طلبات نوتة أ / عادل صموئيل الجزء الثانى

[جوليانا]

السلام عليكم ورحمه الله وبركاته

استاذى الفاضل عادل
عايزه راى حضرتك في الشغل
انا هامسك مع المسابقه العاديه التربيه الفكريه وانا بصراحه مش عارفه ابتدى منين ولا اعمل ايه
عايزه حضرتك تفيدنى في الموضوع ده الموجه الاول قالى اغانى اطفال بسيطه
بس انا مش عارفه المهم انا عايزه حضرتك تساعدنى بصفه حضرتك موجه اول وانا طالبه عند حضرتك ممكن
وشكرااااااااا مقدما

الاخت العزيزة
طبعا الموضوع مفتوح لكل المدرسين تشترك معاكى فيه
انا دلوقتى ممكن اقول لك ادخلى على اى مشاركة من مشاركات اخى العزيز هيثم هو عامل فهرس لكل النوت اللى انا دونتها
انزلى فى الاواخر حتلاقى حاجات اطفال كتير وحاجات سهلة شوفيها بعدين نتكلم
مع اطيب تحياتى عادل صموئيل
بعد ما كتبت وقفلت افتكرت حاجة
عايز اقول لك على سرخطير اولا خلى بالك ان فيه مدرسين بيكونوا مش عايزين يشتغلوا ف بيستهبلوا ويستعبطوا ويقولوا مش عارفين حاجة
يعنى الفرق بين مدراس التنمية الفكرية والمدارس العادية ان التنمية الفكرية التلاميذ فيها بيقعدوا زمن طويل يعنى طول عمرهم فى المدرسة ( مش سنوات محددة زى العادى )
وبعدين مخلوطة على بعضها يعنى مفيهاش مستويات يعنى كلو مسستوى واحد والمقطوعة الموسيقية بتعزفها المدرسة والعيال بيبقوا زى الباند يعنى كل واحد ماسك آلة وبيملا الفراغات بأسها شغل ممكن ... ومفيهاش مستويات يعنى تلاقى واد طول الباب اطول من الناظر وبيمسك كاستنيت
حتى الاناشيد بتبقى فى اقل الحدود عشان مخارج الالفاظ بتبقى عندهم طايرة
وطالما التلميذ بيبقى مع المدرس 12 سنة او اكتر المدرس بيشترى دماغه .. يعنى بيبقى عندو منهجين للمسابقة واحد السنة دى وواحد السنة اللى بعدها وبيكرر فيهم طبعا الموجه والموجه الاول بيبقى عارف كده وبينى وبينك كده احسن ليه ؟
عشان المدرس بيتعب جدا معاهم عشان يحفظوا الحاجة لذلك بيستعملها تانى وتالت لحد آخر العمر وبالطبع لجنة المسابقى ليها اللى قدامها .. يعنى بيروحوا 50 ادارة مش حايفتكروا ان ده اتعمل فين وامتى وبينى وبينك معظم الشغل الاختيارى ( اللى مش المسابقة المفروضة ) بيتكرر كتير جدا جدا .. يعنى اول حاجة تروحى المدرسة دى وتشوفى عاملين ايه السنوات الماضية واكيد حتلاقى شغل يكفيكم سنوات كتير قادمة ( منه فيه ) وبرضو انا معاكى يعنى نتشاور وبرضو الموضوع مفتوح لكل المدرسين الاحباء اللى يحب يقول رأيه او ينزل حاجة او حتى يتعلم
مع اطيب تحياتى كمان