طلبات نوتة - الصفحة 60

**nourshd** · #**591** 01/03/2011, 21h08

محتاجة نوتة
عاشت بلادنا
عظيمة يامصر
وموسيقي رفع العلم
ياريت حد يرد عليا ويساعدنى
ضرورى جدا

الأخت الفاضلة
اولا اهلا بكى فى المنتدى
انا اعتذر عن تأخرى فى الرد عليكى نظرا للظروف
اقدم لكى اولا نوتة موسيقى رفع العلم هو جملة واحدة بين كل جزء وجزء نفس بسيط وتكرر حتى رفع العلم
لما تجربيها اكيد حتكونى سمعتيها من قبل
واعدك ان ادون لكى باقى الطلبات فى اسرع فرصة خليكى متابعة
مع اطيب تحياتى عادل صموئيل

**وسام اكرم** · #**592** 02/03/2011, 18h37

اقتباس:

المشاركة الأصلية كتبت بواسطة عادل صموئيل

احبائى
اقدم لكم نوتة نشيد من اروع الاناشيد التى قدمها عبد الحليم بعد ثورة يوليو
صورة
انا هنا دونت الكوبليه رقم 1و2 و3 فقط
وهى اروع ما فى الاغنية
والسبب انى لم اكملها له قصة
انى لم اجد تسجيلا كامل للجزء الصغير الباقى بسبب ان فيه اسم جمال عبد الناصر
والقصة ان بمجرد ان اعتلى الرئيس الراحل انور السادات الحكم حدثت كارثة خطيرة , مش عارف مين دخل الإذاعة المصرية وحذف اسم جمال عبد الناصر من الاناشيد والأغلنى الوطنية بل استبعدت بعض الاناشيد واختفت , لم يدرك من عمل تلك العملة السوداء انه ارتكب جريمة فى حق التراث والتأريخ الموسيقى لمرحلة من اهم مراحل مصر الموسيقية على مر التاريخ وهى من سنة 1950 وحتى 1970 , واقول انها اهم مرحلة فى تاريخ مصر الموسيقى لأنها كانت عصر نضج فن كل عمالقة الزمن الجميل , واليوم عندنا فى مصر قامت ثورة جديدة , ( ونحن منذ اكثر من ثلاثين يوماً مابنعملش حاجة غير متابعة كل القنوات الإخبارية 24 ساعة ومش ببنام لتلاحق الاحداث ) , وطبعاً كل انسان مننا لما بيشوف مواقف زى دى بيشوف بالذات الموضوع اللى بيخصه يعنى الطبيب مثلا بيركز على الإصابات واخبار المستشفيات و انا طبعاً مركز على الاناشيد الوطنية المصاحبة للصورة , وطبعاً لما بتسمع ام كلثوم او اى حد من جيل العمالقة يعنى حتى الدلوعة شادية لما تسمعها بتغنى