شط الأمل

**Tarek Elemary** · #1 05/10/2009, 08h17

((شط الأمل))

على شط الأمل واقف بقالى سنين

و رمل الشط كله حنين

و قلب ف نار ، عملته فنار

عشان يهدى سفينة قلبك الحيران

بقاله سنين

و موج البحر ياخدك للبعاد و يروح

و واخد منى حتى الروح

و أحلامى زَبَد فى سكة العاشقين

بقالى سنين

***

بنادى و صوتى مش واصل

و أملى بشكل متواصل

يزيد رغم البعاد و البين

و يبقى سؤال فى قلبى حزين

طريقك فين؟

***

صحيح ما أملكش غير حبى

و نور بيشع من قلبى

مكانك فيه

و مطرح ساكنة فيه وحدك

على عهد الهوى معاهدك

و فيه سعدك و فيه وعدك

و فيه كل اللى تتمنيه

***

أنا مش باوعدك بقصور

ولا كنوز من دهب مبدور

و لا ستاير حرير مسدول

لكن بادعى و منايا أنول

هَنَا الأحوال و رزق حلال

و يكفينى إنى أعيش مستور

و ده حلمى فى زمان التيه

ياريت قلبك يآمن بيه

**سعدالشرقاوى** · #2 05/10/2009, 08h30

ايه دا ياعم
الله الله الله
بساطه نغم متخرّط
ياسلام ياحبيب قلبى
كده نتصالح
وانا الغلطان كمان

أنا مش باوعدك بقصور

ولا كنوز من دهب مبدور

و لا ستاير حرير مسدول

لكن بادعى و منايا أنول

هَنَا الأحوال و رزق حلال

و يكفينى إنى أعيش مستور

و ده حلمى فى زمان التيه

ياريت قلبك يآمن بيه
يعنى باختصار مطلوب لحن وغناء جميل على السريع
عشان ننتهز تجليات العودة
و6 اكتوبر
تسلم يابو عمر

**NAHID 76** · #3 05/10/2009, 12h31

بسم الله الرحمن الرحيم
الثائر دائما الشاعر طارق العمرى
خواطرك اليوم جميله
خاصة بعد ماعملت قلبك فنار حتى يهتدى به الحبيب
بس للاسف قلت له مش بوعدك بدهب منثور ولا ستاير حرير
طيب حيجى ليه
زمن الكنبه والقله والكبايه ولى من زمان
دى عايزه رصيد فى البنك وستاير من وسط البلد
مش عايزه أقولك وهمر كمان
للأسف حتقف على الشط كتير يا صاحبى
تحياتى

**Tarek Elemary** · #4 05/10/2009, 14h33

اقتباس:

المشاركة الأصلية كتبت بواسطة NAHID 76

بسم الله الرحمن الرحيم
الثائر دائما الشاعر طارق العمرى
خواطرك اليوم جميلة خاصة بعد ماعملت قلبك فنار حتى يهتدى به الحبيب
بس للاسف قلت له مش بوعدك بدهب منثور ولا ستاير حرير
طيب حييجى ليه؟ ... زمن الكنبه والقله والكوبايه وللى من زمان دى عايزه رصيد فى البنك وستاير من وسط البلد
مش عايزه أقولك وهامر كمان .... للأسف حاتقف على الشط كتير يا صحبى
تحياتى

مدام ناهد
أديكى شاهدة على حبى و أنا شاهد
و كل ما أقرب المسافات بتتباعد
و يا ما كتير بنتعاهد و نتواعد
و هوه يغيب و أنا ولهان
و لما أشوف خياله ف حلم باتشاهد
***
لكن لو بالدهب و المال
لُقانا مُحال
و أهل زمان حكيمهم قال
يا واخد القرد على ماله
يروح المال ...
و يفضلك رفيق دايم
ليالى طوال

****
تحياتى يا ست الهوانم

**NAHID 76** · #5 05/10/2009, 16h31

بسم الله الرحمن الرحيم
الثائر
فيه مثل عندنا فى الفلاحين بيقول
التصاليح غلبت التماليح
أعتقد فهمت معناه
قرد أيه هو عاد فيه قرود
أمال المراكز الطبيه للتصليح والفرد والثنى ومراكز الأسنان والعيون على كل لون يا بتسطه
واللى أنت عرفه كله
واللى ضاعت بسببه سعاد نصر
معدش قرود القرد النهارده غزال بواسطه التصاليح
فهمتنى طبعا
خلى أحلامك ماشيه مع العصر
عصر الليزر وسيبك من عصر القمر اللى واقف على الباب
تحياتى أقصد تصاليح

