مشاركات خارج موضوع طلبات النوتة

**وائل** · #1 22/12/2009, 17h55

استاذ عادل ربنا يديك الصحة
والف شكر على تنويت حكاية غرامي ورجاااااااااااااااء خاص ان تكون كاملة وتشمل المقدمة الرائعة للفرقة ثم لفريد عالعود ثم رد البيانو عليه ياريت تحتوي النوتة على هذا الجزء الخرافي يا استاذ عادل ولو عاوز التسجيل فقط اكتب في اليوتيوب حكاية غرامي جزء 1 واسمعها
وتحياتي لك
يا عزيزى وائل
انا دخلت زى ماقلت طلعت نافذة فاضية مش بتحمل حاجة
يعنى انا احب اللى عايز حاجة يديها لى على طول عشان ما اضيع الوقت ممكن انت تسجلها امبى ثرى صوت بس ؟
حتى التسجيل اللى نزلتوه هنا ع العود برضه بادى من مطرح ما انا عزفتها يعنى مقدمة جملة واحدة وفى الفيلم كده
عموما انا كتبها كده وهى خلصت ولو انت قدرت تدينى المقدمة انا حاكتبها فى صفحة منفصلة لأن فى برمج الكتابة اى ادليب ما اقدرش ازود قبله اسطر اكتب فيها لأن الأدليب انا فى كتابته انا بتحايل على البرنامج يعنى لو كاتب على ميزان ممكن اضيف اى عدد من الموازير قبله
لكن لو فى ادليب اى اضافة موزاير قبله بيلخبط الدنيا
انا حكاية غرامى جاهزة مش حانزلها منتظر ردك وبسرعة عشان انا متأكد فيه اخوة اول ما حايسمعوا انها جاهزة مش حايناموا الليلة دى عادل صموئيل
وعلى فكرة انا حاسس ان فيه ناس عفاريت فى اليوتيوب بس انا مش عارف ليه مش بعرف اسلك فيه دايما هو محتاج إشتراك او حاجة ؟

**armendo** · #2 23/12/2009, 21h12

اقتباس:

