الشاعر أمين حداد من مواليد عام 1958 .. و قد تخرج فى كلية الهندسة عام 1981 ... و فى عام 1990 صدر له ديوان ( ريحة الحبايب ) ... منه أنتقى بعض القصائد ...
الـــوطــــــن
باحب ابنى و بنتى و بيتى و مراتى
باحب بابا و ماما و ستى و اخواتى
باحب مولد الإمام و الحاوى و الطراطير
باحب صوت الحمام و البط و العصافير
باحب شنطة قماش و سندوتش الفينو
باحب رصة كتب نايمة على الكومودينو
باحب شكل الكليم مفرود على الكنبة
و احب ريحة الترماى اللى فى العتبة
باحب ريحة البن لما يتحمص
و احب شكل الفشار ع النار بيترقص
و احب اخر مواصلة فى الشتا لبيتنا
و احب ساعة الفطار طبلية لمتنا
و احب ضحكة أمينة و خالتى فتحية
و احب شكل القلل مرصوصة فى صينيه
و احب أقرا اليفط و انا راكب الأتوبيس
شارع محمد على و محل زنكوغراف
دكتور محمد عطيه و ترزى أحمد خميس
و سعد لوقا المحامى نقض و استئناف
و احب ليلة السفر ساعة السحر قمنا
حطينا جوه الشنط ملاياتنا و هدومنا
و احب اسافر لشرق الدلتا بالبولمان
و احب شهدى عطيه اللى انقتل ظلماً
و احب صوت الغنا ع الطبلة فى الأرياف
و احب أسد الهلالى و هو ماسك سيف
و احب كل الجنود فى حرب الاستنزاف
و احب يوم العبور بيحطموا بارليف
باحب كلمة وطن
باحب كلمة شهيد
باحب كلمة محبة
و احب كلمة عيد
رد: يا شعراء المنتدى .. ينفع كده
العرض الشجري