طلبات نوتة أ / عادل صموئيل الجزء الثانى

[سليم العباس]

لا علاقة لي بالتدوين لا من قريب ولا من بعيد لكن بعد النوتات الجميلة التي استفدت منها في هذا المنتدى الجميل وبالأخص هذا القسم ... خطر على بالي تدوين أغنية بسيطة ، أرجو لمن يمتلك الوقت لتقييمها و إبداء ملاحظات عليها ( أعتقد أنها كثيرة ) .. الأغنية للفنان نصري شمس الدين بعنوان ليلة المحطة و اللحن للأستاذ الياس الرحباني.

أخوكم سليم العباس.

[عاصم المنشاوى]

لأصدقاء

صباح الخير عليكم
من حظنا الجميل وجود كواكب جميلة تقوم بالتدوين وتخليد أغنياتنا...منهم على سبيل المثال لا الحصر....القنان محمد السويفى - دكتور طارق- دكتور وسام- دكتور نيقولا-والفنان السكندرى "نزيه محمد...وآخر من أنضم لهذه الكوكبة الصديق سليم العباس ...والمفروض ان نحييه ونشجعه ...وطبعا لاننسى الموهوب الصاعد الواعد"سيد محمود"....وأدعوا له لأن أمتحانات الثانوية العامة-المؤهلة لدخول الجامعة - ستبدا غدا...نتمنى له كل التوفيق والعودة سريعا...انا شخصيا مستنيه بكام أغتية يدونهم لى....
كل ده تحت قيادة ورعاية واستاذية عمنا "الناظر"...عادل بك صموئيل....
...صباح الفل ياعمنا ....أرجو ان تضع أغنية "محمد الموجى"...عند حضرتك فى الدور...وحضرتك عارف ماينفعش ننزلها تانى ...لأن المنتدى بيرفض...."ياجبيبى واحشنى "...تلحين الموجى وغناء فايزة أحمد..أغنية شديدة الرومانسية ولم تأخذ حظها من الشهرة لأنها جت بعد "يامه القمر ع الباب"..و"أنا قلبى أليك ميال"...وبالتالى كانت خارج السياق الشعبى المعروف فى ذلك الوقت فى بدايات فايزة....رحم الله الجميع.

[armendo]

المشاركة الأصلية كتبت بواسطة armendo

اخى العزيز سليم صباح الخير.. لا اعتقد اخى سليم ان ليلة المحطه هى التجربه الأولى لك بالتدوين فقد عزفت الأغنيه وليس لى عليها اى ملاحظات وليس المهم ان تكون الأغنيه سهله او صعبه المهم ان يكون التدوين صحيحا ..فى انتظار المزيد ان شاء الله.
مع ارق تحياتى
ارمندو

الحاقا بالمشاركه السابقه ..فى الخانه الثانيه من الكوبليه وفى المازوره الثانيه اعتقد ان السى نصف بيمول وليست بيكار هكذا احسست بها وانا اعزفها فى المره الثانيه وارجو من الأستاذ عادل او اخونا وائل علوى ان يفتونا بها .
مع ارق تحياتى
ارمندو

[سليم العباس]

المشاركة الأصلية كتبت بواسطة armendo

الحاقا بالمشاركه السابقه ..فى الخانه الثانيه من الكوبليه وفى المازوره الثانيه اعتقد ان السى نصف بيمول وليست بيكار هكذا احسست بها وانا اعزفها فى المره الثانيه وارجو من الأستاذ عادل او اخونا وائل علوى ان يفتونا بها .
مع ارق تحياتى
ارمندو

أخي العزيز أرمندو أرق التحيات وشكرا لك على تقييم النوتة التجريبية .... في الواقع هي تجربتي الأولى في التدوين و لم أحاول سابقا أن أدون أغنية ... لكنني استعنت ببرنامج السيبليوس لقراءة التدوين و ملاحظة الأخطاء... في النهاية أنا لست مدون وهذا ليس مجال عملي لكن قد يخطر ببالي تدوين بعض الأغاني البسيطة التي أحبها و اتقن عزفها.. ملاحظتك حول علامة سي نصف بيمول صحيحة بعد أن أعدت عزفها... و كنت أعتقد أن الأخطاء ستكون أكثر لكن الحمد لله ... أما أن يقوم الأستاذ عادل شخصياً بتقييم النوتة فهذه أمنية و شرف كبير لي إذا ما حصل... و أتمنى من الأستاذ وائل علوي بتقييمها إذا ما سمح وقته... تحياتي و مودتي

