الأصدقاء
حبيت بس ارفع لكم نوتة ل "شمس الأصيل"...
عشان نعرف بس قيمة وجود الفنان /عادل اللى بسط لنا هذا اللحن الصعب جدا ..يعنى لو قارنت النوتة بنوتة الأستاذ /عادل ...حتلاقى الفرق كبير ...وصعب جدا عزفها ....أستاذ /عادل ...احنا متشكرين ياريس...هاهاهاها
اللى بيسأل على الكلمات والألحان
كلمات:بيرم التونسى
ألحان :العبقرى رياض السنباطى
غنتها ام كلثوم فى 15 مايو 1955
الأفاضل أعضاء المنتدى
تحية طيبة أهدي لكم نوتة موشح (شاغلي بالحسن بدر)
وهذه أول مرة أدون عمل غنائي وأجرب أدون على الأحرف الموسيقية أحرف عربي وهذا الموشح قد تعاملت معه من قبل أتوقع أثناء دراستي أو يمكن في بداية حياتي العملية
وبما أن الميزان 7 من 8
قدر الأمكان جمعت بعض العلامات الموسيقية وفي بعض الأحيان تركتها لخدمة تقطيع النغمات على الأحرف العربية للموشح للحن وأشكر الأستاذ عادل المرجع الدائم لي ولأعضاء المنتدى
واشكر الدكتور وسام أكرم لمساعدتي الدائمة في التغلب على الصعاب التي تواجهني في تقنيات أستخدام برنامج التدوين
لقد رفعت لكم النوتة الموسيقية والملف الصوتي مرة الفرقة كاملة ومرة غناء بمصاحبة عود و إيقاع .
التعديل الأخير تم بواسطة : tarak766 بتاريخ 04/02/2019 الساعة 23h33
------------------------------------------------------------
الاخ العزيز و الغالي استاذ عزت
والله يعجز لسناني و قلبي عن التعبير ياصديقي. انا فعلا في غاية الامتنان على سرعة الاستجابة و لكرمك. اشكرك من كل قلبي و دعائي لك بالتوفيق و النجاح الدائم انشاء الله
اخوك المخلص
وسام
كل الشكر لكل الاخوة انا اتمنى استاذ عادل يكتب
اهواك زى ماعزفتها الفرقة الماسية بس
اكيد الاستاذ عادل مشغول جدا على العموم انا عندى نوتة
لى اهواك وبسيطة اوى وصح بنسبة كبيرة اوى
على حد اعتقدى والله اعلم
كل التحية
ياجماعة دى نوتة ياحسن ياخولى الجنينة من تدوين
استاذ عادل والنوتة عبارة عن صورة وانا حولتها الى
ملف بى دى اف لكنى اتمنى استاذ عادل لو لسه عنده
النوتة ينزل ملف البى دى اف بتاع الاغنية
الاصلى لو كان لسه عنده
كل التحية
عزيزى عمرو
اليكم النوتة المطلوبة من حسن حظكم انى لقيت الملف
بس مش عارف ماعرفتش احذف الاولى
مع اطيب تحياتى
التعديل الأخير تم بواسطة : عادل صموئيل بتاريخ 01/12/2011 الساعة 12h37
غناء ميادة الحناوى وتلحين محمد سلطان
اللحن ده انطلب وانا اول ماسمعته بصراحة ما عجبنيش ( ده ذوقى الشخصى ) , طبعا يهمنى اوصل وجهة نظرى لتلاميذى , اللى بيتعلموا منى حاجات تانية مهمة جدا فى الموسيقى غير مجرد نى بكتب نوتة وهم بيعزفوها
اول حاجة اللحن طويل جدا جدا , يعنى اكتر من حجم ميادة الحناوى , يعنى توب ميادة الحناوى بااالكتير نص الحجم ده , يعنى انا هنا كاتب 16 صفحة , ميادة بالكتير 8 صفحات عشان المستمع يقدر يستوعب اللى بيسمعه , يعنى حتى انا عادل صموئيل شخصيا , شوفوا كل جملة سمعتها كام مرة عشان الكتابة ودلوقتى اللحن عشان حجمه كبير جدا كله طار من مخى ما فيش ولا جملة لزقت , يبقى عامة الشعب المستمعين فقط حايحسوا بإيه ؟ عبارة عن قطار سريع جدا بحيث انك ما تحفظش اى منظر من مئات المناظر اللى بتعدى عليك , وده انا بعتبره مش ذكاء من محمد سلطان , هو متأثر بطريقة فايزة احمد الله يرحمها يعنى اللحن كان طريحة , شيلة كبيرة اوى , بس اختلاف فايزة عن ميادة ان الااعات بتذيع لها اللحن كتير , يعنى من اللحن للحن التانى 6 شهور ممكن يكون الجمهور استوعب فيها اللحن , ولو سمعت اللحن تحس بنكهة فايزة احمد فيه ظاهرة جدا , من اكتر الحاجات اللى ضايقتنى وتضايق اى مدون الصولوهات وبالذات صولو الكمان , يعنى لما تسمع زمان صولو الكمان تلاقى اما صولو بيقوله هو فقط او صوله الفرقة بتقوله بعدين الصولو بعدين الفرقة بتقوله تانى وهنا العازف بيلتزم بالنوتة , ممكن يقول حاجة قليلة جدا من عنده يعنى بصمته , لكن لازم يلتزم جدا بالنوتة , وده اللى انا اشتغلت فيه عشرين سنة , وهنا الفرقة بتقول جملة بعدين الكمنجة بتقولها هنا تبقى دقت طعم الجملة من الفرقة بعدين بتتذوق طعمها من الكمنجة بعدين تسمعها من الفرقة تانى