طلبات نوتة أ / عادل صموئيل الجزء الثانى

[عادل صموئيل]

احبائى
اقدم لكم اغنية من اروع الاغانى الوطنية

يا رب بلدى
واشكر الاخت العزيزة بيانو بيانو انها فكرتنى بيه
والاغنية دى فيها اولا ميزة مهمة جدا لمدرسين الموسيقى انها بتحتوى على ادليب ,,, وانك تنفذ غناء على ادليب ده طبعا يعتبر نقلة كبيرة جدا جدا فى المعزوفات المدرسية

اما انطباعى الشخصى عن الاغنية دى يعنى الحاجة اللى تتعمل لكن تحس فائدتها بعد 45 سنة
بمعنى ان الاغنية دى اتعملت تقريبا فى اوائل الستينات ( ايام العز ) يعنى كان كل الناس مبسوطين والاخبار هادئة والناس عايشة فى جمال ايام ثورة جمال عبد الناصر ... وكانت كلمات الاغنية دى يعنى حب زيادة شوية للوطن
لكن النهاردة محتاجين للأغنية دى ونصرخ يارب بلدى
وربنا يستر
مع اطيب تحياتى

[عادل صموئيل]

احبائى

اقدم لكم موسيقى التتر بتاع
المسلسل التركى

سيدة المزرعة

المسلسل ده انا اتفرجت على جميع حلقاته ال 130 ... يعنى بقى بينى وبينه عشرة
هو مازال شغال على قناة الحياة مسلسلات

انا حبيت الموسيقى دى وحبيت انكم تعزفوها
فى حاجتين لفتوا نظرى ليها
اولا : ان التوزيع ماشى مع اللحن الاساسى وده يفرق معاك لما تعزفها انك بتعزف اللحن كله لكن لما بيكون التوزيع مختلف انت بتعزف جزء من اللحن واحيانا بيبقى ناقص جدا
ثانيا فيه حاجة اتعلمتها من عبد الوهاب وهى انك تعمل او تلاحظ او تتجع عكس الناس ما بتعمل
هنا تلاحظوا آلات النفخ صوتها حنون جدا وناعم جدا مع ان صوت الات النفخ اصلا فى استعمالها الطبيعى جهورى جدا يعنى بتبقى زى صفارة القطار .. لكن الفن انك ازاى تخليها تدى العكس بتاعها
مع اطيب تحياتى

[عادل صموئيل]

احبائى
اقدم لكم رائعة كمال الطويل ونجاة

عيش معايا

هى انطلبت الابوع الماضى وكان المفروض انى ادونها قبل كده بوقت طويل بالذات عشان انا عزفت فيها وعارف ادق تفاصيلها
ومن ذكرياتى عن الاغنية دى ان كانت نجاة عندها مشكلة مع الفرقة الماسية وكانت تاركاها فترة وبتشتغل مع فرقة تانية
ولكن كمال الطويل طبعا اصر انها تعمل الاغنية دى على الفرقة الماسية .. ووقف احمد فؤاد حسن وقال لنجاة قدامنا هنا بيتك ... بالطبع كمان كانت عودة كمال الطويل للتلحين لنجاة بعد غيبة طويلة ... واستايل اللحن تحسو انو كمال الطويل نيو لوك ...
ومن ذكرياتى ايضا اننا عزفناها مع نجاة فى تونس فى مهرجان قرطاج
مع اطيب تحياتى بس اهم حاجة خدوا بالكم من السرعات