Wind Waves مقطوعة موسيقية خفيفة

**sayed_lv** · #1 03/09/2013, 08h10

السلام عليكم و رحمة الله و بركاتة
وبعد شهور من التوقف عن الموسيقى بسبب الثانوية العامة و تنسيقها الذى لا يرحم
عدت ب مقطوعة خفيفة ارجو ان تنال اعجابكم
ملحوظة: هذا العمل مكتوب بالكامل على الكمبيوتر دون استخدام اى الات او ميدي كنترولر
http://snd.sc/15SHwVP

**Hisham Khala** · #2 03/09/2013, 13h33

اقتباس:

المشاركة الأصلية كتبت بواسطة sayed_lv

السلام عليكم و رحمة الله و بركاتة
وبعد شهور من التوقف عن الموسيقى بسبب الثانوية العامة و تنسيقها الذى لا يرحم
عدت ب مقطوعة خفيفة ارجو ان تنال اعجابكم
ملحوظة: هذا العمل مكتوب بالكامل على الكمبيوتر دون استخدام اى الات او ميدي كنترولر
http://snd.sc/15SHwVP

جميل جدا يا سيد

العبارة الاولي التي جعلتها خلفية فيما بعد كررتها كثيرا ، كان يكفي تكرارها مرتين علي الاكثر ثم أجعلها بعد ذلك خلفية
هناك بعض النغمات خبطت في بعضها و كانت صعبة علي الاذن و عندما تريد وضع Non Chord Tone ضعها علي النبر الضعيف ، و يمكن استخدام التنافر لأغراض درامية و لكن أعتقد أنه ليس في حالة هذه المقطوعة القصيرة
قمت بأستخدام الميتود Methods التي في كتب التمارين كثير و لكن لا مانع و هذه الميتود وضعت للعازفين لتدريبهم علي تتابعات بشكل معين سوف تقابلهم في حياتهم العملية ، أما عن الكمبيوتر فهو عفريت لن تفرق معه اي Pattern أكتب له خلطة من الازمنة و السكتات و خلطة من النغمات ذات الابعاد الكبيرة و سوف يقوم عزفها دون معاناة.

تحياتي لك

**sayed_lv** · #3 03/09/2013, 15h19

اقتباس:

المشاركة الأصلية كتبت بواسطة Hisham Khala

جميل جدا يا سيد

العبارة الاولي التي جعلتها خلفية فيما بعد كررتها كثيرا ، كان يكفي تكرارها مرتين علي الاكثر ثم أجعلها بعد ذلك خلفية
هناك بعض النغمات خبطت في بعضها و كانت صعبة علي الاذن و عندما تريد وضع Non Chord Tone ضعها علي النبر الضعيف ، و يمكن استخدام التنافر لأغراض درامية و لكن أعتقد أنه ليس في حالة هذه المقطوعة القصيرة
قمت بأستخدام الميتود Methods التي في كتب التمارين كثير و لكن لا مانع و هذه الميتود وضعت للعازفين لتدريبهم علي تتابعات بشكل معين سوف تقابلهم في حياتهم العملية ، أما عن الكمبيوتر فهو عفريت لن تفرق معه اي Pattern أكتب له خلطة من الازمنة و السكتات و خلطة من النغمات ذات الابعاد الكبيرة و سوف يقوم عزفها دون معاناة.

تحياتي لك

تحياتى لك استاذ هشام خلف
كلامك جميل و احب ارد علية جزئبة جزئية لان فى حاجات تاهت منى

بالنسبة للجملة الاولى كل مرة اتكررت فيها كان باسلوب مختلف قى العزف
و بالنسبة للنغمات اللى خبطت فى بعضها يعنى ايه النبر الضعيف

يعنى اوطى صوتها ولا انزلها فى البيز؟
و بالنسبة لكلام حضرتك عن كتب التمارين فانا مجربتش حتى اقرا ولا واحد منهم .. كل ما اعرفة عن المزيكا اما بالسمع او التجربة .. انا مدرستهاش باى شكل من انواع الدراسة .. كفاية عليا الثانوية و الجامعة فى المستقبل ان شاء الله هههههههههه

