احبائى
اقدم لكم من روائع الفنانة وردة وعبد الوهاب
انده عليك بالحب
طبعا الاغانى الكبيرة جدا دى لازم بيبقى لها اما قصة او موضوع
وانا بستغل الفرصة انى عزفت فيها عشان اقول لكم كلام ما بقاش حد على قيد الحياة يحكى لكم المواضيع دى واللى بعتقد انها تهم معظمكم
والقصة تبدأ من عند ام كلثوم وبالذات مع دخول عبد الوهاب الى امبراطورية ام كلثوم
يعنى الاغانى الطويلة واللى كانت بروفاتها والإعداد لها بيستغرق وقت مش اقل من شهرين
وطبعا زى ماكررت كتير مش عشان الفرقة تطلع اللحن ولكن عشان اللحن بيكون اصلا شىء واثناء البروفات الملحن العبقرى بيفضل يغير فيه يعنى يشيل اجزاء ويزود اجزاء , وبيخترع عبقريات فى الصولو وعبقريات ايقاعية واهم شىء زى ماقلت عشان اللحن يطلع مالوش اى شبيه ... والسمة المتيزة ان عازفين فرقة ام كلثوم هم هم عازفى الفرقة الماسية .. كان اعمال الفرقة المسية لازم تتنظم اثناء الفترة دى بحيث ماتعطلش ام كلثوم .. وبعد وفاة ام كلثوم وانتقلت عدوى الالحان الكبيرة الى عبد الحليم وفايزة ووردة كانت لازم تتنظم اعمال الفرقة الماسية يعنى لو لحن كبير لعبد الحليم وبيستغرق نفس الفترة .. بيشتمل 90% من اعمال الفرقة الماسية للتفرغ للحن ده بإختصار من اجل ان العازف بيعيش متفرغ دهنيا ونفسيا للحن ده .. لما يرجع الكلام للأحان اللى انا عزفتها .. اودونتها وعزفهتا .. حنلاقى ان كل لحن من دول احتل فترة من شهرين لثلاث شهور من حياتى .. وانا اليوم بدون الاغانى دى بتذكر ايلم اللحن ده وايه الاحداث المهمة اللى حصلت فى حياتى خلال الفترة دى ..
ومن 3 ايام انا كتبت لكم حاولوا تسمعوا اللحن على قد ماتقدروا لأن اللحن بيبقى مش مجرد انك تقراه وتعزفه ولكن اللحن فيه احاسيس كتير ومشاعر اكتر ولازم انك تعزفو جزء جزء
بس لما تكون سامعه كويس اكيد العزف حايطلع احلى اكتر
فيه من الحاجات المهمة جدا والخطيرة فى التدوين ( وده درس مهم للمدونين الجدد ) اخراج النوتة .. يعنى امتى تعيد كتابة الجملة وامتى تعمل مرجع وامتى تعمل سينيو
لكن لما نيجى عند الالحان الكبيرة جدا دى ( واللحن ده انا بعتبره من اكبر الالحان ) حساباتك بتتلخبط .. يعنى انا هنا كاتبه فى 22 صفحة ولو ما تعبتش نفسى فى موضوع الاخراج كان ممكن يبقى 30 صفحة ... فيه ميزة خطيرة من مميزات عبد الوهاب بالذات ولو ركزت تلاقيها فى كل الحانه الكبيرة .. انه فى اى كوبليه بيبتدى من مقام بيعمل جملة وممكن بعد كده يغير المقام او الايقاع يعنى بيعمل انقلاب .. وبيستمر الكوبليه وبيستمر الشقاوة اللحنية ولو تلاحظ انو بيبقى بعد جدا عن المقام اللى ابتدى بيه الكوبليه .. بعدين بييجى فى جزء معين وعايز يعيد من اول الكوبليه ... هنا ما ينفعش مرجع لأنك عملت كذا مرجع فى نفس المنطقة
احنا فى الفرقة المسية عملنا حاجة اسمها مرجع احمر وده اخترعه الاستاذ الكبير نصر عبد المنصف وده استاذى فى التدوين .. بس مش بحب استعمله هنا لأنو ممكن يلخبط المبتدئين
او على الاقل محتاج انى اكون موجود شخصيا مع اللى حايعزفوا .. بستعيض عن الموضوع ده بإنى اعمل سسينيو لكن ممكن تحصل مشكلة خطيرة ان بعد تريبل سينيو ما اقدرش اعمل اكتر لذلك السنيوهات فى الكوبليه التانى خاصة بيه فط انا عملت تنويه لذا لازم انك قبل العزف تشوف النوتة وتشوف السنيوهات رايحة منين لفين
ولما نتكلم ازاى عبد الوهاب بيرجع لأول الكوبليه انو بيعمل جملة صغيرة جميلة جدا جدا وخطورتها او قيمتها اللحنية والعلمية انها على صغرها بيبقى فيها نقلة لحنية من المقام اللى وصل له للمقام اللى فى اول الكوبليه ... المشكلة الاخطر ان فى الإذاعة لما بيعملوا اختصار للأغنية عشان الوقت بيشيلوا الاعادات دى ومن ضمنها الجمل الجميلة دى وانا بعتبر ده خسارة فادة للموسيقى لأن الجملة الصغيرة دى احيانا بتبقى مدرسة موسيقية ... لكن من حسن حظكم انى انا موجود ... يعنى الجملة دى اكيد زمان عزفتها 500 مرة وتعلت فيها وبحس انها حرام تضيع لذلك انا بحرص على كل فتفوتة فى اللحن .. والخطورة كمان ان اى مدون غيرى ماعاصرش المرحلة دى انو يدون الاغنية من التسجيل المختصر وطبعا هو معذور بيدون اللى سامعه ... لكن انا حتى لو سمعت التسجيل المختصر ببقى عارف ان فيه حاجة هنا وببحث عنها عشان زمان انا كنت بعزف قدام عبد الوهاب والشىء اللى كسبته من العمالقة انى لحد اللحظة دى بحس انى مازلت بعزف قدامهم يعنى حرام انى اضيع اى جملة حتى ولو كانت صغيرة لأنه هو نفسه ممكن يكون قعد يخترع فى الجملة دى فترة طويلة
اترككم مع النوتة مع اطيب تحياتى
مافيش لازمة للإقتباس عشان كاتب كتير
رد: طلبات نوتة أ / عادل صموئيل الجزء الثانى
العرض الشجري