**سلوى خزبك** · #6 05/10/2009, 18h21

الحقيقة انا سعيدة جدا بجسر المشاعر الفياضة بين اعضاء المنتدى اللى متهيألى كلهم شعراء
شعر سلس يدخل القلب بسهولة ورقة فى الاسلوب تجعلنى اتمنى ان تطول القصيدة وتطول
شكرا لك على شط الامل
وشكرا لكل من حاورك بالشعر
لان المستفيد الحقيقى هو انا وكل ذواقة يقرأ الشعر

**Tarek Elemary** · #7 05/10/2009, 19h23

اقتباس:

المشاركة الأصلية كتبت بواسطة سعدالشرقاوى

ايه دا ياعم... الله الله الله
بساطه نغم متخرّط
ياسلام ياحبيب قلبى ... كده نتصالح
وانا الغلطان كمان

تسلم يابو عمر

يا عم معاك دليلى إحتار
و شوقى بيجرى بالمشوار
يا صوت أرغول
و مهما نقول
هانتلاقى نلاقى البعد و الأسوار

**علاء قدرى** · #8 05/10/2009, 20h19

اقتباس:

المشاركة الأصلية كتبت بواسطة Tarek Elemary

((شط الأمل))

صحيح ما أملكش غير حبى

و نور بيشع من قلبى

مكانك فيه

و مطرح ساكنة فيه وحدك

على عهد الهوى معاهدك

و فيه سعدك و فيه وعدك

و فيه كل اللى تتمنيه

***

أنا مش باوعدك بقصور

ولا كنوز من دهب مبدور

و لا ستاير حرير مسدول

لكن بادعى و منايا أنول

هَنَا الأحوال و رزق حلال

و يكفينى إنى أعيش مستور

و ده حلمى فى زمان التيه

ياريت قلبك يآمن بيه

اخى و حبيبى الشاعر الجميل طارق
شط امل كل فتاة
ان يعشقها شاعر
وتتزوج رجل اعمال؟؟؟
وتلك عبقرية الجمع بين متناقضين
فقط تستطيع المراة فعل ذلك ..
بعبقريتها الخاصة
دون ان تشعر باى جرم؟؟؟؟
وقمة تضحياتها ان تكون ام...

**امييره** · #9 05/10/2009, 21h59

اقتباس:

المشاركة الأصلية كتبت بواسطة Tarek Elemary

***

صحيح ما أملكش غير حبى

و نور بيشع من قلبى

مكانك فيه

و مطرح ساكنة فيه وحدك

على عهد الهوى معاهدك

و فيه سعدك و فيه وعدك

و فيه كل اللى تتمنيه

***

اكثر من رائع اخى العزيز
شعر جميل فيه امل وامانى رقيقه تتمناها كل فتاه

أنا مش باوعدك بقصور

ولا كنوز من دهب مبدور

و لا ستاير حرير مسدول

لكن بادعى و منايا أنول

هَنَا الأحوال و رزق حلال

و يكفينى إنى أعيش مستور

و ده حلمى فى زمان التيه

ياريت قلبك يآمن بيه

وايه فايده القصور والدهب والحرير لو كان مع انسان يحرمك حتى من انك تحس انك عايش من الاساس
تحياتى اخى الفاضل وفى انتظار ابداعاتك الرائعه

**Tarek Elemary** · #10 06/10/2009, 09h39

اقتباس:

المشاركة الأصلية كتبت بواسطة سلوى خزبك

الحقيقة انا سعيدة جدا بجسر المشاعر الفياضة بين اعضاء المنتدى اللى متهيألى كلهم شعراء

شعر سلس يدخل القلب بسهولة ورقة فى الاسلوب تجعلنى اتمنى ان تطول القصيدة وتطول
شكرا لك على شط الامل
وشكرا لكل من حاورك بالشعر
لان المستفيد الحقيقى هو انا وكل ذواقة يقرأ الشعر

حمامة السلام التى رفرفت على قصيدتى و ألقت بغصن الزيتون .... سلوى هانم

لو كان صحيح الكلام مع طيف حبيب نجوى
يبقى التواصل هنا ويا الصحاب سلوى
و إنت كلامك رقيق و غلافه عطف و ذوق
والدنيا من غير بشر زيك ولا بتسوى