طلبات نوتة أ / عادل صموئيل الجزء الثانى

**اميمة68** · #1 06/11/2013, 17h40

اشكرك على كل عمل رائع تقدمة لنا واطلب منك لو ممكن اوبريت مصر بتحلم للفنان مدحت صالح ولك شكرى وتقديرى

الاخت العزيزة
اولا مرحبا بكى فى المنتدى
وطبعا مدرسى التربية الموسيقية زملائى لهم عندى منزلة خاصة وبالذات الناس اللى بتحب تقدم اعمال جديدة مش الناس اللى بتقعد طول عمرها تشتغل على خمس او ست نوت من اللى بتوصل لحد عندهم ويفضلوا يكرروها لحد ما الناس تزهق منه
تحت امرك لكن لو سمحتى ممكن تنزلى لى الملف الصوتى
مع اطيب تحياتى عادل صموئيل

**نور الصباح** · #2 06/11/2013, 18h03

احبائى
اقدم لكم من روائع الفنانة فايزة احمد
يامة ياهوايا
الاغنية دى عجبنى فيها كلامها ظريف جدا واحنا فى مصر ( بعكس اغانى فيروز او كلمات نزار قبانى ) بنفتقد هذا النوع كتير
مع اطيب تحياتى
SSSSSSSSSSSSSSSSSSSSSSSSSSSSSSSS

**عادل صموئيل** · #3 06/11/2013, 18h08

احبائى

اقدم لكم من اغانى فايزة ( وشكلها حاتبقى سنة فايزة )

على وش القمر

الاغنية دى اخدت منى تدوين نصف ساعة حد يقول ياه دى تبقى سهلة اوى فى التدوين اقول لو لأ شكلها سهل لكن فيها جمل بتتعاد عاملة زى المكرونة الاسباجيتى تلخبط فى التدوين يعنى الواحد بيبقى متعصب شوية
لأن الجمل مش محددة زى الاغانى التانية اللى عمال ادون فيها ببقى عارف انا فين دلوقتى طول الوقت الجملة مش بتتوه منى لأن شغل فايزة عادة بيبقى كل جملة مختلفة ممكن فى المقام او حرف زى ماتمشى فى شارع مبانيه مختلفة الشكل بتبقى عارف انت فين عن شارع كلو فيللات زى بعضها تتوه بينهم
طبعا اللحن ده مش لون فايزة ( وانا طبعا ماعرفش قصته لأن مافيهوش كمنجات ) يعنى حتى ما اعرفش اتعمل امتى
المطربين العمالقة كان حلاوة ادائهم بيبقى 50 % من الكمنجات تحت الصوت بتعمل بطانة .. وده الفرق الخطير اللى تحسو دلوقتى يعنى اللى بيغنى بيغنى على هوا مفيش لا سلطنة ولاطرب
فيه حاجة تانية انا حسيتها ( لأنى عشرين سنة مع فايزة حافظها ) فايزة كانت بتغنى مصرى اوى وتتكلم 80% مصرى مطعم ب 20% سورى بس مش محسوس اوى إلا اذا قعدت ترغى معاها شوية لكن كانت لما بتتخانق بتشتم بالسورى
لما تسمعها هنا تحس احلى حلاوتها فى المذهب لكن فى الكوبليه وبالذات الثانى انا حسيتها بتغنى عايزة تخلصه لأنو مش لونها ... يعنى فايزة تحب تقول الجملة 4 مرات وتقول الى بعدها 4 مرات بعدين تعيد الجملتين تانى يعنى هى بتحب تشبع غنا ومتخيل شكلها وهى بعد ماخلصت تسجيل الاغنية دى انها تخلصت من كابوس يعنى لأنها عشان مغيرة اللون انها ممكن ماتعرفش تغنى كويس زى ماهى عايزة ... وحاجة تانية بتغيظ فى الاغانى الموزعة اللزمات الصغيرة وسط الكوبليها لما بتركب على الغنا .. يعنى لو تلاحظوا فى الاغانى التانية ان اللزمات بتبقى منفصلة يعنى هى بتغنى واحنا بنرد عليها ... فى نوعية الاغانى اللى زى دى انا ببقى مش عارف اكتب الغنا ولا الازمة بضطر اكتب بين البينين لأن مش عارف مين اللى ممكن يستعمل النوتة ... يعنى ممكن انت لوحدك تعزف محتاج الغناء يكون متشبع واللازمة اللى من النوع ده تكون حاجة ثانوية وممكن ماتقولهاش ... وممكن النوتة دى تستعملها فرقة مع مطربة اهو ممكن مش حاتخسر يعنى

