طلبات نوتة

[عادل صموئيل]

احبائى

اقدم للأخت العزيزة ميما هيما

احكى يا شهرزاد

من توزيعى المتواضع
طبعا تفيد مدرسين الموسيقى
مرفق الملف الصوتى للتوزيع والنوتة كاملة 3 اصوات
ومرفق نوتة كل صوت على حده .. انا مش محدد الاصوات مين ياخد ايه عشان معرفش بالتحديد الآلات اللى حاتعزف بس انتى وزملائك ماولا تختاروا مين اللى حايعزف الصوت الاساسى ولازم يكون مسموع اكتر من 50 % ومين يختار الصوتين التانيين وممكن لو حا تتخانقوا اعملوا قرعة او كلوبامية
ملحوظة : انا اضفت فى اول اللحن مازورتين من اختراعى يعنى فزلة بيعملوها الموزعين بس هدفى ان عشان الفرقة مع بعض تضبط الإيقاع
وكمان اللحن كان فيه كذا خبطة كاسة مفزعة ودى كان لزوم الرعب والذعر عشان الوطاويط والخفافيش فى المسلسل لكن طبعا مافيش داعى نرعب اللجنة
ولو نفسكم تعملوا الرعب ده هاتوا غطاء حلة وكبشة وهات يا رزع بس اوعوا تكسروا الميزان
مع اطيب تحياتى بالنجاح والتوفيق بس اوعى تغيرى رأيك

[عادل صموئيل]

احبائى
اقدم لكم من روائع بليغ حمدى
ومن كلاسيكيات ام كلثوم

ظلمنا الحب

اتمنى ان تسعدوا بها

اقدمها للاخ العزيز نور الصباح

مع اطيب تحياتى

[عادل صموئيل]

احيائى

اقدم لكم اغنية من العيار التقيل جدا جدا
رائعة السنباطى وام كلثوم

دليلى احتار

واهديها لأخى العزيز ارمندو
الاغنية من الاغانى اللى انا بعتبرها خط احمر .. يعنى ممكن اى عازف يعزف المقدمة لكن عشان يتوغل داخلها محتاجة مقدرة غير عادية .. لأن مش اللحن فقط اللى صعب ولكن اداء ام كلثوم كان متميز اكتر من اللازم .. يعنى انا بخبرتى فى الدنيا وفى السوق عارف ايه اللى بيتغنى فى كل مكان .. يعنى فيه ناس كتير ممكن تغنى اغانى محدودة لأم كلثوم لكن الاغنية دى خط احمر يعنى ماسمعتش ان حد حاول اصلا يغنى منها
لكن بالطبع اللى حافظ الاغنية اوى اوى ممكن مع النوتة انه يعمل منها حاجة
طبعا انا زى ما انتم عارفين بحاول ابسط النوتة بقدر الامكان بس برضه التبسيط له خطوط حمراء يعنى اهم شىء اللحن الاساسى ما ينقصش حرف .. والخط الاحمر التانى هو الاصطدام ببعض الادكاديميين المتزمتين . او اللى مخهم جامد او واقف عند حاجات معينة واى تطوير بيهاجموه .. لكن مش انا لوحدى عبد الوهاب زمان لما حب يطور هاجموه لكن ماسألش فيهم لكن بعدين بقم هم يدرسوا فى الأكاديميات اللى اعترضوا عليه ..
فى اللحن ده فى صفحة 5 سابع سطر من تانى مازورة فيه كذا مازورة انا مضطر انى اكتبهم صعبين اوى كده
يعنى ام كلثوم غنت الجملة مرتين والفرقة بترد عليها بعدين غنت الجملة نفسها مرتين لكن اسهل ومش ممكن يتبسطوا اكتر من كده لأن حايحصل اخلال باللحن
المهم انك اى كمية ممكن تطلعها من اللحن ده تبقى مكسب
مع اطيب تحياتى

[عادل صموئيل]

