إبداعات الشاعر طارق العمرى ، بدون تعليقات

[Tarek Elemary]

هاهنا
*
*
*
*
رمضانيات

[سيد الموجى]

المشاركة الأصلية كتبت بواسطة Tarek Elemary

متغربين عنك يا مصر .... و عن عيونك محرومين

و الزمن واقف ما مر .... و الساعات بتفوت سنين

مش بنملك غير خيال .... نسرح و ف عنينا الدموع

نفوق و ف بالنا سؤال .... آمته هايكون الرجوع

و عواطفى ف قلبى دفينة .... ما يدرى بيها الجيران

و انت ف عينى سفينة .... مرساها بر الأمان

أركب و أرمى حمولى .... و أقول بلاش العتاب

أسمع ما انتى تقولى .... أحضن و ابوس التراب

يا غربتى لا تطولى .... دى مصر الطعام و الشراب

و انا سمكة ف بحر الكنانة .... لو اطلع منه أموت

و القصر بره الكنانة .... ف عيونى قبر و تابوت

أرجع ياغربة أمانة .... قبل العمر ما يفوت

و ألاقى الغربة بتكدب .... و بعدى عنك يطول

و مهما القلب يتعذب .... ما يوم عنك ها يتحول

ف نار البعد أتقلب .... يزيد حبى عن الأول

يزيد حبى عن الأول

الشاعر الجميل / طارق العمرى
أعادت قصيدتك الجميلة إلى ذاكرتى إحدى رباعياتى التى اعتز يها كثيرا
الغربة مش إحساس ببُعد المكان
الغربة إحساس باحتياج الأمان
فيه ناس بتتغرب فى حضن الوطن
وناس بتلقى وطن فى لمسة حنان !
0000
دمت مبدعا

[Tarek Elemary]

أنا العاشق ها هنا

[Tarek Elemary]

ودَّعت خوفى ها هُنا

[Tarek Elemary]

مكتوب علينا ها هُنا

[Tarek Elemary]

لسة ناوى ع الرحيل؟
ها هُنا

[سيد الموجى]

الله عليك يا شاعر يا جميل
تسلم ويسلم لنا الوطن الحبيب

[Tarek Elemary]

مصر بتعيش أحلى حالة،
مصر بيئة لسة صالحة للقوالة
برغم خناقات الأحبة
مصر للنور مُشْرَأِبة
و اللى مش عاوز يغور
يبتعِد أو يستخَبَّى
برغم أفكار الجهالة
و الميول و الإستمالة
مصر بتعيش أحلى حالة

... بنختلف علشان عيونها
نفسنا ف واحد يصونها
يبقى قد المرحلة
دى الآمال مترحلة
مش هانرضى بأى واحد
مش هانقبل مين يخونها

اللى إحنا فيه ده، إندفع فى سبيله دم
ياما ناس إتحملت إزلال و هَمْ
و إنتفض شعبى الأبى .. شعبى الأشَمْ
إتنفست كل الشوارع و الحارات
إتزينت كل البنات
إتحررت كلمة بحبك يا بلدنا
من السكات
إترحمت أم الشهيد على نور عنيها
و هان عليها، و قالت إن الناس أهَمْ

مصر بتعيش أحلى حالة
مصر طلعت للوسع
من بعد حبستها الطويلة
ف أوضة مالهاش حتى صالة
جاية تسكر بالبراح و لا تختشى
و هاتنتشى حتى الثمالة
مصر بتعيش أحلى حالة

[Tarek Elemary]

إفتحى الشباك و بصى ع الشجر و الطير و غنى للحياة،
إروى شجر الشوق و خلى العشق يوصل منتهاه،
عمرنا أيام قليلة، و مالنا حيلة ف قلبنا،
لما بيدق بهوى، يبقى الدوا نمشى وراه
إفتحى الشباك و شوفى الشمس بتغنى لنا
حتى موج البحر بيدندن و يحضن رمل شطه
و يغسله من حزن ليله اللى سهر يملاه دموع
و المراكب كلها لنسيم هوانا إتحركت فردت قلوع
ياللا بينا نعيش معاها عمرنا على جزيرة لوحدنا
رحلة العشق إبتدت و ما فيش رجوع
... إفتحى الشباك و شوفى قلبى واقف يبتسم
على ناصية البيت اللى جنبك منتظر
كف إيدك يرمى وردة ف ليلة قايدة بالشموع
إرمى حزنك و إهربى من سجن غيرك
إنشرى ع الكون عبيرك
قلبى قلبك روحى روحك
حتى طيرى هوه طيرك
دانتى لو تتنهدى باسمع صدى جوه الضلوع

[Tarek Elemary]

قُربِى مِنك،
ده النعيم اللى حِلِم بيه قلبى من يوم التلاقى،
و الكلام عاجز يعبَّر عن حنينى و إشتياقى،
أعمل أيه ؟
أعمل أيه و أنا عينى شايفاكى
و قلبى بينحرق،
و إنتى جاية تقولى لازم نفترق
هوه أنا قربت منك؟!
هوه ده صح اللى باقى!!
فكرى قبل القرار، قلبى مَلْ الإنتظار
و البعاد مش راح يحل المشكلة،
ده إن كان صحيح فيه مشكلة؟
يا حبيبتى ...
هاتى هِمِّك و يَّا هَمِّى، نقسم الأحزان سوا،
... مين هايشعر بيكى غيرى،
عندى أنا بس الدوا
النيران ما يحس بيها زى جلد اللى إكتوى
و الفرح هانقسِّمه و إن خلص راح نرسمه
بابتسامة فوق وشوشنا، بنظرة مليانة هوى
إمسحى الأحزان بكفى
عشقى ليكى راح يكفى
نعاند العمر المعاند
نهزمه و ننسى التَشَفى