الأخ العزيز عاصم منشاوي : شكرا جزيلا على الإطراء ... لكن من الظلم أن تضع اسمي بين أسماء المدونين الرائعين و المحترفين الذين ذكرتهم... أنا مجرد متذوق للموسيقا لا أكثر.... شكرا لك مع أطيب الأمنيات بالنجاح والتوفيق

[وائل علوي]

اخي الحبيب عادل صموئيل
ارجو ان تدرج اغنية اهواك على جدول اعمالك لكي تحسم الجدل الذي حدث حولها قبل فترة وكان يتعلق بالكوبليه الثاني فهناك عدة نوتات مكتوبة بشكل غلط--طبعا حضرتك ستحسم هذا الجدل وستكتب المقام الاصلي له
مع خالص تحياتي
اخوك وائل

[عادل صموئيل]

احبائى
طبعا اول كل شىء ادعو بالتوفيق لكل من فى امتحان الثانوية العامة وكلنا فى الهوا سوا انا حفيدتى ميرنا فى تالثة ثانوى هى النهاردة بتقول عملت حلو فى اللغة العربية وربنا معاكم كلكم ويحفظكم واهم شىء الامن فى مصر الايام القادمة وربنا ما يجيبش حاجة تكدر الصفو العام والاعصاب
اقدم لكم نوتة طلبتوها كتير وهى فيها خلافات كتير ,, وانتم عارفين طبعا انى بشوف ناس كتير بتغنى على جميع المستويات فى مختلف الاماكن بس الاغنية دى ماحدش يقدر يقرب منها لأن فيها حركة مش اى واحد يقدر يسوعبها واكيد لازم تطلع نشاز ..
طبعا عرفتوها ؟

اهواك

كعادة عبد الوهاب انو لازم يعمل حاجة مختلفة او متميزة او عكس العادى ... يعنى الاغنية دى شكلها العام صغيرة جدا جدا مذهب وكوبليه صغير جدا .. وعشان تطلع شىء لو قيمة عمل فى الكوبليه حركة .. انت لو مافهمتش الحركة حاتطلع نشاز انا هنا حاولت اكتبها ( لأنها بينى وبينكم ماتتكتبش 100% ) الحركة هى ان فيه نغمة مش موجودة فى الموسيقا الشرقية او متحورة بطريقة بحيث ان مش اى حد يفهمها او يفهم النكهة دى جاية منين ... الخلاف فى نغمة المى نص بيمول واللى بتظهر وتتلاشى وبتيجى بعدها المى بيمول خفية .. واللى بيزود الشك انو بيدأ الموسيقى الفا دييز انت بتتسلطن مش ممكن تتخيل انو حايغنى بعدها صبا يعنى الصول بيمول والفا ترجع ناتورال واللعب فى المى نص بيمول ... وبس لو عزفتها على الاورج حاتطلع زفت ... لأن المى نص بيمول هنا زائدة اوى يعنى تحسها حاتلزق فى المى ناتورال (شغل عبد الوهاب بقى ) ... ومن هنا لازم تتحس اوى
بس حاتطلع معاكم اكيد طالما قلنا عن السر
من ذكرياتى عن الاغنية دى ... انا طبعا ايام الفيلم ماكنتش لسه ... لكن بعدها بعشرين سنة عبد الحليم حب انو يعيدها وكنت موجود طبعا .. فى البروفة قال حنقول اهواك واحد من المتحذلقين فى الفرقة قال لو فين النوت ؟
قام عبد الحليم رد عليه بكلمة مش كويسة هى ماتعتبرش شتيمة لكن ممكن تقول عليها علامة تعجب بس فجة حبتين
بعدين قال له بغيظ فيه موسيقى فى مصر مش حافظ اهواك ؟؟؟
اترككم مع الاغنية واتمنى ان تعجبكم
التحفة القادمة : ياما انت واحشنى لفايزة احمد هى خلصت تدوين وفاضل التشطيب يعنى ان شاء الله يوم او يومين
مع اطيب تحياتى