المشاركة الأصلية كتبت بواسطة عادل صموئيل

احبائى
واخيرا اقدم لكم نوتة حكاية غرامى
وهذه النوتة بالذاتلا استطيع ان اقدمها واخرج كأى نوتة ولكن اريد ان اتكلم معكم حتى تعم اكبر فائدة
ولأول مرة انا اقدم لكم اغنية حكاية غرامى من عزفى على الكمان لأن كثير منكم لم يدخل القسم الخاص بمعزوفاتى فى قسم المبدعون بالمنتدى وحرصت ان اقدمها من عزفى لأبلور الصورة اكثر يعنى انتم سمعتموها من فريد الطرش كغناء ولكن عندما تسمعوها ايضا كعزف تفيدكم فى طريقة تجويد العزف , بمعنى ان هذا اللحن بالذات لا يُعزف كقراءة حروف نوتة , ولكن به كمية رائعة من الطرب الشرقى يعنى عشان تعزفه لازم تكون اولا حافظ اللحن 100% وبتدندنه او تغنيه كلمات الاغنية ثم عندما تقرأ النوتة وانت بتعزف لابد ان يكون اللحن فى اذنك وحاضر معاك لأن اللحن 75% منه ادليب وادليب قوى جداً ( يعنى شغل المعلم فريد لنفسه ) ويعنى كل ابداعه وضعه لأنه هو الذى سيغنيه ولو كان اللحن لمطرب آخر لما صاغه بتلك الروعة لأن اى مطرب لن يؤدى كل مشاعر فريد الأطرش الصعبة وهنا اذكر ان هذا اللحن لابد ان يكون استغرق من فريد على الأقل سنة كاملة فى تلحينه علما بأن الحان فريد السهلة مثل إتقل إتقل مثلا لايستغرق معه اكثر من 4 أيام .
بالنسبة للمقدمة انا احترمت شعوركم ( وعشان تعرفوا غلاوتكم عندى ) وحسيت شوقكم كلكم الكبير ان تحصلوا عليها من ان عدد منكم صار يبحث عنها لأنها تقريبا غير متداولة واللحن المتداول من مطرح ما انا بدأت عزفى انا امس اول ما تكرمتم ونزلتوا المقدمة من أول وهلة احسست انها صعب جدا أو مستحيل تتكتب , لأن عشان تتكتب فى الحالات الطبيعية لازم تتكتب وتتوزع من اول وجديد لكن وعشان خاطر محبتكم سمعتها خمسين مرة كان اول ملحوظات اولا عزف فريد على العود تعرفون ان فريد حاصل على جائزة احسن عازف عود فى العالم يعنى لما يعمل لحن لنفسه ويعزف صولو عود اكيد حيكون صولو العود شىء اولا مش ممكن حد يقلده وبالتالى مش ممكن حد يكتبه وثانيا التوزيع كان عامله واحد خواجه اسمه بيبى المانزا وهنا تحدى فى منتهى الخطورة لما تسمعوا المقدمة تلاقوا المقدمة مافيهاش ربع تون ومش على ايقاع شرقى يعنى الملعب المفتوح عشان خيول الخواجه تنطلق وخدوا بالكم كام صوت فوق بعض وكلهم وتريات بالإشتراك مع البيانو اللى كان ايضا متوسط النغمات الخارجة منه على الأقل 8 نغمات فى نفس الوقت اقول لكم الصراحة حسيت انى نملة او شعور واحد ماشى فى حتة مظلمة وطلع له مش عفريت واحد ولكن مجموعة من العفاريت , وانا طول عمرى مناضل وبحب التحدى واختراق السدود كتبتها لكم قمت بتحدى عفاريت واشباح عمكم الخواجه العبقرى بيبى المانزا , ولما بقول عفاريت واشباح مش بضحك شوفوا الكوردات العبقرية اللى مش ممكن حد يقدر يحسب النغمات دى ايه وبالذات عشان كلها وتريات , يعنى الشبح من دول لو فى سيمفونية لبيتهوفن بيبقى مركب من وتريات على كذا صوت آلات نفخ مختلفة ممكن الخبراء يستخلصوهم بسهولة
هى اى نعم بتبقى متداخلة مع بعض زى المكرونة الأسباجيتى بس فيه خبراء ممكن بيبقوا عاملين زى اللى بيحضروا الأرواح او بيخرجوا العفاريت لكن لما يكون الأكور كله من وتريات بيبقى صعب جدا لأن الخلط او المزج هنا بيطلع نغمات يعنى تشتبه مثلا ان دى نغمة مى بيمول لكن مع المزج اكيد بتكون دومينن سفن بتاع حاجة تانية لو حطيتها مى بيمول تطلع نشاز وبالتالى يكون الأكور كله غلط معلش اتفزلكت عليكم شوية من نفسى , المهم انا طبعا لما بكتب بفكر مين اللى حايعزفه طبعا انتم يعنى عازف واحد مش فرقة ,
هنا انا استخلصت من كل اكور النغمة الأساسية اللى فيه
كمان فيه ملحوظة مهمة جدا فى المقدمة انا كاتب هنا صولو عود انا كتبت اللحن الاساسى وانتم وشطارتكم تقدروا تركزوا مع فريد وتحاولوا تطلعوا اللى تقدروا عليه هو اول حرف كان بيعمل اوكتاف يعنى مثلا نغمة صول بتبقى صول قرار بعدها صول جواب يعنى الحرف مكون من النغمتين ورا بعض
طبعا انا كتبت اللحن كله وهو خمس صفحات بعدين كتبت المقدمة قى صفحة منفصلة لأن زى ماقلت ان طالما فيه ادليب ما اقدرش اضيف موازير قبله , لكن بالنسبة لكم عادى يعنى تحطوا المقدمة فى الأول .
فيه شىء مهم جدا احب اقوله هو بيبتدى كرد وفى المذهب بيغنى بياتى , فيه سر فى البياتى هنا ان المى نص بيمول
خاسة شوية يعنى ممكن تشتبه انها بيمول يعنى خلوا بالكم .
حاجة تانية الشراك الخداعية عند فريد الأطرش بالذات يعنى لما بيعمل مثلا راست على النواة يعنى سى نصف بيمول وهو طالع ونازل وطالع ونازل على النغمة مرة وهو نازل يروح عاملها بيمول ودى حلية بتفرق فى ادائك للحن يعنى لو ما اخدتش بالك منها تضيع نكهة الجملة لذلك انا لما بتحصل انا با اؤكدها يعنى بكتب سى بيمول عشان تاخدوا بالكم .
آسف للإطالة عليكم وانا تحت امركم فى اى اسئلة

