طلبات نوتة

**وسام اكرم** · #1 13/03/2011, 21h26

اقتباس:

المشاركة الأصلية كتبت بواسطة armendo

العزيز الأستاذ عادل..اكرر طلبى لتدوين اغنية يا حبيب الروح للراحلة ليلى مراد وارجو ان تتذكرها هذة المرة وتكون الثالثة ثابتة مع تحياتى......ارمندو

--------------------------------------------
حبيب قلبي ارمندو
مساء الخير او صباح الخير؟ الساعة في بغداد 12.24 AM
هذه نوتة ياحبيب الروح من تدوين ألاستاذ عادل صموئيل مع خالص حبي و تقديري...
وسام
اولا اشكر الاخ العزيز وسام
ثانيا انا كررت عشرات المرات ان اى عضو يطلب نوتة يشوف الاول هل هى موجودة ام لا على الصفحات انا مش بفتكر النوتات اللى انا دونتها وحصلت كذا مرة انى دونتها مرة اخرى يعنى اطلب من جميع الأحباء انهم يعملوا بحث فى المنتدى عن اى نوتة يطلبوها مع جزيل الشكر
مع اطيب تحياتى عادل صموئيل

**عادل صموئيل** · #2 17/03/2011, 20h48

اقتباس:

المشاركة الأصلية كتبت بواسطة memahima

انا عاوزه ضرووووورى بلييييييييز نوته صباح الخير يامولاتى لسعاد حسنى

الأخت العزيزة
انا دونت هذه النوتة واهديها لأمى العزيزة التى رحلت عنى فى نفس الوقت العام الماضى
كما اهديها لكل المدرسين فى المنتدى
لكن فيه ملحوظة : اللحن ده بالذات فيه كعبلة كتير يعنى لو انتى حافظاه كويس حايبقى سهل جدا جدا انك تعزفيه من النوتة طبعا انا حاولت تبسيطه على قد ماقدرت , لكن برضه بيحتاج ان اللى يتناوله يكون حافظ التسجيل كويس عشان فروق السرعات وطريقة الأداء , بس اكيد انتى طلبتيه لأنك عارفاه كويس
اتمنى ان يطلع حلو ومع اطيب تمنياتى عادل صموئيل

**عادل صموئيل** · #3 19/03/2011, 00h56

احبائى

اقدم لكم
نوتة قلبى سعيد
اهديها لأخى العزيز هيثم صالحى
انا آسف اتأخرت عليك بسبب الثورات
اتمنى ان يسعد بها الجميع
مع اطيب تحياتى

**عزت شحاته** · #4 21/03/2011, 13h22

الى استازى الحميل / عادل صموئيل
الى كل الاخوه اعضاء المنتدى الغالى
اهديكم نوتة جديده
( مصر مصر تعيشى يا مصر )
للمطرب مدحت صالح وناديه مصطفى
مرفق الكلمات

