أعمال من تنفيذ الفنان محمد الآلاتي

[الألآتى]

بص ياعم سيد ..

لكى تكون الأمور واضحة .. وهؤلاء المطربين العظام يأخذون حقهم ..

لابد أن أشرح ظروف العمل ..

العالم دول كانوا متجمعين عندى فى الصومعة .. وكان الإحتفال بوجود أخانا أبو مندور .. لأنه قادم من الإسكندرية خصيصاً لنقعد هذه القعدة ..

وقاعدين لابينا ولا علينا .. نرغى ونتناقش .. ونغنى على روحنا ..

وفى هذه الأثناء .. جاءنا تليفون من واحد حبيبنا .. عازمنا على السهرة والعشاء ..

وبينما نحن نجهز أنفسنا للإنطلاق للعزومة .. ماتفهمش إيه إللى حصل .. وطلعت فى نافوخهم فجأة .. إنهم يغنوا عمل جماعى .. يعنى نشترك كلنا فى عمل واحد .. طيب ندور على عمل جاهز عندى .. لأن الوقت لا يسعفنى لتحضير وتسجيل موسيقى جديدة .. ندور وندعبس .. وهوب .. القلب معاك ثانية بثانية ..

بس دى أغنية لشادية .. وأغنية فردية كمان .. ده أنا إللى بقول ..

مش مهم .. المهم نغنى مع بعضنا .. ده هما إللى بيقولوا ..

ياجدعان مش حانلحق .. لأ حانلحق .. بس بسرعة ..

وقوام قوام حضرت المسائل .. وكل واحد كتب الكوبليه إللى حايغنيه ..

تخيل حضرتك الوضع كان شكله إيه .. كل واحد يغنى الكوبليه بتاعه .. ويجرى على الباب علشان متأخرين ..

يعنى لا فيه إعادة ولا توجيه .. ولا تصليح .. ولا أى حاجه أبداً .. وطلع العمل بعبله كده زى ماسمعتوه ..

مش كفاية إننا مطربين على ماتُفرج .. لأ .. ونغنى ونجرى .. أل يعنى واثقين من نفسنا قوى .

وطبعاً .. أنا لما رجعت من السهرة .. بدأت فى عمليات المكساج والماسترينج .. وتصليح ماأفسده الدهر ..

لكن إيش تعمل الماشطة .... فى أربعة مطربين منتسبين للطرب غلط ..