اخى وعزيزى بابا نويل اقصد عادل صمؤيل كل سنة وانت والأسرة باف خير بمناسبة اعياد الميلاد المجيدة طبعا انا لدى بعض الأسئلة ولكنى سأؤجلها لمشاركة اخرى ولكنى الآن اود ان اصف ما تخيلتة وانت تقدم لنا هديتك الجديدة الجميلة حكاية غرامى فقد تخيلتك وانت ترتدى زى بابا نويل الجميل محملا بالهدايا الجميلة للأطفال الصغار الذين ينتظرونك بشغف ولهفة وينتظرون ان توزع عليهم هداياك التى تبث الفرحة فى قلوبهم ليلة العيد وقد استمعت الى اجدى هداياك الليلة وهو عزفك الرائع لأغنية حكاية غرامى ولم استطع الأنتظار بالرغم من اننى اعانى من نزلة برد شديدة اوع تتعدى احساسك عالى جدا فى عزف الأغنية وهى مليئة بالأحاسيس .وكل عام وانت بخير مرة تانية راجيا من اللة ان يحقق لك كل ماتتمنى وفى مقدمتها الصحة والعافية والآن فالتسمح لى ان اذهب لأنام فقد بدأت اشعر بدروخة تصبح على خير . ارمندو

**وائل** · #3 23/12/2009, 22h00

استاذي واخي وعزيزي عادل-- ايه اللي انت عامله ده يا راجل يا سكره!! ايه الشغل الحلو والمزاج العااااااااااااااااااالي اوي ده!!
مش عارف اقولك ايه مش عشان النوتة لكن عشان المجهود الي بتبذله عشان تلبي طلباتنا وترضينا ومش عارفين نردلك الهدايا دي كلها ازاي بس وبالذات ان راس السنة جاي وبقولك كل سنة وانت طيب يا راجل يا طيب انت والاهل بالف خير وسلام وسعادة وكل سنة واحنا متجمعين في مملكتنا الجميلة مملكة سماعي انا مش عارف اوصف التبسيط والحلاوة الموجودة في النوتة وقمة الابداع ان رغم التبسيط الموجود الا ان حضرتك لم تترك ولا همسة في النوتة و احتفظ اللحن بقوته وبكل احساس فيه وده طبعا هيحس بيه الي هيعزفها وهو حافظ اللحن في دماغه وحاسس بكل نغمة في قلبه قبل صوابعه ومش معتمد فقط على النوتة-- بالفعل استاذ عادل انا اتفق معاك ان اللي هيحفظ اللحن ده كويس هيطلع شغل ولا اروع وهيعرف ان حضرتك حطيت كل جهدك وذكائك الموسيقي في تبسيط هذه النوتة التحفة
واسمحلي انا كده هطمع واكرر طلبي السابق واستأذن من الاخوان في ان تكون النوتة القادمة هي (اول همسة ) مدام احنا دلوقتي عايشين في جو فريد -ودي بيعتبرها فريد شخصيا من اروع الحانه واحبها الى قلبه وده كلام فريد مش كلامي كان بيقول في بداية احد حفلاته ( ان الفنان قيمته بعمله والي بيقدمه لجمهوره والقيمة دي بتطلع بعدما يرحل الناس بتعرف قيمته وانا الان اقدم لكم اول همسة وانتو احكمو)- وفي كتاب عن حياته قرات له انه دائما كان يعتز ويتباهى ويتحدى كبار الملحنين ان يلحنو لحن مثل او همسة هي وحكاية غرامي- وسئل ذات مرة عن لحن القرن الذي سيبقى خالدا وتتذكره الاجيال القادمة دائما فقال بكل صراحة هو الربيع واول همسة والاطلال لام كلثوم
ودلوقتي مين هيصوت معايا على اول همسة؟؟ انا نفسي في اول همسة وتحياتي لك ولكل الاعضاء الجمال الذين ساهمو في اخراج هذه النوتة انا مؤمن ان كل واحد من الاعضاء الي طلبوها ساهم بشي ما في اخراجها
وتحياتي للجميع واسف جدا للاطالة معلش خذني الكلام

