غنوة لمصر

[علاء طه ياسين]

بين الحب وطيب الخاطر
كل كلامي الحلو هدية
أوصف فيكي لكن مش قادر
انتي صفاتك ماهي عادية
انتي نسيم الزرع العاطر
الجاي من حضن الفجرية
إنتي شطوط وغيطان علي نيل
مليان بغناوي مراكبية
إنتي القمح ف حضن نخيل
إنتي النجمة اللي مضوّية
إنتي الغنوة والمواويل
إنتي النور والهوا والميه
يا بلادي يا سواقي الحب
وندي الأزهار ف الصبحية
كل شبابك قاموا اتحدوا
علي عشقك عاقدين النية
ودي مش غنوة اللي انا باكتبها
إعتبريها يا مصر تحية

علاء طه ياسين

[على عبداللاه]

الله عليك
الله عليك
الله عليك
وأنت معذور فى القضيه
مصر وإحنا زى جنيه مخاويه
هى روحنا هى كل الإنسانيه
حاطه فـ عروقنا المحبه وبندقيه
والرصاصه هى هى
كلمه منك ... من علاء
تلم من النوبه لبولاق
صف واحد
قلب واحد
كالأحبه
تقولوا غنوه
غنوه حلوه فى المحبه
تقول فى بلدك عشق حبه
يقولوا وياك الأحبه
مصر هى
أم كل الدنيا ديه

الله عليك

[ام مدحت]

ياسلام عليك يااستاذعلاء
وعلى جمال ما يكتب فى حب مصر
وجمال التعليق
من الشاعر الاستاذ على عبدالله
ايوه شدوا الحيل وحركو الانتماء
ربنا يوفقكم

[علاء طه ياسين]

الشاعر الجميل الأستاذ
علي عبد اللاه


الفجر شأشأ
عصفور وزأزأ
مش قادر أصدق
جمال بلدنا
..
قمح ونخيل
وشجر يميل
وقمر جميل
في ليل بلدنا
..
ونيل بيجري
يسقي ويروي
ودي حاجة حَصْري
بس ف بلدنا
..
وكل عاشق
مخلص وصادق
في قلبه راشق
هوي بلدنا
..
أتمني التواصل دائما
مع دعواتي الطيبة لك بالتوفيق


لك مني وردة بندي فجر مصر

علاء طه ياسين

[علاء طه ياسين]

الغالية الأديبة
أم مدحت

مصر غنوة ع الدفوف ..
مصر سقفة ع الكفوف ..
فاكرة غنوة طوف وشوف ..
اسمعيها ..
تلقِي فيها وصف مصر ..

لك مني أرق زهرة في حدائق مصر

أخوك
علاء طه ياسين