عشان انت تكون تقريبا فهمت الجملة , لكن هنا ظهرت طريقة ( ظهرت بعد جيلى ) ان عازف الكمنجة الصولو والاورج بالطبع والعدوى دى ظهرت على جميع عازفى الصولو ) ان العازف عايز يستعرض عضلاته التكنيكية وبيخرج عن النص بيعمل حاجات عفاريتى يطلع فوق اوى وينزل فجاة يعنى كانك راكب مراجيح مدينة الملاهى , وهنا هو اول بيضيع الجملة , بيضيع ستيعاب الجملة بالنسبة للمسمتع لأنه مش حايفهم العفاريت اللى حصلت , يعنى مش ممكن المجهور يدندن الجملة , والكارثة لما الصولو يبتدى الاول زى اللحن ده , يعنى بيقول حاجة هلامية انت مش حاتفهم منها حاجة بعدين الفرقة تقول الصحيح هنا انت مش حاتلحق تستوعب الجملة , انا اول ماسمعت ده لولا ان الفرقة بتقول نفس الجملة بعد الصولو كنت مش ممكن حاقدر اكتب الصولو , وحتى لو تهورت وكتبته كان مش ممكن حد حايعرف يعزفه ولا حتى العازف اللى عزفه , لأنها حاجة فورية بتطلع منه وصعب هو نفسه يكررها تانى وانما حيقول حاجة تانية , من عيوب اللحن ان لو بصيت على النوتة من اولها لاخرها حتلاقى موازير كتير فيها دوبلات كروش كتير , لو تمعنت فيها وسمعت اللحن حتلاقيها مش تلحين ولكن تفصيل يعنى تعمد عرقلة الجملة او تشبه التمارين التكنيكية ود ه شىء يضيع الطرب , وللعلم تعبتنى جدا انى استوعبها مع السرعة العاللية بس عزائى انها بعد ما اتكبت انكم من السهل تطلعوها , وبرضه دى من اهم مساوىء الجيل اللى بعدنا من العازفين , يعنى احنا اهم شىء عندنا الطرب ثم الطرب ثم الطرب , والتكنيك ده حاجة من نفسك انت تذاكرها فى بيتكم , لذلك تلاقى كل الحان الزمن الجميل فيها الجمل طربية جدا وسهلة او تسميها السهل الممتنع , يعنى فيه مثلا مازورتين فى السطر الرابع والخامس من المقدمة استحالة انك تقدر تدننهم , ل انت قدرت 99% من الناس مش ممكن حتى حاتستوعبهم , بينما كل اغانى ام كلثوم مافيها المصيبة دى , الجيل اللى طلع بعدنا كان دماغه تكنيك بحت يعنى العازف يمسك الكمنجة ويروح واخد ال 16 صفحة طحن , انا طبعا جربت الموسيقى دى والموسيقى بتاعة زمان , كنا زمان بنستمتع باللى بنعزفة ونتمنى الجمهور يصقف اوى ونعيد المقطع تانى وتالت يعنى نفسنا الحفلة ماتخلصش , اما ايام الألحان اللى بطريقة اللاحن ده انا شخصيا كنت بحس انى مش بعزف ولكن بشيل نقلة زلط , كنت بحس ان كتفى ظهرى وجعنى من الكمنجة , يعنى الملحن زمان كان اهم شىء عنده ان العاف يتمتع اوى اوى باللى بيعزفه عشان يطلع كل اللى جواه , لما تسمع ام كلثوم تلاقى فى الكوبليه الاخير العازف بقاله ساعة ونصف بيعزف بس لسه مستمتع ومتسلطن وبيعمل عرب وسحبات جميلة , اما الالحان دى العازف بيبقى خلاص البنزين بتاعه خلص وعمال يستحمل لحد ما اللحن يخلص , وانا لولا الظروف النفسية اللى بتمر بيها مصر والانتخابات ما كنتش حاكتب اللحن ده يعنى اخد منى عشر ايام فى اقصى ظروف الاكتئاب النفسى وهنا لازم اكتب حاجة انا مش عايز اكتبها , المهم انتم عندى , يعنى اللحن فيه اجزاء صعبة واجزاء سهلة , عايزكم تعزفوا الاجزاء الصعبة , طبعا عشان تبقوا استفدتم كلكم من تعبى ما يستفيدش ممنه واحد او انتين فقط
على فكرة اللى يحب يرد بلاش اقتباس يعنى رد فى موضوع جديد لأن انا كاتب هنا كمية كبيرة لو خمسة نزلوها فى ردودهم حتاخد خمس صفحات
مع اطيب تحياتى وآسف للإطالة
ياجماعة دى نوتة السيدة فيروز سكن الليل كاملة
ومن تدوين استاذ سيمون شاهين
يمكن شكلها يخوف شوية لكنها سهلة اوى
على فكرة فى اشاعة فى المنتدى انه استاذ عادل
بيكتب انت عمرى والله اعلم
هههههه
كل التحية
دى نوتة "لست قلبى"أو "انت قلبى"...اتمنى توفى بالغرض مؤقتا لحين كتابتها....طبعا سيبك من الشخبطة اللى انا عاملها على النوتة لما كنت مبتدئ.....دى حاجات من 15 سنة[/
الصديق الفنان/نزيه محمد.....اخيرا ياعمنا شرفتنا هنا ونورتنا....ياريت تنزل لنا نوتك هنا ...بدل طريق رأس الرجاء الصالح ده...هاهاها...مع الأعتذار والحب للجميل دائما عم احمد "نور الصباح"...اللى عرفنا على حضرتك...
التعديل الأخير تم بواسطة : عاصم المنشاوى بتاريخ 08/12/2011 الساعة 12h23
رد: طلبات نوتة
العرض المتطور
