سهرة سماعية فى بيت الجمالية - الصفحة 4

**abuzahda** · #31 18/08/2009, 20h41

اقتباس:

المشاركة الأصلية كتبت بواسطة unicorn

صور ميين يعنى ؟؟؟

عايز صورة مين بالظبط ؟؟؟؟
صورتى أنا تنفع ؟؟؟
اه ......عايز صورة صاحبك يعنى ؟؟؟
طيب خد دى مؤقتا ,

كان نفسنا تبقى معانا و الله يا استاذ سيد

يــــــــــــــــــــــــــــــاهـ ، يا حمو ......
إنت كلت إيه في الجماليّة ؟ خلاّك تفهمني صح !
بالظبط كده ...
كنت عايز اشوف صورة لعمّي محمد الألاتي و هو مـِبْتِسِم ....
و الحمد لله ببركة الأيام المُفترجة دي ... أهو ربنا نوّلهالي على إيدك

أما "أنا" فصورُه هوَّ و سِيدي علي ، واخدين نص الهارد ديسك

* * *

و ما دمنا بأيام مُستحب فيها عمل الخيرات ، ياريت صورة لعمّايا كيمو و جيمو
(يكش يكونوا مكشرين ، بس اشوفهم)

* * *

و أهديك هذا المقطع من غنوة فريد الأطرش : أحلى الأماني فيك يا زمان

لقا الحبايب هنا و سرور ...... و سرور
لقا الحبايب نور على نور ..... على نور
ورّينا الصور يا ابو مندور ...... مندور

**abuzahda** · #32 18/08/2009, 20h53

اقتباس:

المشاركة الأصلية كتبت بواسطة د أنس البن

بسم الله الرحمن الرحيم

الأحباب جميعا ..............
كل عام وأنتم طيبون ..........
وأشكر كذلك كل الأحباب الذين حالت ظروف قاهره عن تمكنهم من الحضور ...........
وأعتذر لكل من لم أتمكن من دعوته وإن كنت أتمنى أن تكون لدى القدرة لدعوة كل أعضاء وأحباب سماعى من العضو رقم واحد حتى آخر زميل سجل عضوية فى المنتدى , فالكل جميعا أفراد أسرة واحده والكل أحباب فى القلب ومقلة العين ..........

مركز المودة السماعيّة
الوالد الدكتور أنس

أدامك الله خيِّراً نديا
و رزقني معيّتكم في اللقاء القادم ، لأنعم برؤية الأحبة

بس انا كنت عايز اطمن من حضرتك على الفازة اللي في الصورة

(جت في حد ؟)

**غازي الضبع** · #33 19/08/2009, 05h29

ربنا يديم المحبة والمعروف
**
والله يسامحك يا مدام ناهد

عارفة لو عملتي عزومات تاني في وسط الأسبوع

والله العظيم هازعل بجد المرة الجاية
دي تالت عزومة تفوتني .. بسبب إنها في وسط الأسبوع
وإنتي عارفة إن مديري ( إلهي يجيله ويحط عليه

) ما بيرضاش يديني أجازات
يعني ما ينفعنيش غير جمعة وسبت
هاه

**NAHID 76** · #34 19/08/2009, 06h31

بسم الله الرحمن الرحيم
أخى الغالى غازى الضبع
تعلم منزلتك جيدا
وياما قلت لك أطلب أجازه
رمضان يا غازى جمعه وسبت
بس والله علي المره دى وميكنش عندك زعل
ده أحنا نعمل لقاء علشانك
بس أدعى لي بالصحه وبس
تحياتى يا غائب يا حاضر

**صلاح السويفي** · #35 19/08/2009, 19h05

يُعد منزل الدكتور أنس والسيدة عقيلته مدام ناهد (العامر بحب الله)
من البيوتات المصرية العريقة ..والعائلات المصرية ألصميمة الأصيلة
ورغم بعدي الجسدي إلا أني عاصرت كرمهم المصري(الأسبق من الحاتمي)
منذ لقاء أحباء سماعي الأول ..
وتُعد هذه العائلة الأصيلة نموذجا لما عليه الشعب المصري العريق
والذي يقر به العديد من ذوو العقول المستنيرة الواعية المثقفة مايكفي للتفرقة بين القول الغث والسمين
واللذين عاشرت معظمهم على مدى أربعين عاما مضت مابين السعودية مشرقيا والمغرب الأقصى مغربيا
فشعب مصر لم يبدُ ابدا ولن يبدوَ (كشعب يعيش في الضياع والتشتت واللاوعي والضن والبخل والتنكر لقيم العروبة والدين وسيادة البخل والشح وغلبة المصلحة والمنفعة والعلاقات المرتبطة بهم ..)
أبدا لم يكن شعب مصر هكذا إلا في خيال مريض حاقد يريد درأ الشمس بذرة من رمال ...

