هيه دى المدرسة
إزيكو يا حلوين
إمال فين الأستاذ
زوغ وراح على فين
ليه تدفعوله مقدم
أهو فاتكو هنا قاعدين
فاتكو وراح على مطعم
ياكل بقى ويستطعم
وربى هوه الأعلم
إمتى ييجى يا طعمين
,,,,,,,,,,
أستاذنا عامل فردة
عليكو يا إخوان
طير م اللى قلبك يحبه
وشاى وباكو دخان
كراتين كتيرة وقفف
تملا يا ناس دكان
ورنجة ويا فسيخ
وبصل وتوم للطبيخ
وأناناس معاه بطيخ
وسمنة لزوم الخزين
,,,,,,,,,,
أستاذنا مهوش لوحده
معاه كمان عريف
بياكل البطة كاملة
ومعاها عشرين رغيف
وسلطة خضرا كتير
وفلفل من الحريف
والشوربة يشربها
وميه قول قربه
ويحلى بمربى
والشاى دا كوبايتين
,,,,,,,,,,
بس أنا هاتعلم
مش هادفع الميسانية
مفيش معايا فلوس
وظروفى صعبة شوية
شوفولى بحث اجتماعى
أو حد يدفع ليه
حيلتى ترينج مرقع
فيه الرمق ومبقع
لو يلزمك قول ينفع
وحلال عليك يازين
,,,,,,,,,,
هآجى أنا من النجمة
من قبل ما حد يصحى
ومش هاغيب ولا حصة
ولا حتى هانزل فسحة
يمكن فى يوم اتعلم
واكتب وراك الفصحى
طول عمرى باكتب عامى
فى سياسة حرقالى دمى
بس اللى زاد من همى
إتنين جنيه ضايعين
رد: موسيقى الشعر - دروس في علم العَروض
العرض الشجري