رد: مزيكاتى فى صفحاتى
في البداية ما كنتش اعرف ان كتاب مزيكاتى فى صفحاتى من تأليف عمنا محمد الالاتي
فتحت الكتاب لقيته 542 صفحة .. اتخضيت !
و لكن الصفحات كلهت مكتوبة ب خط كبير مريح جدا لعيون الواحد
محدش يتخض من الحجم
و الكتاب عبارة عن كوكتيل في البداية دروس موسيقية سريعة و شرح بسيط جدا و معاه صور .. بس باسلوب السهل الممتنع
بعدين شرح للمقامات الشرقية و تمييز الفوارق بين السلالم العربي و الغربي و الترادفات بينهم .. و ب نفس اسلوبه السهل الممتنع
و بعديها نبذة عن الفارق بين الملحن و الموزع و المؤلف الموسيقي يدل عن فهم و خبرة
و بعدين سر خطير ازاي في كيفية الخروج من جمود الارتام الموضوعة مسبقا و ازاي تم التحايل علي البرامج ( دي مش شطارة و بس ! دي انا بعتبرها صياعة مصريين و حد فاهم هو عاوز ايه و ايه اللي ناقصه و يكمله و يحسن كمان من لا شيء ! ) برافو عليك يا محمد بيه يا الاتي .. ملعوبة
ثم نيجي بقي للضحك كله ... مش ضحك تريقة لا سمح الله !
تحليلات الاغاني القديمة الكلاسيكية موسيقيا ..
و لكن ضحك في التحليلات .. الراجل دمه خفيف جدا و بيشرح و شغال عادي كأن مفيش حاجة و يقوم رامي نكتة او قفشة تخليك تكسر ملل المصطلحات الكتيرة و المهمة في نفس الوقت و مينفعش يشيل اسم مقام او تحويلة .. كنت فقط اتوقع لتكتمل الصورة ان التحليل يكون مرفق بنوتة و نعلم علي النوتة و نقول هنا راست و هنا كورديللي و الخ .. و ان كان دة لا يقلل ابدا من الجهد اللي اتعمل .. تحليلات جميلة و مفيدة و دروس موسيقية بحق الكلمة
و اللي عجبني بقي اكتر في التحليلات .. لم يتم مناقشة صوت المطرب و لا معاني الكلمات .. لأنه تحليل موسيقي للموسيقي ذات نفسها و نقد و مدح للملحن
انا نزلت الكتاب النهاردة .. و معرفتش اسيبه غير لما اخلصه كله من كتر ما هو جذاب و جميل و دمه خفيف
الجميل في الكتاب برضه انه مكتوب باللغة العامية المصري بتاعتنا .. مش عربي و نحوي و التزام باللغة ( مع الاحترام للغة العربية )
تحس من الكتاب ان الكاتب قاعد معاك شخصيا و بيحكيلك الحدوتة في استرسال و مش عاوز تسيبه
استاذ انور .. شكرا للمساهمة بالكتاب .. كتاب جميل
استاذ محمد .. شكرا علي الكتاب
مجرد اقتراح لحضرتك يا محمد بيه .. اذا قرأت مشاركتي
ليه سيادتك ما تديش الكتاب لدار نشر و يقوموا بطباعته و نشره كنسخة تجارية في المكتبات المختلفة .. منها دا يجيب ل حضرتك عائد مادي و الحاجة التانية ان الناس تقرا الكتاب خصوصا ان البعض لسة مش بيستخدم انترنت و ليه بيعتمد علي الكتب المباعة التقليدية
جرب ..... مش ها تخسر حاجة
و لكل الاصدقاء في المنتدي .. ارشح الكتاب للقراءة
و شكرا للجميع
|
العرض الشجري