ها اعترف

[سعدالشرقاوى]

(ها اعترف)

مظلوم ولازم اعترف

دا الدّم فى عروقى هرب

والاعتراف سيد الدليل

أحسن ما اجادل وانضرب

وانطق وأقرْ بتهمتى

وأنفد بعمرى وجتــّتى

لسّه حا خاف على سُمْعتى

دا الفاعل الأصلى هرب

ماقدّاميش غير لاعترف

احسن ما اجادل وانضرب

,,,,,

أمرك يابيه قولىّ أعمل ايه

انا اصلى محتاج الادب

فين محضرك أمضى عليه

من غير ما اشوف اللىّ انكتب

العمر عدّا وشعرى شاب

والصحّه مش حمل العذاب

اكتب سؤالك والجواب

وبلاش تدقــّق فى السبب

خلينى أوفــّر كلمتى

دا الفاعل الأصلى هرب

واصبرخلاص على بلوتى

أحسن ما اجادل وانضرب

,,,,

انت اللى ف ايدك كل شئ

والشرطه برضه ف خدمتى

مين يسألك عذبته ليه؟

او يسألك على جسّتى

ياعم خلــّصْ فى الكلام

خليك على نفس النظام

آهى أىْ عيشه والسلام

زىْ الغريب فى دولتى

برئ ولازم أعترف

دا الفاعل الأصلى هرب

واصبرخلاص على بلوتى

أحسن ما اجادل وانضرب

,,,,

[ام مدحت]

نعم يا شاعر التوته
الاعتراف سيد الادله
ولكن كنا نتمنى ان تنتهى
هذه الصفحات من تاريخنا
لكم التحية