وجبة رائعة من الفنون
بارك الله فيكم
ويسعدنى ان اشارك معكم ببعض كلماتى
قليلة الأصل
قليلة الأصْـــــل بتسوّد حياة جارها
وتسيئ لكل البلد ولألف بيت جارها
وتشوّه المحترم واللىّ ساكن جارها
تمشى ف طريق اللبط من جهلها ترقص
وكلامها كله عبط من غير طرب ترقص
حركات على وشـّها من غير كلام ترقص
تشـْبه لِـبغله بترفـُصْ لو تفــوت جارها
يامعاند الناس بأىّ أساس تبيع غيرك
وتنسى عيبك وعينك بصّه على غيرك
فى الزحمه تهرب وترمى الحمل على غيرك
باصص لفوق فى السما وكبير على المخاليق
وكأن طينتك عجب مش طينة المخاليق
والشرّ منــّك سيول بيغرّق المخاليق
وتلاقى قلبك يضيق مايساعش يوم غيرك
(عديم الرأى)
لو يوم تصاحب عديم الرأى هايضرّك
ويهين كرامتك فى وسط الخلق ويضرّك
وان جه يفيدك يخونه الفكر ويضرّك
وان مرّه جه يمدحك من جهله هايضرّك
تعمل معاه الجميل وف ظرف يوم ينسى
فى الخيبه فكره سديد وعلى المفيد ينسى
بدل ماتقعد تحفــّظ فى الغبى ينسى
ياعم انسى العسل لو أكله هايضرّك
(أنا والفشار)
ياعم بطــّل بكشْ دايما علينا تسيح
الكيل طفح والمرار فى معاملتك بيسيح
والبحر ناشف ومن كدبك تملىّ يسيح
عمـّال تبعتر كلام بين البشر تساويه
والكدب عندك مزاج واخد عليه تساويه
يشبه كلام الليل بالسّمنه لو تساويه
ساعة ماتطلع عليه شمس النهار بيسيح
طول ما انت مبسوط مراتك تخاف منك
وتشيل مداسك وتجرى بيه ورى منك
وكلمتك لو حديد تبقى حليب منك
طول ما انت مبسوط وعندك مقدرة وصحة
تمشى وراك كيف تمرجى او طبيب صحة
وان خسْ مالك ومنك ولــّت الصحة
تجيب عيلتها وتيجى تاخد العزال منك
رد: امثال من الموال والمربعات فى الفن الشعبى
العرض الشجري