سيد درويش (نوتة) ‏

**guest** · #14 10/07/2012, 17h58

سيد درويش هو ابو الموسيقي المصرية .. و ابو الموسيقي العربية
عمره الفني 6 او 7 سنوات و بس القيمة الفنية اللي سابها غيره معملهاش في 60 او 70 سنة
صاحب مدرسة البساطة المتناهية لدرجة تعقد !
مصري مصري مصري من ساسه ل راسه .. خرج من العباية التركية اللي كانت مسيطرة علي الموسيقي ايامه , و محدش عرف يرجعه
اتولد في اسكندرية 1892 .. و توفي في 1923
ناس بتقول انه بيتهوفن الشرق
و هو قال علي نفسه انه مش اقل من فيردي
انا شايف انه احسن من الاتنين دول عشان هو كان مصري اصيل يرسم ملامح شخصية الموسيقي المصرية و كل اللي بعده ساروا علي خطاه
..
اولهم محمد عبدالوهاب اللي تأثر ب سيد درويش ( ايامها كان لسه مش مشهور و اسمه محمد البغدادي )

أنا مش هواة تدوين الاغاني .. بس بعمل كدة اذا كنت محتاجها لنفسي في شغل أو توزيع أو تحليل لحن

بس قلت اشارك معاكم ب نوتة ( يا سلام سلم علي النسوان )
الاغنية دي كلمات بديع خيري ( رفيق درب سيد درويش )
غناء سيد درويش و حياة صبري ( يقال انه كان بيحبها جدا و كانت هي ملهمته )
الوارثين هو اسم تاني للاغنية منعا للبس

كلمات الاغنية ظريفة جدا
اذكر منها

نعرف جغرافيا ونحوي وحساب وحاجات تراللي
خمسة في تسعة بستاشر وباريس في الوجه القبلي
بونجورنو ده فعل مضارع مفتوح على البحري تمللي
و
كفانا بس نعيرها قال ايه عاملين بكالوريا
والواحدة في طبخة نابت عايزالها سبع الكخيا
مابدال التكنولوجيا يدوهم طبخالوجيا
وكلها لهجة لوجيا وأومور أونطالوجيا

كلمات عبقرية سابقة اوانها .. لا يمكن تكون مكتوبة في 1918 ! يعني من 94 سنة !
لحن بسيط و جميل جدا في مقام النهاوند .. و هي دي عبقرية سيد درويش الجمال و البساطة
شكرا