ومع اطيب تحياتى

**نور الصباح** · #4 06/11/2013, 18h37

احبائى
اقدم لكم من اغانى فايزة ( وشكلها حاتبقى سنة فايزة )
على وش القمر
SSSSSSSSSSSSSSSSSSSSSSSSSSSSSSSSSSSS

**غواص النغم** · #5 06/11/2013, 19h59

مرحبا استاذ عادل

اعتقد ان الكروان فايزة احمد كان عندها حلم ان تصل اغانيها الي العالمية واعتقد ان الموضة وقتها كانت كده هي طموح الفنانين للوصول للعالمية كان حلم بيراودهم فعمل حليم توزيع جديد لاغانيه مثل اهواك
فحبت فايزة ان تقدم نفسها في اغاني عالمية مثل داليدا مثلا
فعمدت الي التدرب على الصولفيج تدريب شديد حتى تتخلص من البحة التي في صوتها عند مدام رطل ((أكيد بتعرفها )) وحتى انها استطاعت ان تخفي الكثير من هذه البحة كما قال الناقد كمال النجمي وعاتبها على هذا الفعل وقال ان احلى مافي صوت فايزة هي البحة وهي كانت تعتبر ان هذه البحة عيب وليست ميزة في صوتها !!
ثم طلبت من سلطان ان تقدم الحان دون الربع تون وتكون سريعة وبدون اعادات فقدمت عدة اغاني من هذا اللون القصير السريع مثل على وش القمر ، احنا اصحاب ،ولانعرف من الذي ادخل هذه الفكرة في راسها حتى انها سجلت هذه الاغاني في التلفزيون على طريقة الاغاني الاوروبية ...ويعلق سلطان عن هذه الاغنيات بقوله :

لم تكن فايزة ضد التطور ولكن بشرط أن يتم بطريقة صحيحة. لقد تعرضنا للهجوم أنا وهي حين قدمنا مجموعة من الأغنيات القصيرة والسريعة مثل: "حبيتك وبداري عليك"، "إنساني" "دنيا جديدة"، و "على وش القمر" واتهمونا بإدخالنا الدرامز والآلات الحديثة، فماذا يقول من هاجمنا أيامها عما يسمعه اليوم؟ أعتقد أنها لو عاشت لقدمت كل ما هو عصري ومتطور في إطار الذوق الشرقي حتى لو استفادت من تكنولوجيا الغرب.

لفايزة اغنية جميلة كانت تتمنى ان تعيد غنائها وتعطيها حقها مرة اخرى لانها غنتها في بداياتها وهي اغنية النار القايدة او المعروفة بإسم اقول له ايه من الحان كمال الطويل ويبدوا انها كانت تريد من كمال الطويل ان يتشجع ويلحن لها مرة اخرى بعد انقطاعه عن التلحين لها ولكن لم يمهلها القدر ان تعيد غنائها لحن الطويل لفايزة ثلاث اغنيات النار القايدة واغنية انا اللي تنسانس انا واغنية ياما قلبي قال لي لا
هل فايزة احمد كانت تفكر في توزيع اغانيها القديمة وتعيدها مرة اخرى ؟هل كانت تحرص على تسجيل اغانيها الطويلة تسجيل استديو لان هناك عدة اغاني لها يوجد لها تسجيل حفل فقط فهل كانت تحرص ان تسجل اولا تسجيل الاستديو ثم تغني الاغنية في حفل كما كانت تفعل كوكب الشرق ام لا ؟

تحياتي

ملاحظة:

اغنية حدوتة كلمات صلاح جاهين الحان سيد مكاوي وغناء قنديل الغناء العربي محمد قنديل
موجودة بجودة عالية على هذا الرابط تفضل :
http://www.sama3y.net/forum/showpost...&postcount=511

