سؤاااااال مهم ليا للاستاذ الالاتي او الدكتور هشام

[عادل صموئيل]

المشاركة الأصلية كتبت بواسطة حسن عبد العليم

الاستاذه الافاضل اشكركم علي ردودكم ولكن ليه اسفسار كلام الاستاذ عادل نبهني ليه وهوه
سبب اختفاء اغاني الان من الالات الوتريه هوه لان الالات الوتريه عايزه زمن كبير ولا ايه السبب الحقيقي
لاختفاء الالات الوتريه من اغاني اليوم مع ان فيه جمل كتيير ما تتقالش الا بها وبعدين الاله الوتريه يمكن دا
الشئ الوحيد اللي بيفرقنا عن الغرب وهوه الربع تون والاحساس العالي في تذوق الموسيقي
ليه اختفت الاالت الوتريه او ان صح التعبير ندره استخدامها .؟؟؟؟
سيادتك ربط كلمه توزيع مع ايقاع االي هوه دم وتك ولا تقصد ايه بالتوزيع زمان ودلوقت لان في اغاني
زمان فيها دم وتك بس مش بصوره دلوقتي ...,,؟؟؟ بليز وضح اكتر

وعاجز عن الشكر ليكم استاذتي الكبار ....

الأخ العزيز
انا اشتغلت مع العمالقة اكتر من 20 سنة ولذلك اكتسبت منهم وجهة نظرهم واحاول قدر الإمكان اشرحها لنأخذ مثلاً انت عايز تغنى لحن للأستاذ عبد الوهاب انت تعطيه الكلام لكن اوعا تسأله اللحن حايخلص إمتى حايرمى الكلام على طول او كل كام يوم تتصل بيه وتسأله عملت ايه فى اللحن حايقول لك انا مش فاضى ويرد لك الكلمات لأن عبد الوهاب كان بيلحن اللحن ممكن فى شهر او فى سنة او اكتر يعنى حسب الإلهام وبعد مايعمل الجملة ممكن يعدل فيها 100 مرة لحد ماتطلع اولا مش شبه اى جملة وثانياً تكون احلى مايمكن يعنى ما تتغيرش اكتر من كده والنتيجة طبعاً إفحص اى لحن لعبد الوهاب تشوف قيمته الفنية اد إيه وازاى عاش خمسين سنة ويعيش اكتر اما اليوم الملحن نفسه يجى له زبون عايزه يلحن له 7 أغانى ويديه العربون وييجى ياخد ال 7 الحان بكره الصبح وطبعاً الملحن ده لو عمل 100 لحن بيطلعوا كلهم شبه بعض او مفيش اى قيمة لأى لحن منهم وعمر اللحن بينتهى بعد اسبوع
واهم شرط فى الجملة الموسيقية انها تكون حلوة جدا وجديدة مالهاش شبه وفيها فكرة يعنى الملحن عشان يوصل لجملة كده لازم ياخد وقته فيها وممكن يعدل ويبدل لحد ماتوصل لمستوى الكمال وراجع كل مقدمات ام كلثوم مثلاً لأى ملحن جملة جملة والجملة الحلوة دى الآلات الوترية بتظهرها عرف لما تجيب قماش غالى جدا وفاخر جدا وتروح لترزى يعمل لك بدلة ؟ اكيد جمال القماش حايظهر مع شطارة الترزى يعنى الجملة الحلوة المتكلفة الآلات الوترية بتظهر حلاوتها 100 مرة لأن الجملة الحلوة بتسلطن العازف ويدى اجمل ماعنده , اما جمل اليوم الهزيلة زى ماقلت التوزيع واتوزيع الأكثر من اللازم مع الإيقاع العالى بيضيع وحاشتها , زى فى المطبخ لما تدى طباخ شاطر احلى خضار واحلى لحم يعمل لك احلى طبيخ لكن لو اديت طباخ خضار ردىء ولحم مش حلو او فاسد بيضطر يملى الاكل فلفل اسود وبهارات وشطة وكاتشب وهوت صوص يعنى كل ما يمكن ان يغطى على ريحة اللحمة اللى مش حلوة صح ؟
ونيجى للإيقاع : الإيقاع يا اخى مش دوم وتك ولكن الإيقاع الشرقى الأصيل عبارة عن عشرات التراكيب بتستخدم الدوم والتك والسكتات يعنى عندك الوحدة الكبيرة والسماعى والأقصاق والدويك يعنى عشرات الإسماء انا عايزك مثلاً تسمع اغنية الحب كله لأم كلثوم شوف كمية وصعوبة وتنوع الإيقاعات اللى فيها وشوف الحاجات دى حد بيستعملها دلوقت ؟ لأ طبعاً
ونتكلم اخطر موضوع عن التوزيع : كان زمان فيه موزعين عمالقة مش حايتكرر زيهم تانى منهم اندريه رايدر وبيبى المانزا وعبد الحليم نويرة وفؤاد الظاهرى ولكن التوزيع ده شىء امتى قيمته تبان ؟ للناس اللى دارسة موسيقى مش عامة الشعب يعنى فى اوروبا لما بيسمعوا توزيع السيمفونية 11 صوت ماشيين مع بعض اللى بيسمعوا كلهم دارسين موسيقى وبيميزوا كل صوت يعنى بيحسوا بكل سطر فى التوزيع بيقول ايه مش زحمة وخلاص يعنى التوزيع ده مش طبق بيتزا تتاكله وانت مش عارف معمول من إيه ولكن طبق بيتزا مشكل اوى لكن المتذوق بيبقى عارف كل ذرة فيه معمولة من إيه بالضبط , وعشان تعرف هلى التوزيع ناجح ولا فاشل هات اغنية من بتوع دلوقتى وهات عشرة شباب من اللى بيسمعوها وقول لهم غنوا لى التوزيع لحن لحن مش حايعرفوا انا خبير وعارف بقول ايه وهنا يصبح اتوزيع شىء خايب وفاشل لأنه بقى شىء الناس بتسمعه وهى مش حاسة بتسمع إيه ونأتى لأخطر نقطة وهى ان الموع لما بيكون عارف ان الناس مش بتميز توزيعه تلاقيه بيكرر التوزيع فى كذا لحن ( لأن ماحدش حياخد باله ) لأن اللى بيسمعوا مش بيفهموا الموضوع والخبراء مش بيسمعوا الأغانى الحديثة لكن تعالى لزمان الموزعين العظام كانوا بيعملوا ايه فى كل عشرريرن اغنية لعبد الوهاب كان بيختار جملة واحدة بتكون نغماتها طويلة يعنى فيها فراغات تخليك تحس بالتوزيع واللى يستحسن يبقى خط واحد عشان يوصل للناس اتمنى ان تكون وجهة نظرى وصلت وانا مش بتضايق من الشرح لأنى اصلاً مدرس موسيقى واحب اتناقش بمنتهى الحياد فى اى موضوع مع اطيب تحياتى