( عشمتنى بالحلق)
قالوا المرتب زاد رُحت اشتريت لحمه
وعزمت كلّ الولاد والبيت صبح زحْمه
وكسيت مراتى وجِبت هديّه لخالاتى
قولوا لحماتى عشان تدعيلى بالرّحمه
,,,,,,
ماكنــّا عايشين وشايلين طين وبنعانى
وقولنا قرشين يسدّوا الدين يا ناسيانى
لمّا القرار انطلق ع الارض مال واندلق
عشــّمتنى بالحلق خرّمت أنا ودانى
,,,,,,,
واخدين مسكــّن عشان مفعوله يِئلمنا
ولا عمْر طبع الجبان فادنا وعلــّمنا
على ايه نويت يازمن رهنت بينا السّكن
محتاج توفىّ التمن على سركى سلــّمنا
,,,,,,,
مات الضمير ياولد والحظ بالمقلوب
تلاتين سنه ع البلد والناس بتاكل طوب
حضر الجميع فى معاد يدفن فى طينها فساد
شوفوا العجب ياولاد لسّه الصِّوان منصوب
,,,,,,,
كان فيه زعيم من زمان بيقول مافيش فايده
من يوم ماضاع الأمان والدنيا نار قايده
نفسى أمّا اقولها ألاقى حدْ يسمعنى
جنبى وجعْنى ومتأكــّد ماليش زايده
,,,,,,,,
لمّا انتى رافضه ياست الناس تطاوعينى؟
وماضى منــّك يمين لاتطلــّعى عينى
ياريت صراحه وقولتى الأمر بالرّاحه
وبلاش مناحه داغلبى كان مكفــّينى
,,,,,,,,
رد: عشمتنى بالحلق
العرض الشجري