية عش انت مثلا اكيد حاتحس انو مطرب فاشل مع انو ممكن يكون مطرب كويس الى حد ما لأن الاغانى دى بتحتاج مش بس قراءة نوتة ولكن مهارة عالية جدا جدا فى العزف
الصح ان هنا فيه مئات النوت انت الاول اشتغل على النوت الاسهل بس تكون حافظ الاغانى اصلا واركن الاجزاء الصعبة دى لما مستواك يرتفع يالتدريج ,, انا كمدرس موسيقى اصلا اهم شىء بالنسبة لك انت هو انجاز عدد اكبر من الاغانى
يعنى لما تاخد نوت تقدر تمشى فيها بعد 3 شهور مثلا حتكون عزفت عدد كبير من الاغانى احسن ماتمسك واحدة صعبة اعلى من مستواك بعد 3 شهور حتلاقى نفسك عامل حاجات قليلة وانا ما اتولدتش شاطر يعنى كنت مبتدىء وحاولت ودرست وتعبت
مع اطيب تحياتى

[عاصم المنشاوى]

أغنية "حدوتة "
من كلمات الفنان والرسام والشاعر والممثل والصحفى صلاح جاهين - ألحان سيد مكاوي

لو كنتي ست الحسن و الجمال
يكون أمير أحلام غرامك أنا
ليكي أول الحدوتة في الدلال
و انا آخر الحدوتة ليا الهنا

دقيت عليكي الباب كتير
رد الصدى و قال يا أمير
ما بينكم البحر الكبير
دقيت على الباب بالإيدين
رد الصدى و قال لي يا زين
بينك و بينها بلدين
أنا قلت لو بيني و بينها السما
مغرم بها و هي كمان مغرمة
و انا آخر الحدوتة ليا الهنا

آه من طريقك الطويل
و لا ليا غير قلبي دليل
عطشان يا مية سلسبيل
حالي يا ست الحسن حال
إرخي شعورك الطوال
خديني من حر الجبال
و ان ما لقيت عندك لقلبي دواه
لاعشق عيون الشمس و اهوى الهوا

صبرت لما الود بان
عملت انا تختروان
و حملت قلبي شمعدان
دوبت لك بحر الهوى
في كلمة هنقولها سوا
و نقول دا عنقود و استوى
و الناس تشوفنا تقول يا ست البنات
حدوتة آخرتها التبات و النبات و انا آخر الحدوتة ليا الهنا
*****************
فيه كلمة مش مفهومة ...وهى "التختروان" وهى دى صورة التختروان ياجماعة ...حاجة كده زى التاكسى
وسيلة نقل فى ذلك الوقت ...أى خدمة
شكرا اخى العزيز عاصم
بس التختروان ده اللى على جملين ده حاجة ملوكى
يعنى ده كان المرسيدس بتاعهم زمانها
بس اخطر حاجة فيه ان الجملين لازم يكون بينهم دوزان زى الوترين بتوع العود
لأن لو الجملين مش متوافقين مع بعض ف الحركة .. تخيل انت بقى
مع اطيب تحياتى عادل صموئيل

[عادل صموئيل]

الاخ العزيز المنير
انا اشكرك البرنامج وصل ومع الاسف انا اتأخرت انى اشوفه لسبب انا بتعامل على الهوت ميل يعنى اول ماكنت زمان بقتح الكمبيوتر بيتفتح مباشرة وبيظهر لو فيه رسائل على الايميل بيظهر يقول لى لك ؤسالة كنت اشوفها فورا
لكن لما نقلونا على برنامج سكايب ( اللى انا بعتبره فاشل ) او لأنه اصلا مش مجانى يعنى ماناخدش منو كل الامكانيات مش بيظهر موضوع ان لك رسائل عشان كده نادر ما بفتح الايميل
وانا اشكر الاخ العزيز المنير لنو خدمنى كتير فى كذا برنامج كان صعب احصل عليه وطبعا البرامج دى بتساهم فى انتاج النوت اللى انا بقدمها لكم ولازم كمان كلكم تشكروه
فيه مشكلة فى برنامج انكور 5,2 هى مش معطلانى دلوقتى لأن عندى نسختين ويندوز على جهازى وبشتغل كل شغلى على واحدة منهم وبجرب الحجات الجديدة ع التانية طبعا عشان ما اتعطلش
المشكلة انى سطبت برنامج انكور 5,2 طبعا انا عندى حاجتين ( والامر مفتوح ليكم كلم اللى يقدر او عندو حل للموضوع )
فيه نوت موسيقية اللى حابتدى اكتبها دلوقتى جديد ونوت قديمة كاتبها على نسخ انكور اللى كنت بستعملها قبلا
الجديد انو بيكتب اللغة العربية فى النوتة عادى يعنى انتم عارفين اقصد كل كلمة عربى انت بتشوفها على النوتة
لكن لما احب افتح اى نوتة مكتوبة على الاصدار اللى قبله بيطلع العربى مربعات ودى مشكلة علما بان اللغة العربية انا ظابطها جدا على الجهاز لو حد عنده فكرة ممكن يقول لنا مع اطيب تحياتى وزى ماقلت انا حاليا مش متعطل يعنى بشتغل على انكور 4,55 وشغال عادى على الطابعة الجديدة اللى اشتريتها
مع اطيب تحياتى