طلبات نوتة

**عادل صموئيل** · #1 07/07/2009, 19h48

اقتباس:

المشاركة الأصلية كتبت بواسطة وائل

استاذنا الفاضل الاخ عادل
الف شكر على اخلاقك وذوقك الراقي انك رديت عليا
رغم مشاغلك الكتيرة الا انك مبتبخلش علينا بوقتك الغالي وبترد علينا كلنا وبتلبي لنا جميع طلباتنا--- وده شي الشكر قليل جدا في حقك يا غالي
ولا نملك الا ان ندعي لك بالصحة والعافية لانك بتسعدنا ربنا يخليك لينا يا كبيرنا

الأخ العزيز وائل
اقدم لك نوتة حكاية العمر كله واشكرك على كلامك الجميل وان شاء الله الباقى فى القريب وانا آسف للتأخير لأنى مشغول 48 ساعة فى اليوم

**عادل صموئيل** · #2 11/07/2009, 19h25

عزيزى نور الصباح
اولا اشكرك على كلامك الحلو
اقدم لك نوتة هل هلال العيد
وملحوظة انا بعد ما اخلص نوتة وانزلها بكون بجهز نوت تانية يعنى طبعاً ده فى الوقت اللى ممكن ادون فيه لأنى مش متفرغ للتدوين طول النهار يعنى فى اوقات معينة حسب وقت الفراغ وهناك ايضاً حاجة لازم تتفهموها ان فيه بعض الحان ببتدى اكتب بعدين بزهق منها واركنها وممكن اكملها فى ايام تانية بس المهم انك فى اى وقت لو فتحت الجهاز بتاعى حتلاقى كذا نوتة ما زالو تحت الكتابة
ومع مراعاة ان فيه اعضاء تانيين بيطلبوا كذا طلب مرة واحدة وانا بحاول اقدم لهم جزء من طلباتهم واكملها بعدين حسب استطاعتى
هنا انا اقدم النوتة دى ولأول مرة اقدم لكم التسجيل بتاعها وهى لنور الهدى وهى لحن لطيف جدا وسهل وخفيف واهدية لأحبائى مدرسى الموسيقى الأعضاء بالمنتدى واهديها للأخوات جوليانا وايمان ومحبوبة وهى جميلة لما تتعمل فى مدرسة واقول لكم على سر ان فى كل وزارة التربية والتعليم فى كل الجمهورية ما حدش عملها قبل كده ( وانتم طبعاً عارفين انى بعرف دبة النملة من اسكندرية لأسوان , والتميز ده مهم جدا انك تؤدى لحن ماحدش عمله قبل كده فى المدارس يعنى جميل لأن الناس المعنيين بالأمر واللى بيقيموا شغلك وهم الموجهين والموجهين الأوائل وموجهين العموم بالمديريات والمستشارة بيبقوا سعداء جداً لما يسمعوا لحن مش متداول 1000 مرة ومستهلك فى جميع المدارس وده بيرفع اسهم المدرس اللى بيقدمه وطبعاً تميز تانى لما تقدموا فى الحفلات المدرسية الحان مش متداولة
مع اطيب تحياتى

**عادل صموئيل** · #3 13/07/2009, 22h35

اقدم لأعضاء المنتدى وبناء على طلب الأخ العزيز وائل نوتة

موعود

كاملة وطبعاً لكن ان تحسوا بمدى المجهود الذى بذلته فى كتابة هذا اللحن ( 11 صفحة ) والمهم ان تستفيدوا منها حتى احس بثمرة مجهودى وقد راعيت كالعادة ان ابسطها بحيث ان يستفيد منها الجميه
تنبيه : هذا اللحن يعتمد على إختلاف السرعة بين الجمل يعنى انا كتبت سرعات تقريبية واحنا ايام الفرقة الماسية عمرنا ما كتبوا لنا سرعات ولكن كان المايسترو فى البروفات او حليم فى الحفلات بيشاور السرعات المطلوبة وطبعاً احنا حفظناها من كتر البروفات
واقول للأخ وائل وصلتنى رسالتك وفى لحن ودارت الأيام انا حنزل لكم حزء جزء حتى لا تملوا من الإنتظار الطويل
مع اطيب تحياتى

**جوليانا** · #4 14/07/2009, 16h08

السلام عليكم ورحمه الله وبركاته

استاذى العزيز الفاضل /عادل صموئيل
الساده الافاضل اعضاء منتدنا الحبيب
الاخ الفاضل نور الصباح لقد قرات فى احدى مشاركاتك سؤال عن تلاميذ وتلاميذات استاذنا الكبير عادلاننا لم نشارك فتره اذا كنت فهمت صح فهذا يدل على الروح السائده فى منتدنا وهى الحب والعطاء والاحترام فشكرا لك وليس هذا غريبا لاننا جميعا
تعلمنا هذا من استاذنا العظيم من حبيب الملايين استاذى ومعلمى عادل صموئيل
فانا افخر دائما انه قبلنى لاتعلم منه
استاذى الفاضل اشكرك انك لاتنسى ابدا تزويدا بالنصائح المفيده والمهمه فى عملنا لم تنسى رغم متاعبك ان تذكرنا وتذكرنا بان اغنيه هل هلال العيد لم تتعمل قنل كده
انا ببقى عايزه اعبر اكثر بس بصراحه طول عمرى ضعيفه فى ماده التعبير لكن ارجو ان يكون وصلك ما نكن لك من احترام وتقدير وحب واشكركم
سوف ارفق لحضرتك اغنيه الفنانه شاديه