***************
اخى العزيز
اشكرك على ردك وانا متفهم كلامك ولكن الموضوع اخطر من كده
لما يكون الفن عظيم جدا بيبقى حاجة حضارية او حلجة تراثية او حاجة تاريخية ومن هنا لازم نحافظ عليه كما هو
يعنى التطور بيبقى حاجة زى رشى الملح فى الطعام لها حدود وإلا ....
يعنى مثلا هرم خوفو لو انا عايز اطور فيه حاجة محظور المسه ولكن التطوير يبقى تمهيد المكان اللى حواليه بس برضو بحيث انى ما أغسرش المعالم الحضارية التاريخية
الفن الاصيل عامل زى الاكل الخاص بكل دولة يعنى بيبقى من تراثها يعنى عندنا فى مصر الملوخية مثلا ما اقدرش اطورها واحط عليها كاتشب او مايونيز لكن اقصى تصوير هو اضعها فى طبق اجمل او اخلى شكل المائدة جميل لكن مع التحذير بعدم المساس بالملوخية والتى يعرفها المصريين من مئات السنين
بالنسبة لفايزة الاغانى اللى انت ذكرتها دى تعتبر اسوأ اغانى فايزة ... يعنى انت هات 20 اغنية من اغانى فايزة التقليدية واسمعهم كويس حاتحس بعد كل اغنية بإشباع كأنك واكل ديك رومى .. ولو تلاحظ ان كل اغنية لها ابداع خاص جدا ومتميز جدا .. وانا فايزة كانت صديقة شخصية لى يعنى حاظها شخصيا ومش ممكن تكون طلبت من اى ملحن انو يعمل لها اغانى مافيهاش ربع تون ... يعنى فايزة كان لها منطقة خاصة هى الملكة بتاعتها فى العالم العربى واتحدى حد يطربك بهذه الدرجة فى العالم ولا حتى ام كلثوم ... المنطقة دى كانت بياتى الحسينى وبالذات نغمة السى نصف بيمول اللى تحت المدرج وتلاقيها فى معظم اغانيها انا لما بسمعها كانت بتسطلنى
يعنى كل مطرب عظيم له حرف منفرد كده ... اما بالنسبة للصولفيج ومدام رطل .. فايزة كانت بتعزف عود عزف رائع وفاهمة جدا جدا كل مقام لذلك لو تلاحظ ان كل اغانيها الطويلة فى كل جملة الجملة التالية بيبقى فيها علامة تحويل اما بتروح مقام تانى او بتلمس مقام وتلاقى النقلات دى سهلة وصحيحة وتنساب كالماء فى الجدول لن فايزة خبيرة فى المقامات .. وللعلم كانت بتشترك مع محمد سلطان فى التلحين يعنى زوجته وعايشه فى البيت وبالطبع بتشوفه وهو بيلحن لها واميد بتتحشر فى كل جملة .. ودى بيلاحظها اى مدون بيروح لهم البيت يدون لهم تلاقيه مش بيتعامل مع ممد سلطان وفايزة بتكون بتطبخ فى المطبخ ( ولبنى وبينك كان طبخها رائع روعة غناها ) ولكن بتبقى موجودة وتتكلم فى كل حرف بيمليه محمد سلطان للمدون على العود ... اما موضوع ان فيه اغانى لها حفلات فقط مالهاش تسجيل استوديو دى مستحيلة يعنى احنا عادتنا لازم اللحن يتسجل فى الاستوديو الاول بعدين الملحن بياخد نسخة من الشريط مع كلمات الاغنية ويسجله بأسمهم فى جمعية المؤلفين والملحنين بتاريخ اليوم .. عشان بعد كده ما يجيش حد يسرق اللحن ويقول ده بتاعى .. ولكن اختفاء التسجيلات دى ممكن يكون لخبطة فى مكتبة الاذاعة
او اللى بيعمل خريطة اذاعة الاغانى واحد مش بيفهم فى الاغانى اصلا ...
لما نيجى لكلمة العالمية ... انا اللى يشهرنى فى العالم هو الشىء اللى انا متفرد بيه مش اللى زى كل العالم مابيعمل ( دى كلمة خبراء ) يعنى لو فيه مسابقة طبخ وانا حشترك فيها ابقى معتوه لو اقدم لهم هامبورجر مثلا
لأن كل العالم بيعمل هامبورجر لكن اقدم لهم حاجة مصرى صميمة هم مايعرفوهاش
ولو اى حد المانى مثلا سمع اغنية على وش القمر بالنسبة له عادى ماهى زى اللى ىبيسمعو لكن لو سمع غريب يازمن مثلا ولا ياما انت واحشنى اكيد حايتجنن هو طبعا مش فاهم الموسيقى الغريبة دى ايه بس اكيد هايذهل من حلاوتها وانا حصلت معايا كتير يعنى عزفت مئات المرات قدام اجانب بتعمد اعزف لهم حاجة بياتى مثلا عشان يحسو انى مختلف وانا لو عزفت لهم حاجة زى الغربى بتاعهم مش حايحسوا بقيمتى
التطور زى ماقلت لازم يبقى رشة ملح يعنى مثلا ام كلثوم لما دخلت الجيتار عمل ايه حتة صغيرة تبين احنا اهه متطورين لكن باقى الاغنية تسمع ام كلثوم
اما كارثة اعادة تسجيل الاغانى بتوزيع حديث دى مصيبة استدرجوا فيها كارم محمود مثلا واعاد بعض اغانيه وكان الناتج زبالة وكمان خلوه يصورها فيديو ولبس باروكة وجاكيتات حمرا وكان شكلو زى الزفت يعنى قضى على تلك الاغانى ولا انكر عبد الحليم جربها مرة واحدة ولما سمع التسجيل امر بحرقه .. وما طلعش الا بعد وفاة عبد الحليم
مع اطيب تحياتى عادل صموئيل

