عازفى فرقة أم كلثوم - الصفحة 16

**غواص النغم** · #**151** 16/01/2012, 12h56

اقتباس:

المشاركة الأصلية كتبت بواسطة بشيرالأنس

الموضوع يخص من عزفوا وراء أم كلثوم وليس من عزفوا في فرقتها.
أخي الكريم كل ماأعرفه أن الأستاذ عادل صموئيل عازف الكمان عزف فعلا مع الفرقة الماسية لكنه لم يعزف وراء أم كلثوم وإذا كان ماكتبته أنت أخي صوابا ستبقى هذه معلومة جديدة بالنسبة لي.
شكرا لك أخي الكريم.

اخي العزيز بشير الانس
طبعا الاستاذ عادل صموئيل عزف في فرقة ام كلثوم وقد تحدث عنها في اكثر من مشاركة له بالمنتدى ومنها هنا:
http://www.sama3y.net/forum/showpost...postcount=5164

وهنا:

http://www.sama3y.net/forum/showpost...postcount=5233

تحيتي

**عادل صموئيل** · #**152** 16/01/2012, 15h50

اقتباس:

المشاركة الأصلية كتبت بواسطة أمير بلان

استاذي العزيز ما أفهمه من كلامك أن فرقة الست كانت تغير دوزان الألات في نفس الحفلة ....لكن ما يحيرني هو قانون الاستاذ محمد عبده صالح ....فمن المستحيل أنه كان يغير دوزان نفس القانون في ليلة واحدة ....فعليه أن يحضر أكثر من قانون ... فما سر صوت قوانينه المتشابهة ....فدائما القانون يسمع نفس القانون (ذا النقرات الخشبية الواضحة وكأنه يعزف على الخشب المعتق وليس فقط أوتار النايلون المجردة - والاقرب اليه من ناحية جودة الصوت هو قانون الفنان أبراهام سلمان ) فما سر قوانينه ؟؟ ومن الصانع ؟؟؟؟؟؟؟؟ وما يوجد عندكم معلومات عنه ؟؟؟
أعتذر عن تلهفي الزائد

الموضوع ده حلو ومن مميزات سماعى واول مرة اشوفه اليوم مع الأسف وكل واحد من الاعضاء الاحباء بيوضع فيه معلومات واشياء جميلة لكن لفت نظرى هذا الموضوع السؤال عن آلة القانون
بس الشرح محتاج شوية توضيح عشان الموضوع يبقى مفهوم جدا
اولا فيه حاجة فى الموسيقى اسمها التون العالمى او البيتش العالمى وده بيتظبط على آلة البيانو يعنى انا لما احب اضبط كمنجتى على التون العالمى وانا بظبط كمنجتى شرقى يعنى صول رى صول رى باخد نغمة الصول من البيانو او من الاكورديون على المسرح .. ولما كانت ام كلثوم بتغنى على الطبقة الصغيرة يعنى بننزل تون عن التون العالمى .. يعنى وتر صول عندى بظبطه على نغمة فا فى الاكورديون واظبط باقى كمنجتى عليه .. وبالتالى كل الآلات الوترية زى الشيللو والكونترباص
طيب الاكورديون آلة ثابتة بيعمل . هو بينزل اللحن تون فى عزفه يعنى لما يكون الجملة دو سى لا مثلا
هو بيعزفها سى بيمول لا صول يعنى بينزل اللحن فى عزفه تون .. وفى اغنية ودرات الايام نزلنا تون ونصف يعنى ضبطنا وتر صول عننا على نغمة مى من الأكورديون .. والاكورديون والجيتار بيتصرفوا زى ما قلت
دى ممكن تحصل معاك لو انت بتعزف سماعى وسامع اغنية فى الراديو وآلتك مش مضبوطة على التون اللى انت آلتك مضبوطة عليه وانت بتعزف معاهم اسمها بتصور اللحن من درجة كذا على درجة كذا
اما القانون فيه ميزة مختلفة جدا عن كل الآلات
يعنى لما تمسكل القانون بيبقى كل وتر ( وبيكون مكون من 3 اوتار ) بيمثل نغمة بكل علامات التحويل اللى على النغمة .. يعنى يوجد على يسار القانون قطع حديدة اونحاسية متحركة بتتفتح ووتفقل ( او تشغلها او تلغيها )
دى وظيفتها انك لما تقفلل واحدة فى النصبينهم ( وهم كذا واحدة ) بترفع الوتر نص درجة يعنى تبقى دو دييز واللى بعدها بترفه كمان ربع درجة وهكذا
لما تنظر للقانون حتلاقى الاوتار ورا بعض وفيه لامة على الجنب ان الوتر ده دو .. عازف القانون الشاطر بيتميز
ان عنده مقدرة عالية على التصوير .. يعنى لو عايزين ننزل تون هى ببببببببببببببيترك وتر دو ويستعمل الوتلا اللى قبله تبقى دى الدو بتاعته وبيتعامل مع القانون على ان الدو اتنقلت تحت وتر وبالتالى كل القانون نزل وتر ويكمل
مع اطيب تحياتى عادل صموئيل