**عادل صموئيل** · #4 23/12/2009, 22h51

احبائى اشكركم
اشكركم على كلامكم الجميل وهو اعلى اجر اتقاضاه عن مجهودى واحب ان انوه عن كلمة اخى العزيز وائل انى قمت بتبسيط النوتة الى اقصى درجة ممكنة دون ان ينتقص اللحن جرفاً واحداً ان دى المدرسة اللى انا عملتها واتمنى ان يتعلمها منى كل من يدون نوتة يعنى انا لو قمت بتبسيط اى لحن وحدث اى خلل فى النوتة لضاعت قيمة اللحن ولأصبح الذى افعله شىء لا قيمة له يعنى سيكون شىء مشوه وقيمة الذى افعله هنا قيمتان اولهم هذه النوتة اقدمها للهواة والمبتدئين وثانيهما لو اى مطرب ( وانا هنا فى مملكة سماعى اخاطب كل من فى الكرة الأرضية لأن المنتدى عالمى ) لو أى مطرب رأى فى نفسه انه يستطيع ان يغنيها لأخذ هذه النوتة التى دونتها وقدمها لأحسن فرقة وسنعزف معه احلى عزف لتمهد له ان يقدم اخلى غناء وسيسعدون بالنوتة ايما سعادة لأنها مبسطة بحيث تطلع معاهم فى ساعة بروفة بكفاءة 100% واما الصدق الذى كتبت به الادليب ( وهو من اصعب المدونات اطلاقاً ) يكفى للمطرب ان يكون حافظا للغناء جيدا والفرقة تسير معه وتحمله وتؤازره وتعضده لأنى قمت بتبسيط الحروف الإيقاية بالذات حتى يكون من السهل عليهم التخديم مع المطرب اما لو جعلتها مكلكعة ومعقدة كما يفعل البعض هنا فى العزف ايضا يعزفون عزفا مصاحبا يعرقل المطرب ويضيع السلطنة وهذا اللحن بالذات يحتاج لأعلى درجة من السلطنة .
وعن الكلام الجميل وانى اشبه بابا نويل وتكلمتم عن الأعياد ورأس السنة وطلبتم
اول همسة ماشى ياعم
اعدكم لو اطال الله فى عمرى ان اقدم لكم نوتة اول همسة ليلة رأس السنة مبسوطين ؟ وسابدأ الكتابة فيها من الآن
ودى بتعتبر بالنسبة لى احلى كتابة لأنى حافظها وعلى فكرة انا عزفتها فى قسم المبدعون فى المنتدى
مع اطيب تحياتى وكل عام وانتم بخير