يا حبيبتى يا مصر وانت شايف دبابات على الشاشة تحس ان صوت شادية بقوة الدبابات , وهنا ظهر ( من ضمن الاشياء اللى انا شخصيا بعتبرها من ظواهر الفساد خلال ال 30 سنة الماضية ) وهى جيل اللى بيغنوا ع الشعب يعنى المحسوبين مطربين وهم مش ..... لأن كلمة مطرب يعنى من عبد الحليم وانت نازل , من اخطر الظواهر ظهور جيل اللى بيغنوا من الشباب المخنثين او اللى تحس انهم بيغنوا بمياعة ويترقصوا بإبتذال ويتنططوا ع المسرح زى القرود وظهرت كارثته لما حاولوا يشتركوا آل ايه فى الثورة ويعملوا اغانى
ظهرت الفاجعة يعنى تسمع اغنية وطنية بصوت شاب صوته مايع مخنث والموسيقى التافهة وانت شايف شهداء على الشاشة انا حسيت بقرق وبقيت ابحث عن اى محطة اخرى اسمع فيها ام كلثوم بتقول وقف الخلق ولا عبد الحليم بيقول فدائى , واللى حضر منكم الحروب كانت الاناشيد دى اقوى من مدافع الهاون ودانات الدبابات , كان زمان فيه كلمة خطيرة احب اقولها لكم المطرب يعنى صوت راجل وشكل راجل وحركات راجل على المسرح , لأنه فنان زيه زى اى محامى او طبيب او أى شخصية محترمة واكتر كمان لأن تسجيل المطرب بيبقى ابد الدهر , وكلمة مطربة يعنى فنانة محترمة زى ليلى مراد او فايزة مثلا مش الحاجات اللى بنشوفها دلوقتى
فى الختام تحباتى الى ارواح الشهداء فى كل البلاد فى مصر وتونس وليبيا واليمن والبحرين , ولكن كل ما اتمناه ان بعد ماتستقر الأمور ( طبعاً انا بتكلم من ناحية شغلتى ) اتمنى يارب انى قبل ما اموت اشوف مطربين رجالة رجالة فعلا ومطربات بنات محترمات ينسوا اللى حصل فى ال 30 سنة الماضية ويكملوا امتداد العظماء اللى سبقوهم , وبينى وبينكم انا نفسى فى وسط حركة التطهير دى انهم يقبضوا على كل اللى كانوا بيغنوا خلال ال30 سنة الماضية ويدوهم 45 يوم استمرار اعدام , او كمان نفسى زى ماشبابنا الجميل اللى زى الورد نزل ينظف شوارع البلد , نفسى يحكموا على اللى بيغنوا دول انهم يمسكوا ادوات وينظفوا آذاننا من اللى عملوه فينا خلال 30 سنة
---------------------------