[عمرو الهنداوي]

استاذ عادل

عازف الساكس الرائع استاذ سمير سرور كان من ضمن اعضاء الفرقة معاك

الراجل الجميل دة كان بيتميز بى ايه فى العزف؟ وليه ماكان له منافس؟ ومين كان بديل له فى حالة غيابة مع الفرقة؟ وايه رايك فى مجموعة الالبومات اللى هو عملها لام كلثوم وحليم تحت عنوان عاشق الساكس ؟هى البومات مازالت تباع حتى الان وحققت انتشار واسع له فى وقته وكمان رايك ايه فى الة الساكس فى الموسيقا الشرقية؟


كل التحية
عزيزى عمرو
سمير سرور جه معانا بمحض الصدفة يعنى كان فيه عازف عليه العين كان اشطر من سمير سرور كتير وكان بليغ تقريبا اتفق معاه ,, بس كانت اخلاقه مش كويسة يعنى مغرور اوى اكتر من الازم وقليل الذوق وماينفعش يقعد مع بهوات وحصلت لو حادثة فى شبرا انو وقع تحت الترام ودراعه اتقطع .. وبالطبع كان من حظ سمير سرور .. هو اخطر واهم حاجة فى سمير سرور انه طبع نفسه انه يعزف الربع تون ,, يعنى هو بييجى على الساكس بالتحايل او التخليق يعنى بس مش كل النغمات يعنى 4 نغمات فقط لأن الآلة طبعا مش طبيعتها تعزف الربع تون .. بس هو كان ميزتو انه حساس اوى يعنى قدر يدى المطلوب ؟؟
اما عن الشرائط اللى عملها انا مش بحبها اوى يعنى انا كنت اتمنى اعمل انا بالكمنجة شرائط كده بس ( ... ) لأن الساكس مش حلو فى الغنا البشرى الكمنجة احلى طبعا .. وبعدين اكتر حاجة انا ماحبيتهاش الاضافات بتاعة دلوقتى يعنى التصفيق والحاجات دى ,, لأنها مش موجودة فى اللحن الاصلى .. لأنى اؤمن بنظرية الملوخية يعنى عايز تعمل ملوخية لازم تعملها زى ما بتتعمل بالتقلية مش بالمايونيز عشان تبقى متطور .. بس طبعا عموما الشرايط دى احسن من الاغانى الزبالة اللى جت بعدها
اما عن رأيى فى الساكس عموما فى الموسيقى الشرقية انو شىء غريب على الاذن الشرقية يعنى لازم يستعمل بإحتراس شديد جدا عشان اهم شىء نكهة الموسيقى الشرقية يعنىيقول الصولو المناسب مش اى صولو ويسكت بعدها
يعنى لو تلاحظ ان بليغ هو الوحيد اللى قدمه لكن عبد الوهاب والسنباطى ما حبوهوش ( اقصد الآلة طبعا )
بس مكانش لو بديل فى مصر وقتها لأنه كان الوحيد اللى بيقرا نوتة
مع اطيب تحياتى

[salhi_haithem]

المشاركة الأصلية كتبت بواسطة عادل صموئيل

احبائى

اهواك

التحفة القادمة : ياما انت واحشنى لفايزة احمد هى خلصت تدوين وفاضل التشطيب يعنى ان شاء الله يوم او يومين
مع اطيب تحياتى

سلام و تحية
الله الله عليك يا استاذ عادل على هذه التحف الجميلة لعبد الوهاب و عبد الحليم و على التحفة القادمة ايضا لفايزة و يا ريت دوما تقول لنا على الاغنية القادمة كي نأخذ وقتنا في سماع الاغنية و فهمها الى ان تأتينا بالنوتة..
و تعقيبا على كلام اخي عمرو عن سمير سرور و حسب اعتقادي انو من ميزاته كان يعطيك النغمة الشرقية بآلة السكسوفون و هي آلة غربية و هذا في حد ذاته كان اعجاز و مهارة, و المهارة ليست غريبة على اعضاء الفرقة الماسية..
هيثم

