طلبات نوتة أ / عادل صموئيل الجزء الثانى

**وائل علوي** · #1 07/02/2013, 06h14

اخواني واصدقائي الاعزاء
تحية طيبة لكم اينما كنتم
وتحية للاخ والاستاذ الكريم عادل صموئيل على كل مجهوده وبصمته الفنية في المنتدى لانه لوحده يمثل مدرسة فنية كبيرة
ما رايكم فيرائعة نجاة اسالك الرحيل من اجمل ماغنت لعبدالوهاب هل تتفقوا معي ان تكون في الجدول؟؟ نشوف تصويتكم ,,,,
مع خالص تحياتي

**عزت شحاته** · #2 07/02/2013, 10h15

استاذى الجميل / عادل صموئيل
صباح الفل والورد والتمر حنه
مزنوق يا باشا ف الاشراف والتدريب على (ورشة غناء) بالثقافة مطلوب فيها مونولوجات وموشحات ودويتوهات واغانى وموواويل
- اعشم ف نوتة مونولوج اسماعيل ياسين
( عينى ع الفن ياعينى علينا )
( وعلى فكرة دا حالنا فعلا اليومين دول - بقينا بنقبل اى شغل واى حاجه وبنتلهف على اى سكة - استرها علينا يارب دا احنا غلابه )
---
ومعلهشى يا باشا طلبين مره واحده
لو ينفع دويتو ( تعالى اقولك )عبد الحليم وشادية
===========
وليك كل الشكر والتقدير والعرفان
وربنا ما يحرمنا منك
انا وكل مدرسين ومحبين الموسيقى

**nessreen** · #3 07/02/2013, 22h15

استاذى الجميل / عادل صموئيل
اشكرك على مجهودك وتعبك معانا بس ارجوك عاوزة نوتة مصر شالت فوق طاقتها لامال ماهر محتاجاها ضرورى فى ظروف البلد دى لانى مطلوب منى حفلة ومش قادرة اقدم الاغانى العادية **مش حاساها** علشان كده عاوزة النوتة دى ضرورى ولك جزيل الشكر

**piano_piano_d** · #4 08/02/2013, 16h01

مُـــنـــتــــــــــــداي المُــــــــــفَــــــــضــــــــــــل .. غبتُ عـــنـْــــــــــك كثيراً من الوقت .. شكراً لكل القائمين على العمل بالمنتدي وأخُص بالشكر الأستاذ المُحترم أ/ عادل صموئيل لما يُقدمة للمنتدي من تُحف وتراث جميل ، وعُذراً لأني لستُ مُتابعة للأعمال الجديدة بالمنتدي .
أرجو من سيادتكم بذوقكم الرفيع أغاني للأفراح mp3 ليمكن تشغيلها في القاعة .

**nessreen** · #5 12/02/2013, 13h55

اقتباس:

المشاركة الأصلية كتبت بواسطة nessreen

استاذى الجميل / عادل صموئيل
اشكرك على مجهودك وتعبك معانا بس ارجوك عاوزة نوتة مصر شالت فوق طاقتها لامال ماهر محتاجاها ضرورى فى ظروف البلد دى لانى مطلوب منى حفلة ومش قادرة اقدم الاغانى العادية **مش حاساها** علشان كده عاوزة النوتة دى ضرورى ولك جزيل الشكر

بلييييييييييز يا جماعة محتاجة نوتة آمال ماهر ضرورى ((مصر شالت فوق طاقتها)) ارجو من استاذعادل تدوينها لى

**عادل صموئيل** · #6 12/02/2013, 16h04

اقتباس:

المشاركة الأصلية كتبت بواسطة nessreen

بلييييييييييز يا جماعة محتاجة نوتة آمال ماهر ضرورى ((مصر شالت فوق طاقتها)) ارجو من استاذعادل تدوينها لى

انا تحت امرك يانسرين وتحياتى لشعب بورسعيد البطل
بس محتاج الملف الصوتى وتحت امرك
مع اطيب تحياتى عادل صموئيل

**عمرو الهنداوي** · #7 12/02/2013, 18h03

اقتباس:

المشاركة الأصلية كتبت بواسطة عادل صموئيل

انا تحت امرك يانسرين وتحياتى لشعب بورسعيد البطل
بس محتاج الملف الصوتى وتحت امرك
مع اطيب تحياتى عادل صموئيل