احبائى

اقدم للأخ العزيز محمد عطية

المال والبنون

هى مش من النوعية اللى انا بحبها ولكن حسيت انو محتاجها اوى
اما مش بحبها عشان كذا سبب
اول سبب انها بتعتمد على صولو الكمنجة .. والكمنجة بالذات احلى حاجة فيها صوتها .. يعنى انا مثلابتفادى جميع المشاكل اللى تخلى صوت الكمنجة يبقى وحش وبدفع دم قلبى احيانا لو لقيت فنى يخلى صوت الكمنجة احلى يعنى يعمل لى احلى فرسة ممكنة ويضبط العمود ويراجع على صندوقخها الرنان يعنى يكون الغراء فاكك من مللى لايرى بالعين المجردة ولكن بيؤثر على صوت الكمنجة اما الاخ العزيز ياسر عبد الرحمن بيعزف من منطقة وحشة فى الكمنجة .. يعنى المفروض انت لما تتعلم كمندة فى الول من اهم مشاكلها انك مش بتضبط مسار القوس .. يعنى من آخر المراية والى الفرسة المفروض انك تحاول تخلى الوس يكون فى منتصف المنطقة عشان لو القوس نزل تحت شوية او طلع فوق شوية الكمنجة بتزيق .. وده من اهم الحاجات اللى بقولها لكل اللى عايز يتعلم كمنجة انك لازم تبدأ مع مدرس لأنو طول الوقت حياخد بالو من كذا حاجة ومنها انحراف القوس عن مساره
ويقعد الاول يقوللك بالذوق ولما تطلع روحه حايشخط فيكلحد ما ايدك تتعود ع المسار من اول القوس لآخره طاله نازل .. وهنا الاخ ياسر عبد الرحمن بيعزف فى اقصى منطقة يطلع منها صوت الكمنجة تحسو بيبح فرخة مش بيعزف كمنجة هم بيعتبروا الفزلكة دى تطور .. وبعدين طول الوقت بيعزف بنفس المكان يعنى تخيلوا انى ولا مرة سمعت صوت الكمنجة الطبيعى .. والكارثة ان فيه بعد كده عازفينمتخلفين بيحسوا ان دى موضة وبيبقى الكل بيعمل كده زى ما تلاحظوا واخيرا حايضيع من المستمع صوت الكمنجة الطبيعى .. والكمنجة بتحتاج رقة فى العزف .. يعنى مش معقول يكون معاك بنت حلوة رقيقة وتشدها من شعرها تؤلمها وتخليها تتوجع
المشكلة التانية التوزيع اللى بيضيع اللحن الاساسى
المشكلة التالتة انت لو سمعت مقدمة لعبد الوهاب مثلا دايما طول الوقت المستمع العادى ماشى مع الجملة يعنى مستوعب أيه اللى اتقال ومن ثم لو بيعزف حايعزف اللى استوعبه ..لكن اللحن اللى من النوعية دى او نوعية الإخراج ده بعد مايسمع الخناقة دى تلاقيه مش مستوعب حاجة يعنى زى قطار ماشى بسرعة واسألك شفت ايه ؟ تقول هو انا لحقت اشوف حاجة ؟
يعنى انت لو رجعت لزمان وشفت التوزيع اولا تلاقى ماكانش بنوزع اللحن كله ولكن بنوزع جملة واحدة منه كل كذا خمسين لحن لن الجمل الموسيقية حلوة مش ناقصة حاجة
مع اطيب تحياتى

[عادل صموئيل]