الاستاذ القدير و الكبير أستاذ عادل صموئيل المحترم
تحية طيبة , أرجول لك كل خير أنشاء الله. أولا أشكرك جدا على تدوينك لاغنية العندليب الاسمر ( صورة) و اللتي أعتقد ان كل واحد منا يحمل لها ذكرياته الخاصة معها. كما قرأت تفسيرك لحذف الكوبلية الرابع. انا من بعد أذنك طبعا, دونت الكوبلية الرابع بشكل مبسط و مرفق مع ملف صوتي. أرجوا ان ينال رضاك و رضا الاعزاء مع خاص أحترامي و تقديري
المخلص الى الابد
وسام

**عادل صموئيل** · #**593** 03/03/2011, 18h30

احبائى
اولا اقدم اطيب التهنئة لأخى العزيز عزت على عيد ميلاده انا رديت على سؤالك عن انكور ممكن تروح هناك تشوف الرد
ثانيا ارحب بعودة الاخت العزيزة الغالية جوليانا بعد غيبة طويلة ارجو ان تكونى معنا دائما
ثالثا اقدم نوتة
عاشت بلادنا
للأخت الجديدة نور واتمنى ان تستفيد منها ( على فكرة انا قدمت لكى نوتة رفع العلم فى مشاركتك السابقة لكن الظاهر انك ماشفتيهاش ) يعنى المفروض ان الاعضاء الجدد يواظبوا على دخول المنتدى عشان انا احس بجدية طلباتهم يعنى بيحصل كتير واحد طلب طلب من 15 سنة وانا دونته وهو مادخلش المنتدى من ساعتها
واخاطب الأخت نور ( وطبعاً كل مدرسى الموسيقى المجتهدين فى المنتدى )
طبعاً الكل هنا يعرف انى بحاول ان اقدم كل خبرتى ومعلوماتى لكل ابنائى واحبائى
انتى طلبتى مارشات لطابور المدرسة وانا افضل انك تبحثى هنا فى موضوع طلبات النوتة يعنى انا دونت اكتر من 100 نشيد ممكن تاخدى منهم موسيقى مارشات تكفيكى طول عمرك يعنى تختارى جمل من الاناشيد وتكررى الجملة مرتين وتلصقى وراها جملة من نشيد تانى يعنى ممكن تعملى لنفسك كذا كوكتيل من الاناشيد العظيمة دى
وانا شخصيا يعنى كموجة اول تربية موسيقية وفى الوزارة صانع اعمال يعنى بعمل المسابقات وحاجات كتير من منهج او كتب الموسيقى بتاعتكم , المنهج والمسابقات ده حاجات احنا بنفرضها عليكم يعنى لازم تنفذيها لكن الطابور ده بتاعك انتى كمدرسة موسيقى يعنى شخصيتك انتى , وانت مديرة الطابور تنفذيه زى ماتشوفى احسن حاجة , والطريقة االلى انا قلت عليها هنا ( وطبعا الكلام موجه للجميع ) انك تعملى طابور متميز يعنى انا كانت بتصادفنى مشكلة ( كفنان ) كنت بقرف منها يعنى ادخل 20 مدرسة الاقى الطابور نفس هو هو كل حاجة يعنى مدرسة حافظة جملتين تعزفهم ف الطابور وكل المدرسات بيعملوا نفس الجملتين , بالنسبة للموجهين بتبقى حاجة مملة ولما تكبرى وتبقى موجهة حاتحسى بده , طيب فين انتى ؟ يعنى فين ذوق مدرس الموسيقى والفنان المفروض ان يكون جواه , بالطريقة اللى انا بقول عليها لو عملتى ( من مدوناتى الكتير هنا ) كذا كوكتيل ممكن لو انا الموجه بتاعك وزرتك 20 مرة ممكن اسمع منك عشرين طابور مختلف مش كده ولا إيه ؟
آخر سؤال انتى طلبتى عظيمة يامصر هل انتى عندك اورج شرقى ؟ طبعا انا يسأل لأن احب اعرف كل امكانيات المدرسين اللى بتعامل معاهم هنا فى المنتدى
مع اطيب تحياتى واكتبى لى انك خلصتى النوتة دى