يامصريين امال ماهر

**عادل صموئيل** · #8 12/02/2013, 22h03

احبائى
فى اشد ايام مصر سواداً من 7000 سنة اقدم لكم
مصر شالت فوق طاقتها

للفنانة امال ماهر
انا بحب جدا امال ماهر لأنها بالذات اللى لو كان الزمن الجميل فضل زى ماهو كانت حاتبقى امتداد فنانى الزمن الجميل
يعنى زى ما فايزة ووردة ونجاة وكلهم كانوا امتداد اللى قبلهم لكن مع الاسف الهاوية اللى حصلت خلت اى حد ماشى ف الشارع وطلع فى دماغه يغنى يروح مغنى ويبقى نجم .. واكتر حاجة بتجننى ان اى حمار ينهق تلاقى المتفرجين الشباب يصرخوا من الاعجاب مش فاهم ... يعنى ما مشيوش فى شوارع وشافوا عربيات كارو وشافوا الحمير بتنهق ويسموعها ويستمتعوا بصوتها ببلاش كده ويوفروا ال 500 جنيه تمن التذكرة ,,, ده كمان لو عجبو نهيق حمار معين ممكن بالموبايل بتاعو يسجل له شوية نهيق على ماقسم كده ويتمتع بيهم مع نفسه فى البيت
النشيد ده اكتر حاجة عجبتنى فيه هى ضخامة التوزيع يعنى زى اناشيد زمان اللى تسمعها تحس بالمدافع والدبابات يعنى ايام الحروب كانت الاناشيد دى بتولع الجيش والشعب وبالذات ايام بورسعيد المجيدة الخالدة كان الراديو بيبث الاناشيد دى وكأنك ولعت نار فى الشعب وكانوا بنزلوا على الاعداء والستات بالذات بأيد الهون وبغطيان الحلل وادوات المطبخ خلوا الانجليز والفرنسيين يجروا زى الارانب وقالوا احنا نقدر على الجيوش والبنادق لكن ايد الهون وغطيان الحلل ( النحاس بتاعة زمان ) مش الالومنيوم بتاع دلوقتى كان العسكرى الانجليزى ياخدلو غطا حلة نحاس من دول يتقلب عسكرى شطرنج بس المشكلة ان العسكرى احمر والشطرنج ابيض واسود يعنى كمان مش حاينفع عسكرى شطرنج ... بس انا واحد صاحبى قال لى ( بس ده سر ماتقولوش لحد ) ان العساكر اللى اخدوا غطيان الحلل دول بعد كده كانوا بيوقفوهم فى صالات البولنج والناس تضرب عليهم بالكورة اللى زى البطيخة
وده السبب فى انتشار صالات البولنج فى حوارى وشوارع انجلترا وفرنسا والسبب ايه : ستات بورسعيد ربنا يجعل كلامنا خفيف عليهم ضحكنا
نتكلم فى الشغل شوية الاخت العزيزة نسرين والاخواة الاحباء مدرسين الموسيقى اللى يحبوا ينفذوا النشيد ده
علامة تافى فى الاناشيد الحماسية مش بتبقى متصلة لجاتو يعنى كروش بوانتيه ودوبل ولكن عشان تبقى عسكرية بيبقى فيها فاصل اما اعتبرها انها كروش دوبل بوانتيه نقطتتين يعنى وتريبل كروش او كروش بوانتيه وسكتة دوبل كروش وكروش
والسبب ان علامة التافى فى الاناشيد الحماسية لو اتعملت لجاتو بيبقى الغنا مايع مش حماسى
طيب حد لمض يسألنى طيب انت ماكتبتهاش ليه كده وخلصتنا ووفرت الشرح اقول له : انا اهم حاجة عندى السهولة فى الكتابة وهى كده سهلة مستوى ابتدائى لو كتبت التافى زى ما بقول حاتبقى شكلها صعب وغلس ( مع انها هى هى )
مع اطيب تحياتى وادعوا لمصر لحسن مصر بتضيع ...........................

**وائل علوي** · #9 14/02/2013, 10h32

اقتباس:

المشاركة الأصلية كتبت بواسطة وائل علوي

اخواني واصدقائي الاعزاء
تحية طيبة لكم اينما كنتم
وتحية للاخ والاستاذ الكريم عادل صموئيل على كل مجهوده وبصمته الفنية في المنتدى لانه لوحده يمثل مدرسة فنية كبيرة
ما رايكم في رائعة نجاة اسالك الرحيل من اجمل ماغنت لعبدالوهاب هل تتفقوا معي ان تكون في الجدول؟؟ نشوف تصويتكم ,,,,
مع خالص تحياتي

الاخوة الاعزاء تحية طيبة
الظاهر مفيش ولا واحد بيحب هذه الرائعة !!!!!!!!!

**عزت شحاته** · #10 15/02/2013, 22h22

استاذى الجميل / عادل صموئيل
اللسان عاجز ع الشكر
على نوتة ( تعالى اقولك )
وف انتظار مونولوج ( ياعينى ع الفن )
وربنا يخليك للموسيقى والموسيقيين
والغلابة اللى زى حلاتى