آن الأوان

[علاء طه ياسين]

بسم الله الرحمن الرحيم

بسم الله ماشاء الله ..
بعد كلام الأستاذ / طارق العمري الجميل ..
ليس لي كلام ..
ولكن هذه محاولتي البسيطة (علي أدي) ..


أنا اتخيلت الأحفاد مشغولين بعوالم القنوات الفضائية والانترنت والبلاي ستيشن .. ودي ليلة نهاية شعبان .. وجدهم سابح في تهويماته الصوفية .. مع صوت المنشدين ..


مدد مدد مدد
مدد من غير عدد

عطر من الجنة جَيْ
الله يا كريم ياحي
انت الجاه والسند

خدني خدني من ايدي
علي حر النار ياسيدي
مليش صبر وجَلَدْ

يا حسين يابن الإمام
ويا صاحبة المقام
نظرة تشفي الجسد

مدد مدد يا دايم
أجرك كبير ياصايم
ف كتاب الله وَرَدْ

مدد مدد مدد

ويفوق الجد من تهويماته الصوفية .. ويدخل غرفة أحد أحفاده .. يلاقيه بيلعب علي جهاز البلاي ستيشن .. فالجد بحنيه يحط ايده علي كتف حبيبه .. فالحفيد يلتفت لجده ويقول ..

أهلا بيك يا حبيب أحفادك
والله ياجدو لك في القلب مكانة كبيرة
عمر لساني مايوم يقدر يوصفها لحد

الجد :

أهلا بالبكاش أبو دم خفيف
عقبال كده ما أشوفك جِدْ

الحفيد :

انت بتتمنالي طول العمر
ولا يا جده بتتمناه لك
عاوز رد

الجد يضحك ويقول :
طيب بقي نتكلم جَدْ
فين اخواتك

الحفيد :\

فاطمة بتتفرج ع الدش
أصله يا جدو طلعت حتة بنت
بتطبطب وتدلع
راحت بقي ايام الست
أما محمد بقي مشغول بأغاني جديدة
بينزلها من ع النت

الجد باستغراب :
انتوا نسيتوا
احنا اليوم دا آخر شعبان
يعني بكره بعون الله صايمين

الحفيد :

طيب حاضر
احنا يا جدو أكيد عارفين

الجد يكلم حفيده وهو شارد سارح :

ايه الزمن المقلوب ده
ياه .. يا حفيظ
والله يا بني زمنا بجد
كان له طعم جميل ولذيذ
مش دلوقت
فين أيام قرآن المغرب
والشيخ رفعت
كان في الراديو بيقرا بصوت رنان
ولا اللمة علي الطبلية
والسهرة لحد الصبحية
فين أيام فوانيس رمضان

الحفيد :
مانا عندي فوانيس رمضان
بتنور وتغني كمان

الجد:
لا يا حبيبي
جايز عندك أغلي فانوس
بس فانوسنا كان شيء تاني
حاجة بتلمس قلبك لمس
ناخده ف اول ليلنا نغني
وف آخر الليل نرجع بيه
وننام إلي أنْ تصحي الشمس

الحفيدان الآخران محمد وفاطمة يأتيان إلي غرفة أخيهما وهما يقولان في صوت واحد :

طيب إيه رأيك يا حبيبنا
تحكيلنا حكايات رمضان
واحنا هنسكت خالص خالص
وهنسمع حكاياتك
قول يا حبيبنا
قول يازمان ارجع يا زمان

إلي هنا توقفت وكنت ناوي أكمل المظاهر المختلفة لرمضان علي هيئة مجموعة حوارات وأغاني خفيفة ..
يعني غنوة الفانوس كنت بدأت مطلعها للمقارنة بين الفانوس الحالي والفانوس زمان ..

كان أحسن منه صنعة
فانوس قزاز بشمعه
تفضل للصبح والعة
واحنا عاملين مظاهرة

نلف في الشوارع
نضحك نلعب نصارع
.........

وغنوة بعد العصر لحد المغرب

العصر ابويا يصحي
يمسك في ايده سبحة
ويتوضي ويطلع ياخدني ف سكته

................
..............
...............

ونرجع بالسلامة
وادخل اعاكس ف ماما
تصرخ وتقول لبابا
الواد دا سَكِتّه

..............
.............


أتمني أن أكون حاولت ..

علاء ياسين