**عادل صموئيل** · #5 28/03/2011, 18h39

احبائى
يسعدنى ان اقدم لكم اليوم نوتة رائعة عبد الحليم
حاول تفتكرنى
انا دونتها كاملة وراعين فيها اقصى درجة فى التبسيط ( يعنى فى الفرقة الماسية كانت مكتوبة اصعب من كده كتير ) بس انا طبعا يهمنى جدا الأخوة المبتدءون يعنى افتخر لو اكبر عدد ممن يقدر يعزف النوتة , اما عن الذكريات وأشكر اخى العزيز عاصم المنشاوى , طبعاص الذكريات كتير جداً لكن اولا ارد على سؤاله لمذا غنى عبد الحليم اكثر من اغنية , فى هذه الحفلة غنى عبد الحليم 3 اغنيات يامالكاً قلبى ورسالة من تحت الماء للموجى ثم حاول تفتكرنى والسؤال لمذا غنى عبد الحليم 3 اغنيات مرة واحدة وارد رد حايخليكم تستغربوا بس بجد وانتم تعرفون مصداقيتى وحيادى : عبد الحليم غنى 3 اغنيات فى هذه الحلفة لأنه كان لا يستطيع غناء عشر اغانى , طبعاً التفسير ان كنا بنعمل بروفات خمسة وخمسين بروفة على الاغانى وفى حالة ال 3 اغانى كنا بنسجلهم فى 3 ايام تسجيل متواصل لمدة 20 ساعة على الأقل الشريط مش بيقف ثم البروفة الجنرال ثم بروفة فى الصباح يوم الحفلة فى مكان الحفلة عشان ضبط الميكروفونات واجهزة التسجيل ثم الحفلة ( وهذا التقليد اخذه عبد الحليم عن السيدة ام كلثوم وبعد ما توفى عبد الحليم بقت وردة وفايزة يعملوا فينا كده ) المهم بعد يوم شم النسيم كان عبد الحليم تانى يوم يسافر لندن فى مشتشفى لندن كلينك وله غرفة هناك مخصصة له يتعمل له عمرة كاملة وانا اذكر مرة زرته فى المستشفى دى والممرضة كانت بتشتكى انها مش لاقية فى جسمه عرق سليم عشان تعطيه الحقنة , يعنى تخيلوا الانسان البائس اللى كان بيسعد الملايين كل شرايين جسمه تلفت من كتر الحقن والممرضات كانوا بيبحثوا عن واحد سنتيمتر سللين فى اى مكان من جسمه !!!!
المهم كان عبد الحليم دايما بيتوقع النهاية لأن صحته كانت وصلت لحارة سد يعنى وصلت الحالة انهم عرضوا عليه استئصال الكبد ( كان لسه مافيش زرع كبد ) ولكن الاطباء فهموه ان استئصال الكبد بيعمل فقد ذاكرة جزئى فى اى وقت هو قال يعنى ممكن اقف على المسرح انسى حاغنى ايه او انا مين او انا جاى الحفلة دى ليه اصلاً , طبعاً فضل انهم يحاولا يلصموا فيه ويموت عظيم ولو تراجعوا قارءة الفنجان كانت احلى حفلة كان فيها اجمل صوت لعبد الحليم يعنى دى معجزة ان مستشفى متنقل ربنا أخد منه كل حاجة لكن حافظ له على صوته لآخر لحظة , ده السبب اللى كان بيخليه فى سنواته الأخيرة يحاول يجهد نفسه عشان يعمل اكبر عدد ممكن من الاغانى يتركها للذكرى والتاريخ لأنكل سنة كان بيحس ان ممكن ما يبقاش فيه عبد الحليم فى شم النسيم القادم , لكن فى حفلة نبتدى منين الحاكية كانت الاغنية كبيرة جدا ماتسمحش اننا نعمل حاجة تانية معاها , يعنى هنا حاول تفتكرنى هى زمنها طويل لكنها عمليا صغيرة يعنى لو حسبت المقطه بتاع ابقى افتكرنى بيتعاد فى كل كوبليه وجملة تعالى , وقد يسأل حد بتعملوا خمسة وخمسين بروفة على ايه ؟ انت لو شفت اول بروفة واول ورق اتحط قدامنا وقارنته باللى بتسمعه دلوقت تلاقى 50% منها اغنية تانية يعنى كل يوم الماحن بيعدل ويغير ويشيل ويحط يعنى المقدمة دى مثلا اتغيرت كذا مرة وكل حرف اتراجع 100 مرة بس اللى كان بيزعجنا ويضايقنا الاورج ( وانا بكره الاورج على فكرة ) كان يجيب اورج جديد ويقعد يستعرض علينا بأصواته الجديدة اللى كان معظمها مقرف ويقعد يجرب الصولو صوت صوت لما روحنا تطلع وبعد ما اعصابنا تخلص بعد 70 غيار يرجع للصوت الاولانى , بس برضه انا النهاردة لما حصلت الثورة باترحم على كل فنانى العصر الجميل وعلى اناشيدهم , يعنى فى وسط الاناشيد اللى طالعة لثورة 25 يناير ولو قارنتها بأناشيد ثورة 23 وما قبلها تحس ان الاناشيد الجديدة هبلة او فاضية يعنى تحس انها مش مصرية مش بتتكلم بلغتنا , يعنى انت لما تسمع اناشيد واغانى زمان تحس بنكهة مصر الفول والطعمية والملوخية والملوحة والفطير المشلتت وخان الخليلى والهرم والعباسية وشبرا , الاناشيد الجديدة بحس ان مالهاش نكهة اصلا , فيه حاجة تانية كل اغنية انت سمعتها من عبد الحليم او ام كلثوم بتكون الاغنية دى عندهم من كذا سنة قبل ان يغنيها بس هى عملية نفس يعنى هو لازم يكون عنده 4 اغانى جاهزة على الاقل ( عشان مش يتزنق قبل الحفلة ويختار اغنية اى كلام وخلاص ) هو بيكون عنده الاغانى جاهزة وهو بيحدد الجو يسمح السنة دى بأى اغنية , طبعا الكلام ده مش بيحصل دلوقتى , يعنى الملحن بيجى له 17 اغنية فى يوم واحد يدخل على الاورج يدبهم وزى ما يطلعوا ممكن يطلعوا كلهم اتغنواا قبل كده 100 مرة , يعنى حتى دلوقتى تلاحظ ان جمل كتير بحالها زى ماهى فى 100 اغنية , على ايامنا اى جملة لو فيه اشتباه او شبهة ان اى احجة شبهها كانت بتتنسف فوراً
طبعا اشكركم على حسن الاستماع
ومع اطيب تحياتى