**عادل صموئيل** · #5 16/07/2009, 21h10

اقتباس:

المشاركة الأصلية كتبت بواسطة جوليانا

السلام عليكم ورحمه الله وبركاته

استاذنا ومعلمنا الكبير /عادل صموئيل
حضرتك عامل ايه ان شاء الله تكون بخير واحسن حال
انا درست فى كليتى اربع سنوات ولكنى لم اجد من يبسط لنا الامور ويعلمنا كما تتفضل حضرتك عندمايسال احد اى سوال فاجد شرحا وافيا مستصاغا يفهمه بسرعه ياريت حضرتك كنت درستلنا اكيد كنا هنبقى احسن من كده بكتير
المعلمومات قيمه جدا وبتتشرح بكل سهوله ربنا يبارك لنا فيك ويجزيك خيرا ان شاء الله
واشكرك كثيرا على مجهودك فى اغنيه موعود دائما تجعل من الصعب سهل فهذه مهاره لم نجدها الا عند حضرتك
ودائما شكراااااااااا

الأخت العزيزة جوليانا
اقدم لكى اغنيتن من طلباتك مصر اليوم ف عيد وصوت بلادى وقد دونتها كاملة بالمقدمة الموسيقية
وردا على كلامك الجميل المشكلة ان فى مصر وفى كثير من الدول لا يتفهمون معنى كلمة التعليم وهذه الكلمة معناها كبير جدا , يعنى عندنا فى مصر لو طالب حصل على الثانوية العامة ونقيم مستواه نجد مستواه خامسة ابتدائى لا تالتة ثانوى لأن المدرس اصبح يدخل الحصة ويلقى عليهم الدرس ويخرج ولا يضع فى اعتباره كمية الفهم الذى فهموه للدرس ومن المفيد له ان لايفهمون ليأخذوا دروس خصوصية , ولكن كلمة تعليم بمعناها الفعلى هى ما افعله يعنى من يسألنى سؤال اجتهد فى محاولة عرض الموضوع كله يعنى انتى لو سألتينى سؤال هذا السؤال عادة يكون جزء من موضوع ولو رددت على سؤالك فقط لن تفهمى شيئا ولكن لو شرحت لك الموضوع من اوله عندما آتى للجزء الذى يحوى إجابة سؤالك ستكونين فهمتى وإستوعبتى الموضوع كله , وانا انسان غلبان ولا انتحل اى صفة ... ولكن التعليم الصحيح هو ما افعله

**armendo** · #6 18/07/2009, 19h26

الأخ العزيز ابو برهان تحية طيبة
اهم ما يميز اسلوب الأستاذ عادل صمؤيل هو اعطاءك نوتة بسيطة يستطيع ان يقرأها اى عازف بسهولة تامة ولكنى اشك انة سوف يلبى طلبك قريبا لأن امامة طابور طويل من الطلبات تحتاح الى وقت طويل حتى يلبيها كما ورد فى ردة على احدى المشاركات ولذلك فانا اهديك نوتة قارئة الفنجان كاملة وارجو ان تستقيد منها ان شاء اللة ويا ريت الأستاذ عادل يعيد تدوينها بأسلوبة السهل فى المستقبل القريب ان ساء اللة.
وتقبل تحياتى
ارمندو
عزيزى ارمندو
اشكرك على تعاونك لتخفيف الضغط وللعلم النوتة مكتوبة حلو هى مكتوبة بإحتراف شوية لكن المهم ان الخط واضح يعنى مع شوية تركيز ممكن تتعزف بسهولة وبالذات لما اللى يقراها يكون حافظ الأغنية وبالذات عشان الأدليب