[mahmoud feteih]

الاستاذ العظيم عادل صموئيل حضرتك حققت لى على المستوى الشخصى كل مااضنانى فى البحث عنه من نوتات واخص بالذكر نوتات دقة ساعة العمل وموسيقى هدية العيد وبعمرى كله حبيتك وقدرت تهجر لانها فعلا نوتات نادرة واصلا مش موجوده الا فى دار الاوبرا او معهد الموسيقى ولو الواحد راح هناك ممكن مايلحفهمش من الزحمة ولو لحقهم حايخش فى متاهات الله وحده يعلم نتيجتها وانا اتمنى ادراج اغنيات انده عليك بالحب لورده وسكة العاشقين واغنية وفى وسط الطريق لنجاة الصغيرة فى الخطة وهناك اغنية رائعة لحنها عبد الوهاب فى 10 دقائق وغنتها ورده ولاحد يذكرها على الطلاق ولاتذاع وهى مؤثرة جدا اسمها لبنان غنتها ورده فى الثمانينات بمناسبة الحرب فى لبنان ولى سؤال وجوابه عند حضرتك هل عندنا ملحن اسمه احمد ملوخيه كان لحن اغنية لوردة بصراحة هى اغنية جميلة لايحضرنى اسمها بس اللى فاكره ان فيها موسيقى جميله وفيها كوبليه بيقول يازمان افرح يازمان ويانجوم ارقصى حولينا ده مفيش فى العالم كله اتنين - ومش فاكر الباقى

[وائل علوي]

استاذ عادل
لي استفسار من بعد ما ماتت وردة وانا عندي حالة رغبة واشتياق وميول وحنين رهيبة لسماع اغانيها !! وهذا لا يعني انني كنت اتجاهل اغانيها قبل موتها لكن بصراحة مكنتش رقم واحد عندي في السماع يعني مثلا اغنية العيون السود من زمااااااان جدااا لم اسمعها لما ماتت لقيت نفسي بدخل اليوتيوب واشاهد وردة وبليغ وهما بيغنوها دويتو قمة في الروعة والمصداقية--صراحة باين جدا على بليغ انه كان لسه بيعشقها وده كان واضح في نظراته لها حتى هي اثناء الغناء اشرت له بعينها يبص في حتة تانية عشان تعرف تكمل لانه بيسحرها بنظراته ويربكها
الشي الغريب ليه الفنان بعد مايموت تزداد قيمته عند الناس ونهتم باعماله ونحب نعرف تفاصيل حياته الفنية والخاصة وهو عايش بيبقى مركون على الرف !! واكيد حضرتك لاحظت هذا الامر مع الكثير من العظماء لم ياخذوا التكريم اللائق بهم في حياتهم
ارجو ان تخصص الفترة القادمة لاهم اعمال وردة لانها علامة من علامات فترة من احلى واجمل واروع فترات الغناء العربي وهي فترة السبعينات والثمانينات التي كنت اعيش فيها في مصر الحبيبة ومازلت اتذكر اغانيها التي كنت اسمعها باستمرار اينما ذهبت في الاسواق في التكاسي في المطاعم والمقاهي --بالفعل وردة كانت تمتلك شعبية كبيرة في تلك الفترة --كانت ايام جميلة,,واللي اعرفه انها السيدة الثانية في مصر بعد ام كلثوم
وياريت تكون العيون السود في الجدول لما لها من اهمية وهي طبعا باي حال من الاحوال لن تكون بصعوبة بعمري كله حبيتك التي استمتع هذه الايام بعزفها والتي سعدت بها حيث انني ول من طلبها من اكثر من سنة وافرح كثيرا عندما ارى اعجاب الاخوة بها اشعر وكاني انا اللي كاتبها طبعا السعادة دي لاني انا كنت السبب بس طبعا الفضل كله لحضرتك ومجهودك
مع خالص تحياتي