نحن أبناء مصر وشعب مصر لسنا بمنزلة الشتيمة عند الناس ،
نحن شعب أصيل كريم
وسنظل دوما كذلك بفضل الله..وبفضل أبناء مصر ومن هم على شاكلة أهل د أنس البن وعائلته..
وهم كثر . . . . . . . . . .

**د أنس البن** · #36 19/08/2009, 20h48

أخى وصديقى الحاج صلاح السويفى
كل الشكر لك على كلامك الجميل فى حقى ولو انى أرى أنك أعطيتنى أكثر من حقى بكثير
والحقيقه الذى يستحق الشكر هو كل من تفضل بتشريفى وكل من تجشم عناء السفر وشرفنى فى بيتى وأعطانى فرصة عمرى لألمس كل هذه المحبه والموده ولكى أعلم أن الله تعالى اقتضت حكمته أن يعوضنى بدل الولد والبنت عشرات بل مئات بل آلاف من الأحباب الذين لهم دين فى عنقى بما غمرونى به من فيض المودة والمحبة والأخوة الصادقه
أما عن الكلام الذى فلته عن مصر والمصريين فلك الحق تماما فيه , لكن ثق يا صديقى العزيز أن كل إنسان ينتمى لوطن يرى أن وطنه لامثيل له وله الحق طبعا فى تصوره , كذلك تأكد أن كل بلد من بلاد الدنيا له مايميزه من خصال حسنه وله أيضا ما يعيبه ولا أستثنى من ذلك مكانا عن مكان , حتى فى مصر مثلا وفى كل بلد عربى ترى أبناء كل إقليم يعتزون بإقليمهم , بل أبناء كل مقاطعة أو مركز أو قرية يرون قريتهم أحسن القرى وهكذا ...
مرة ثانيه أشكر مشاعرك الطيبه وحسن ظنك فى وأمانه لو نزلت مصر أن أراك .......

**صلاح السويفي** · #37 19/08/2009, 21h35

اقتباس:

المشاركة الأصلية كتبت بواسطة د أنس البن

وأمانه لو نزلت مصر أن أراك .......

يااااااه..ياأخي العزيز..

لهي من أولويات اشتياقاتي لمصر
ويقدّرني الله على أداء الأمانة

**سعدالشرقاوى** · #38 22/08/2009, 20h04

(سهره سماعية فى بيت الجمالية)

فعلا زىّ ماكنت أتصوّر
إنّ الصحبه دى شئ مش عادى
وإن إله العرش جمعنا
فى أصفى قلوب على أرض بلادى
,,,

ضلّ التوته علينا بيكسى
فى ساعة حرّ وفى الضّهريّه
والتليفون عمّال بينادى
يقول عايزينك فى الجماليّه
,,,

قبل ما افكّر روحت موافق
للدكتور وانا كلىّ سرور
وقلت له عندى طلب لو تسمح
عايز نمرة أبو مندور
,,,

وكان فى الصحبه الدكتور ثروت
بس مجاش والمانع خير
وأبو مندور ع الدولى لمحنى
لقيته محوّم شبه الطير
,,,

نفس الصّوره اللى ف أحلامى
راجل شهم وإبن أصول
باسأل قلبى شاورلى عليه
خدته ف حضنى ياناس على طول
,,,

وأنا طوّالى معاه باتكلـّم
مين حانشوفه ومين مش جاى
وف بلطيم ريّحنا شويّه
ودرش معانا بنشرب شاى
,,,

وف دمياط وصفولنا السّكه
وخدنا طريقنا على الجماليّه
لمّا وصلت وشوفت أبويا
كأنىّ مسكت السّما بإيديّا
,,,

كان بينادى لأمّنا ناهد
قلبى رآها اطمّن دغرى
حسّيت إنىّ ساعتها ف بيتنا
ومتربّى معاهم من صغرى
,,,

ناس بالعربى تحسّ معاهم
إنّ الدّنيا بحالها أمان
وانا فرحان وسعيد بلقاهم
لمّا وصل دكتور سليمان
,,,

مش ها تكلم على أخلاقه
ولا عن علمه اللىّ يخليك
قاعد تسمع منـّه محاضره
وخايف كلمه تعدّى عليك
,,,

بيتكلم ويّا الدكتور
ويقولوا حكايات م السّنه
وكأنى ويّا ابو مندور
بنعيشوا لحظات فى الجنه
,,,

