تحليلات سيادة الرئيس ـ أبو على

[سيادة الرئيس]

في الذكرى الأولى لثورتنا المبهرة

كلمات رائعة من : تميم البرغوثي

لحن و أداء أروع من : مصطفى سعيد

منصورة يا مصر مش بجميلة العسكر



إحنا اللى روَّحنا بدرى بس مش أكتر

قول للى روَّح عشان يرتاح فما ارتاحشى

الراحة كلِّ ما تستعجلها تِتْأخَّر

واللى ها ينزل ها يُحكُم لو ما روَّحشى

قصر الرياسة بْبلاش، بسِّ انتَ مستخسر

●●●

قصر الرياسة ما فيش بينك وبينه كتير

فيه سلك شائك وكيس رملة وكُشْكِ غفير

لو جيت لوحدك، ها يضرب، والرقاب ها تطير

وان رحت مليون، ها يهرب، وانتَ تبقى أمير

رئيسنا واحد شهيد، يحكُم من التحرير

قصر الرياسة الجديد بِصينِيَّة ومدوَّر

●●●

منصورة يا مصر بجميلة خيام الخيش

بيحرقوها عشان تمشى ولا تمشيش

يا مصر عُمْرِ ما فيه ثورة تقوم بِشْوِيش

المُلك ده اللى ادِّتيه للعسكرى بقشيش

حقّ العيال اللى ماتوا فى طابور العيش

وبنت عَرّوها فى الشارع و شيخ أزهر

●●●

يا حاجّة ياللى بتقرى الكفّ والفناجيل

إقرى وشوش البشر، ع النصر تلقى دليل

ده حقنا ف مصر مش ها نسيبه للتساهيل

وان قلتى نصبر يومين، يبقى ها نصبر جيل

أجلنا قبل كدة فادنا بإيه التأجيل

رَمْيِ الجُثَثْ فى الزبالة فى الضُّحَى الأحمر

●●●

منصورة يا مصر بجميلة ولاد وبنات

بجميلة اللى انحبس بجميلة اللى مات

بجميلة التريَقَة والضحك فى الأَزَمات

ودم فوق الرصيف ناقش سُوَر وآيات

يا مصر ياللى انتصرتى فْ جُمعِتين وِتَلات

نفس العَدُو هُوَّه هُوَّه بَسِّ متنكَّر

●●●

الصبح طالع لِقِى دبابة فوق راسُه

مربَّعة فوق دماغُه وكاتمة أنفاسُه

والشرق مقفول وخِتْمِ النِّسر ترباسُه

قام خبَّا شمسُه ووزَّعها على ناسُه

على العيال اللى ماتوا غدر وانداسوا

بقى شرق فى كل جسم، وشمس بتنوَّر

●●●

الشعب واقف وصدره للرصاص عريان

والدولة خايفة ولافَّة نفسها ف جدران

وزى ما الحاوى ممكن يلدغُه التعبان

شوفوا حيطان السجون بتلفّ ع السجان

والفالح اللى بيتهوَّر على النسوان

ما شفناهوش ع الحدود يا ناس بيتهوَّر

●●●

كان للفراعنة إله قرد وإله تمساح

وللإله كهنة وعسكر يقف بسلاح

وخزنة متقفِّلة بالضبة والمفتاح

وقصر يشبه قصور الجمهورية براح

يا عينى ع الآلهة بقوا فرجة للسياح

ياللى بنسر وسيفين فرحان ومتكبَّر

●●●

الشمس تُدعى الغزالة فى اللغة فاعلم

وبالغزالة المضيئة فى السما باحلم

غزالة ممكن تبيِّن طبعها الوحشي

ما تغرّكمش الأسامى ورقِّة المبسم

دى شمس واللى يِقَيِّدها ما يفلحشي

ومصر حالفة، ها تتحرر، ها تتحرر

[جمال المنياوي]

سيادة الرئيس / مشرف دار المحترم
كلماتك تمس القلب وفعلا هي أجمل ما يمكن سماعه اليوم وكل يوم مع إنتصار العزة والكرامة . بس أنا لي تعليق بسيط
ليه كل الاسوة دي على الجيش ؟ مش هو الجيش ده إللي حما الثورة ؟ التوفيق من عند الله بس لازم مننساش الجميل وربنا يحمي مصر ويدوم عليها نعمة الامن والامان .
تقبل كل الاحترام والتقدير ,,,,,

[Hisham Khala]

سيادة الريس
لك أطيب تحية و تهنئة بعيد الثورة الاول و التي مازالت مستمرة.

أنا قرأت الكلمات و وجدتها تدور حول فكرة رأسية عدم الثقة في العسكر و الندم علي عدم الاستمرار في التظاهرات (علي مدار العام)

جيش مصر أكيد مصريين ، هم أحنا و هم أخوتنا و هم ولادنا
فإذا ما أختلافنا علي أسلوب الفترة الانتقالية و التي فيها كثير من الأخطاء فلا داعي أن نقوم بتشويه جيشنا و إضعاف الروح المعنوية لنا أولا و له ثانياً.

