اخر اصدار .. وأعمال أخرى

**nasrnsar** · #1 14/11/2009, 08h52

اخر اصدار
ومايمنعش..
انى ارميكى فى ذات النعش..
اللى رميت فيه..كلا من خان
ولاهحزن..ولاهشرب كاس الحسره عليكى..
ولاهسهر ادخن ..واملى الاوضه دخان
راح انام..وسعيد انى صارحتك..
وده مش معناه انى سامحتك..
لكنى انا ببعد عن لفك والدوران.
اجمل ما اتمتع بيه فى حياتى..
صدقى لنفسى.. وبعدى عن الاحزان
.....
فى طريقك..هتلاقى اى ما اى هيبقى صديق
هيمد ايديه لاتنين ليكى..
بزهور.. وعطور..وكلام سهل التصديق
تتنفسى كلماته..ويحس حياتك زى ما هتحسى حياته..
وهيخرج بيكى..لبراح من ضيق
تاخديه فى الخلوه..زى ماكنتى بتاخدينى
تهديله حاجات..زى ما كنتى بتهدينى
والخلوه مكان متخصب.. لبلاله الريق.
......
الحكم عليكى بانك خاينه..
اصدرته خلاص.. وقفلت الباب
لانى لابقبل انى اعرف خاين ولا كداب
ولا باقى فى عمرى عمر انافق فيه..
ولاحد اغنى عليه..
وكفايه عليا انى بملك من الاصحاب .. اصحاب
اعداهم ..ماتعديش..
فيهم اصدق وش..فيهم اطيب وش..فيهم اجمل وش..
وما يمنعش..
انه بعد خيانتك..ارميكى فى ذات النعش..
اللى رميت فيه كلا من خان
اللى رميت فيه كلا من خان.
شعر
محمود صابر الخطيب

**nasrnsar** · #2 16/11/2009, 21h24

من بعيد

من بعيد شوفتك معاها ..من بعيد

طبعا قالتلك .. انك انت الوحيد ..

وانك انت المعجزه .. وان قلبك شىء فريد

...

وابتدت تعزف موسيقى الحب من بين الكلام ..

ترمى عليك سهم الهوى .. ترسم عليك زيف انسجام

تشرح ازاى كان فى بعدك اليوم يمر بالف عام

تفرش السكه حكاوى .. اى حاجه والسلام .

وكمان قالتلك ان طيف بيناديها فى المنام ..

وانها بتشتاق لصوتك لما عنها تكون بعيد .

...

آسف اقولك يا عزيزى .. انت مخدوع لاختيار ..

انت دايب فى محبه ليل طويل من غير نهار ..

انت مغشوش فى الكلام ..انت تايه فى الزحام ..

انت محتاج للحقيقه .. قبل ما فى غرقك تزيد

....

انامش بقولك الكلام ده بحسدك او انى خالى الزكريات

انا قبل منّك ياعزيزى سمعت كل التسجيلات ..

يوم ما قالت انها .. وانى املها وبختها ..

صوتها كان مليان آهات .

صوتها فى العمر الربيعى ... كان ومتدرّب طبيعي

على كدب اسمه التعبيرات .

واكتشفت ما بين ضلوعها قلب اجوف ..

قلب بيحب الجديد

...

انا كنت حبيتها عزيزى .. بس من غير معنى سامى

انا كنت شايفها فى يومى ..

زى اسم من الاسامى .. زى حاجه م الحاجات

زى طيف وسط الطريق .. لا ليه لالون ولا بريق ..

زى دخان السجاير.. زى شيك من غير رصيد .

من بعيد شوفتك معاها .. من بعيد ..