**وائل** · #5 23/12/2009, 23h08

[QUOTE=عادل صموئيل;383475]احبائى اشكركم
اشكركم على كلامكم الجميل وهو اعلى اجر اتقاضاه
هذه الجملة ادمعت عيني وتدل على انك انسان عظيم وفي قمة التواضع والعطاء
معقولة في انسان بالجمال والتواضع ده!!!!!! بجد احنا لسه في زمن الفن الجميل لان استاذ عادل انسان قلبه وروحه جميلة
ياعزيزى وائل
انا يشرفنى ان انتمى الى زمن الفن الجميل ويمكن احمد الله على انى دخلت معاهم وانا سنى عشرين سنة واليوم وكلهم رحلوا وانا اطال الله فى عمرى شوية بعدهم لأكون سفيرهم والمتحدث بلسانهم واكون شاهدا على هذا العصر الذى يمثل خلاصة نضج الثقافة والفن من منشأ الفن من ايام المتنبى وابو فراس وزرياب كان العمالقة الذين عشت معهم هم بلورة كل تلك الثقافات والفنون , والفنان فى الزمن الجميل لابد ان يكون جميلا من الخارج وجميلا من الداخل يعنى شكل ومضمون
وجاء فى كلامك استاذ عادل بيكتب بدون مقابل مادى ؟ بالعكس انا باخد مقابل مادىى كبير يعنى لو حد محترف كلفنى اكتب حكاية غرامى اجر الكتابة مش اقل من 3 آلاف جنيه بأسعار اليوم لكن لما بكتبها لكم انا باخد اكتر من 3 مليون جنيه احنا من اهم ماعلمونا فى زمن الفن الجميل الذكرى العطرة والتاريخ
يعنى اللى بيغنوا النهاردة بيكسبوا فى سنة اكتر من اللى كسبه ام كلثوم وعبد الوهاب وفريد طول عمرهم مجتكعين لكن لما يرحلوا حياخدوا معاهم كام ؟ او المسموح ياخد من البنك معاه فى الآخرة كام مليون ؟ لكن العمالقة اخدوا معاهم الآخرة كتير
تخيل فى هذه اللحظة كام واحد فى الكرة الأرضية بيسمع ام كلثوم ويقول الله دى مثلها مثل الصدقة الجارية وانا بعد ما اموت لما اى انسان يقرا نوتة من اللى انا كتبتهم ويستفيد بيها حتى بعد عشرات السنين او يسمع احدى معزوفاتى اكيد الاجر حايوصلنى هناك , ولا تنسى مفهوم الصدقة الجارية وهى كل من ترك شىء يستفيد به الناس مع تحياتى عادل صموئيل

**عمرو الهنداوي** · #6 25/12/2009, 09h17

استاذ عادل كل سنة وحضرتك طيب

كان عندى سؤال وهو لماذا لم يتم التعامل او التعاون مع عبد الوهاب وفيروز فى اكتر من عمل من وجهة نظرك

ازى ؟ عبد الوهاب بكل امكانياته عمل اغنية واحدة فقط لفيروز وليه باقى الملحنين المصريين ما لحنوا لفيروز؟؟؟
زى السنباطى والموجى وسلطان وغيرهم

سمعت مرة انه فيروز كانت براعة فى مود معين من الغناء ونغمات معينة وغير قادرة فنيا على اداء اغانى غير القصيرة
والموشحات هل الكلام دة صحيح؟؟ مع انها غنيت فى مسرحيات اغانى طويلة!! وما هو السر فى رايك من نجاح صوت فيروز واختلافه؟؟ لدرجة انه فى بعض الناس لسه بيقولوا انه صوت من السماء وليس الارض

وعلى فكرة كان فى اخت لنا هنا كانت طلبت زهرة المدائن من حوالى 6 اشهر يعنى فاضل 3 اشهر والاغنية تجيب بيبى هههههه

