تــجــــليـــــات

[عصفور طاير]

يا نهار أبيض يا ولاد.. ناصر دويدار!!!

أي ريح طيبة

يا ألف خطوة عزيزة.. أشرقت الأنوار وازدانت الديار في عالم الأشعار
والله واحشني جدا على المستوى الشخصي وعلى مستوى تمرداتك الشعرية، أو تجلياتك كما سميتها أنت.

إن شاء الله نلتقي قريبا على مقاهي المحروسة، أو دمنهور أيهما أيسر.. وأنا شايف إن الكراسي عندك كتير -حسب الصورة- يعني تساع من الحبايب ألف.

أنا عصفور طاير (صو صو صو).. على رأي عم سيد أبوزهدة زينة شعراء الشطر الغربي من كوكب الأرض.. واسمي الحركي جمال.. أكيد علاء حايكون قال لك المجموعة كلها.

عموما ألف مرحبا، وأغدق علينا من ابداعاتك وتجلياتك وتمرداتك.. داحنا مشتاقين دوي دوي يا دميل

[Islam Eidrisha]

الأستاذ ناصر دويدار
ما أبدع الصورة في عفويتها ومصريتها ودفئها وما أروعك في رسمها وصياغتها على طريقة السهل الممتنع
لقد كان لي في يوم أشبه بالحلم الجميل شرف الدردشة مع عمنا سمعجي وبصحبته الأستاذ علاء قدري في إحدة مقاهي دمنهور حيث أنني إسكندراني المنشأ دمنهوري الهوى بحكم النظرية الجحوية العتيقة ثم دفعتنا أمواج الحديث على شاطئيكما دفعا (عصفور طاير وناصر دويدار) وكم كانت الرمال ناعمة على الشاطئ الصافي النقي الرقراق وكم كنت أود وقتها أن يكون لي بكما سابق معرفة لأشاركهما التقطيع في فروتكما
لقد أدركت الآن أن لي في دمنهور عزوة ما أحلاها وصحبة ما أوفاها
دمتم لنا وسلمكم الله مثنى وفرادى من كل سوء

[د أنس البن]

الشاعر الأصيل ناصر دويدار
هنا القاهره
وحلت البركه فى سماعى
وأقول لأخى إسلام
ياما انتو متهنيين يا اهل البندر

[ناصر دويدار]

عايز أعترف لكم إعتراف أنا كانت علاقتى بالنت محدودة جــداَ جــداً وكانت قاصرة على دخولى على مواقع رياضية لمعرفة الأخبار ومعلومات عن لعيبة الكورة لاستخدامهم فى برنامج اسبوعى على شبكة الشباب والرياضة أو لاستخدامها فى تدعيم الجريدة التى اقوم بإدارة تحريرها وهى عشاق الأهلى لكن اتصل بى صديق عمرى علاء قدرى وكلمنى على هذا الموقع فورطنى فى محبتكم جميعاً بلا أستثناء الشاعر الفنان طارق العمرى وصديقى الشاعر الكبير كمال عبد الرحمن وعمنا دكتور أنـــس البن والفنان المبدع سيد ابو زهدة وحبيبى جمال دربك العصفور الطاير وإســـــــــــــــــلام أبن منطقتى الجديد والتلقائى عمر زهران وحمدى السمر بصراحة شديدة انا أتورطت فى محبتكم وأرجو أن تديم محبتنا جميعاً لأن أنا لاقيتلى أهل نتاويين فا أقبلوا منى محبتى وتقديرى وامتنانى وشكرى أيها الفنانيين والشعراء الكبار .
أخوكم الصغنن ...
ناصـر دويـــدار

[Tarek Elemary]

المشاركة الأصلية كتبت بواسطة ناصر دويدار

الجريدة التى اقوم بإدارة تحريرها وهى عشاق الأهلى
طارق العمرى وصديقى الشاعر الكبير كمال عبد الرحمن و دكتور أنـــس البن والفنان المبدع سيد ابو زهدة وحبيبى جمال دربك العصفور الطاير وإســـــــــــــــــلام أبن منطقتى الجديد والتلقائى عمر زهران وحمدى السمر بصراحة شديدة انا أتورطت فى محبتكم وأرجو أن تدوم محبتنا
أخوكم الصغنن ...
ناصـر دويـــدار

