واترص اترص يا ورق الفل

[علاء قدرى]

المشاركة الأصلية كتبت بواسطة علاء طه ياسين

....
البنت الحلوة وعدتني
وعدتني كتير
وعدتني بحب مفيش زيه
ولا في الأساطير
وانا قلبي معاها كما العصفور
يحلم بالهوا والسما والنور
ويطير في بلاد العشق يطير
وحلمت كتير
....
البنت كما نجماية بليل
بتغيب وتسيب فيضان مواويل
وضفيرة شعر ومربوطة
بشريطة حرير
والهوي مقادير
وانا قلبي معاها غزال عطشان
وعنيها تقول نهر وبستان
في براحهم بترفرف عصافير
....
ضحكتها نغم والبسمة شروق
وخجل بيدوب في سواقي الشوق
واترص اترص يا ورق الفل
وياست الكل
من عندك تبتدي يا حبيبتي
أحلي المشاوير
....

علاء

اخى الشاعر الغنائى علاء
تحية لك على الكلام الجميل المرح الذى يشع من اغانيك العذبة؛ ولكن لى ملحوظة موش عليك لكن على اخواتنا فى المنتدى اللى دايما ينصحونك بالصبر حتى تقع اغانيك فى ايد ملحن فاهم ؛ وانا اقول لهم ولك بكل صراحه ووضوح
احنا هنا فى المنتدى احسن من اى ملحن بلغة السوق ؛ الطريق فى سوق الاغنية الان ممهد للكلمات السفيهة ؛ وانواع الخضار و الفاكهة و السمك السمك؛ و العنب العنب ؛ و البلا البلا ؛ لو تعرف تكتب ده توكل عل الله ؛ وان ماكنشى انتظر حتى يتحسن ذوق و احساس الناس ؛ وتاكد انك ساعتها على الطريق الصحيح ؛ اما الان فيكفى انك بتكتب شعر فى المنتدى لشعراء زيك ؛ لن يخدعوك ؛ وتقبل نصحهم فهم يحبوك ؛ وخير لك من اتجد سميع واحد بيفهم خير لك من الف اصم
تقبل تحيات اخوك علاء