كل سنة وانتم طيبن واخواتنا الاقباط كلهم بالف
صحه وسعادة ان شاء الله

عزيزى عمرو هنداوى
اولا فيروز غنت من تلحين عبد الوهاب اغنيتين سكن الليل ومر بى غير انها غنت له ياجارة الوادى بالنسبة لأى لحن اللى كان بيحصل ان المطربة هى اللى بتطلب من الماحن يعمل لها لحن مش العكس وعبد الوهاب كان بيحب فيروز لكن فيروذ كان عندها مجموعة ملحنين اولهم الخوين رحبانى اضافة الى الياس رحبانى ثم فيلمون وهبه ( بتاع يامرسال المراسيل ) وعدد من الماجنين اللبنانيين غيرهم ودل كانوا بيتميزوا بغزارة لحنية كبيرة يعنى هم اللى كانوا بيعملو الكلام واللحن وتأليف المسرحيات وتلحينها يعنى ممكن يعملوا لها 365 لحن رائع فى السنة يعنى مثلا لو حفلة بكرة فى اى مناسبة كانوا يعملوا لها اغنية تأليفا وتلحينا غير نظامنا فى مصر لازم تجرى ورا المؤلف لحد ما ربنا يفتح عليه ويعمل الاغنية بعدين تجرى ورا الملحن لحد ما يفضى لك ( وعبد الوهاب كان لازم تديلة الأغنية وتسيبه لحد ما يعمل احلى حاجة ممكن ياخد سنة وده ما يمشيش مع فيروز اللى كانت شلال متواصل او سيل من الغناء ) وبعد كده تجرى ورا الفرقة ودى مشكلة تانية يعنى عندنا الفرقة الماسية لو فيه اغنية جديدة لأم كلثوم بتاخد بروفات شهرين وورث عنها الحكاية دى عبد الحليم يعنى شهرين ما تقدرش تطلب من الفرقة الماسية بروفات كتير للحن كبير اما فيروز كان عندها فرقة ضخمة عبارة عن 3 فرقق فرقة شرقية وفرقة اوركسترا سيمفونى وباند وكانوا موظفين عند الإخوين رحبانى يعنى شغالين او موجودين تحت امرهم 24 ساعة , اما بالنسبة لفيروز لو سمعت حفلة فيروز فى القاهرة كان فيها فاصل رائع ورهيب من الموشحات ( وللعلم كان مختصر ) يعنى لو سبتها براحتها فيروز تديك وصلة موشحات يعنى مش اى أى ولا زى زى , اما بالنسبة لأداء فيروز الغنائى ( اصل اخوك مدمن فيروز )
عندها اغانى طويلة وقصيرة واغانى كوميدية واغانى سياسية يعنى كل الألوان , اما ادائها االفنى ماحدش زى فيروز يعنى كان لها ميزة انها بتغنى شرقى بإقتدار وبتغنى على توزيع اوركسترالى يعنى هى بتغنى لحن والأوركسترا بيغنى توزيع حاجة تانية خالص وكان ممكن تغنى كده طول اللحن او عشر جمل ورا بعض وانا طبعا ( او الصح يقال ) لو حسبت فيروز مع عمالقة نجوم الصف الأول فى زمن الفن الجميل تكون هى الوحيدة فيهم كلهم اللى امتلكت الميزة دى يعنى لو تسمعها كويس فى الألحان الموزعة تكتشف حاجة تانية خالص مش موجودة عند اى حد غيرها يعنى عمرك ماتلاقى اى مطرب منهم فيه الميزة دى وطبعا كل مطرب كان بيتميز بميزة مش ف غيرة ودى كانت ميزة فيروز مع اطيب تحياتى عادل صموئيل

**imane-tanger** · #7 02/01/2011, 17h24

السلام عليكم و رحمة الله و بركاته
تحية للقائمين على المنتدى عامة و للأستاذ عادل خاص
أنا عضوة جديده معكم، شدني هذا القسم بالخصوص لهذا المنتدى القيم
و حتى لا أطيل عليك أستاذ عادل أنا لي طلب أتمنى يحظى بالاهتمام، أتمنى الحصول على نوتة أغنية " يا ليل طول"' للفنان المغربي محمود الادريسي و ألحان الأستاذ عبد القادر الرشدي ، و لكم مني جزيل الشكر و فائق الاحترام

