صورتين ولقطة من ألبومى

[حمدى شبانة]

الأولة
صورتى ونا بالمريلة
وسط حوش المدرسة
أنا وصحابى التلامذة
والأساتذة
وتدور فى راسى الأسئلة
الكل لابس مريلة
مين عن يمينى ومين عن شمالى
وليه كل الملامح تايهة عن بالى ؟
وكنت بضحك ليه أنا والصحاب
ماتقولش كان مكشوف عنا الحجاب
ان اما نكبر 00 ونرمى المريلة
حنلقى الضحكة جوانا متأجلة
________________

تانى صورة فيها وحيد منطوى
قاعد بين اربع حيطان منزوى
زى اللى راجع من معركة مهزوم
أيوة افتكرت وكأن لسة اليوم
يومها الحبيبة نست
حبى وقست
_______________

وف اخر الألبوم
سايب مكان فاضى لآخر لقطة
لصورة لاهى واقعة ولا ساقطة
ياخسارة عمرى ماشوفتها
ولا حشوفها ف يوم
راح ينكتب على ضهرها
( اخر صورة للمرحوم )
وقتها
ألبومى يبقى انتهى

***************

[على عبداللاه]

لسه فيه
انا لسه شايفلك صور
راجل كبير ومعاه ولد زى القمر
يبوس ايديه ويراعى فيه
يقول يا والدىطلبك يحققلى السعاده
دا البصه فى عيونك يا والدى كالعباده
أطلب تطاع بأمر رب الكون تلاقى وبزياده
الله عليك فى الصوره دى
ربيت بجد
بنيته هو
مش بنيت علشانه
لقيته رد
قدم حنانه
هنهوة بس فى الصوره ديه السعاده

[حمدى شبانة]

ياأستاذ على الصورة بتاعتك رائعة 000 امتى الأصول تتقابل ؟

الأصل والصورة
------------
الأصل أحسن م الصورة
وكل من شاهد ( أصلك )
من قلبه بيقول الله
ونا لما أقرا أشعارك
أتنهد تنهيدة واه
فاضل خطوة الايد تتمد تسلم
عندك ؟ عندى ؟ لازم (يامتر) نتكلم
*********

[على عبداللاه]

ربنا يكرمك يارب
وأنا بكل تأكيد ليا الشرف

[NAHID 76]

بسم الله الرحمن الرحيم
الاستاذ حمدى شبانه
جديده فكرتك ولطيفه وفيها بساطه جميله
شكرا لك وهل من مزيد
تحياتى

[سعدالشرقاوى]

اخى الاستاذ/حسن شبانه
الصورة التانيه ها تحلو
وتخليك ترسم فى الجو
وتمسح دمعه فى عنينا
وتنسّينا كلمة لوّ
وكنت بضحك ليه أنا والصحاب
ماتقولش كان مكشوف عنا الحجاب
ان اما نكبر 00 ونرمى المريلة
حنلقى الضحكة جوانا متأجلة

هيا صحيح متاجله لكن جايّه
ايوه جايه والميّه ميه
الضحكة جايه

[حمدى شبانة]

شكرا لكل من تفاعل مع قصيدة صورتين ولقطة شكرا لأصدقائى فى المنتدى 00 شكرا للأستاذ ( أو) الأستاذة NAHID 76 شكرا للأستاذ سعد الشرقاوى - وانا اسمى حمدى وليس حسن ياعم سعد
ولكم منى الشكر -- وأرجو رأيكم النقدى فى قصيدتى القادمة