**بشيرالأنس** · #**153** 16/01/2012, 15h57

شكرا الأستاذ عادل...كم أنك محظوظ أخي الكريم أنك شوفت أم كلثوم وعزفت مع فرقتها لتطرب كل عشاق فنها.

**salhi_haithem** · #**154** 16/01/2012, 18h28

اقتباس:

المشاركة الأصلية كتبت بواسطة بشيرالأنس

الموضوع يخص من عزفوا وراء أم كلثوم وليس من عزفوا في فرقتها.
أخي الكريم كل ماأعرفه أن الأستاذ عادل صموئيل عازف الكمان عزف فعلا مع الفرقة الماسية لكنه لم يعزف وراء أم كلثوم وإذا كان ماكتبته أنت أخي صوابا ستبقى هذه معلومة جديدة بالنسبة لي.
شكرا لك أخي الكريم.

السلام عليكم ورحمة الله وبركاته
اخي العزيز عندي فيديوا لاغنية اغدا القاك و الاستاذ عادل بجانب عازف الغيتار عمر خورشيد... و بداية من الدقيقة الثانية و 2 ثواني بيكون الاستاذ عادل واضح و الكاميرا مركز على الغيتار و بجانبه الاستاذ عادل ...و جل الفيديوات التي من عام 1970 تجد فيها الاستاذ عادل
اتركك مع الفيديو من ‫ط£ظ… ظƒظ„ط«ظˆظ… - ط£ط؛ط¯ط§ظ‹ ط£ظ„ظ‚ط§ظƒ - ظƒط§ظ…ظ„ط©‬&lrm; - YouTube

اخوك هيثم

**tarab** · #**155** 16/01/2012, 18h41

تحيه طيبه أ . عادل صمويل , وصلنا تسجيل مصور فقط وليس اذاعي ..لو سمحت لدي سؤال ماذا كانت المناسبه لاقامة حفل ١٠ سبتمبر ١٩٧٢ في جامعة القاهره حيث غنت ام كلثوم اغدآ القاك ويامسهرني .
ولحضرتك الشكر .

**عادل صموئيل** · #**156** 16/01/2012, 20h00

اقتباس:

المشاركة الأصلية كتبت بواسطة tarab

تحيه طيبه أ . عادل صمويل , وصلنا تسجيل مصور فقط وليس اذاعي ..لو سمحت لدي سؤال ماذا كانت المناسبه لاقامة حفل ١٠ سبتمبر ١٩٧٢ في جامعة القاهره حيث غنت ام كلثوم اغدآ القاك ويامسهرني .
ولحضرتك الشكر .

