طلبات نوتة أ / عادل صموئيل الجزء الثانى

**salhi_haithem** · #1 25/05/2013, 11h38

اقتباس:

المشاركة الأصلية كتبت بواسطة عادل صموئيل

احبائى
اقدم لكم من روائع عبد الحليم اغنية من العيار التقيل جدا

اليالى

مع اطيب تحياتى

السلام عليكم
شكرا جزيلا أستاذ عادل من أعماق القلب على تحفة الليالي وأدين لك بالمعروف لما تقدمه لنا من تحف جميلة و جليلة من زمن الفن الجميل و لو تكرمت أستاذ عادل علينا بنوتة ساعات ساعات التي طلبها أخي العزيز عمرو الهنداوي و خاصة هي من ألحان د. جمال سلامة و قد سبق و دونت و أبدعت في تدوين أعماله مثل أغنية محمد يارسول الله و أغنية مهما خذتني المدن وأغنية سلام الله ياطه وأغنية آمنة ام النبى وأغنية المصريين اهمه وأغنية المصريين اهمه و أغنية مصر مصر تعيشى يا مصر و أغنية الله الله ع المستقبل و أغنية احكى يا شهرزاد ألخ...
في رعاية الرحمن هيثم

**عاصم المنشاوى** · #2 26/05/2013, 07h39

hGw]rhx الأصدقاء الأعزاء

وعمنا الكابير قوى .....استاذنا عادل
...أنا كمان زى صديقنا الموهوب /سيد محمود...واحشنى جدا...ونتمنى فعلا ان نتقابل...

استاذ عادل ..أنا لما دخلت المنتدى لقيت طابوووور طوييييل قوى وزحمة ...وانا لو بأيدى والله كنت ساعدت...عالعموم بص حضرتك انا واقف اهو فى آآآآآآآخر الطابور ...ومستنى لما ييجى دورى ....ايه الطلب اللى معايا ده؟...لا ماتشغلش بالك يا أستذة ...دى أغنية "شريفة فاضل"...مش محمد منير (حارة السقايين...)...بكلماتها الشعبية من الحارة المصرية للمبدع حسين السيد...وتلحين الراحل الموهوب "منير مراد"....سنة1966...وبسبب الأفلاس بيغنوها سنة 2013 ...تخيّل حضرتك....!!!!!

اخى العزيز حمد لله ع السلامة
احكيلك قصة
زمان ايام المحوم عبد الحليم ... احنا كان حفلاتنا عبارة عن حاجتين .. يعنى الحفلات العامة اللى انتم بتشوفوها .. وحفلات خاصة يعنى واحد بيعزم اصحابه فى الفيلا بتاعته بيكون عدد المتفرجين مش اكتر من عشرين وبفلوسه طبعا عايزين يسمعوا اى مطرب او مطربة من اول ام كلثوم وانت نازل .. وفيه حاجة اسمها قعدة خاصة يعنى ممكن نروح مكان والمتفرجين بيبقى راجل ومراته فقط طبعا دى للأثرياء اوى والامراء يعنى عايز يسمع عبد الحليم مثلا وطبعا مركزه مايسمحلوش يوح حفلة مع عامة الشعب .. المهم فى يوم من دول كان امير سعودى عامل قعدة وماجر قاعة فى تانى دور فى فندق شيراتون القاهرة وجليب عبد الحليم والفرقة الماسية المتفرجين كانوا 3 اشخاص وقبل عبد الحليم كان كايب كام مطرب عشان لزوم تسخين القعدة
واثناء المطربين دول ما كانوا بيغنوا كنا احنا الفرقة الماسية قاعدين على جنب عاملين لنا قعدة كنا بنسمع المطربين دول كاننا متفرجين على ماييجى موع فقرتنا
طلع يغنى الرائع محمد عبده وكان لسه مطرب جديد وطبعا عجبنا اوى اوى وفجأة طلع محمد منير وابتدينا نسمع ونضرب كف على كف كيف هذا الشىء ينتسب الى الطرب
يعنى اولا انت لو سمعته بيغنى جملة فيها خمسين نغمة بيبقى فيهم 40 نغمة ع الاقل نشاز اما خاسة او زايدة او مش موجودة على السلم الموسيقى وبخلاف انو بيحزق ومتخشب كانو حط صباعو في فيشة الكهربا قبل مايبتدى يغنى
الخلاصة انك لو جمعت كل اغنيه من اول ما ابتدا لحد دلوقتى وحسبت كمية البهريز الموسيقى اللى فيها مش حاتطلع نص كوبليه من اغانى عبد الحليم ببساطة لن الملحن لما بيعمل لحن لعبد الحليم بيطلع فيه كل اللى جواه .. والملحن اللى بيعمل لحن لمطرب فاشل بيحاول انو ما يكشفوش يعنى بيعمل له اتفه لحن ممكن وبرضو بينشز فيه .. اما عن اغنية على مين دى معمولة لشريفة فاضل على انها منولوج مش اغنية عاطفية وزى ما انت قلت الافلاس الفنى يعنى الملحنين والمؤلفين الرصيد اللى جوا مخهم خلص فإبتدا اللى بيغنوا عملية للسطو على التراث وكل برغوت على اد دمه
المطرب اللى شايف انو مطرب زى هانى شاكر بيعيد اغانى عبد الحليم .. والكائن اللى مالوش وصف من عينة الكنج محمد منير بيدور على اى اغنية تافهة وللعلم الاغنية دى ما ينفعش يغنيها راجل لأن كلامه اصلا حريمى
لكن كلو كوم لما يطلع واحد حمار فى التليفزيون وبيتكلم عن عظمة مصر وفجأة قال مصر التى انجبت عبد الوهاب ومنير يانهار اسود نفسى اسألأ الحمار ده ايه وجه المقارنة يعنى ممكن تقول عبد الوهاب بيلبس جمزة ومحمد منير بيلبس جزمة
او عبد الوهاب بيشرب مية ومحمد منير بيشرب مية طيب ماكلنا بنلبس جزم وبنشرب مية ... زى ما واحد يقول لك فى كتاب معمول عن انجازات الرئيس ( بتاع جمهورية بمبوزيا الغربية عشان مادش يفتكر انى بتكلم فى السياسة ) انو اول رئيس بيصلى الفجر ... طيب صلاة الفجر دى حاجة بين الرئيس وبين ربنا يعنى حتعود ع الشعب بإيه ؟؟؟ مثلا يعنى فكرونى زمان بمسرحية لمحمد نجم بتاعة شفيق ياراجل اللى بيمشى فى الشارع وبيتكلم فى التليفون
مع اطيب تحياتى عادل صموئيل