و شكرا لحضرتك على ردك الكريم

**عبد الهـادي** · #4 04/09/2013, 07h48

السلام عليكم
أستاد سيد
مادا سأقول لك انه عمل جميل للغاية
ما شاء الله عليك
بالمناسبة أنا قرأت ردك على الأستادة و الصديق الغالي هشام خلف
و لقد سألته عن النبر الصغيف و القوي
هو كلامه صحيح تماما في علوم الهارموني لازم توضع أصوات تألفية في الضربات القوية من الايقاع أو الميزان
فانتبه معي
لكل ميزان ضربات قوية و ضعيفة
متلا
4/4 تكون الضربة الأولى و التالتة ضربات قوية و الضربات الأخرى خفيفة (أنا عم بحكي يعني في الحقل أو المازورة الواحدة )
3/4 الضربة الأولى قوية و الباقي الضربات خفيفة
أتمنى تكون فهمت قصدي و استطعت أن أوصل الفكرة لك
أتمنى مراجعة كلامي من طرف الأستاد هشام خلف
تحياتي و خالص محبتي و تقديري
ننتظر جديدك أستاد سيد

**عادل صموئيل** · #5 06/09/2013, 23h07

اخى العزيز
مقطوعة رائعة وانا اكرر ياريت تحاول تتعرف على اى من مخرجى المسلسلات تعمل موسيقى لمسلسل وانا متأكد ان حايبقى لك شأن كبير
والمهم يعنى انا بحكم خبرتى لما بسمع اى عمل بحس بمدى خبرة اللى عامله لكن معاك الموضوع مختلف يعنى العمل ده مش عمل واحد فى ثانوية عامة ولكن واحد مخضرم سنين طويلة فى التأليف والدراسة وده شىء يحسب لك
اما بالنسبة لتكرار التيمة الاولى كذا مرة انا ليا وجهة نظر
طبعا انا احترم وجهات نظر كل الاخوة الاعزاء اللى سبقونى فى الرد
ولكن اسمعنى
طبعا المفروض ان اى مؤلف موسيقى لازم حتى لو حايتخصص فى الموسيسقى الشرقية لازم يسمع كتير كتير كتير الموسيقى الكلاسيكية ده لو حايؤلف اعمال موزعة
بمعنى ان مؤلفين الموسيقى الشرقية العظام بيعملوا اللحن ميلودى فقط ( او 95 % منهم وعندك عبد الوهاب مثلا )
واللى بيوزع بنفسه الحانة ده عدد قليل اوى ومن هنا لازم يدرس كل المدارس وبالطبع ابو التوزيع هو الموسيقى الكلاسيكية
وانت لو سمعت وركزت اوى فى الموسيقى الكلاسيكية بتلاقى الحركة فى اى سيمفونية فيها جمل موسيقية محدودة جدا يعنى حسب الصيغة ممكن تكون جملتين موسيقيتين فقط اسمهم A , B وجملة بتوصلك من سلم الجملة A الى سلم الجملة b ثم قفلة للحرجة بتكون عادة مستوحاة من احدى الجملتين دول والصيغة دى اسمها سوناتا الليجرو فورم وبتكون دائما الحركة الاولى فى السيمفونيات
المهم قلنا ان جملة a بتتعاد كتير جدا ييجى 500 مرة مثلا لكن كل مرة بتتقال بشكل وتوزيع مختلف
يعنى مرة تلاقيها مع الكمنجات بعدين تتلقفها احد آلات النفخ يعنى تلاقى الجملة عمالة تتناقل من مجموعة او عائلة آلات لأخرى يعنى دايما مسموعة مع اختلاف التوزيعات اللى معاها .. وهنا انت لما كررت التيمة الاولى كذا مرة بالعكس انا لقتها حلوة مش مملة لأن كل مرة سمعتها بشكل مختلف .. وعايز اقول لك حاجة خطيرة جدا جدا ( طبعا بحكم شغلى مع العمالقة ) انت بتعمل الموسيقى اولا للشعب المصرى .. الشعب المصرى مش بيفهم فى التوزيع بمعنى ان عشان المستمع يتذوق التوزيع لازم يكون دارس موسيقى وهارمونى .. وعشان انا اوصل لمستواه لازم اديه تيمة لذيذة وسهلة
يعنى تتفهم وتتحفظ بسرعة بعدين اكررها بتوزيع خفيف .. بعدين اكررها بتوزيع اتقل شوية ( يعنى ممكن اخدها على آلة تانية طبعا ) المهم تتدرج عشان تسحب المستمع بحيث يبقى متابع
يعنى اقول لك على سر .. فيه مؤلف شايف نفسو انو عبقرى يروح هابد جملة صعبة بعدين وراها جملة تانية وعليها توزيع كتير زحمة يعنى طيب المستمع لسه ماهضمش الجملة الاولى تروح مديه التانية بعدها التالتة بيبقى زى واحد اكل قطمة كبيرة جدا من ساندويتش حايزور ... والنتيجة انو ماسمعش حاجة يعنى لما تخلص المقطوعة مش حايحس الا انو سمع شوية خبط مافهمش منو حاجة
اقول لك على سر تانى ... فيه مؤلفين كبار دلوقتى بيعملوا تترات مسلسلات والمسلسلات دى اتشهرت لأن اولا المسلسل اتذاع ييجى 30 حلقة يعنى الجمهور سمعها وابتدا يتذوقها لما سمعها 30 مرة لما بييجى المسيقار ده يعملها فى حفلة الناس بتستمتع بيها اوى ليه ؟؟؟؟؟؟؟ لأنها حافظاها
لكن نفس الموسيقار الكبير ده ( زى عم خيرت مثلا ) لو قدم الموسيقى دى اول مرة فى حفلة ماحدش حايفهم منها حاجة إلا لو موجود واحد خبير فى الهاردمونى ممكن يتذوقها وهنا بيبقى الموسيقار كبير لكن اعلى من مستوى الشعب
يعنى ميزة عبد الوهااب واللى معاه ايه ؟ انهم كانوا بيعملوا موسيقى بيفهمها كل كل الشعل على اختلاف ثقافتهم
فيه كمان حاجة خطيرة جدا جدا ( ممكن الاكاديميين او الخبراء يختلفوا معايا ولعلمك بنختلف كتير )
زمان فى الثلاثينيات اول ماطلع عبد الوهاب كانت التأليف الموسيقى كلو فى قوالب يعنى لما تألف موسيسقى اما تكون سماعى او لونجا او بشرف .. الخ
السماعى مثلا بيقيدك لأنك لو خرجت عن القواعد الموسيقيين حايهاجموك وهنا لازم تعمل خانة بعدين تسليم بعدين خانة وهكذا
جه عبد الوهاب فى مخو اطنان من الموسيقى حس ان القوالب دى حاتقيده راح مكسر كل القواعد دى الاول طبعا اتهاجم لكن بعدين اتفهم وبقى كل اللى بعدو قلدوه وده كان السبب فى النقلة الموسيقية الرهيبة اللى حصلت من بعد الثلاثينيات
ولو عبد الوهاب ماعملش الثورة دى كنا لحد دلوقتى لسه عمالين نعمل سماعيات وعمر ما كانت ظهرت المقدمات الموسيقية الرائعة للأغانى واللى ممكن تعتبرها مقطوعة موسيقية مستقلة انا آسف للإطالة لكن العمالقة اللى اشتغلت معاهم بيعلموك حاجة انت تحب تعمل موسيقى رائعة ولا تلتزم بالقوالب ؟
طبعا ده رأيى الشخصى والموسيقى التأليف بيبقى احساسك ايهيعنى تآلف مثلا انت عامله جميل ممكن عايز تخليه بالطريقة الاكاديمية يطلع مش حلو
وللعلم لما عبد الوهاب كان بيألف عمرو ماكان بيفكر فى موضوع القواعد يعنى كان بيقول لك احساسه ايه
ولما كان بيحب يخترع حركة خطيرة زى مثلا يحط مقام غريب اوى او نقلة غريبة مش مستساغة اصلا ع الطبيعة هنا كان بيقعد يخترعها او يوظفها او يخليها تخضع للقواعد لكن دى بتبقى لعبة او حركة فى جملة واحدة وسط خمسين جملة بيعملهم بإحساسه
مع اطيب تحياتى عادل صموئيل

