الجمعة 17 ديسمبر 2010
(مصر ... والهلال مع الصليب)
فى المحروسة ؛
مريت على مارجرجس وسيدنا الحسين
وأنا ماشى من مصر الجديدة للغورية
فى العروسة ؛
مريت على الأنبا مينا والمُرسى أبو العباس
وأنا عايم من المنتزه لغاية المنشية
فى قبلى ؛
مريت على الأنبا أنطونيوس وجامع الناحية
وأنا أمر بين الغيطان والقرى الصعيدية
***
اخبط عالبيوت ؛
ادخل الاقى المشاءالله مع الصليب
وصورة العدرا جنب صورة البيت الشريف
انزل زنقة الستات ؛
الاقى إللى داقه الصليب على إيديها
وإللى معلقة على صدرها المصحف الشريف
وعلى السوق ودينى ؛
أجيب هِدمة ولا لقمة أو رغيف
ألاقى محمود يعملها هو ورئيف
***
قامت أُم حسن وأُم رامى يعجنوا خبيز كحك العيد
دى تصلب عليه ودى تفطر عليه والصاجات شايلين
عادتهم يدوقوا بعضيهم حتى لو كانوا زى بعض عاملين
دى تدوق البربارة ودى تدوق العاشورا ما هما طابخين
فى يوم ؛سمعوا إن أُم محمد وأُم جورج مع بعض متخانقين
قاموا صالحوا بينهم وقالوا رب اجعلنا دايماً منصورين
آمين
رد: الوحدة الوطنية المصرية
العرض الشجري