**عادل صموئيل** · #3 26/05/2013, 12h42

احبائى
اقدم لكم تحفة من الزمن الجميل

القمح الليلة

هى مش صعبة اوى يعنى حاتتفهم بسرعة ان شاء الله
والجميل فيها ان الجمل بتتكرر كتير يعنى لما تتعب فى جملة شوية تبقى خلصت ربع اللحن
وناخد بالنا من السينيو والكودا عشان انا ماحبيتش اكرر الكتابة

عشان طبعا انا احب تاخدوا بالكم من اى شىء تسمعوه مش نسمع وخلاص
الملاحظ فى اللحن ده استخدام كوال الاوبرا يعنى البنات اللى بيغنوا او بيعملوا آهات بطبقات عالية جدا فوق المستوى
زمان قبل ثورة 1952 , كانت مصر تحوى عدد هائل من الاجانب من مختلف الجنسيات وفى مصر من زمان يعنى تلاقى كتير منهم مولودين فى مصر .. وتشبعوا بالحياة المصرية مع الاحتفاظ بنكهتهن الاجنبية طبعا ( لأن اهم حاجة فى الدنيا القومية واللى يفرط فيها لايستحق ان يعيش اصلا )
المهم كورال الاوبرا ده بيبقى مش ناس بتغنى زى فوزية ونبوية واخوتهم الكورال بتاع المصرى ولكن بيبقوا دارسين موسيقى على درجة عالية جدا جدا والورق اللى بتشوفهم ماسكينه ده مش كلام ولكن نوتة موسيقية مكتوب فوقها الكلام
وللعلم ايضا المطرب المصرى الملحن بيحفظه الاغنية على العود او بيديه شريط عليه الاغنية وهو بيحفظ منو ..
لكن المطرب الاوبرالى بيحفظ بطريقة مختلفة ... يعنى مثلا مطربة عايزة تغنى اوبرا عاتيدة مش حاتديب المقدس فيردى من الآخرة يحفظها وجايز ما يدوهوش اجازة ينزل كام يوم ويرجع تانى ولكنبتاخد نسخة من الصوت بتاعها اللى حتغنيه بيبقى موجود فيه النوتة الموسيقية مكتوب تحتها الكلام وبتقعد على البيانو تحفظ
مع اطيب تحياتى عادل صموئيل

**عاصم المنشاوى** · #4 26/05/2013, 15h45

Ha;v; أشكرك يامدرسة التدوين

أشكرك على حكاويك وقصصك الظريفة ...على ذكرياتك ونصايحك الجميلة ....