**عبد الهـادي** · #6 08/09/2013, 13h44

مرحبا أستادي الغالي عادل صموئيل
الحقيقة كلامك جميل جدا جدا
أشكرك جزيل الشكر و أتمنى يستفيد الأخ سيد من كلامك المهم و جميع أعضاء و أساتدة المنتدى متل ما استفدت أنا
و الحقيقة أنا كنت عملت تجربة بسيطة من زمان
أخدت فكرة موسيقية و اشتغلت عليها بالقواعد
بعدين أخدت نفس الفكرة و اشتغلت عليها باحساسي
فطلع الشغل حلو كتير (أحلى من الجملة الأولى )
و كمان بدي أضيف شغلة
هي بتتعلق بالموسيقى الكلاسيكة العالمية
يوجد قالب لتأليف يسمى قالب حر و فيه بيكون المؤلف حر تماما يعمل الى بدوا ياه
عادة يستعمل هدا القالب في تأليف القصيد السمفوني
و يستعمل في السيمفونية متلا في السيمفونية الأولى للعبقري بتهوفن تبدأ بهدا القالب...
و الحقيقة أنا لما باسمع للموسيقار عبد الوهاب بحس انوا الموسيقى الى بيعملها هي مع احساس تماما مش شغالة بقواعد لتطوير الأفكار الموسيقية ...
مع تحياتي و خالص محبتي و تقديري لكم جميعا