**نقولا رفيق** · #8 03/01/2011, 14h13

اقتباس:

المشاركة الأصلية كتبت بواسطة عمرو الهندواى

استاذ عادل كل سنة وحضرتك طيب

كان عندى سؤال وهو لماذا لم يتم التعامل او التعاون مع عبد الوهاب وفيروز فى اكتر من عمل من وجهة نظرك

ازى ؟ عبد الوهاب بكل امكانياته عمل اغنية واحدة فقط لفيروز وليه باقى الملحنين المصريين ما لحنوا لفيروز؟؟؟
زى السنباطى والموجى وسلطان وغيرهم

سمعت مرة انه فيروز كانت براعة فى مود معين من الغناء ونغمات معينة وغير قادرة فنيا على اداء اغانى غير القصيرة
والموشحات هل الكلام دة صحيح؟؟ مع انها غنيت فى مسرحيات اغانى طويلة!! وما هو السر فى رايك من نجاح صوت فيروز واختلافه؟؟ لدرجة انه فى بعض الناس لسه بيقولوا انه صوت من السماء وليس الارض

وعلى فكرة كان فى اخت لنا هنا كانت طلبت زهرة المدائن من حوالى 6 اشهر يعنى فاضل 3 اشهر والاغنية تجيب بيبى هههههه

كل سنة وانتم طيبن واخواتنا الاقباط كلهم بالف
صحه وسعادة ان شاء الله

عزيزى عمرو هنداوى
اولا فيروز غنت من تلحين عبد الوهاب اغنيتين سكن الليل ومر بى غير انها غنت له ياجارة الوادى بالنسبة لأى لحن اللى كان بيحصل ان المطربة هى اللى بتطلب من الماحن يعمل لها لحن مش العكس وعبد الوهاب كان بيحب فيروز لكن فيروذ كان عندها مجموعة ملحنين اولهم الخوين رحبانى اضافة الى الياس رحبانى ثم فيلمون وهبه ( بتاع يامرسال المراسيل ) وعدد من الماجنين اللبنانيين غيرهم ودل كانوا بيتميزوا بغزارة لحنية كبيرة يعنى هم اللى كانوا بيعملو الكلام واللحن وتأليف المسرحيات وتلحينها يعنى ممكن يعملوا لها 365 لحن رائع فى السنة يعنى مثلا لو حفلة بكرة فى اى مناسبة كانوا يعملوا لها اغنية تأليفا وتلحينا غير نظامنا فى مصر لازم تجرى ورا المؤلف لحد ما ربنا يفتح عليه ويعمل الاغنية بعدين تجرى ورا الملحن لحد ما يفضى لك ( وعبد الوهاب كان لازم تديلة الأغنية وتسيبه لحد ما يعمل احلى حاجة ممكن ياخد سنة وده ما يمشيش مع فيروز اللى كانت شلال متواصل او سيل من الغناء ) وبعد كده تجرى ورا الفرقة ودى مشكلة تانية يعنى عندنا الفرقة الماسية لو فيه اغنية جديدة لأم كلثوم بتاخد بروفات شهرين وورث عنها الحكاية دى عبد الحليم يعنى شهرين ما تقدرش تطلب من الفرقة الماسية بروفات كتير للحن كبير اما فيروز كان عندها فرقة ضخمة عبارة عن 3 فرقق فرقة شرقية وفرقة اوركسترا سيمفونى وباند وكانوا موظفين عند الإخوين رحبانى يعنى شغالين او موجودين تحت امرهم 24 ساعة , اما بالنسبة لفيروز لو سمعت حفلة فيروز فى القاهرة كان فيها فاصل رائع ورهيب من الموشحات ( وللعلم كان مختصر ) يعنى لو سبتها براحتها فيروز تديك وصلة موشحات يعنى مش اى أى ولا زى زى , اما بالنسبة لأداء فيروز الغنائى ( اصل اخوك مدمن فيروز )
عندها اغانى طويلة وقصيرة واغانى كوميدية واغانى سياسية يعنى كل الألوان , اما ادائها االفنى ماحدش زى فيروز يعنى كان لها ميزة انها بتغنى شرقى بإقتدار وبتغنى على توزيع اوركسترالى يعنى هى بتغنى لحن والأوركسترا بيغنى توزيع حاجة تانية خالص وكان ممكن تغنى كده طول اللحن او عشر جمل ورا بعض وانا طبعا ( او الصح يقال ) لو حسبت فيروز مع عمالقة نجوم الصف الأول فى زمن الفن الجميل تكون هى الوحيدة فيهم كلهم اللى امتلكت الميزة دى يعنى لو تسمعها كويس فى الألحان الموزعة تكتشف حاجة تانية خالص مش موجودة عند اى حد غيرها يعنى عمرك ماتلاقى اى مطرب منهم فيه الميزة دى وطبعا كل مطرب كان بيتميز بميزة مش ف غيرة ودى كانت ميزة فيروز مع اطيب تحياتى عادل صموئيل