احبائى

اقدم لكم من روائع عبد الحليم مع بليغ حمدى

خسارة خسارة

واقدمها للأخط العزيزة الناشطة زينة الغريبى .. وانا اول ماشفت الطلب رحت مدونها على طول يعنى الاغناى من النوعية دى بالنسبة لى وبالذات لما ما يكون فيها قلق فى المقدمة او ادليب بتبقى بالنسبة لى زى ماتكتب جواب
اما ذكريات الاغنية دى بالنسبة لى انها من فتى احلامى وكان اول مرة ادخل سينما فى حياتى كان عمرى سبع سنين وقتها .. وكان طبعا السينما ساعتها يعنى احلى حلم واحلى فسحة وفيها كل سحر الدنيا .. الغريب ساعتها انك كان ممكن المرب انت بتسمعه من سنين لكن مش تعرف شكله لأن يعنى بيطلع صوره نادرا فى الجرائد .. يعنى انا كنت اعرف شكل عبد الحليم طشاش يعنى مش اوى لأن حتى الصورة فى الجريدة بتبقى مش واضحة
وانا كنت نموذج لعموم المستمعين يعنى كان المطرب بيتشهر ويبقى لو ملايين المستمعين من الإذاعة وما يعرفوش شكله اصلا .. مش زى دلوقتى الشكل هو كل حاجة يعنى اى عيل فى تانية ثانوى ممكن امه تعمل لو شريط وترش قرشين فى القنوات الفضائية وبعد اسبوع يبقى نجم على ايه ؟؟؟؟؟ ماعرفش
او المطرب مش يتنيل على عينه يقضى وقته يحاول يتعلم يحسن مستواه ولكن طول الوقت بيقعد يفكر ازاى يعمل عمليات تجميل يحسن خلقته وعجبى
مع اطيب تحياتى

[سليم العباس]

نشيد بلاد العرب أوطاني
نشيد موطني

[عادل صموئيل]

احبائى
اقدم لكم مفاجأة غير متوقعة
انتم طبعا عارفين ان ذوقى حلو فى اختيار الموسيقى والاغانى
اقدم لكم تتر
مسلسل لوعة قلب التركى

انا عندى فى البيت كذا تليفزيون فى كذا غرفة وطول النهار والليل مشغلين مسلسلات تركية لكن التتر ده سمعته خطف عقلى لأنه ده التركى الاصلى .. يعنى باقى المسلسلات فيها مسحة من التلوث الاوروبى ودى اخطر فيروس دخل على الموسيقات ذات الطابع المتميز ( غير مصر طبعا ) اللى مثل الموسيقى التركية والموسيقى الهندية
واللى لفت نظرى او فكرت فيه ان المسلسل ده تاريخى يعنى ايام الثورات على الدولة العثمانية وايام كمال اتاتورك
وهو الى جاب اجل الدولة العثمانية وريح الدنيا من قرفها .. وانا لما بروح تركيا وبحس انها بقت متطورة 70سنة لقدام كلهم بيقولوا ثورة كمال اتارورك هى السبب ( واتمنى اللى عايزين يشدونا لورا يسمعوا ويحسوا )
عايز احكى لكم حكاية صغيرة لكن لطيفة اوى .. احنا لما كنا بنروح مع العمالقة للدول العربية ايام زمان .. كان بيتطوع ناس من عندهم يبقوا المرافقين بتوعنا يعنى كمان يفسحونا فى البلد .. انا لاحظت ان كل بلد فيها فنانين كبار بدرجات زى عندنا ولكن الفنانين بتوع مصر كانوا هم الدرجة الاولى .. والفنانين بتوع البلد لو الفنان منهم داخل بلده بيبقى محلى يعنى ( قبل الفضائيات ) كان عبد الوهاب بتاعهم جوا بلدهم فقط ماحدش يعرفه خارج الدولة .. كان الفنان بيتشهر عربيا لما ييجى مصر ويعمل حفلات ويطلع يتولد تانى من مصر يعنى مثلا اول ماجه فهد بلان وعمل الزوبعة بتاعة هيهيييييييه .. الناس هنا افتكرتوا انو عبد الوهاب بتاع سوريا .. لكن لما رحنا هناك اكتشفنا انو حاجة قليلة اوى هناك وفيه ناس اكتر منو كتير جدا
المهم التميزالخطير بتاع تركيا بالذات ... اول حاجة انا بقعد اشرب احلى شيشة فى العالم .. بعدين لو عايز اسهر .. هناك التلوث الجديد فى الموسيقى والغناء مادخلش على الموسيقى الاصيلة يعنى الديسكو والحاجات دى دخلت فى خط منفصل بمعنى انك دلوقتى ممكن تلاقى مسرح محترم فيه صالح عبد الحى وعبد الوهاب بتاعهم .. ولاحظت انهم بيحافظوا على القيم الكبيرة عندهم دى .. لو حتى لو المطرب بقى سنة 120 سنة خلفه كورال اقل واحد منهم مصيبة فى حد ذاته .. يعنى فيه صفو تانى وتالت يضمن ان التراث يفضل للأبد ... بعكس معظم الدول اول ما العمالقة توارو الصراصير طلعت من جوا البالوعات .. يعنىحتى لما تطلع فلتة زى مثلا البنت المصرية كارمن اللى كسبت فى آراب آيدل .. دى من وجهة نظرى لاتقل عن وردة لو حد اتبناها كويس لكن مع الاسف حتى لو حد اتبناها حايخليها تغنى زى الموجود
طبعا عشان تستمتعوا باللحن انا منزل الملف الصوتى وارجو اسمعوه كذا مرة الاول هو اقل من دقيقة
مع اطيب تحياتى