يا سيدى صغنن ايه بس و انت مولود كبير بموهبتك و بصحبتك لفطاحل الثقافة و الشعر الدمنهورى المعجون بصميم تراب الوطن الجميل
محبتنى لشعرك لا علاقة لها بالكبير ين كمال بك و علاء بك قدرى و لكنها فرضتك و فرضت حبك و فرضت مكانتك بيننا فأهلا بك

[سعدالشرقاوى]

المشاركة الأصلية كتبت بواسطة ناصر دويدار

عايز أعترف لكم إعتراف أنا كانت علاقتى بالنت محدودة جــداَ جــداً وكانت قاصرة على دخولى على مواقع رياضية لمعرفة الأخبار ومعلومات عن لعيبة الكورة لاستخدامهم فى برنامج اسبوعى على شبكة الشباب والرياضة أو لاستخدامها فى تدعيم الجريدة التى اقوم بإدارة تحريرها وهى عشاق الأهلى لكن اتصل بى صديق عمرى علاء قدرى وكلمنى على هذا الموقع فورطنى فى محبتكم جميعاً بلا أستثناء الشاعر الفنان طارق العمرى وصديقى الشاعر الكبير كمال عبد الرحمن وعمنا دكتور أنـــس البن والفنان المبدع سيد ابو زهدة وحبيبى جمال دربك العصفور الطاير وإســـــــــــــــــلام أبن منطقتى الجديد والتلقائى عمر زهران وحمدى السمر بصراحة شديدة انا أتورطت فى محبتكم وأرجو أن تديم محبتنا جميعاً لأن أنا لاقيتلى أهل نتاويين فا أقبلوا منى محبتى وتقديرى وامتنانى وشكرى أيها الفنانيين والشعراء الكبار .
أخوكم الصغنن ...
ناصـر دويـــدار

اخونا الكبير اللى مش صغنن الاستاذ/ناصر دويدار
شكلك كده بتستأذن واللا ايه
لسّه ماقعدناش مع بعض انا كنت فى مشوار
والا من دسوق ح اطبّ البحر قصدى (النهر)واجيلك
ما صدّقت لقيتك يابلد

[علاء قدرى]

عمىالشاعر سعد الشرقاوى
اولا حمد لله على سلامتك
ثانيا الشاعر ناصر دويدار من قاطنى القاهرة من 25 سنة ؛ بجانب عمله فى الاذاعة و التلفزيون
يعنى حطب فى دمنهور موش حتلاقية لكن ممكن تظبطة فى القاهرة ؛ وانا عارف الخن يتاعة
بس شرف انت و نورنا
الف حمد لله على السلامة

[yosry_at]

كلام جميل وصور اجمل
فوالهى انها لتجليات رائعه وما اجملها كلمات التجلى وساعات التجلى وايام التجلى
فسير على بركه الله ونحن فى انتظار المزيد
يسرى عطيه سليمان

[عفاف سليمان]

المشاركة الأصلية كتبت بواسطة ناصر دويدار

تجلـــيــــــات 1ملف مرفق 156822

وشى ميدان واسع

دكاكين عيونى المفتوحين
طالع بخور منها
وسورة الرحمن
بصوت محمد رفعت
بتكنس أسفلت روحى العريض
وبتدفى الزقاق من برد فبراير
نافورة قلبى
بتنيم تراب الشوارع
برشرشة الصباح
تحت رجلين البنات
السيدة زينب على دراعى اليمين
وع الشمال مبدورين البياعين ع الرصيف
مناديل حريمى وطرح
شربـــــــــــات فرح
قلل قناوى
حب العزيز
بهارات بتتعارك مع المناخير
طاولة لمون
كحل العيون
تـــــــــــــــــّوك
حُلقان
شموع سبوع مولود
تماثيل جدود
راس نفرتيتى بتبص على سيدنا الحسين
جناحين الميكرفون طارت من مدنة الجامع
بتغطى المكان بصوت الأدان
المغربية بتلم دراويش الميدان
سدرى أتملى عيون
أتزحلقت دموعها من فوق رخام المقام
عمرى ماكنت إمام
لكن سكوتى متعبى كلام
وحصالة دماغى أتملت دنانير
حطها سيدنا عمر
وشى أتملى خرابيش سمك شفايفى
بتتعارك عليه القطط
وتفتش فى جورنال ودانى
عن صورة للنيل
غطانى كف الليل
طفيت ميدان وشى
وسبت نور البلكونات للولاد والبنات
سبت وناسة فى مدخل قلبى
يمكن يعدى غريب
يمكن البرد اللى فى الشارع
يخش يتدفى ف دماغى
يمكن ولد فى اللفة
أمـــه راح ترميه
قلبى يحتويـــــــه
( هتف البعيد )
عايز تشوف نفسك بحق وحقيق
أقلع هدوم روحك وطير
هتشوفها عريانة بدون تفاصيل
على شجرة جزورين
نايم ف حضن النيل
( هتف القريب )
عايز تشوف نفسك بجد
أقلع قميصك
من صدر بحرك
طلِِّع ملايكة حزنك الشفاف
أفتح ميدان روحك الواسع
هتلاقى وش أبوك
قبل ما يموت بســـــاعة
يوم 4 رمضـــــان
وقت اما قالك
عايز تشوف نفسك بجد
أعرف بأنك
ضئيـــــــــــــــــــل
تافـــــــــــــه
قلــــــيـــــل
عايز تشوف نفسك
ولعّ فى وناسة روحك
شموع المستحيل
قناديل وعيش زى خلق الله
درويــــــــــــــــــــــــــــــــش 0