**عزت شحاته** · #**594** 04/03/2011, 22h53

استازى الجميل / عادل صموئيل

اغنية ( انا مهما خدتنى المدن) للمطرب عماد عبد الحليم
اغنيه جامده قوى ومناسبه جدا لعيد الام ووطنيه فى نفس الوقت
( وبيها نفس مواصفات التى طلبتها الاخت انيتا والتى ارشحها لحضرتك )..
(حاولت رفعها لم استطع لان رفعتها لحضرتك قبل كده فى صفحة 337)
.................................................. ..................
الاخت nourshd
نوتة اغنية ( عظيمه يا مصر)
.................................................. .................

**عادل صموئيل** · #**595** 06/03/2011, 00h29

احبائى
وسط التطورات المتلاحقة كل يوم ومش عارفين ايه حايحصل بعد ساعة
اقدم لكم بناء على طلب الأخت العزيزة جوليانا
نوتة اغنية الشهيد يابلادى

اول ماسمعتها هى على سلم رى الكبير او عجم على رى لكن وجدت انها بتوصل لنغمة صول فوق المدرج طبعا مفيش تلاميذ يوصلوا للنغمة دى , وطبعاً اولا عشان معزة الاخت جوليانا عندى وعشان ما اكونش تغبت على تدوين اغنية مش حاتقدر تنفذها لأن الاولاد حاييجو عند النغمة دى وحاتطلع نشاز طبعا , وطبعا الكلام ده للجميع زى ما انتم عارفين
انا قلت اخليها من دو يعنى ننزل كلمة لقيت نفس النغمة لسه عالية يعنى بقت فا مالهاش حل قلت انزلها من لا حاتبقى النغمة العالية مى يعنى مالهاش حل لأن لو اللحن ما ينفعش ينزل اكتر من كده , وطبعا دى من مشاكل الفقداء اللى بيلحنوا دلوقتى يعنى يكون اللى بيغنى صوته مسرسع اوى يعمل لع مصيبة زى دى , يعنى جدير بالذكر زمان مثلا المطرب الرئع كارم محمود كانت نغمة صول دى بيعملها وهو مغمض وعنده اعلى لكن كان الملحن الفنان بيعمل له اللحن فى المنطقة دى يعنى جمل موسيقية جميلة جداً لكن اللاحن مش مفتوح اوى بحيث ان لو حاول حد يغنيها من طبقة اقل ممكن ينزل باحته لأن الغليظ حيكون فى حدود المعقول , لكن الخايبين بتوع دلوقتى يعمل النغمة العالية والنغمة الواطية فى اللحن مسافة بينهم زى من هنا لأخر فيصل , وبعدين زى تنويه الاخت جوليانا خلوا بالكم ان المذهب تلحين الاستاذ بليغ حمدى يعنى طبعا شوفوا الفرق بين جمال الجملة القديمة والجديدة ولاحظوا ان فيها اوكتتاف برضه لكن بين العالى والواطى اوكتاف يعنى اى مطرب ممكن يغنيها من اى مكان لكن مانجيش نعمل المسافة الكبيرة دى فهمتوا حاجة
انا طبعا دونت الالحن ومش عايز اخليكم تحسوا اننى تعبت دونته تانى 3 مرات ولكن انا تعبت ودونته مرة واحدة لكن عندى فى البرنامج ممكن اغير البيتش او التون بتاع النوتة لأى درجة انا عايزها
عملت مرة من رى ومرة من دو ومرة من لا وكل واحد يختار اللى تعجبه , يعنى كأنك فى محل بيتسا وتختار
طبعا اول مرة تحصل دى ولكن ابتسموا لأنكم بتعيشوا فى عصر عادل صموئيل يعنى طبعا اكيد ببقى عارف المشاكل والامكانيات اللى عندطلبة المدارس وربنا يسترها ونكمل السنة دى على خير , لأن اللخبطة دى ماحصلتش عمرها
يعنى مالهاش سابقة عشان نتخيل ايه الوضع فى التعليم يعنى حتى ثورة يوليو حصلت فى يوليو كان اجازة الصيف بعدين استقر العام الدراسى , اما ثورة عرابى ماكانش فيه مدارس اصلا
معلش استحملونى تخاريف عواجيز مع اطيب تحياتى وفاصل ونعود

**عزت شحاته** · #**596** 08/03/2011, 22h31

الاخ العزيز / ابو كارم
نوتة (الدنيا ريشه ف هوا )
معلهشى .. هيه اللى موجوده
لو عجبتك .. هاكتبها على الانكور قريب وانزلها بشكل احسن

**Anitta** · #**597** 10/03/2011, 20h21

الاستاذ SAIDAICHA1 نوتة محمد نبينا موجودة في المنتدى هنا بس مش فاهمة اصدك اية بالحقل الناقص
تفضل النوتة في المرفقات

طبعا يا استاذ faster 08 تقدر تطلب بس ممكن تحط التسجيل بتاع الاغنية الحضرتك عايزها وبعد كدة لو حد عندوا النوتة هيرفعها او ممكن استاذ عادل يدونها او حد من الاساتذة البيدونوا في المنتدى