اخى العزيز
مالهاش مناسبة رسمية ولكن حفلة كانت عاملاها جامعة القاهرة للموظفين فيها ممكن يكون مناسبة للجامعة نفسها لكن مش مناسبة وطنيى يعنى
فيه ملحوظة كانت زمان الايام دى : ان كانت الهيئات والشركات الكبرى كل سنة بتعمل حفلة سنوية يعنى الهيئة تشترى الحفلة وتاخد التذاكر وتوزعها مجانا على اعضائها .. بس اكتر نجمة فى الحفلات دى كانت فايزة احمد لن اجرها كان قليل شوبة بالنسبة لنجاة الصغيرة وعبد الحليم ووردة
بس الحفلات دى كان فيها عيب ان جمهورها مش الجمهور الطبيعى اللى بيحضر الحفلات عموماً
يعنى سلوك الجمهور بيختلف واحيانا بطريقة تضايق المطرب
انا الحفلة اللى انتم منزلينها هنا لأغداً القاك انا مش بحبها بحسها حفلة سيئة جدا للأغنية دى بالذات
ولو تحبوا احكى لكم عن تفاصيل اكتر ( طبعاً بتحبوا تعرفوا الاسرار واللى ما اتقالتش قبل كده ؟ )
حفلات ام كلثوم العادية بيبقى الجمهور كل حفلة هو هو نفس الاشخاص بنسبة اكتر من 80 % . بمعنى ان انت لما تكون قاعد على المسرح بتحفظ الجمهور وبيبقى فى نفس المكان يعنى اول صف بيبقى قاعد احمد رامى وقدامة منصدة صغيرة عليها مناديل ( من القماش بتاعة زمان قبل اختراع الكليلنكس ) لأن احمد رامى كان لما بيسمع ام كلثوم بيبكى ويلزمة دستة مناديل ؟ يعنى ان لو نظرت بزاوية 45 درجة حاتشوف واحدة ست شعرها لبيض وجنبها راجل بشنب كثيف ووراهم كذا وكذا كل حفلة
التميز الخطير ده وغن كان الفنان محمد صبحى هو اللى بيتولى توزيع تذاكر حفلات ام كلثوم كان الجمهور بيشترى نفس الكرسى كل حفلة , بقول التميز الخطير ده ان الجمهور كان حافظ طريقة ام كلثوم يعنى امتى بصقف وامتى يصقف اوى وامتى يصقف بهدوء .. وامتى يقول آه ياست .. لأن العبقريات اللى زى ام كلثوم اى قلق ممكن يلخبطها .. وهنا عايز اقوللكم ملحوظة عمرك رحت مولد ؟ الموالد هى ازحم مكان فى العالم وبه كل اصناف البشر ممكن تلاقى واحدة بتغنى وجنبها ناس بتضرب نار وممكن خناقة وكراسى تطير او واحد بيصرخ لأن محفظته اتنشلت والمطربة بتغنى عادى .. لكن ام كلثوم لو حد جه جنبها وعمل اى صوت ممكن تنسى الكلام
نرجع للى ضايقنى فى الحفلة دى ... زى ماقلت ان الجمهور كان كله داخل ببلاش على حساب الجامعة ومش جمهور ام كلثوم وجمهور مش من النوع اللى بيحضر حفللات اصلا .. يعنى بينظر اليك على المسرح كانك كائن غريب جاى من الفضاء .. اول ما ابتدت ام كلثوم الوصلة كان الثلاث صفوف الاولى من صفوف الجماهير خالية