... شعر...محمود صابر الخطيب

**nasrnsar** · #3 16/11/2009, 21h32

وبشتاقلك

وبشتاقلك ..
ولما الشوق يعاندنى ..
اعافرفيه واندهلك
ويرجعلى صدى صوتى ..
بنفس اللحن يندهلك
انا فى البعد يا غاليه ..
بكل الحب مشتاقلك ..
وبشتاقلك
...
كلامك لسه رنّاته ..
فىليل البعد تطربنى
وتاخد روحى من روحى ..
وعن احزانى تبعدنى
ولما ارجع لجواباتك ..
عشان م اعد فى حروفك
الاقيكى على بابى واتسامرمع طيفك
وارجع تانى بالذكرى .. ليوم ما كنتى بتجينى
ببسمه حب ما تخلص .. يداعبها الهوا تنعس
واشوف الشوق على جبينك
دانا فى البعد ياغاليه ..
بكل الحب مشتاقلك ..
وبشتاقلك
...
قريب جدا ح اكون جنبك ..
واحط ايديّا فى ايديكى
وتاخدينى .. تضمّينى .. بفستانك تلفينى ..
واشوف الفرحه فى عنيكى
اشاورلك تطاوعينى .. تغطّينى .. تدفينى ..
مع قلبك تخلينى .. اعيش العمر اغنيكى
دانا فى البعد يا غاليه ..
بكل الحب مشتقلك ..
وبشتاقلك شعر..محمود صابر الخطيب

**nasrnsar** · #4 16/11/2009, 21h37

التحـــــدّي

عدّي على جسر التحدي .. ومدّي
وإستمدّي قوتك من دفئ يدّي
وردي الالم، بالالم ..
وارفضي قرارات الامم ..
وادفني بنفس العلم، اللي ح يموتوا بعدي
...
ياشمعة الشرق اللي مش لازم تنطفي
إفردي طولك .. وبالكفاح إستانفي
فكريهم بالهدف والإتجاه ..
عرفيهم فين بندفن الغزاه ..
واربطي عندك .. بعندي .
...
انا في العند اعاند الحياه،واقوى البشر
واصد بالإيد والجسد،كل طلقات الخطر
وامسح دموعك من على خد الشهيد ..
واستقبل العام الجديد .. بنفس النشيد
وانتصر..عاللي على حدك يعدّي
..
ياخلق يا بتوع السلام ع الترابيزات،والجات
إحنا ع الارض الحضاره،والزمان الآت
وإنتوا. ،والكيل بمكيالين..مرفوضين ..
في كل ملّه .. وكل دين.
ياخلق طول عمرها ضدّي ..
انا قبلت التحدّي .. انا قبلت التحدّي
... .شعر ..محمود صابر الخطيب

**nasrnsar** · #5 20/11/2009, 19h04

البيـــــان

اسقى للعالم قانونك
واشكى ضعفك .. اوديونك
زيد جنونك .. زيد مجونك ..
وابعد عن الحق
لكن الأقصى لا
...
قول ما يفيدك.. أو يزيدك
واطبع النجمه فوق وريدك
اجمع مطاريدك .
واخرجوا م الشق.
لكن الأقصى لا
...
غيّر التاريخ .. والخريطة
واعمل الأعيا د بزيطه
وامشى على وجه البسيطه ..
بالصاجات والرق
لكن الأقصى لأ
...
اقتل ما تقتل م النفوس
وافرض حصارك باللصوص
اكسر الساق .. والرؤس
بالرصاص .. والشنق
لكن الأقصى لأ
...
ارهب ما ترهب م الجموع
يا اى شىء يشبع .. يجوع
لا الشمس راح تنسى الطلوع ..
ع الضفه .. وبيت الشرق
واحنا بالاقصى احق .
إحنا بالأقصى احق.
.... شعر ..محمود صابر الخطيب

**nasrnsar** · #6 20/11/2009, 19h13

السـويس

علي خط العرض تلاتين
واقفه السويس تبص علي سينا شمال ويمين
الايدين .. مسنودين علي عتاقه الجبل ومفرودين
العنين .. شعلتين منورين شط الخليج وسهرانين ..
ومسهرين سفن القناه والبمبوطيه والصيادين