تجلـــيــــــات2
رنة صجات العرقسوس
بترّقص الشمعة ف أزاز فانوس
شعر الكنافة بيستوى ع النار
ويطير على ورقة الجورنال
اللى أنكتب فيها ببنط عريض
عــــــبرنــــــــا القنـــــــــــــــال
أم الخلول منوّرة فى سوق الخضار
خد القطايف بالزبيب لوّن
بهارات ع الرف تتشون
قلم كوبية
من ع الودان بيطير
ع السطر بيدون
حساب الصجات
الحاجة بتنادى من الشباك
ع الولد محروس
يطلّع العيش
أخوه رجع م الجيش
وفاضل ع الأدان
مافيـــــــــــش
الواد سعيد صبى المكوجى
مستشوى شلن بقشيش
ويقول ف سره
ولية قرشانة
أم لطفى بتشتكى جوز بنتها للناس
شوضلى وضلالى وبلطجى
واخد فلوسها
والبنت بتحبه
موكوسة زى أمها
يلا أهى عيشة والسلام
عنتر ندا بيأكد أسامى الولاد
وأرقام البيوت
فكرية بتنادى عليه من التالت
أكتب عمر عندك
مولود من أمبارح
مع أول خطوة عسكرى مصرى
دخــــل سيـــــنـــــــا
وأكتب كمان مينا
وشقة 6 حمو وأخوه خالد
ياااااااااااااااااااااااااااااااااااااه
رمضان مخلى الجو صافى
هنااااااااااا القاهرة
مدفع الأفطار ضرب
أدان المغربية
بيوّحد اللمة
وتتجمع على الطبلية
كل الأمـــــة
أبويا كان ساكت من زمان
ما قالشى ولا كلمة
الراديو والع من مدة ع الفوازير
مين اللى خلى الصغير كبير
ومين اللى خلى الخدش
جرح خطير
أبويا مات
ولسه الراديو والع ع الفوازير
ورغم ده رمضان بيفضل
أجـــــــمــــــل
(موضوع تعبيـــر)



تجـــليــــــــات3
مافيش نبى عاطل
وّلا الملايكة بتطلع تونس ديابة
مافيش حق باطل
والدنيا ف الأخر
رايحة رايحة
للغلابة

بعد مساء الخير على حضرتك وعلى اهل سماعى الكرام
بالله عليك لا تحرمنا من هذه التجليات
راااائعه والله جميله
تشبيهات جميله ومقام السيده والحسين
ورمضان وكل اللى فيه جميل
حتى الراديوا والفوازير
بصراحه جمال ما شفت مثله جمال انك تعبر بوشك انه ميدان
وكل ما قلت جميل من تجليات
لك خالص التحيه والتقدير
ولك وللجميع اسعد الاوقات
اختكم عفاف

[ناصر دويدار]

بصراحة انتى جبتينى من ميدان الساقطين على السيدة زينب وسيدنا الحُسين زى ما بيقولوا على ملى وشى
لكن انا مبسوط جداً أن حضرتك شرفتينى فى السيدة زينب ومبسوط أكتر أن التجليات عجبتك ورمضان كريم وكل سنة وانتى طيبة وان شاء الله معزومة ع السحور أنتى والحبايب كلهم وكل سنة وحضرتك بخير
أخوكى
ناصر دويدار