ودى عملاها ما تحصل فى حقلات ام كلثوم اللى كان الكرسى ساعتها ثمن اغلى تذكرة خمسة جنيهات مصرية ,, وقبل الحفلة بساعة ممكن تتباع التذكرة بألف جنيه مصرى وده كان مبلغمفزع وجسيم ساعتها واللى كانبيشتريها واحد جاى من السعودية مثلا وبيموت فى ام كلثوم ومستعد فى آخر لحظة اى ثمن,, واللى بيبيع له التذكرة بياخد مبلغ الالف جنيه واللى كان ساعتها ممكن تشترى بيه سيارة فيات 1300 على الزيرو وبروح يسمع ام كلثوم فى البيت فى الراديوهى مش حاتطير يعنى يحضرها الحفلة القادمة ( آسف للإطالة ) المهم الثلاث صفوف الخالية دى بالطبع للسيد الدكتور عميد الجامعة وادارة التدريس اكابر الجامعة يعنى .. يبقى الباقى الموظفين الصغيرين .. والظاهر ان السيد الدكتور عميد الجامعة اتاخر ومش معقول الهيئة تدخل بدونه .. وميعاد ام كلثوم مقدس يعنى الساعة العشرة تتفتح الستارة مالهاش دعوة مين جه .. لأن جمهور ام كلثوم بيكون لازق ع الكراسى من الساعة 9 عشان يقعدوا ويستريحوا وما حدش يتحرك
ابتدت وخلصت المقدمة وابتدت غناء المذهب واثناء ما هى بتقول واهلت فرحة القرب وهى آخر سلطنة .. اذ فجأة باب القاعة الخلفى يتفتح ويدخل السيد الدكتور المبجل عميد الجامة وخلفه السادة اعضاء هيئة التدريس .. طبعا الاخوة الموظفين الغلابة او ما شافوا العميد بتاعهم راحوا وقفوا وقعدوا يصفقوا لحد ما السيد المحترم المبجل والسادة المحترمين المبجلين قعدوا على كراسيهم كانت ام كلثوم خلاص اتدمرت ... يعنى ابتدت تنسى الكلام .. وتحسها عايزة تكلفت الحفلة وتخلص حست انه مش يومها ... وفيه مشكلة خطيرة جدا جدا حصلت لأم كلثوم بعد وفاة محمد عبده صالح انه كان بيبقى لازق فيها من الخلف بزاوية يعنى مش خلفها خلفها ولكن على يمينها شوية .. كانت ام كلثوم ساعات بتنسى الكلام .. وهى بتغنى جملة وحاسة انها مش فاكرة الجملة اللى بعدها كانت بتعمل له إشارة خفية بإصبعها ( الاشارة دى له هو بالذات على طول هو يقول لها كلام الجملة التالية ) والملحوظ ان الاشارات دى بينهم فقط يعنى كان فيه إشارات للفرقة لما تحب تعيداكتر من المتفق عليه يعنى جملة انا عارف انها 3 مرات هى استحلتها , او حاسة انها ما قالتهاش حلو اوى اوى بتحب تعيدها مرتين كمان والوحش يتشال فى المونتاج ... طبعا مع عدم وجود محمد عبده صالح ابتدت تظهر الكحاية دى كتير .. انا بكتب لكم وانا بسمع التسجيل ده وجت عند فأتى او لا تأتى ووقفت خالص نسيت اللكلام وماحدش لحقها
وحصل ظاهرة تانية جننت ام كلثوم بس عدتها ... واحد من المتفرجين طالما الحفلة ببلاش جاب معاه بنته طفلة عمرها ييجى 8 سنوات راح مطلعها فى الممر بين الكراسى وخلاها ترقص ,, طبعا فى حفلات ام كلثوم العادية دى مش ممكن يدخلوها .. المهم لفتت نظر المتفرجين وقعدوا يصقفوا لها وام كلثوم خلت الفرقة تيد الموسيقى كتير يمكن البت تتعب وتخلصنا بس البنت كان صحتها كويسة ماتعبتش
من اهم الظواهر اللى قلت عليها فى كلمة نفس الجمهور وحافظ الست .. فيها احينا لما بتغنى الكوبليه تانى مرة بيصقفوا عايزين تانى .. احيانا هى بتبقى عايزة تمشى ع الكوبليه اللى بعدوا بتخلى الفرقة تعزف لازمة الكوبليه ,, احيانا بيتشبثوا بالإعادة .. بس بيحسوا انها مش عايزة تعيد بيسكتوا
مع اطيب تحياتى