وعلى فكرة محمد منير له جمهور عريض جدا ...ومانقدرش نزعلهم ...لكن هو لو حطيناه على ميزان الطرب الحساس كميزان الدهب ...حيبقى فيه تحفظات عليه....لكن حضرتك سيد العارفين كتير جدا فى عالم الفن ( مسرح -سينما- غناء-تمثيل...ألخ) فيه حاجات كتير قوى مش منطقية ...زى لوحة فنية ...لسه متباعة ب40 مليون دولار ...والله عبارة عن خط ازرق فى نص اللوحة ...ههههههه...المهم عايزين نروح فرح الأميرة سوسن عند عمنا عم /أحمد عبدالله-نورالصباح-...يعنى حضرتك تيجى تركن عندى فى الهرم ونطلع بعربيتى بعد كده...وياريت يكون معانا الأستاذ عمرو الهنداوى واى صديق من الجيزة....وعايز أشكر ....الفنان السكندرى الموهوب /نزيه محمد على كتابة أغنية (حارة السقايين ) واللى عايزها هى موجودة فى صفحة 13 عند الفنان /نزيه محمد....برغم انى دورت عنده عليها ...لأنه عارف انه بيحب الحاجات البلدى بتاعة الحارة المصرية .....كل الشكرلكم جميعا....
http://www.sama3y.net/forum/attachment.php?attachmentid=279709&d=1326549464

**عادل صموئيل** · #5 26/05/2013, 20h10

احبائى
اقدم للأخ العزيز المجتهد ( وبلدياتى ) عزت شحاته مجموعة الترانيم اللى طلبها وانشاء الله تكون النوت حلوة وتمشى معاهم بسهولة ودعواتكم

لكن فيه ملحوظة انا كتبت الغناء بس مش فاهم الموسيقى لأن مافيهاش لحن لكن فيها فزلكة بمعنى ان عازف اورج بيلعب كتير اوى ومركب كذا صوت على بعض بطريقة فيها شوية غشومية لان الترنيمة ( او اى موسيقى او اغنية ) لما تتعمل بالطريقة دى تبقى تتسمع فقط لكن عشان حد يعزفها لازم من كل بد تبقى الموسيقى واضحة
والمشكلة الخطيرة دى وانا بتكلم على التعامل مع تلاميذ او ناس مش محترفين ان حتى انت لو عزفت المقدمة دى على مانوصل للغناء يكون المقام طار من اللى حايغنى ويغنى برة المقام
ولما نتكلم عن الغشومية والعبقرية يعنى تخيل انت مثلا سامع سيمفونية لبيتهوفن بيبقى فيها 12 صوت بيتعزفوا مع بعض لكن اللحن الاساسى بيكون واضح بحيث لا يدع اى مجال للشك
لكن لما تسمع توزيع وعايز اكتب الحروف كذا صوت مع بعض مش عارف اللى انا سامعها دى نغمة ايه يعنى اجرب صول تتطلع مش صول اجربسى تطلع مش سى لازم يتكتبوا كذا نغمة مع بعض وممكن برضو تطلع مش هى لأن عازف الاورج شاطر اوى وبيطلع كل الفزلكة اللى عنده .. والفزلكة دى كمان فيه مشكلة خطيرة لازم تفهمها
انو بيبقى جوا استدويو وعنده كذا تراك بيسجل عليهم
يروح عازف حاجة ويرجع الشريط يعزف حاجات عليها مختلفة كذا مرة ودى لو حد عزفها على اورج حاتطلع ناقصة حجات كتير لأن فيه 3 اورجات تانى مش موجودين
والعلاج : فى شغل المدارس والكنائس ( يإختصار مع التلاميذ اللى مش محترفين من خبرتى الطويلة احسن حاجة انك تعزف قبل الغناء الجملة الاولى من الكوبليه والللى حايغنى او حايغنوا يغنوا تانى مرة هنا تضمن التون يبقى مضبوط 100 % والاهم كمان عشان المستمعين ( يعنى كلهم مش خبراء موسيقى ) يعنى لما يسمع الجملة موسيقى حايلحق يفهم هو سامع ايه لما اللى يغنوا
مع اطيب تحياتى