**عادل صموئيل** · #6 07/11/2013, 17h20

احبائى

اقدم لكم من اشهر روائع تراث فايزة احمد

بتسأل ليه عليا

مع اطيب تحياتى

**salhi_haithem** · #7 07/11/2013, 19h15

السلام عليكم
حقيقة قمة المتعة أغاني فايزة وتشكر على الجهد الجبار و لو ممكن و عندك وقت أستاذ عادل ممكن تدون الأغاني الطويلة شوية لأنه فيهم موسيقى حلوة و أغاني ذو قيمة فنية مع كمية طرب مثل أغنية "خلينا ننسى"
أو أغنية " ايوه تعبني هواك " كلمات عمر بطيشه وألحان محمد سلطان
أو أغنية " نقطة الضعف " عبد الوهاب محمد ألحان محمد سلطان
و فيه أغنية " رسالة من إمرأة " كلمات نزار قبانى تلحين محمد سلطان
و فيه أغنية "حبيبي يا متغرب " كلمات عبد الرحيم منصور وألحان بليغ حمدي
و فيه أغنية " علمتني الدنيا " حسين السيد الحان محمد سلطان
و فيه أغنية " صعبان علينا " كلمات عبد الرحمن الابنودى الحان محمد سلطان
وفيه أغنية " بصراحه " كلمات مأمون الشناوى تلحين محمد عبد الوهاب
و فيه أغنية " لا يا روح قلبي أنا " حسين السيد و ألحان رياض السنباطي
و أختر ما شئت
مع أطيب تحياتي هيثم
عزيزى هيثم
اتفق معاك جدا ان فايزة بالذات اغانيها الطويلة كلها حلوة من اولها لآخرها يعنى وانا كنت بعزف معاها كنت بستمتع طول الوصلة الغنائية بعكس الحان اخرى طويلة بيبقى الحلو فيها نصفها الاول والباقى تحس انو متكلفت يعنى الملحن بيخلص باقى الاغنية وخلاص بإستثناء عبد الوهاب والسنباطى طبعا
والمقصد ان مش اى ملحن يقدر يلحن اغنية طويلة 13 او 14 صفحة وتفضل حلاوة الاغنية كامل اللحن ومحمد سلطان كان بيتميز بالميزة دى يعنى كل كوبليه بيبقى بنفس الحلاوة والقوة وبيساعده على ذلك حلاوة الكلمات اللى كان بينتقيها هو وفايزة بعناية فائقة ... ان شاء الله ادونهم كلهم قريبا بس لى عندك رجاء الاغانى بتاعة فايزة اللى انا دونتها فى الفترة الاخيرة معلش تتعب لما تكون فاضى وتحطها فى الفهرس
لأن الفهرس بتاعك ده انا بعتبره المرجع بتاعى لأنى من كتر التدوين ممكن انسى وادون الاغنية تانى لذلك لما بحب ادون اغنية برجع للفهرس بتاعك اولا
مع اطيب تحياتى عادل صموئيل