**بشيرالأنس** · #**157** 16/01/2012, 20h48

شكرا للأستاذ عادل على هذا الشرح الذي جعلنا نعيش أجواء هذا الحفل ونعرف حقيقة الأشياء...وهنا أتذكر أنه قد سبق الحديث في سماعي عن هذه الطفلة التي ترقص وجاء كل واحد بحكايته منهم من قال أنه من كثرة إعجاب الست بهذه الطفلة أعادت الكوبليه مرات...وووووو...تاريخ أم كلثوم لن يؤرخه كاتب ولن يدعي فيه أحد معرفة...وردكم هذا أخي الكريم خير دليل على ذلك...تاريخ أم كلثوم سر في جسد كل شخص حضر حفلا لها أو كلمها...رحمة الله عليهم جميعا
أطال الله عمرك والسلام عليكم ورحمة الله

**عادل صموئيل** · #**158** 16/01/2012, 21h05

اخى العزيز بشير الانس اشكرك لتقديرك الجميل لكلامى المتواضع
اضيف كلمة صغيرة
واما كلثوم بتغنى فى الحفلة تخيل حضرتك من كتر الصمت ولتركيز كنت لو القيت ابرة على الارض كانت حاتعمل انفجار .. ومن هنا تتفهموا مدى قدسية الإستماع واحترام الفنان الكبير ...
يعنى كان زمان اهم شىء المطرب يسيطر على الجمهور ويتحكم امتى يصفق وامتى يصمت
يعنى اقول لكم معلومة كمان مادمتم بتحبوا اسرار ام كلثوم ( واللى ماحدش بيحسها إلا لو حد من الداخل قالها يعنى حاجات ما يدخش باله منها الكتاب والصحفين والرواة وبالذات المتخلفين اللى بيعملوا مسلسلات عن حياة الفناني بيخلونى اقعد اضرب كف على كف ولا حاجة من ده حصلت او ممكن تحصل )
اقول لكم
مش ساعات ام كلثوم وانت تبتسمعها تلاقى الجمهور هب وقال آآآآآآه ياست
من كتر الصمت ساعات كانت ام كلثوم بتتخيل الناس ناموا .. كانت بتضغط على حرف او بتعمل اى آه او انه تجرح القلب تلاقى الجمهور كانه اتكهرب ويفز على الكراسى ويقول آآآآآآآآآآآآآآآآآآآآآآآآآآآآآآآآآآآآآآآآآآه ياست ثم يجلس
معناها احنا صايحيين ومعاكى وبنسمعك بكل حواسنا ... وهنا المطرب يبدع
اما اللى بيغنوا هذه الايام بيتعمد انه يخلى الجمهور يفضل يصقف طول الوقت كأنه اهبل ,, ومعاه عشر مزاهر تفضل تخبط وبببببببيتعمد يخلى البنات الحلوة فى الصالة ترقص ويشجعهم تلاقى 200 بنت حلوة بترقص فى الجمهور مين حا يتركهم ويسمع المطرب الفاشل ؟
وهو بذلك بيغطى على فشله فى الغناء
يعنى انا عادل صموئيل عازف الكمان المتواضع جدا لو دعيت فى حفلة واقبض فيها مبلغ محترم بس جمهور مش بيجيد السمع افضل انى اقعد من ناس بيحبونى واعزف لهم مجانا للصبح بس يكونا بيفهموا كل حرف بعزفه .. يعنى لما احب العب بعواطغهم واعمل سحبة اصابع حارقة يقولوا الله .. دى عند الفنان بالدنيا
مع اطيب تحياتى

**خليـل زيـدان** · #**159** 16/01/2012, 21h31

حبيبنا الجمـيل عــادل باشا صموئيل
بالفعل .. حضرتك حـلو الرواء .. عشنا بين جنبات كلماتك لحظات رائعة .. دافئة
أطلقنا فيها العنان لخيالنا .. لكن ...
نحن في سمـــاعي .. منبر التوثيق .. للتراث وكل مقوماته ..
فنرجوك .. أن تحكي لنا ذكرياتك الفنية
وأن يكون تسجيل صوتي .. وليس كتابة .. فقط سجل ذكرياتك بصوتك
وارفع لنا الملف .. لنستمتع بصوتك ودفء كلماتك وذكرياتك
التي ستظل مرجعاً هاماً لا يقل أهمية عن ملفاتنا الغنائية

**tarab** · #**160** 16/01/2012, 22h16

ياسلام عليك استاذ عادل وفيت وكفيت عشنا مع حضرتك زمن غير الزمن , اكثر من هذا يا باشا تنعش القلوب .
مشكورين لوقتك ومجهودك .