طلبات نوتة أ / عادل صموئيل الجزء الثانى

[عاصم المنشاوى]

الصديق / عزت شحاتة

الميعاد ح يكون الساعة ستة بعد الضهر ...بتيقى بداية الطراوة وقبل زحمة رواد المقهى ...لأنه المكان المفضل للفنانين والمثقفين ...

الصديق الجميل عم أحمد الأمير "نور الصباح "..
أعتذر لك بشدة ...أنى مش حقابل حضرتك ...ونييجى مع بعض الأوبرا ...أنا ح آجى بالمترو ...لأنى أضطريت لبيع سيارتى من مدة لمواجهة أعباء الحياة بعد انهيار السياحة فى مصر ....لكن زى ماشرحت لحضرتك ح تركب مترو الأنفاق من المنيب وتنزل محطة الأوبرا ...مفيش اسهل من كده...وبرضو معاك ع الموبايل...

اشوفكم الأربعاء ان شاءالله الساعة 6 مساءا -كافيتيريا بوتشيللى بدار الأوبرا

[عادل صموئيل]

احبائى
انا ما اقدرش اتأخر على عمرو هنداوى ده حبيبى ... يعنى لعلمكم معظم البرامج اللى بتسهل لى شغلى ليكم اخدتها من عند عمرو
انا كمان حاجى بالمترو لأن من ساعة الثورة مش بقدر انزل بالعربية وسط البلد والتميز ان فيه محطة للمترو عند الاوبرا
وعشان تبقى الصورة واضحة فيه مترو تحت مترو
يعنى مترو من حلوان للمرج بيمر بمحطة رمسيس وتحته مترو من شبرا للجيزة وده اللى بيروح محطة الاوبرا
يعنى كل اللى مش من سكان القاهرة يركب مترو شبرا الجيزة فى اتجاه الجيزة وينزل فى محطة الاوبرا
الوصفة سهلة اوى ولما تلقى نقلة لفت تعرف على طول انك تهت
مع اطيب تحياتى

[armendo]

المشاركة الأصلية كتبت بواسطة عادل صموئيل

احبائى
انا ما اقدرش اتأخر على عمرو هنداوى ده حبيبى ... يعنى لعلمكم معظم البرامج اللى بتسهل لى شغلى ليكم اخدتها من عند عمرو
انا كمان حاجى بالمترو لأن من ساعة الثورة مش بقدر انزل بالعربية وسط البلد والتميز ان فيه محطة للمترو عند الاوبرا
وعشان تبقى الصورة واضحة فيه مترو تحت مترو
يعنى مترو من حلوان للمرج بيمر بمحطة رمسيس وتحته مترو من شبرا للجيزة وده اللى بيروح محطة الاوبرا
يعنى كل اللى مش من سكان القاهرة يركب مترو شبرا الجيزة فى اتجاه الجيزة وينزل فى محطة الاوبرا
الوصفة سهلة اوى ولما تلقى نقلة لفت تعرف على طول انك تهت
مع اطيب تحياتى

ودى وصفه سهله ودى وصفه هايله
حمدا لله على السلامه يا مولانا وحشتنا
مع ارق تحياتى
ارمندو

[guest]

استاذ عادل /

أنا مش عارف وضع هذه الكلمات في موضوعه المناسب ؟

أنا عاوز اسأل سؤال واحد ..
حضرتك كنت بتفكر في ايه .. أو كنت فين و انت بتلعب أغنية ( تلات سلامات ) .. انا كنت بدور علي الاغنية ... معرفش وصلت ازاي ل تسجيل حضرتك للاغنية دي و حتي معرفش هي فين في المنتدي .. بس حظي الحلو بقي لحقت انزلها

سؤالي هو .. ايه كمية الاحساس المرهف و الفن الخالص دة والعزف من غير فزلكة و القوس مظبوط علي الشعرة و و و..

الله يسامحك يا عادل بيه .. عزفك شديد الحس ابكاني و خلاني انسي كل معاناتي اللي شوفتها في مصر و خلاني اهج منها .. وخلاني افكر جديا في الرجوع ليها من جديد

انت مش بس ملك التدوين

انت ملك الاحساس بدون منازع
اخى العزيز
طبعا اشكرك على كلامك الجميل .. هو الموضوع بيتكون من كذا عنصر .. اول حاجة ان الموسيقى الغربية بيبقى كل الاحساس مكتوب فى النوتة يعنى لو صفحة قراها احسن عشر عازفين فى العالم لو سمعتهم مش حاتفرق ده احساس مين ولا ده صباع مين غير لما يكون مكتوب على غلاف الشريط او الاسطوانة
يعنى اقول لك حاجة تضحك وانا طالب فى الكلية كانت طبعا دراستى موسيقى كلاسيكية كان لما تعجبنى مقطوعة جميلة واحط احساسى فيها كنت بتشتم من الاساتذة لأنى كده بكون خالفت حاجة فى النوتة ... يعنى كان زملائى بالطبع مش قد شطارتى كان فيهم ناس ميح يعنى بس لو التزم بالنوتة وانا ما التزمتش يدوه درجة احسن منى ... للكن فى الموسيقى الشرقية بعد الشطارة اهم شىء الاحساس
يعنى لما تسمع ام كلثوم فى اغنية وتسمع حد تانى بغنيها تحس كانك بتاكل حلة بامية قرديحى مش من غير لحمة ولكن من غير بامية ... لأن الموضوع اللى بيشدك فى ام كلثوم مش بس قدرتها الكبيرة الخارقة ولا اللحن الحلو ولكن احساسها ... وتلاحظ انها لو اعادت الجملة عشرين مرة كل مرة بتقولها بإحساس احلى ... وعندنا فى مصر انت بتعرف العازف لما تسمعه يعنى نقول دع صباع الحفناوى او فلان ... واهم حاجة الإضافة اللى بيضيفها العازف يعنى مثلا فى حملة عازف بيحسها عايزة حلية سحبة صاعدة وعازف تانى بيديها الحلية سحبة هابطة .. وامتى العازف بيعزف سهل وامتى بيقول حاجة او حلية صعبة ... واهم شىء واخطر شىء عشان انا عزفت بمفردى قدام كل العمالقة انا بمعايشتهم عرفت هم بيحبوا الجملة تتقال ازاى .. يعنى دلوقتى كل العازفين الجداد اهم حاجة عندهم الفزلكة واستعراض التكنيك لو عبد الوهاب سمعهم كان ضربهم بالنار ... هو عامل لحن لازم انت تعزفو زى ما هو عامله وزى ماهو عايزه ... بعدين بصمتى انا او احساسى انا بيبقى حاجة زى رشة الملح او كمية السكر فى كوب الشاى .. يعنى تؤدى الغرض لكن لا تتلف اللحن
مع اطيب تحياتى عادل صموئيل