= 450) this.width = 450; return false;" border=0>

**عادل صموئيل** · #6 07/04/2011, 02h22

= 450) this.width = 450; return false;" border=0>

الدنيا ليل والنجوم طالعة تنورها نجوم تغرى النجوم من حسن منظرها
ياللى بدعتوا الفنون

اقدم لكم نوتة رائعة من كلاسيكيات عبد الوهاب الخالدة

الفن

اهديها لأخى العزيز وائل
هنا ملحوظة الاغنية دى لما تسمعها يتهيأ لك انها صعبة جداً ولكن على العكس انا هنا بسطتها بشكل ممكن تعتبره اعجازى
يعنى المقدمة ادليب عملتها على ميزان عشان اى حد حتى لو مبتدىء ممكن يقراها بدون مشاكل بس المشكلة فى اللحن ده هو سهل جدا لكن فيه خاصية انه بيحتاج احترافية عالية جدا جدا فى الأداء ودى موضوع صعوبته , يعنى اللى يعزفه كله محتاج انه اولا يكون حافظ اللحن صم بحيث ان النوتة ترشده
طبعاً لاحظوا فروق السرعات بين الكوبليهات
كمان لاحظوا الانتقالات المقامية العبقرية والخبيثة احيانا اللى عبد الوهاب لازم يعملها والا ما يبقاش عبد الوهاااااااااااااااب
مع اطيب تحياتى

**عاصم المنشاوى** · #7 07/04/2011, 18h18

scan0034.jpgالأستاذ/عادل
تسلم ايديك ع المجهود الضخم لأغنية "الفن"...والتى لأسباب سياسية كانت نادرا ما تذاع وأذا أذيعت ,كانت تذاع مبتورة...بدون ذكر أسم الملك "فاروق الأول"....رحمة الله عليه...
الأستاذ/حجازى ...دى نوتة "يانسمة الحرية"لعبد الوهاب واتمنى ان تكون هى...ولا تقصد أغنية تانية؟....