**سليم العباس** · #8 07/11/2013, 19h54

سؤال بمناسبة النوتات الجميلة للفنانة الكبيرة فايزة أحمد ، أستاذ عادل :

- في سورية و أظن في بلاد الشام عموماً لا تحظى الفنانة الكبيرة فايزة أحمد بشعبية مماثلة لغيرها من المطربات القديرات مثل وردة الجزائرية - نجاة الصغيرة - ميادة الحناوي - شادية .

و أنا سأقول رأيي في هذا كمستمع :
أعتقد أن مستوى الألحان التي قُدمت لفايزة أحمد كانت أقل قيمة من التي قدمت لوردة أو ميادة مثلاً ، لأن الملحن محمد سلطان لم يصل إلى مستوى محمد عبد الوهاب أو بليغ حمدي في كثير من أعماله ، و بالطبع هذا لا ينفي أن ألحاناً رائعة خالدة موقعة باسمه .
لو غنت فايزة أحمد نفس الأغاني التي قدمتها نجاة أو وردة أو ميادة ، لكانت حققت نجاحاً باهراً ، يتجاوز ما حققته بأشواط بعيدة .

أود معرفة رأي حضرتك ، وشكرا لك على منحنا فرصة طرح الأسئلة .

اخى العزيز
وانا اشركم على الاسئلة لأنها بتحرك جوايا كلام كتير مخزون وانا مش بكتب مقالات الايام دى بمعنى انى انا افتح موضوع واتكلم فيه لكن لما حد بيسأل بيبقى عايز يعرف معلومة وانا احب كده اكتر من انى اكتب كلام ممكن مايستهويش ناس كتير
انا طبعا كلامى يختلف عن كل الناس ( واكتر واخطر شىء الصحفيين اللى بيكتبوا فى الجرائد فى المواضيع الفنية اللى مش بيفهموا فيها ) وانا شخصيا عزفت مع كل المطربين دول .. عندنا فى مصر منبع الفن ومن اهم اسباب ازدهار الفن ان الجمهور عندنا زمان كان ذوقه وتذوقه عالى جدا جدا جدا .. والموضوع ده هى اللى بيشهر فنان او بيخفس بيه الارض بمعنى ان كان زمان لما بتشترى شريط بتختار مطربك المفضل من ضمن كذا مطرب دلوقتى بيشتروا الشريط وخلاص اى حاجة تعمل دوشة
لذلك لما نقيس على ذوق المصريين فايزة غنت ونجت وفرقعت والمصريين بيموتوا فيها واكرر كانوا بيحبوا نجاة وبيحبوا وردة لكن بيموتوا فى فايزة .. وكل عشر حفلات كنت بعزف فيهم كان واحدة لنجاة واتنين لوردة و7 لفايزة وده احصاء سنوات طويلة ... وللعلم كنا بنسافر دول عربية كتير مع فايزة وكان الجمهور بيبقى اكتر من خمسين الف متفرج وحيموتوا عليها واقول لك على سر ماحدش يعرفوا
انا مرة كان عندنا بروفة مع وردة فى الفرقة الماسية .. وكان فيه موضوع يتطلب انى اروح مع وردة بيتها اخد منها حاجة قالت لى اركب معيا سيارتى وبعدين السواق بتاعى يرجعك مكان سيارتك .. ركبت جنبها وكان السواق مشغل كاسيت السيارة على اغنية لقيتك فين بتاعة فايزة ( انا اعرف انهم ما بيحبوش بعض ) فوجئت ان وردة بتغنى معاها حافظة الاغنية وقال بصوت عالى الله عليكى يافيزة كذا مرة وياروحى عليكى يافايزة يعنى تحس انها معجبة بيها جدا
ولعلمك وردة وفايزة ممكن يكونوا قامات متساوية لكن ميادة الحناوى اقل منهم كتير طبعا ... اما ان عندكم فى سوريا بيفضلوا وردة وميادة اكتر انا تحليلى حاجة
ممكن يكون الشعور ده مش فى كل سوريا يعنى محافظات محافظات
كمان فيه حاجة عندنا فى مصر اسمها عقدة الجواجه يعنى لو فيه سلعتين واحدة مصرية وواحدة مستوردة المواطن بيشترى المستوردة لدرجة ان عندنا مصانع شرابات رجالى مثلا بتعمل التيكت اللى ع الشراب كلو مكتوب بالانجليزى الجهلاء اللى مايعرفوش انجليزى بيشتروه على انو مستورد وبيكون صناعة رديئة جدا
وفيه قول ماثور زمان : لاكرامة لنبى فى وطنه
زمان كان الافلام العربية بتاعتنا بيجيبوا ممثل من لبنان لو دور لبنانى فى الفيلم كان بيبقى حاجة زى الفاكهة .. وشعور زمان كنت بحسو وانا صغير لما كنت اشوف الأجانب فى الشارع كنت بحس انهم حلوين اوى مخلوقات جايين من الفضاء نفس الشعور لما باخد احفادى نقعد فى خان الخليلى بيشوفوا الاجانب بإنبهار كانهم معمولين من جاتوه مش مخلوقات زينا
ورأيى الشخصى فى محمد سلطان الحانه رائعة واقل سبب انو كان بيعمل الالحان دى فى عصر لسه عبد الوهاب والسنباطى بيلحنوا وفايزة غنت لهم من قبل واخيرا غنت وقدرت تهجر عشان الجمهور مايحسش ان الحانو اقل منهم
وآسف للإطالة مع اطيب تحياتى عادل صموئيل