ألسلام عليكم
إلحقيقة حبيت أضيف كمان حاجة مهمة جدا , وهي مقتبسة من الأستاذ محمد عبد الوهاب ألله يرحمه , ووقتها صرّح إنو أحد الأسباب اللي خلته ميلحنش لفيروز كانت رغبة الأخوين رحباني بإجراء تعديلات على ألحانه , وساعتها قال عبد الوهاب : "وعبد الوهاب لا يسمح بذلك" , ولكن عبد الوهاب كان يحب صوت فيروز

وأما بالنسبة للإمكانيات الغنائية بتاعت السيدة فيروز , فصوتها خاص خالص ونادر , ولكن الإمكانيات محدودة جدا مقارنة مع العملاقات المصريات : ألسيدة أم كلثوم , أسمهان , وليلى مراد وغيرهن
وكمان ده كان واحد من الأسباب المهمة والرئيسية إللي شكلت حاجز ومانع بوجه الملحنين المصريين من تقديم ألحانهم للسيدة فيروز
نقولا مرجية

**ahmed5005** · #9 09/06/2012, 12h56

السلام عليكم جميعًا
أسف بدايةً إني هضع الطلب هنا ، لم أجد مكانًا آخر ، حيث أن خاصية الرسائل الخاصة أعتقد غير مفعلة .

مساء الخير ، أستاذ عادل ، أتمنى حضرتك تكون بخير .

كنت حابب أسأل حضرتك و أستشيرك في إني ، عايز أتعلم أعزف علي الكامنجة ، و أنا عمري عشرين سنة ، و ملعبتش على أي آلة موسيقية قبل كدة .

بس أنا عندي رغبة كبيرة ، إني أتعلمها ، أنا عرفت من ردود حضرتك في المواضيع إنك عازف كمان - كبير - ما شاء الله ، و فهمت كمان إن في مشاكل في صيانة الكمان في مصر و أماكن بيعها ، إلي آخره .

أنا حابب أعرف من حضرتك سعر الكامنجة الكويسة كام ؟ ، لإني عايز أشتري واحدة و أنساها بعد كدة ، مش عايز أشتري صيني ، و منين ممكن أشتريها و تكون كويسة ، هل في شارع محمد علي بس ؟ ، أنا عايز أعرف أهم حاجة سعر الكمانجة النضيفة كام ؟ أنا أعرف صديق هيسافر إيطاليا قريب ، بيقولوا إنها هناك غالية ؟! ، مستني رد حضرتك .

شكرًا جدًا و آسف على الإطالة .

أنا ساكن في الجيزة بالمناسبة .