...
قلبها الاخضر جناين .. طارحه تين مع برتقان
والعنب ضليله ماشيه ع الطرق وعلي البيبان
الخضره نور علي ارضها فدان ورا فدان
يحكي حكايه المكان .. من زمان الفراعنه لهذا الزمان
انسانها قاتل في الحروب .. وفي السلام انسان
...
فيها ملامح م القري ومن السواحل .. ومن المدن ومن الواحات
نجوم علي الارض سايره .. مجموعات في مجموعات
تكسب القرش من العرق .. والبنات اجدع بنات
تبتسم للي يحبها .. ويجيب لهااحلي الحاجات
هيه مصر في صبرها .. وفي الكلام وفي السكات
...
حبوها قد ما تقدروا .. وفكروا ازاي تسير
ابنوااللي باقي طوبه طوبه .. وازرعوا هتلاقوا خير
من مواني ومن مصانع .. بس شغاله بضمير
وكل واحد منكم يبقالها سفير..
وان حد فيكم سبَها .. حنفكره بطابور الاعاشه .. ومعسكر التهجير.
...
شعر.. محمود صابر الخطيب

**nasrnsar** · #7 21/11/2009, 15h54

البطله

زى ما شوفت اللى قبلك..

شوفتك انتى بخدعى نص البلد

تضحكى للى انتى عايزه تضحكيله..

تهمسى للى انتى عايزه تهمسيله..

تاخدى اللى فيهم يعجبك ..وتلفى ويّاه البلد..

...

تكتبى اسمك واسمه فوق مسله فى الميدان ..

ترسمى قلبك وقلبه فوق اساميكو كمان

ترقصوا الرقصه الجديده..

تضحكوا الضحكه السعيده..

وتسبيه فى نفس المكان..

اللى سبتى فيه ما قبله ..يوم ما كنتى معاه زمان..

...

اللى كان يعجبى فيكى ..

انك انتى بتقدرى بين يوم وليله تغيّرى..

انسان حديد مخدوع بحبك ..لولشخصه تقدّرى

تقنعيه انك حبيبته .. وان طبعك من طبيعته..

واما يشعر بالامان..ترمى قلبه فى التراب...

...

شىء طبيعى من بنيّه لسه فى بداية السنين

سايقه الدلال على قدّها .. شايفه الكتيرم المعجبين

اللىيكتب شعر فيها ..واللى يوصف فى عنيها ..

واللى يطلب انها.. تكتبله مره كلمتين.

واما دورك جه عليا لجل اكون بطل الروايه..

ابتديتى تعدّى ليّا الكمين زى الضحايا...

نظره ..همسه ..كلمتين..بسمه صفرا ضحكتين..

وتضيّعى ايام هنايا....

...

لأ يابطله الاحــــــلام كفايه..

آخر خطوط الغدر وصلت للنهايه.

مش انا الى بسهوله يمكنك ان تخدعيه..

مش انا اللى بكلامك..تفرحى وتفرحيه

مش كل طير فى الدنيا دى ياكله البشر..

مش كل طير فى الدنيا يقدر ع السفر ..

وانا قلبى عاش كام تجربه..وقفل الكتاب

انا قلبى شـــاب..

وانا لسه فى بدايه الشباب.

... شعر..محمود صابر الخطيب

**nasrnsar** · #8 21/11/2009, 15h57

الدخـــــــان
حقى التاريخى فى الوطن .. مش محتاج دليل
من بدايه نشأة الارض عايش انا والنيل
وجه واحد هوه وجهى ..
والنهايه ميّتى من روان .. اوسلسبيل
وانتو.. انكلستوما فى الجسد ..
نفسها تنهى على الامل الجميل
...
صعب جدا انكم تنهوا عليّا ..
ياوجوه لاهى شرقيه ولا غربيه
ياجنس خارج عن حدود الانسانيه .
تكنولوجيا العصر ممكن تملكوها ..
واما احاول اخطى خطوه بتسرقوها ..
وتسيسوها .. وتحولوها لكام قضيه .
شعبى انا محمود .. وصابر ..
وساعه الجد يبقى قعقاع القادسيه.
...
بطّلوا بقى الاعيبكم وسيبكم من النسيان
واما افكر انى اسيبكم .. ده عشان انا انسان
اقدر احافظ عن مكانى وواجهتى ..
واعدى فوق كل اشواك محنتى ..
وبكل طاقتى وقوّتى .. ازلزل العصيان
وحياة ابوكو ما تمكروا ..
وفكّروا قبل ما يفوت الاوان ..
وتصبح بيوتكم نار.. وكل الهوا دخان .
... شعر...... محمود صابر الخطيب