المقامات الموسيقية

**الألآتى** · #1 07/08/2009, 06h27

مقام الراست

مقام الراست ياجماعة هو أبو المقامات الشرقية .. وهو مرادف لسلم الميجور الغربى .. مع تغيير طفيف ..

وكلمة ( راست ) تعنى المستقيم .. يعنى لابيروح شمال ولا بيروح يمين .. ماشى زى القطر .. مابيحودش .. مالوش دركسيون .

والراست ياإخوانى يبدأ من درجة الدو .. يعنى درجة ركوزة ( نغمة الدو ) .. وإسمها بالفارسية ( راست ) ..

يعنى نفهم من كده .. إن مقام الراست .. غير نغمة الراست .. طيب

وإحنا قولنا قبل كده .. إن المقام يتكون من ثمانية درجات نغمية .. يبقى الراست يبدأ من الدو .. حتى يصل لنغمة الدو الجواب .. يعنى الدو إللى على اليمين .. ( دو ، سى ، لا ، صول ، فا ، مى ، رى ، دو ) ونقراها من الشمال لليمين .. إتعودوا على كده بقى ..

طيب .. إحنا قولنا إن الراست مرادف لسلم الميجور الغربى .. طيب إيه الفرق بينهم ؟

الفرق إن نغمة أو درجة المى فى الراست منخفضة ربع تون .. ونغمة السى كمان منخفضة ربع تون .. يعنى إيه الكلام ده ؟

من المعروف إن هناك مسافة صوتية بين كل نغمة وإللى بعدها .. يعنى لما بنقول دوووووو .. وبنقول رىىىىى

مابنقولهمش زى بعض .. لأ .. بنقول الرى بنغمة أعلى من الدو .. هى دى المسافة الصوتية .. وهناك نصف مسافة صوتية ..

وعند الشرقيين .. هناك ربع مسافة صوتية .. يعنى ربع تون .. هو ده الفرق بين الموسيقى الشرقية والغربية ..

والملف المرفق .. حايوضح كل إللى أنا قولته ..

**عفاف سليمان** · #2 07/08/2009, 07h10

والله يا استاذنا محمد الالاتى
الشرح جميل جدا بصوت حضرتك وواضح ووافى
وانا فهمت الحمد لله
بس بردوا هرسم شجره مفرعه منها المقامات
وان شاء الله بس استنى كل الشرح واكيد هلاقى حل لكل فرع من الشجرح ينبثق منه اى نغمه
واكيد هتبقى سهله جدا زى شرح حضرتك
جزاك الله كل خير وكل سنه وحضرتكم والجميع طيبين وبخير
اختكم والتلميذه التى تحاول ان تجتهد اختكم عفاف
ياربى مفيش تلميذه كمان معايا تساندى لازم احقق النجاح علشان ميبقاش شكلى وحش وسط اخوانى
تحياتى للجميع

**MOHAMED_SAFWAT** · #3 08/08/2009, 07h44

انا مش فاهم المسافات لانها كلها جت ورا بعضها

**غازي الضبع** · #4 08/08/2009, 11h44

اقتباس:

المشاركة الأصلية كتبت بواسطة عفاف سليمان

والله يا استاذنا محمد الالاتى
الشرح جميل جدا بصوت حضرتك وواضح ووافى
وانا فهمت الحمد لله
بس بردوا هرسم شجره مفرعه منها المقامات
وان شاء الله بس استنى كل الشرح واكيد هلاقى حل لكل فرع من الشجرح ينبثق منه اى نغمه
واكيد هتبقى سهله جدا زى شرح حضرتك
جزاك الله كل خير وكل سنه وحضرتكم والجميع طيبين وبخير
اختكم والتلميذه التى تحاول ان تجتهد اختكم عفاف
ياربى مفيش تلميذه كمان معايا تساندى لازم احقق النجاح علشان ميبقاش شكلى وحش وسط اخوانى
تحياتى للجميع

يادي أم الشجرة اللي عمـّالة تحنسِـينا بيها ولغاية دلوقتي ما رسمتهاش
يا ستي ارسميها وخلصينا

**unicorn** · #5 08/08/2009, 13h19

اقتباس:

المشاركة الأصلية كتبت بواسطة الألآتى

مقام الراست

مقام الراست ياجماعة هو أبو المقامات الشرقية .. وهو مرادف لسلم الميجور الغربى .. مع تغيير طفيف ..

