ياخساره ع الفلاح

**سعدالشرقاوى** · #1 15/05/2012, 08h25

(ياخساره ع الفلاح)

ياعم يافلاح سلــّمها للمولى

ماتقولش يوم حارتاح والدنيا فى مزاوله

نفذ الرصيد عندهم مافاضلش لك رنّه

والباقى سٍنـّه وتنسى انك تبع دوله

,,,,,

الزرع صابه العفن ومافيش تمن للفول

ولمّا حكم الزمن خلاك فى يدْ فلول

يادموع على مخدتك ومغطياك بلوتك

حاتقول لمين شكوتك ياقلة المسئول

,,,,,,

صيف الغلابه ابتدا والقطن مش مزروع

والمصنع اللى اشترى بنجر ماهش مقلوع

الجاز خلاص اتمنع واتجمّد المحصول

والرز مش مشتول علشان تموت م الجوع

,,,,,,

جيـبت الكيماوى شكك والسجن ع الابواب

حتى التقاوى بسكك عجّزت وانت شباب

ولا حدْ سائل عليك فى الشعب والشورى

وان جيت فى صوره يلاقوك باصص فى خُرم الباب

,,,,,,

الميّه متسمّمه والكهربا سرّت

والكلمه متكممه لم جات فى يوم قرّت

ايه اللى مانع نشوف العدل فى دقيقه

لمّا الحقيقه جرت من توبها واتعرّت

,,,,,

قلاعيّه مالكه البقر والأكل فيه مكروب

والليل مابان له قمر والبيت صبح مخروب

لاعملت مرّه اعتصام ولا اشتكيت حالك

ولا يوم عيالك شفوهم يحدفوا بالطوب

,,,,,

بطــّل تلف السواقى واشتغل عاطل

وبلاش تروّى ف شراقى الحق بالباطل

مالكش ذكرى فى برنامج مع مرشح

يهمه صوتك ويوم ماتعوزه بيماطل

,,,,,,

على جثــّة الفلاح كل الاسود هاجمه

يمكن وجود حضرته بـيْسبّب الأزمه

يايكون وجوده الاساسى ف تأسيس الدستور

يايغور فى آخر الطابور ان كان مالوش لزمه

,,,,,,

**Tarek Elemary** · #2 15/05/2012, 10h23

صوت الحق
جبين بعرق
و بشكل أرق
بتتكلم

بصوت مكتوم
و بدن محموم
حاسس بهموم
و ببتألم

الله ينور يا شاعر

**محمد الشافعى احمد** · #3 26/05/2012, 11h50

يا عم يا فلاح عالساقية غنى وقول
يا اللى كلامك باح بالسر .. والمأمول
ازرعها صدق وخير تحصدها قمح وفول
اصل العشم فى الله بينور المحصول ..
وان بت يوم عطشان عمر العطش ما يطول

مع حبى وتقديرى للاستاذ سعد والاستاذ طارق على الكلام الجميل

**رائد عبد السلام** · #4 15/07/2012, 17h55

عمنا الجميل
صاحب الصوت الشعري المميز
سعد الشرقاوي
لما أشوف اسمك علي قصيدة ده معناه ختم الجودة والتميز

آآآآآآآآآه يابيرم زمانك !

والله أقولها بلا أدني مجاملة

ماشاء الله علي موهبتك
أيها الشاعر الذي يقطر موهبة ومصرية .