أيضا مفيش ثورة علي مر العصور كانت مثالية و خالية من الفوضي و بدون أخطاء و بدون ثمن ، إلا إذا كان إنقلاب منظم له من يقوده.

إضافة لما سبق الخناقة و الاختلاف الحالي هو أختلاف علي مصالح بعض التكتلات ، بمعني: من قام بالثورة و أشعلوا شرارتها الاولي كانوا مجموعة من الشباب الواعي و الذين لم يكن لهم أي نشاط سياسي سابق لكن الكعكة ذهبت من أيديهم إلي غيرهم ، و هنا أمامان شيئين:
هل من قام بالثورة لابد من مكافئته بحكم مصر؟ حكم مصر لا يكون بطريقة عشوائية! حكم مصر لابد له من إدارة و قوة لأستتباب الأمن و دفع الاقتصاد.
هل من حصلوا علي الحكم يستحقونه؟ هل هم جديرين علي الادارة السليمة؟ هم منظمون من زمن بعيد - و بعيدا عن رأيي الشخصي - فلقد أختارهم الشعب بأغلبية ساحقة و حتي الآن لم يظهر منهم شئ لا يروق لي.

بعض التكلات الاخري التي ليس لها رصيد شعبي و حولها علامات استفهام تثير المشاكل بخطورة شديدة لأنها برغم من تنظيمها لم تنل نصيب طيب من الكعكة.

و عليه هذه صرعات وقتية حتي يحدث أتزان بين القوي المختلفة و الارادات المتباينة و سوف يحدث هذا الاتزان قريبا.

للأسف لم اسمع الاغنية حتي أتكلم عن اللحن و الاداء ، فانا مستعجل جدا و علي سفر.

[نوران احمد]

بصراحة كلمات رائعة سواء هى او قصيدة و اغنية يا مصر هانت كلها كام يوم
تميم البرغوثى شاعر اكثر من رائع و حساس جدا

[Hisham Khala]

بعد الاستماع للاغنية
أكرر تحفظاتي علي الكلمات
و لكن أعجبني هذا المقطع

كان للفراعنة إله قرد وإله تمساح

وللإله كهنة وعسكر ((حرس)) يقف بسلاح

وخزنة متقفِّلة بالضبة والمفتاح

وقصر يشبه قصور الجمهورية براح

يا عينى ع الآلهة بقوا فرجة للسياح

هناك تنويعات في المقامات و الالاتي أدري بالتحويلات المقامية الشرقية
و الاداء جميل فيه طابع الموال
نشكرك علي تقديم هذا العمل.

[سيادة الرئيس]

الأستاذ جمال

الدكتور هشام : الذي إذا مر على موضوع زاده علم و بهاء

و الله أنا لا أقصد إلا النواحي الجماليه في النص و الأكثر في اللحن و الأداء . . أما السياسة فأنا أحترم وجهة نظركم و إن اختلفنا

أسأل الله أن يعم الخير على مصر في كل مجالاتها و تعود رائدة برائد مخلص

[هدى دولت]

سيادة الرئيس ..
نتقدم بكل فروض الطاعة والولاء
لكل إختيار تأتي به
يعبر عن روعة الجمال
بمنظور راقي
يستوعب المعنى
وينطرب للحن
وينفعل بالحدث
بكل الصدق .. نقول .الله الله الله
على الصوت الدافى
وإيقاع ننفعل به .. بشجن ولوعة
وإحساس مصري عميق
وعلينا أن نفرق بين الجيش
" كجنود بواسل على الحدود"
وبين " المجلس العسكري العتيق " !!!
بوعى رجل الشارع البسيط
ماأروع فطرة الإنسان المصري الأصيل
ما أشد فطنتك أيها الفلاح الفصيح

ننحنى لصاحب الكلمات النابضه
بحنين للمبدع تميم البرغوثي
وننحنى لآهات الصدق
بصوت المصري الحاني
مصطفى سعيد

سيادة الرئيس ...
بعيداً عن أى شعور
برهبة حضوركم الباهي
ننحنى لوجودكم المُهيب
ونعترف ..
إعتراف مغلف بكل الحب
صدقت ..
أجمل ما يمكن سماعه في كل زمان ومكان
نبض الشعب على ضفاف ساحرة
في صفحتك يا جميل ..يا نــيــــل
قبل أن تُسطر على صفحات التاريخ

مداد القلم ...
مياه الخالدة مخلوطه بدماء طاهرة
بأطياف أرواحهم السامية
نقرأها على ضفافك ...يا نيل

سيادة الرئيس ..
ننحنى لرقة هذا اليوم
وندخر منه زاداً من الجمال ..
... لأيامنا القادمة ...

أشكرك ..

دولت

[سيادة الرئيس]

و الله يا ست دولت الواحد مش عارف يقول إيه قدام سيل المشاعر و رقة الكلمات النابعه من جوهرة مصونه زيك

بارك الله فيك و في زوجك و أسرتك على الدوام