**وائل علوي** · #8 07/04/2011, 22h54

اقتباس:

المشاركة الأصلية كتبت بواسطة وائل علوي

استاذي الجميل واخي العزيز عادل
اشكرك كل الشكر على هذه الهدية الغالية وكرمك الكبير
النوتة اكثر من رائعة وسهلة الاداء
وعندي استفسار وهو هل ممكن تحولها على مقام الحجاز كار؟؟ انا عارف ان الكرد (2 بيمول ) ممكن تحويله بسهولة على الحجاز كار( 4 بيمول) بس هل النهاوند (3 بيمول ) ممكن تحويله الى الحجاز كار؟؟؟
اعتقد انها عملية صعبة ويمكن تحتاج لاعادة كتابة من جديد---- لو كنت غلطان صحح لي استاذ عادل
انا عزفتها زي ما انت كاتبها وهي حلوة بس انا شفت ناس كثير بيعزفوها على الحجاز كار واكدو لي ان ده هو مقامها--- طبعا انا اقصد المقدمة مع المذهب
وانت كاتبهم بحرفية عالية وياريت لو بالامكان تحويلها على الحجاز كار اكون ممنووووووووووون لك كتير
وفي كل الاحوال الف مليون شكر يا راجل يا طيب
ربنا يديك الصحة والعافية وما يحرمناش منك ابدا
مع خالص تحياتي
اخوك وائل

عزيزى وائل
انا مش فاهم قصدك ايه من كلمة حجاز كار يعنى تبتدى منين
الاغنية مقام نهاوند مش ممكن تبقى حجاز كار
وفيها الكوبليه الاخير حجاز كاركورد
فى التسجيل اللى عندى هى بادئة من فا يعنى نهاوند الجهاركاه بس طبعا عالية جدا مش اى حد حايعرف يعزفها وبالذات صولو
الكمنجة , يعنى انت هل هنا سامع اللحن سليم ولا فيه اختلافات لو اللحن سليم يبقى المقام صح
هو ممكن يكون الدليل 4 بيمول لو عملنا نسخة تبدأ من فا يعنى نهاوند على الجهاركاه بس حاتزيد فى السكة فى الكوبليه التانى صول بيمول وفى جزء حاتبقى رى نص بيمول يعنى اعتقد حايبقى معقد شوية وصعب انت كان قصدك كده ؟
مع اطيب تحياتى عادل صموئيل

عزيزي عادل تاكد ان نوتتك سليمة ورائعة جداااا
وانا اقصد الي قلته تماما وهو نهاوند على الجهاركه الذي يبدا من الفا والدليل اربع بيمولات انا عايزها على المقام ده حتى لو كان صعب يبقى عندنا الاثنين وكل واحد يختار الي يحب يعزفه وتفضل ديه النوتة الي اقصدها لكنها ناقصة كتير-ياريت تقدر تحولها استاذي الكريم

**Anitta** · #9 11/04/2011, 13h44

الاستاذ عادل كنت اتمنى ان اجد عند حضرتك نوتة العجايب السبع بتاعت المسابقة هي عندي بس انا عايزاها pdf لانى مش هاقدر اظبطها من غير ما اسمعها
وشكرا جدا لحضرتك

عزيزتى انيتا
طبعا حتلاقى مش انا اللى عمال المساابقة السنة دى
هنا انا منزل لكم كلكم ولكل من يهمه الامر ملف مضغوط عليه كل المسابقة يعنى حضانة وابتدائى واعدادى وثانوى بصيغة pdf
فكى الضغط حتلاقى للى انتى عايزاه وكل المسابقة مع اطيب تحياتى عادل صموئيل

**عادل صموئيل** · #10 10/04/2011, 16h17

الأخ العزيز نور الصباح
اقدم لك اخيرا بعد ايه ................................
نوتة
يا حبيبى قول لى اخرة جرحى ايه
وشوف ايوب لما صبر كسب ايه
اما بالنسبة للدعوة الكريمة انا لو الاخ العزيز عاصم المنشاوى ييجى معايا ماعنديش مانع بس اهم حاجة عندكم شيشة على اى ترعة ؟ معلش اصل الفنانين عندهم شعرة ساعة تروح وساعة تيجى
عشان يمكن ارشح نفسى لرئاسة الجمهورية , الكل عمال يرشح نفسه وكلهم سنهم اللى 79 سنة واللى 99 سنة انا بالنسبة لهم كتكوت
مع اطيب تحياتى