**نور الصباح** · #9 24/01/2014, 19h44

الأخ الكبير والفنان العظيم الأستاذ
{ عـــــــــــــــــــــــــــــــــــــــــــــــــ ــــــــــــــــــــــــادل با شـــــــــــــــــا صموئـــــــــــــــــــــــــــــيل
سلام الله عليكم ورحمته وبركاته
لذا نرجو من جنابكم تدوين الأغنيات التالية احتفالا منكم و منا برحيل هذين الفنان العظيم وهى :
1 - النجمة مالت ع القمر فوق فى العلالى والملف الصوتى بالصفحة رقم 242 بتاريخ الجمعة الموافق 1 / 11 / 2013
وذلك امتدادا لاحتفالات نصر أكتوبــــــــر العظيم
احتفال العبور إلى بـــــــــر الكرامة وشمس الانتصار
وشكررررررررررررررررررررا
أخوكم
نور الصباح

**نور الصباح** · #10 27/01/2014, 15h04

مبروك علينا حل مشكلة المرفقات.
أخي العزيز الأستاذ عادل
أين يمكن رفع نوتة لولا الملامة؟
مع تحياتي وتشكراتي- فؤاد

SSSSSSSSSSSSSSSSSSSSSSSSSSSSSSSSSSSSSS

أخى الحبيب وصــــــــــديقى العزيز الفنان
فـــــــــــــــــــــــــــــــــــــــــــــــــ ـــــــــؤاد العــــــــــــــــــــــــــــــلمى
حمدا لله على سلامتكم وعودتكم إلى أحضان المنتدى الدافئة
ويسعدنى أن أقدم لكم نوتة الفنانة الراحلة (وردة )
{ لولا الملامــــــــــــــــــــــــــــــــــــــة }
تدوين أمير المدونين وسلطان مملكة التدوين
الفنان
عـــــــــــــــــــــــــــــــــــــــــــــــــ ـــادل باشــــــــــا صموئـــــــــــــــــــــيل
وشكررررررررررررررررررررا
أخوكم نور الصباح