أنا باقى

[Tarek Elemary]

أنا ماوعَدْتِكِيش بالحب

و لا لِيكى مكان فى القلب

و لو وَهْمِك فى يوم خَدَعِك

ما ينفَعْشِ إنى أشيل الذنب

***

وعطفى عليكى ترْجِمتِيه

بإحساسك

و كان نِفْسِك فى يوم

تسقينى من كاسك

و أنا ...

لحنك ما يِطْرِبْنيش

و مهما هَاعِيش

ماتِكْتِبِنِيش فى كرَّاسك

***

أنا مِشْ قِصة

تحكيها لسُمَّارك

و لا نجمة

تِحِب تْلِفْ فى مدارك

و مش هاقْدَر أكون

لحن الشجَّن و الشوق

و لا دمعة كَمان يشكى

لمِزْمَارِكْ

***

ماكُنتش يوم

أحب أكون كده قاسى

و لا مشرط طبيب جارح

ولا ناسى

و يمكن أكون

بَحِب الخير لِعُشَّاقى

لكن ماقدرش

أخون بالعطف إحساسى

***

ما تظلِمِنيش

عشان يُصْدُق فى يوم ظنك

ماتدفَعِنِيش

فى يوم إنى أقول عنك

كلام يمكن يكون مظبوط

ماهوش مغلوط

لكن لو قلته

راح يِنْقِص كتير منك

***

أنا باقى

على ذكرى الهوى الكذَّاب

و فاتح قلبى

ماقفلتش فى يوم الباب

و أيه يمنع

لو العشق اللى تتمنيه

بقى صفحة

وطويناها

و عِشْنا صحاب؟

[سعدالشرقاوى]

أستاذى/طارق العمرى
ايه ده
خبر ايه ياجماعه
ماتصلوا ع النبى امّال
ما حصلش حاجه
والامر ما يستغناش
ولازم تعملوا خاطر لدخلتنا

أنا باقى

على ذكرى الهوى الكذَّاب

و فاتح قلبى

ماقفلتش فى يوم الباب

و أيه يمنع

لو العشق اللى تتمنيه

بقى صفحة

وطويناها

و عِشْنا صحاب؟
ايه الجمال دا ياعم تسلم ياكبير

[Tarek Elemary]

أيه يا عم سعد ....
إنت فاكرها خناقة .... دى حالة تعترى الشاعر زى ما إتفقنا و جات معايا كآبة كدة
المهم الموضوع و صياغته يعجبوك

[Tarek Elemary]

المشاركة الأصلية كتبت بواسطة سعدالشرقاوى

أستاذى/طارق العمرى

ايه ده

أنا باقى على ذكرى الهوى الكذَّاب
و فاتح قلبى ماقفلتش فى يوم الباب

و أيه يمنع لو العشق اللى تتمنيه
بقى صفحة وطويناها
و عِشْنا صحاب؟

ايه الجمال دا ياعم تسلم ياكبير

والله يا عم الحاج سعد هى المسألة بقت تلاكيك .... و حاجة بقت تزعل الواحد اللى عنده إحساس