والملف المرفق .. حايوضح كل إللى أنا قولته ..

ربنا يباركلنا فى عمرك يا مايسترو ,
الملف الصوتى مع الشرح الكتابى دة وصل الصورة بالظبط و عرفنا الراست تمام التمام ,
بس فيه نقطة صغيرة كنت عايز اسأل حضرتك عليها ,
موضوع درجة ركوز المقام دى غامضة حبتين , حضرتك قلت هى الدرجة اللى بيرتاح عندها اللحن , و بيقف فيها
بس بصراحة ما عرفتش بيرتاح ازاى يعنى , يعنى لو قلنا غنوة قولى حاجة ,
قولى حاجة أى حاجة ....قول باحبك قول كرهتك
قول .... قول .... قول و ما يهمكشى حاجة
قولى عايزك ... قولى بعتك
بس قولى أى حاجة .... أى حاجة
يا حبيبى
الللحن ارتاح هنا فين ؟؟؟ أو درجة الركوز عند أى كلمة من دول ؟؟؟
و بعدين عندى سؤال تانى , لازم اللحن اللى من مقام الراست يبتدى من الدو ؟؟؟
يعنى أول حرف يكون دو ؟؟؟
و لا ممكن يبتدى من أى حرف تانى فى السلّم بتاع الراست و يعدى فيه على الدو من خلال اللحن؟؟
ثالث سؤال الراست على الاورج هو الصوابع البيضاء بس , صح ؟؟؟ ( مع الربع تون طبعا)
شكرا يا مايسترو يا كبير ,
انتظر بأة أمثلة التفاعل بتاعتى , و انت عارفنى بأة أمّا باتفاعل ,
ربنا يستر

**الألآتى** · #6 08/08/2009, 13h47

أهو كده التفاعل ولا بلاش .. أسئلة فى صميم الدرس .. برافو يامحمد ..

نبدأ فى الإجابات ..

اقتباس:

المشاركة الأصلية كتبت بواسطة unicorn

موضوع درجة ركوز المقام دى غامضة حبتين , حضرتك قلت هى الدرجة اللى بيرتاح عندها اللحن , و بيقف فيها

بس بصراحة ما عرفتش بيرتاح ازاى يعنى , يعنى لو قلنا غنوة قولى حاجة ,
قولى حاجة أى حاجة ....قول باحبك قول كرهتك
قول .... قول .... قول و ما يهمكشى حاجة
قولى عايزك ... قولى بعتك
بس قولى أى حاجة .... أى حاجة
يا حبيبى
الللحن ارتاح هنا فين ؟؟؟ أو درجة الركوز عند أى كلمة من دول ؟؟؟

اللحن هنا إرتاح على درجة الركوز .. إللى هى الدو .. عند كلمة ياحبيبى الأخيرة ..

وعموماً .. المفروض أن الجملة الموسيقية تنتهى على درجة الركوز .. وإذا إنتهت على درجة أخرى فى سلم المقام .. نقول عليها ( درجة معلقة ) ..

اقتباس:

المشاركة الأصلية كتبت بواسطة unicorn

و بعدين عندى سؤال تانى , لازم اللحن اللى من مقام الراست يبتدى من الدو ؟؟؟

يعنى أول حرف يكون دو ؟؟؟
و لا ممكن يبتدى من أى حرف تانى فى السلّم بتاع الراست و يعدى فيه على الدو من خلال اللحن؟؟

مش لازم الجملة اللحنية تبدأ من درجة الركوز .. ممكن تبدأ من أى درجة داخل سلم المقام .. حسب رؤية الملحن ..

لأن لو كل ملحن بدأ من درجة الركوز .. لأصبحت الألحان كلها متشابهة .

فمثلا : أغنية فكرونى .. تبدأ بجملة ( كلمونى تانى عنك ) .. كلمة كلمونى بدأت من الدو .. يعنى من درجة الركوز

أما أغنية ( بدنا نتجوز ع العيد مثلاً ) .. تبدأ بكلمة ( بدنا ) .. نجدها بدأت من درجة اللا .. وليس الدو ..