**علي ثلاثة** · #6 27/05/2013, 12h15

أستاذ عادل
ألف شكر على هذه التحف
وخصوصا
القمح
لي ملاحظة طفيفة
وجدت في هذا الرابط

http://www.sama3y.net/forum/attachme...1&d=1161065119

مدونة خان الخليلي
وفي هذا الرابط

http://www.sama3y.net/forum/attachme...7&d=1161065448

مدونة
نانا
وهذه الملاحظة هي-
كلا المدونتين عمل واحد-
وأرجح أن تكون المدونة لمعزوفة
نانا
والسهو وارد في تكرار المدونة
أو وضع عنوان غير مناسب
وإن كنت أميل إلى تكرار المدونة
لأن الصورتين أخذتا من نفس الكتاب
ولا داعي لتكرار مدونة مما جاء فيه
وشكرا

اخى العزيز
المشكلة دى بتحصل من عدم الخبرة فى اسماء المقطوعات الموسيقية لموسيقار محدد
او الشريط اللى دون منه اختلط اسمها على اللى مسجل الشريط لأن مؤلفات عبد الوهاب كتير جدا
ولكن هناك مشكلة فى المراجعة ايضا يعنى لو اللى عمل الكتاب شخص واحد المفروض انو يراجع حاجة زى دى
مع اطيب تحياتى عادل صموئيل

**عاصم المنشاوى** · #7 27/05/2013, 13h41

الفنان / على ثلاثة

هذه المقطوعة الرائعة بالفعل هى ل (نانا) ...وقد لحنها عبد الوهاب ...وأطلق عليها اسم نانا تيمنا وغزلا فى زوجته فىما بعد

"نهلة القدسى".....وليست خان الخليلى

**nessreen** · #8 27/05/2013, 15h36

اقتباس:

المشاركة الأصلية كتبت بواسطة عادل صموئيل

احبائى
اقدم لكم تحفة من الزمن الجميل

القمح الليلة

هى مش صعبة اوى يعنى حاتتفهم بسرعة ان شاء الله
والجميل فيها ان الجمل بتتكرر كتير يعنى لما تتعب فى جملة شوية تبقى خلصت ربع اللحن
وناخد بالنا من السينيو والكودا عشان انا ماحبيتش اكرر الكتابة

عشان طبعا انا احب تاخدوا بالكم من اى شىء تسمعوه مش نسمع وخلاص
الملاحظ فى اللحن ده استخدام كوال الاوبرا يعنى البنات اللى بيغنوا او بيعملوا آهات بطبقات عالية جدا فوق المستوى
زمان قبل ثورة 1952 , كانت مصر تحوى عدد هائل من الاجانب من مختلف الجنسيات وفى مصر من زمان يعنى تلاقى كتير منهم مولودين فى مصر .. وتشبعوا بالحياة المصرية مع الاحتفاظ بنكهتهن الاجنبية طبعا ( لأن اهم حاجة فى الدنيا القومية واللى يفرط فيها لايستحق ان يعيش اصلا )
المهم كورال الاوبرا ده بيبقى مش ناس بتغنى زى فوزية ونبوية واخوتهم الكورال بتاع المصرى ولكن بيبقوا دارسين موسيقى على درجة عالية جدا جدا والورق اللى بتشوفهم ماسكينه ده مش كلام ولكن نوتة موسيقية مكتوب فوقها الكلام
وللعلم ايضا المطرب المصرى الملحن بيحفظه الاغنية على العود او بيديه شريط عليه الاغنية وهو بيحفظ منو ..
لكن المطرب الاوبرالى بيحفظ بطريقة مختلفة ... يعنى مثلا مطربة عايزة تغنى اوبرا عاتيدة مش حاتديب المقدس فيردى من الآخرة يحفظها وجايز ما يدوهوش اجازة ينزل كام يوم ويرجع تانى ولكنبتاخد نسخة من الصوت بتاعها اللى حتغنيه بيبقى موجود فيه النوتة الموسيقية مكتوب تحتها الكلام وبتقعد على البيانو تحفظ
مع اطيب تحياتى عادل صموئيل

الف شكر ليك استاذى الغالى وميرسى على المعلومات اللى حضرتك بتقولها لينا من ايام زمن الفن الجميل

**عادل صموئيل** · #9 27/05/2013, 15h55

احبائى
اقدم لكم من تراث ام كلثوم القديم اوى

على بلد المحبوب

مع اطيب تحياتى

**عمرو الهنداوي** · #10 27/05/2013, 21h16

أستاذ عادل

دليل المقام في على بلد المحبوب يبدو وكأنه فيه خطا...
ارجو حضرتك التصحيح ان وجد

كل التحية

اخى العزيز
فعلا فى السطر الاول فقط نسيت اخلى ال لا نص بيمول فى الدليل
وانا بحب الناس الصاحيين
وانا عدلتها والف شكر وطبعا خليكم معايا
مع اطيب تحياتى عادل صموئيل