سعادتنا ماتعرفش حدود
والصوره الحلوه ف عنينا
ولقينا الدكتور محمود
بسماحته بيطلّ علينا
,,,

والمنامات بدأت تتفسّر
والأحلام بتوفىّ الوعد
هلّ مشاعلى وعمّى آلاتى
وجه ورا منهم محمود سعد
,,,

كانت الدنيا احلوّت خالص
وشفت الناس الغاليه عليّه
وبانسى همومى واريّح بالى
واسمع منهم كام أغنيّه
,,,

جه الالاتى بصوته العالى
نقلنا القعده وخدنا براحنا
لمّا ينادى يقول عايز آكل
أقول له كفايه أحسن تفضحنا
,,,

عمّتى ناهد جت م المطبخ
قالت جاهز كلـّه تمام
قول سهّاته بكام مشروب
على مايجينا صلاح علام
,,,

والالاتى قعد جار منّى
وعايزه يشد معايا هدومى
نفسه انسدّت مارضيش ياكل
خلـّص كومه وشيّع كومى
,,,

كنّا بناكل وبنتكلم
ولمّا يعوز يشاوشنى ف ودنى
كنت باحرّص وانا باسمع له
خوفى يسهّى الناس وياكلنى
,,,

شربنا الشاى فى جنينة الأنس
وعمو كمال كان لسّه مجاشى
وطبعا لو هايغيب شهرين
وكله يروّح أنا مش ماشى
,,,

وّزة بركات على طبق اليوم
قسّم يا ألاتى وشبّعنا
وبدأ أبو دينا يحنّ علينا
ومن نغماته يسمّعنا
,,,

وابن سيادة الريّس علوه
وصحابه راكبين عجلات
وابو حسام كان عايز لفـّه
وسمحوله بتلات لفّات
,,,

زاد عن حدّه وخلف وعده
والعمليّه مشت ويّاه
وبقى يكسّر فى المتكسّر
هوّ بيجرى وهمّا وراه
,,,

واحنا ساعتها بنشرب قهوه
والليل خش يمين وشمال
وعمو كمال يوصل على سهوه
وعصفور طاير أبو جمال
,,,

وأبو حسام يشرح فى الناى
وعقله السبعه لعمى كمال
وانا كنت اعرف إنها سبعه
وكل عقله ولها حلاّل
,,,

وأخر السهره عمتى ناهد
طلبت منى أقول لو بيت
,,

قلت انا صاحى ياناس من بدرى
وخدت لى لفّه يادوب ع الغيط
,,

حسّيت انىّ بعافيه شويّه
والمفروض مافارقش البيت
,,

خفت ساعتها لتزعلوا منىّ
دوست ف كلّ الصعب وجيت
,,

ولمّا لقيتكم ربىّ شفانى
وحسّيت إنىّ خلاص خفـّيت

**unicorn** · #39 22/08/2009, 22h59

اقتباس:

المشاركة الأصلية كتبت بواسطة سعدالشرقاوى

(سهره سماعية فى بيت الجمالية)

,,,

عمّتى ناهد جت م المطبخ
قالت جاهز كلـّه تمام
قول سهّاته بكام مشروب
على مايجينا صلاح علام
,,,

والالاتى قعد جار منّى
وعايزه يشد معايا هدومى
نفسه انسدّت مارضيش ياكل
خلـّص كومه وشيّع كومى
,,,

كنّا بناكل وبنتكلم
ولمّا يعوز يشاوشنى ف ودنى
كنت باحرّص وانا باسمع له
خوفى يسهّى الناس وياكلنى
,,,

ينصر دينك يا عم سعد ,
أسمع عن ملحن حب يفرد عضلاته قام يلحن الجرنال ,
لكن شاعر يحكى الحكاية بكل تفاصيلها شعرا ؟؟؟
جديدة عليا خالص ,
الحكاية ما تخرّش المية يا عم سعد , و كلامك بينقط سكر.
سهّاته يا عم سعد ؟؟؟ بالله عليك جبتها ازاى ؟؟؟
بس برضه ما ينفعشى من غير ملف الصوت يا عم سعد
انت كدة بتعزمنا على الغدا و مش عايز تسقينا شاى , ينفع الغدا من غير شاى يا فصيح الفلاحين ؟؟؟
انت راجل بتنقط شعر يا عم سعد,
روح الله يرضى عليك

**الألآتى** · #40 22/08/2009, 23h14

ياساتر ياعم سعد .. ده إنت قطعتنى ياراجل .. أنا برضه شيعت كومك يامفترى ..

بس زى العسل .. وصف جميل .. وكل شيخ وله طريقة ..