طبلة شرقية

[محمود العيادى]

المشاركة الأصلية كتبت بواسطة الألآتى

الوردتين وصاحب الوردتين والجنينة كلها مش خسارة فيك يابو على

تصور إن فيه موضوعات زى الموضوع ده .. مش فاكر إنى شوفتهم قبل كده ..

والبركة فى عم محمود العيادى وأمثاله إللى بيدعبسوا فى الموضوعات القديمة وبيفكرونا بيها ..

البركه فيك انت يابو حسام يامايسترو المنتدي .. و بعدين انت عارف يموت الطبال و صوابعه بتلعب .. وانت عارف ان موضوع الطبله ده كبير قوي و فرصه ان الواحد يتكلم عنه ..

المهم ان الطبله المعروفه لها اشكال منها فخار و منها المونيوم .. والفخار هو نوع مهم لانه فخار و يتم حرقه في الافران علشان التجويف يبقي مسمط يعني جاف حتي يمكن خروج الرتم اجوف بلا طنين و يتم شد جلد عليه بواسطه الحبال و الغراء ..

ومن انواع الجلد ماعز قراميط و لامؤاخذه جلد الحمار .. لكن من اجود انواع الجلود هو جلد السمك و قبل العزف لابد من تسخينه حتي يشتد و صوته يبقي كويس ..

وايضا من انواع الطبله نوع من نفس الشكل لكن مقاسه اكبر شويه و يسمي الدهله و هي صوتها رخيم شويه لاتساعها و هي تستخدم مثل الباص و يتم العزف عليها بالشكل التالي علي حرف الطبله و يسمي التك و في المنتصف يسمي الدم و طبقا للميزان و الزمن المطلوب للعزف يعني مثلا رتم الفالس ميزانه 2من اريعه يعزف دم بضم الدال ثم تك تك ثم دم ثم تك تك و دي تبقي اسمها المازوره او الجمله الايقاعيه الموسيقية ..

وبالمره من اشهر عازفي الايقاع من الاقدم الي الاحدث سيد كراويه ابن بورسعيد و كان عازف في فرقه ام كلثوم و كذلك محمد العربي و كتكوت الامير و عمنا محمود حموده و باحه و خميس حنكش و خالد جمعه و استك و عبد اللطيف ابو طبلتين ( اسمه كده ) و سعيد الارتست ونجم و اخيرا اخر عنقود ال العيادي الفنان احمد العيادي شقيقي الاصغر و كمان فيه الاكبر منه يوسف و فيه شويه من الاحفاد لسه علي الطريق و فن الايقاع ده فن يعتمد تماما علي حب الطبله و التكنيك اي طريقه العزف عليها لان كل واحد له بصمه في العزف تختلف عن الاخر و يمكن تمييز العازف عن الاخر باصابعه و طريقه عزفها ..

وفي النهايه انا باشكرك جدا لانك اديتني فرصه الواحد يطلع معلوماته يمكن تفيد الاخرين و عاوزك كده دايما حريص علي افاده المنتدي بمعلوماتنا الموسيقيه المحترفه مش الاكاديميه بس و شكرا .