**عادل صموئيل** · #7 09/09/2013, 12h53

الاخ العزيز عبد الهادى
فيه فرق بين النمطية والقوالب الثابتة وبين التطوير لكن طبعا لما اللى بيعمل التطوير يكون موهوب وفاهم هو بيعمل ايه
والتطوير هو اساس الاختراعات فى كل شىء
بمعنى ان النمطية ممكن تفضل تعمل اى شىء بالشكل النمطى لمدة 300 سنة
ولكن التطوير بيخليك فى ظرف عشر سنوات تعمل انقلاب فى الاختراعات
فى الموسيقى العربية فضل انتاج القوالب فترة عشرات السنين لكن لما عبد الوهاب ابتدأ يطور كان المنتج فى سنوات قليلة مختلف ومبهر
يعنى مثلا كان زمان من قبل القرن العشرين لحد ما ظهر عبد والهاب المطرب لما بيغنى اغنية كان كل شغل الملحن هو الغناء وكانت الموسيقى شىء ثانوى يعنى ماكانش فيه مقدمة موسيقية يعنى كان بيسبق الغناء جملة موسيقية واحدة تكرر كذا مرة وهى فى مقام الغناء وكانت تسمى دولاب يعنى الفرقة بتكون حافظة كذا دولاب فى كذا مقام يعنى عندهم مثلا دولاب بياتى , لو المطرب حايغنى اى اغنية فى البياتى يعزفوا هذا الدولاب .. وبتوع زمان كانوا بيسموه يصلح بياتى يعنى يعمل سلطنة فى البياتى .. وعادة لما تسمع الاسطوانات القديمة بتاعة العشرينيات تلاقى الدولاب ده جملة تافهة مالهاش قيمة موسيقية عادة يعنى القانون بيقول حاجة ومعاه ناى وكمان بيقولوا زى ماهو بيقول لحد ما يوصلوا لقفلة فى مقام البياتى
بعدين اكتر تطوير حصل كان تأليف جملة موسيقية واحدة خاصة باللحن المعين واعطيك مثلا اغنية آه من لقاك فى اول يوم لأم كلثوم تلاقى الفرقة تعزف الجملة يمكن 30 مرة لحد ما ام كلثوم تجهز وتقف عشان تغنى
لكن لما جاء عبد الوهاب ( وانا بتكلم عن عبد الوهاب كمثال للملحنين اللى عندهم غزارة شديدة لتأليف الجمل الموسيقية بالإضافة الى تلحين الكلمات طبعا ) احس انو ممكن يعمل جملة موسيقية بعدها جملة تانية بعدها جملة ثالثة وهكذا
وبالطبع اللون الجديد لاقى اعجاب وقبول شديد من المستمعين اللى كانت نسبة التذوق عندهم عالية جدا .. فأصبح كل ملحن بعد ذلك يعمل مقدمة موسيقية احيانا متوسطة الطول واحيانا طويلة .. ولو تاخد بالك ان جمهور ام كلثوم كاندايما بعد انتهاءالمقدمة بيصفق بشدة وبإلحاح عشان تعيد المقدمة مرة ثانية واحيانا ثالثة
وانتقل التطور ايضا لموسيقى الكوبليهات يعنى بالتدريج اصبحت من الروائع
والخلاصة ان ممكن موسيقى يعمل مقطوعة ويلتزم بالقواعد كاملة لكن تطلع سخبفة مملة فى السمع , وموسيقى آخر موهوب فى خلق جملة حلوة يخرج عن القواعد والقالب ويعمل لحن يجنن
مع اطيب تحياتى عادل صموئيل

**sayed_lv** · #8 16/09/2013, 23h13

استاذى العزيز عادل باشا
لا اجد معانى و كلمات اصف بها شكرى لك على كلامك و على شرحك الواف لوجهة نظرك و على كلامك عن موسيقار الاجيال و انت قد تعاملت معه و عرفت اسلوبة "ودماغه" و عايز تفيد بالمعرفة دة كل الناس

.......
الاخ العزيز عبد الهادى
شكرا للتوضيح و على كلامك و تشجيعك و بالطبع سأحاول العمل برأى اساتذتى فى المرة القادمة ان شاء الله

**أحمد الجوادي** · #9 17/09/2013, 01h22

صديقي العزيز أستاذ سيد المحترم

لا أجد ما أقوله إلا ما قلته لك سابقا وهو أنك تحمل موهبة رائعة للغاية، وفي رأيي أتمنى أن تتخصص بالموسيقى، وأتمنى أن أراك يوما ما وقريبا من ضمن كبار الموزعين والملحنين في مصر وفي وطننا العربي كله.

خالص محبتي لك

أحمد الجوادي