**عادل صموئيل** · #7 26/07/2009, 20h45

اخوتى الأحباء
اشكر كل من سأل عنى وتأخرى عليكم شوية مشاكل ومشاكل
اقدم لكم بناء على طلب الأخ العزيز وائل نوتة ودارت الأيام
وبناء على اقترتح الاخ وائل اقدم لكم هنا المقدمة الموسيقية كاملة والمذهب وهذا الموضوع هنا متجدد يعنى كل ما اكتب كوبليه سوف ازيده هنا على هذه النوتة يعنى كل من يرغب فى هذه النوتة كاملة ان شاء الله يراجع الموضوع هنا كل فترة لأن الاغنيى طويلة جدا كما تعرفون يعنى المقدمة والمذهب فقط ست صفحات .
هنا اود ان اقدم لكم درس مهم جدا فى النوتة إخترعه استاذى الكبير المرحوم نصر عبد المنصف وهو من اهم الاساتذه الذين علمونى تدوين النوتة وله اختراعات فى النوتة الموسيقية العربية من أهمها علامة الازمة وهى غير موجودة فى النوتة الغربية والإختراع الذى اقدمه لكم اليوم هو المرجع الأحمر وهو عبارة عن مرجع باللون الأحمر يحوى بداخله عدة مرجعات او اجزاء من النوتة الموسيقية نعود من اوله وذلك تفادياً لكثرة السينيوهات او على الأقل حتى لا نتعدى على السينيوهات الموجودة وذلك الإحتياج كنا نجتاجه كثيراً ايام المطربين العمالقة لأنهم كانوا بيعيدوا اثناء الغناء ومن اى مكان وكان ذلك يحدث تداخل فى المرجعات التقليدية وكان الحل عمل السينيو ولكن السينيو ايضا؟ً له عمل وكثرة السينيوهات ممكن تعمل بلبلة لذلك لجا الأستاذ العبقرى نصر عبد المنصف لهذه الفكرة اللماحة وهى عمل مرجع بلون احمر نعود منه دون المساس بالمرجعات الموجودة والسنيهات وذلك من اهم مميزات نوت الفرقة الماسية والذى طبعاص تسرب إلى جميع الفرق والمدونات الموسيقية ونجد هنا المرجع الأحمر من اول غناء المذهب والى الجزء الذى ستروه وهنا ارجو من تلاميذى دراسة هذا المرجع وتفهمه لأنى كنت سابقاً احب ان استعمله فى مدوناتى وستروه بعد ذلك وهذا من ضمن المعلومات التى احب ان اقدمها لتلاميذى لنهم قد لا يسمعوها من مكان آخر
ولاتنسوا كام قلت انا كلفترة حسب ظروفى سأكمل نوتة ودارت الأيام هنا فى هذا الموضوع , وانا هنا افتخر انى اقدم لكم نوتة ودارت الأيام بسهولة تامة يستطيع اى مبتدىء تنفيذها
مع اطيب تحياتى

**عادل صموئيل** · #8 30/07/2009, 02h24

احبائى
اولا اشكر كل من سأل على صحتى يعنى انا الحمد لله احسن شوية
واهم اخبارى انى والحمد لله وبعد طول عذاب من الإنتظار ظهرت نتيجة امتحان الكادر ونجحت والحمد لله
اقدم بناء على طلب اخى العزيز نور الصباح نوتة سبحان الواحد الأحد
ةانا اقدم هذه النوتة واقدم معها تسجيل اللحن وذلك لأبنائى واخوتى واصدقائى وتلاميذى مدرسى الموسيقى بالذات لأنه عمل كورالى ممكن يقدم فى المدارس ويمتاز بأن ماحدش قدمه قبل كده لأننا عادة نشكون من تكرار الأعمال الموسيقية
وانا سعيد جداً بانى قدمت كمية كبيرة من الأعمال والتى تصلح للتقديم فى الحفلات والمسابقات المدرسية والتى لم تقدم من قبل , وحتى الاغانى العاطفية ممكن تقدم على هيئة مقطوعات موسيقية حيث ان المشكلة الازلية ان المطلوب فى المدارس اناشيد او اغانى لابد ان تكون وطنية او دينية او وصفية وبالنسبة للأغانى الوصفية ياريت لو حد عنده بمناسبة عيد الفطر المبارك نشيد فى وصف خروف مشوى وتحته صينية كبسة من بتاعة السعودية اعتقد يبقى نشيد فريد من نوعه
مع اطيب تحياتى

**عادل صموئيل** · #9 01/08/2009, 19h29

يا احبائى اشكرك معلى كلامك الجميل وانا مش قد الكلام ده كله
اقدم لأخى العزيز نور الصباح ( واشكره على الزفة اللى عمل لها لى ) اغنية اختال فوق عيدانك واكبر يازرع الشراقى
واقدم ايضا التسجيل
واهديها لمدرسين الموسيقى احبائى وهى عمل كورال جميل جدا وسهل جدا
واهم شىء انه تقريباً عمر ما حد قدمه فى مدارس قبل كده ولا حظوا انى بركز دايماً على الموضوع ده
يعنى ممكن يتقدم فى الحفلات او كنشيد اختيارى فى اى مسابقة
مع اطيب تحياتى

**nzar123** · #10 01/08/2009, 21h50

دا صَباحَكْ مِنُّوَرْ يا أخضَرْ والخيرْ في اللي سَاقي
للمحبين والمعطائين بكل زمان ومكان
الكلمات لأغنية زرع الشراقي
وشكراَ لمن ترجمها لغة موسيقية الدكتور عادل ولمن اقترحها نور الصباح حتى تكون بين يدي المعطائين والمخلصين