[عادل صموئيل]

احبائى
والعودة الى عبد الحليم
اليكم

خايف مرة احب

مع اطيب تحياتى

[عادل صموئيل]

اخى العزيز عزت شحاته
اقدم لك اللى قدرت اكتبه
هو المفروض عشان فيه تكرار كتير انك من النوتة انت تطلع اللحنوبعدين انت اصرف فيه
انا كتبت الاساسى
مع اطيب تحياتى

[عادل صموئيل]

احبائى

اقدم لكم من روائع عبد الحليم حافظ

بتلومونى ليه

الاغنية دى بتمثل موضوع مهم جدا جدا بين الاغانى كلها عموما
انتم اكيد فاكرين فيلم حكاية حب . عبد الحليم ومريم فخر الدين واللقطة الشهبرة لما قابلها على البحر وقالت له غنيى لى الاغنية وابتدا يغنى بصوته من غير موسيقى بعدين الموسيقى دخلت بالتدريج
هنا كنا سامعين صوت عبد الحليم الطبيعى وغنى بصوته الطبيعى
وكان من اهم سمات زمان ان ده الصوت الطبيعى للمطرب .. لأن المطرب ازاى اصلا تسمعو وده مش صوته الطبيعى ده بالضبط بيمثل مثلا واحدة ملكة جمال لكن مضروبة كل اللى انت شايفع مش طبيعى او واحد بيرفع اثقال بيرفع مثلا 300 كيلو والناس بتصفق له لكن فى الحقيقة الاثقال اللى بيرفعها حاجة منفوخة على الفاضى ماتطلعش عشرة كيلو
لما نيجى للغنا دلوقتى تلاقى المطرب بيمثل بصوت وبيغنى بصوت تانى تحسو طالع من بالوعة كلو مؤثرات صوتية .. اصبحت الناس ماعندها تذوق يعنى فيه بطة حية وبطة كاوتش ممكن تسللق الاتنين وتاكلهم ؟
وده الشىء اللى طمع اى واحد صوته وحش انو يغنى
انا اذكر مرة كنت مع عبد الحليم وكان المهندس القدير زكريا عامر قال لعبد الحليم احط لك شعرة ايكو يعنى صدى صوت عبد الحليم اتضايق وقال له ممنوع لأن لو الناس سمعتنى كده فى الحفلة مش حاتصدق صوتى
لكن دلوقتى بيحطوا اكتر من عشر مؤثرات مختلفة وبيسرعوا سرعة الشريط عشان العيوب تقل وبرضوع انتم شايفين
مع اطيب تحياتى