اقتباس:

المشاركة الأصلية كتبت بواسطة unicorn

ثالث سؤال الراست على الاورج هو الصوابع البيضاء بس , صح ؟؟؟ ( مع الربع تون طبعا)

أيوه صح .. علشان كده .. الراست .. إسمه المستقيم .. يعنى مافيش أصابع سوداء على البيانو .. ولو إن البيانو مايقدرش يقول راست ..

يالى شد حيلك وذاكر ..

**Islam Eidrisha** · #7 08/08/2009, 14h25

الله الله يا عمنا ده مقام السلطنة والمزاج العالي
واللي هياخد باله من حتة السلطنة اللي في النص اللي بتميز الراست عن الميجور الغربي الجاف هيفهم معنى الربع تون
بس يا عم الآلاتي حضرتك قلت إن المقام ده كلمته واحده ودوغري وما بيحودش لا يمين ولا شمال دي بقى اللي عايزين نفهموها؟؟!! وياريت توضح لنا بأمثلة تانية لمقامات بتحود عشان نعرف الفرق.
معلش دي غلاسة بس حضرتك اللي قلت اسألوا؟
وطبعا كلنا في انتظار أبو مندور ينتع لنا كام مثال راست من بتوعه وانا متأكد المرة دي إن كلهم هيطلعوا بياتي

بنهزروا وياكوا يا ميدو

والله ده حضورك هو اللي خلى الموضوع لذيذ ودمه خفيف
فينك يا أبو فارس احضرنا يا عم

**غازي الضبع** · #8 08/08/2009, 14h57

أنا أهوه يا سُلم
وهاتلاقوني لعلعت في مقامي الحجاز والصبا .. لإني باحبهما قوي
والكرد كمان .. ولا واني دايما اتلغبط فيه

الله ينور يا عم محمد يا كبير الالاتية

**unicorn** · #9 08/08/2009, 19h28

شكرا جزيلا يا استاذ محمد على الاجابة الشافية الوافية الكافية ,
معلش بعد إذنك سؤال بايخ كمان ,
لما جينا خفضنا الربع تون للماجير عشان يبقى راست , المسافة بين المى و الفا نص تون فى الماجير , صح ؟؟؟
طيب مش المفروض تفضل المسافة هى هى بعد تغيير الربع تون ؟؟؟
لاننا غيرنا فى المى , و فى الفا كمان , يعنى المسافة المفروض تفضل ثابتة يعنى برضه نص تون , بعد ما غيرنا المى ( إلى مى إلا ربع ) و الفا ( إلى فا إلا ربع )
يعنى المفروض بفضل فرق المسافة نص مسافة و ليس مسافة الا ربع بين المى و الفا و بين السى و الدو التى تليها ,
مش كدة و لا أنا دماغى سخنت
يعنى تغيير الربع تون إذا تم على كل حروف مقام الماجير يبقى المسافة بين الدرجات لازم تفضل ثابتة ,
و لا إحنا بنغير الربع تون فى بعض الحروف فقط مش فى كل المقام ؟؟؟

**غازي الضبع** · #10 08/08/2009, 19h38

اقتباس:

المشاركة الأصلية كتبت بواسطة unicorn

شكرا جزيلا يا استاذ محمد على الاجابة الشافية الوافية الكافية ,
معلش بعد إذنك سؤال بايخ كمان ,
لما جينا خفضنا الربع تون للماجير عشان يبقى راست , المسافة بين المى و الفا نص تون فى الماجير , صح ؟؟؟
طيب مش المفروض تفضل المسافة هى هى بعد تغيير الربع تون ؟؟؟
لاننا غيرنا فى المى , و فى الفا كمان , يعنى المسافة المفروض تفضل ثابتة يعنى برضه نص تون , بعد ما غيرنا المى ( إلى مى إلا ربع ) و الفا ( إلى فا إلا ربع )
يعنى المفروض بفضل فرق المسافة نص مسافة و ليس مسافة الا ربع بين المى و الفا و بين السى و الدو التى تليها ,
مش كدة و لا أنا دماغى سخنت
يعنى تغيير الربع تون إذا تم على كل حروف مقام الماجير يبقى المسافة بين الدرجات لازم تفضل ثابتة ,
و لا إحنا بنغير الربع تون فى بعض الحروف فقط مش فى كل المقام ؟؟؟

إنت بتذاكر من ورانا يا واد