**عادل صموئيل** · #**598** 10/03/2011, 21h42

الأخت والأبنة العزيزة انيتا
وطبعا الكلام موجه الى الجميع
انتى طلبتى التآلفات على اغنية يابلادى
انا هنا حديكم درس صغير جدا عن التآلفات من وجهة نظر مثل انجليزى قديم ان افضل ان اعطيك رغيفاً من الخبز ان اعلمك كيف تخبز رغيفاً من الخبز . المشكلة انى عايز اديكم حصة صغيرة ازاى انتم تعملوا التآلفات بنفسكم
اولا لن انا لو حطيت تآلفات ممكن تكون صعبة عليكم لأنى اكيد حافترى عليكم شوية وممكن تكعبلكم وزى ماقلت من قبل ان فى الموسيقى الشرقية المفضل انك تعمل الايد الشمال على ذوقك
انا هنا فى المرفقات عامل تآلفات السلم الكبير يعنى تآلف درجة دو هو الدرجة الاولى والثالثة والخامسة يعنى دو وثالثتها مى وخامستها صول يعنى لو فى اول المازورة نغمة دو ممكن نحط فى اشمال دو مى صول او نغمتين منهم يكفوا يعنى دو صول او دو مى او مى صول ( طبعا اقروا السطر ده كذا مرة علشان تستوعبوه كويس والكلام ده للى لسه مش دارسين موسيقى لأن الدارسين طبعا شبعوا من الكلام ده )
نفس الكلام من اى درجة او اى نغمة يعنى مثلا نغمة فا التآلف بتاعها يبقى فا لا دو يعنى الاولى والتالثة والخامسة
وايضا ممكن فى الايد الشمال تحط التآلف كله او اى نغمتين منه
لما نيجى لتآلف اللى يتحط فى الإيد الشمال ممكن تحط زمنه روند او 2 بلانش فى ميزان 4/4 يعنى هو ارضية وماتعملش تحركات كتير عشان ما تتلخبطش وهدفه هو اظهار اللحن الاساسى يعنى لو لعبت كتير ممكن اللحن الاساسى يضيع طبعا فى كل النغمات يلاحظ دليل السلم يعنى مثلا لو دليل السلم فيه سى بيمول يبقى لازم فى الشمال تبقى السى بيمول
فيه كمان حاجة خطيرة وهى التوافق والتنافر فى اى سلم الدرجة الثانية والسابعة متنافرة
يعنى مثلا فى سلم دو المتنافر لو ضغطت دو مع رى ( لأنها التانية بتاعتها ) والتنافر دو مع سى ( لأنها التانية بتاعتها ) بمعنى مثلا لو اول نغمة فى المازورة دو فى الايد الشمال اوعا تحط تآلف رى او سى حط تآلفات اى نغمات تانية
واقولها البلدى اى نغمة ماتحطش معاها اللى قبلها واللى بعدها يعنى مثلا
اول نغمة ف المازورة صول اوعا تحط معاها تآلف فا او تآلف لا يعنى ان ماحطيتش تآلف صول ممكن تحط اى تآلف تانى غير دول
طبعا الدرس ده فى الكلية بيتعلموه فى خمس سنين ( وساعات وساعات يعنى فيه ناس بيعمل معاها شغل وناس تطلع بيضا ) لكن زى ماقلت العملية عملية واحد بيحب الحاجة ويحاول يفهمها حتة حتة , وطبعا مش حانقرا الكلام ده نروح عاملين التآلفات على طول يعنى اكيد حتاخد وقت بس نفهمها كويس يعنى نقرا كلامى هنا كذا مرة ونجيب ورقة وقلم
ونذاكرهم وحانوصل والعملية زى ماقلت هى تفهم الموضوع زائد ذوق
وانا معاكم
مع اطيب تحياتى عادل صموئيل

**عزت شحاته** · #**599** 12/03/2011, 12h54

استازى الجميل / عادل صموئيل
نوته اغنية (الدنيا ريشه)
اول كتابة لى على برنامج انكور .. بعد المذاكره والاجتهاد
لما قدمته حضرتك من شرح عالى المستوى
ارجوا التقييم والمراجعه -- وكلى ازان صاغيه ..
فأنا اعتبر نفسى تلميذ صغير فى مدرسة عادل صموئيل
========
الاخ العزيز / ابو كارم - الاخ العزيز / وائل علوى
اهديك اول نوتة بناء على طلبك .. لكن لو تنتظروا رآى الاستاذ
اولا يبقى افضل .. ثم اتفضلوا انتوا وكل الاخوه الاعضاء

**عزت شحاته** · #**600** 13/03/2011, 14h20

اخى العزيز /وائل علوى - احى العزيز ارمندو
شكرا على لفت انتباهى للأخطاء التى حدثت بالنوتة
التى رفعتها ف السابق ..اغنية (الدنيا ريشه )
وهاهى المحاوله الثانيه بعد التعديل
وانتظر ردكم
=======
وايضا ارجوا ان يسمح وقت استاذنا الاستاذ عادل
فأنا فى انتظار التقييم
============
اخى وصديقى /عاصم الشناوى
ليك مده .. اين انت ؟
نريد الاطمئنان ..
=====================
الى نفسى..
موضوع التدوين طلع شىء مش سهل ابداااااااااااا
دا انا مجرد بنقل نوتة مكتوبه ومدونه ف السابق
واخدت منى الجهد دا كله
امال اللى بيعملوا الاستاذ دا يبقى ايه
ربنا يديك الصحه يا استاذ